24‏/4‏/2012

مارثون رئاسي

أعزائي
اهلا بيكم يارب كلكم كلكم تكونوا بخير 
انا حيرانه جدا زي معظم المصريين 
مش عارفين حننتخب مين او بالاحري مش عارفين حنقدر نختار صح
والا حنختار غلط 
الصوره دي بتوصف حالي بالظبط زي ما اكون في خندق ومش عارفه اطلع منه 
واكيد في غيري بيعانوا لانهم محتارين 
تعرفوا احنا عاملين زي ايه ؟
بشبه حال اللي محتار زي حالاتي  باننا معزومين علي حفله كبيره
 مع كل الشعب المصري
وقالولنا ان سندريلا حتكون في الحفلة واللي لابس كويس حيتصور معاها 
الشعب في منه حيلبس اسموكن وفي فورمل وغالبا الشباب حيلبس كاجوال 
ومش عارفين مين فينا حيفوز بالتصوير مع سندريلا 
---
 
نرجع نشوف باقي المرشحين 
الفريق احمد شفيق 
---
بتقول انك تقدر تقود مصر برصيدك السابق من الخبرات 
بس مش شايف ان تحديث المطارات مش كافي عشان يكون ده رصيدك 
شعارك العدالة الشاملة 
طيب فين الاصلاح السياسي 
ياسياده الفريق المواطن المصري عايز ياكل ويشرب ويلبس  ويتعلم 
ويربي العيال ويضمن مستقبلهم حتقدر تحل كل المشاكل دي ؟
المقربين منك يطلقوا عليك لقب 
كوماندا  ( الورشة  )
حنشوف الاصلاح ياكوماندا
---
حمدين صباحي 
--
تتبنه برنامج الرئيس الراحل عبدالناصر 
عارفين انك ناصري بتؤمن بتراثه 
طيب عبدالناصر بني السدالعالي 
بس دمر السلاح الجوي المصري 
حرر مصر من الملك والانجليز 
وسلمها لاسرائيل 
حتعمل ايه في المشاكل المتلتله الموجوده حاليا 
حتأمم رؤس الاموال المتضخمه الموجوده في مصر 
بلاش والنبي ترتدي عباءة عبدالناصر 
عايزينك حمدين صباحي الاعلامي 
في مقابله لحضرتك قبل انتخابات 2010 وكانت علي برنامج البالتوك 
وكانت بتتم في روم سياسيه .. كانوا بيسالوك ومعاليك بتجاوب 
ولما الترن جه عليه وسالتك زعلت من سؤالي 
وبالتالي ادامن الروم زعلوا عشان خاطرك 
سؤالي كان 
لو لم تتيح لك برامج التوك شو الحديث عن برنامجك لمجلس الشعب 
هل كنت حتنزل للشعب تتكلم معاه في الشارع ؟
والا المسالة وسيله استرزاق وخلاص 
كانت اجابتك انك سردت عليه مواقفك السياسيه 
كنت عايزه اجابه واضحه وصريحه وهي 
نعم او لا 
بس لما اترشحت لرئاسه الجمهوريه لقيتك نزلت في مترو الانفاق 
والمواصلات العامة والمقاهي 
مش عارفه مين غيري اقترح عليك الاقتراح ده ؟
علي فكره ده يحسبلك وانا بحييك لنزولك للمواطن الغلبان 
---
 دكتور عبدالمنعم ابو الفتوح 
---
اسلامي يريد اصوات الليبراليين 
تقول ان دور الرئيس ان يساعد العدالة علي اتخاذ قرار مستقل 
من اجل استرداد حقوق المصريين 
كيف سيتم ذلك ؟
تؤمن بالفكر الاسلامي الوسطي الذي يمثله الازهر 
وستختار اكثر من نائب 
ياتري فيهم شباب وفلول  وعواجيز تعدوا 75 سنه ؟
في برنامجك كما تقول 
سيكون اول مائة يوم استقرار الامن في مصر
وتعود الاوضاع الامنية 
مشكله البنزين والسولار ماهي حلولك فيهم ؟
مشكله ضياع تامينات اصحاب المعاشات والدوله بتنقطهم من فلوسهم
اللي دفعوها طوال فتره عملهم حتكون ليها اولوليه ؟
مشكلة العشوئيات واولاد الشوارع  والبطالة والشباب المكدس في المقاهي 
حتاخد حيز من اهتمامك ؟
تقول ان مصر دولة غنيه  ويجب ان تكون ثروتها للمصريين 
ويشعر المواطن بذلك  كيف سيتحقق ذلك ؟
امس كنت عند دكتور الاسنان وهو صديق ايضا 
لما تطرقنا للانتخابات الرئاسيه 
قال ياخوفي يكون لسه مع الاخوان . نفس الكلام سمعته من ناس كتير
خايفين بصراحه لان بكده يبقي الاخوان ماسكه كل شيء في مصر 
ياريت يطلع ظننا مش في محلة 
بس ليه تحفظ بسيط 
دكتور عبدالمنعم مصر مش غرفة عمليات  حتعمل العمليه وتطمن علي المريض 
وبعدها مساعدينك يلاحظوا حالته 
دي مصر يادكتور 
---
الداخليه اعلنت انتهاء تطوير مستشفي طره 
ياتري ده كلام في كلام ؟
---
هل ممكن ان يصاغ الدستور في شهر واحد ؟
يمكن بمناسبه شم النسيم حيكون دستور مسلوق 
---
بمناسبه شم النسيم  السنه دي غيروا اسمه 
بقي شم الحريق 
وده بمناسبه الحرايق اللي كانت يوم الاحد 18 ابريل 
---
شركات الزبالة الاسبانيه نهوا تعاقدها 
وحاليا لا في اجنبيه ولا مصرية 
والزباله مكدسة في ارقي شوارع القاهرة 
وقال ايه عمال الزباله  مش عايزين يلموا الزبالة 
 معتصمين لرفع رواتبهم 
اشمعني هما اللي مش حيعتصموا 
--- 
مليونية الاحزاب 
مليونيه الاخوان 
امتي مليونيه السلفيين ؟
انا شايفه انه استعراض قوه مش اكتر من كده 
---
في التحرير يوم الجمعهة 20 ابريل 2012
ميكروفونات كتيييييير 
الاول بيقول  اسلامية اسلامية 
التاني - مدنية مدنية 
التالت - الشعب يريد حازززززم 
الرابع- شفت ايه من ربنا غلط عشان تكرهوا شرعيته 
الخامس - ربنا واقف معانا احنا وليسقط الاخرون 
السادس  - شعب وبرلمان ايد وحده  
باقي الشعب اكيد بيقول 
يالهووووووووووتي 
---
حريم ابو سماعين نزلوا التحرير مطالبين ببرائته 
من الباسبور الامريكي 
----
الجرعه النهارده كانت زياده 
واوعوا اوعوا تقلبوا الصفحه 
ابقوا معي



---
 

هناك 4 تعليقات:

حمـــــــــــــــــــــة يقول...

سيدتي
الثورة قامت على الفساد، عدم توفر الحرية و الفقر.
مع الأسف الكل متشابك : سياسة مع إقتصاد و الجمع بينهما صعب على المدى القصير و المتوسط
في الإنتظار فترة حرجة منتظرة حيث سيكون رد فعل أصحاب المصالح قويا
السؤال من يستطيع المرور بالمركب الى بر الأمان ؟
شخص محنك يميل الى القديم أو شخص نظيف غير محنك
هذا جوابه عند الشعب إذا توفرت النزاهة والحيادية وووو
كل التمنيات القلبية للشعب المصري

غير معرف يقول...

السلام عليكم
تحياتي ليلى ،، مقال جيد كالعادة ،، لكن طبعا لا تعليق على شفيق فقد خرج من السباق مبكرا ،، أما بخصوص أبو الفتوح ،، فأختلف كالعادة معك وياريت يكون تابع للإخوان ،، لكنه للأسف تركهم ،، وخسر كثيرا بسبب ذلك ،، ومع ذلك أنا أحترمه وأقدره ،، وربما أنتخبه بعدما أسمع برامج كل المرشحين وأتعرف أكثر عليهم .
أما بخصوص مرسي فلا أظن أني أميل إلى انتخابه لا أرى فيه رئيس مصر القادم ،، ومرشحي التالي ربما يكون صباحي قبل عمرو موسى ..
عموما ربنا يهيء الخير لمصر حيث كان ..
ملحوظة :
المرشح المستبعد اسمه أبو إسماعيل وليس أبو اسماعين ،، وأظن السخرية منه ليست من طبع الكرام ،، وأنت أهل للكرم ومنك تعلمناالخلق الرفيع ..
حكيم عقول .

غير معرف يقول...

السلام عليكم
تحياتى ليلى, والله دا كلام مية مية يعنى أحنافعلا مش عارفين مين ننتخبة طبعافيةناس عارفة مين مرشحها من الأول وفين ناس زى حالتى أنا مش عارفة أنتخب مين كل واحد بيقلي أن دا هو اللى حيصلح الحال ولكن يبقى الحال على ماهو علية وعلى المتضرر اللجوء للتحربر , والنبى ياليلى أبقى قولى للريس الجديد يبني شوية خيام للمعتصمين الجديد والقديم ربنا يستر!!!!!!!

ابو روتا يقول...

فى اولى تجاربنا الديموقراطية ولاول مرة نختار رئيس الكل راى فى نفسه الاهلية لتولى المنصب حتى وان رفض كرئيس وزراء زى سيادة الشفيق فريق ودا طبيعى فالوقت دا لكن المعركة الاخيرة لرسم طريق صحيح للديموقراطية فمصر هى الدستور وعدم تولى اى حد من الفلول الذين سيعيدون النظام البائد مرة اخرة فى حالة وجود دستور صحيح وعدم تولى اى احد من النظام السابق الذين مازالت ذيولهم تمسك زمام البلد يمكن الاصلاح بالتدريج ففساد 50 سنة لايمكن اصلاحه بتولى رئيس ولو كان عمر بن الخطاب