24‏/6‏/2012

يوم للتاريخ

أعزائي 
النهارده كان يوم طويل ودمه تقله وممل وماشي بطيء 
انتظرنا كتير اسبوع لاعلان نتيجه مين حيبقي الرئيس 
تحس انها كانت ولاده متعسره  والدكتور مش عارف يولد 
اده طلق صناعي مافيش فايده 
قال نعملها قيصريه ونخلص 
قالوا الاعلان الساعه 3 عصرا 
الشوارع فضيت من الماره قبل الموعد المحدد 
وطبعا التحرير  كان بيعج بمؤيدي مرسي 
والمنصه كان لمؤيدي شفيق 
وباقي البلد فاضيه 
الكل قاعد مشدود امام الفضائيات وبيستعجل النتيجه 
ابتدا الخطاب من المستشار فاروق سلطان  حوالي الساعه اربعه الا ربع 
طبعا كانت روحنا طلعت 
ابتدا بمقدمه طويله عريضه  كان لازم يقول قبلها 
الساده المشاهدين برجاء اخذ حبوب الضغط 
لاني حرفع ضغطكم واحرق دمكم 
الورق اللي ماسكه كتير عامل زي كتاب التاريخ لسنه 
تالته ثانوي ادبي 
بقينا نقول ياهادي ربنا يصبرنا 
يعني ممكن اثناء البيان اي وحده لسه ماطبختش الرز ممكن تروح تطبخه 
وترجع حتلاقيه محلك سر 
او اللي عايز ياخد شاور من الحر مافيش مانع ويرجع يلاقيه لسه زي ماهو 
وممكن اللي عايزه ترضع البيبي مايضرش 
 والله كنت خايفه وسط البيان ينزلوا الاعلانات 
والمستشار فاروق سلطان يقول زي معتز الدمرداش 
حنرجع بعد الفاصل بس اوعوا تروحوا في اي حته 
برضه حسيت وانا بسمع البيان انهم حيقبضوا بالساعه 
عشان كده بيطولوا المده زي مسلسلات رمضان
كان ناقص  فاروق سلطان يقولنا 
عبدالحميد وعادل ونسمه وشريفه 
انتخبوا شفيق 
اما بدريه وسعديه وعبدالله واحمد ومحمد حسنين 
انتخبوا مرسي 
ودول كانوا في لجنه ابو تشت  
اما عمنا حاتم بيجاتوا المشهور بالاسم الحركي وهو 
كاتم حاجاته بيسال احنا علي الهوا  ردوا قالوله ايوه 
كان ردي ساعتها عليه  خد بالك بعدين تاخد برد من الهوا 
بجد شلونا لغايه ما اتكرموا علينا واعلنوا النتيجه  
نتيجه فوز مرسي ماكانتش مرضيه لكتير من الشعب المصري 
بس برضه في اتقبلوا النتيجه بروح رياضيه 
الفريق شفيق  اتقبلها وارسل برقيه تهنئه لدكتور مرسي 
ماهو لازم يكون في غالب ومغلوب 
سمعت خطاب الرئيس الجديد دكتور مرسي 
ممكن نقول انه مرضي الي حدا ما 
بس افلح ان صدق 
نستنه نحكم عليه بعد مرور 100 يوم من توليه الرئاسه 
الصوره دي بتعبر عن فرح طفل بقدوم رئيس جديد 
الطفل كله امل في بكره عايز يتعلم وياكل ويلبس
ويكبر ويلاقي شغل  ويتجوز ويخلف ويعيش حياه كريمه 
الرئيس الجديد عامل مشروع نهضه  خير وبركه 
وكلنا حنساعده ولازم نرضي بحكم الصناديق 
مش دي الديمقراطيه اللي عايزنها 
كفايه سنه ونص عدت علينا  كانت كبيسه 
نرضيي باللي ربنا قسمهولنا
وربنا  ان شاءالله مش حيخيب رجائنا 
ان مصر تفضل هي الرائده 
ربنا دايما بيعملنا الاحسن وبنحس بده بعد فتره 
ياريت كلنا نحب مصر اكتر 
لانها تستحق حبنا
واوعوا اوعوا تقلبوا الصفحه 
ابقوا معي
 

هناك تعليق واحد:

غير معرف يقول...

أسعد الله أوقاتك ليلى
شكرا على مقالك الهادئ المتزن ..
لكن أنا لسه خايف وعندي انزعاج بسبب آثار الانتخابات على الصداقات وعلى الأسر وانهيار العلاقات الاجتماعية ،، أنا كنت مستعد نفسيا لتقبل النتيجة أيا كانت ،، حتى لو فاز شفيق كنت هاتقبل النتيجة ،، لأني عملت الصح من وجهة نظري ولايكلف الله نفسا إلا وسعها ،، ألان أنا طمعان في نجاح مرسي وخايف عليه من الجيش والإعلام ..
تحياتي ليلى وبكره أحسن من النهارده ..
أوقاتك سعيدة
حكيم عقول