اعزائي
بقالي فتره مش بكتب بس بصراحه الاحباط العام
ليه صديق علي الفيس بوك اسمه نهاد
له اكتر من جروب هناك ومعروف باسم نينو زكي
بما انه صديقي اللدود واختلاف وجهات النظر بينا كتير
بس ده مايمنعش من اننا اصدقاء
ده ملخص حديث عن مبارك وامريكا
طبعا ده رأي نينو انما باسلوبي انا لانكم واخدين عليه
واكيد بعد ما استئذنته في النشر وهو وافق
---
تعالوا نشوف ايه الكلام
تعالوا نشوف ايه الكلام
مبارك كبر في السن وعمره الافتراضي عند الامريكان انتهي
واوشك علي انتهاء الصلاحية
ورغم تعاونه الكامل مع الامريكان الا انه كان يرفض بعض مطالبهم
لو قالوا اقلع القميص والبنطلون يقلعه
بس لو هوبوا ناحيه الاندروير بيرفض خلعه تماما
ويقول الا ده
وبرضه امريكا شافت ان جمال لن يحقق المعادله
كانت شايفاه حرامي وهي عايزه نصاب
وطبعا في فرق كبير بينهم
هما مش عايزين حرامي لابس تي شيرت مقلم
وماسك كبشه مفاتيح في ايده
زي اللي بيطلعوا علي المواسير
انما عايزه نصاب ومحترف
لابس بدله اخر موديل وماركه عالميه
وكرافته وساعه وحزام وشوز اخر صيحه وبرضه كله ماركات
ده بقي الفرق بين الحرامي والنصاب
عم الحاج مبارك كان بيقول للاخوان ان الحريه تاتي علي
ايديهم ودول اعدائكم
بيقصد الامريكان طبعا
قام عم الحاج وارب الباب عشان الاخوان يدخلوا
وده كان عام 2005 واخدوا 88 مقعد في البرلمان
وبعدها قفل الباب تاني
امريكا تعمل ايه جابت التيار الليبرالي
وبقت جبهه معارضه واقفه في وش الاخوان
وتهاجم الحكومه وكمان المعارضه واكيد في ناس حيلتفوا حولهم
وضغتت امريكا علي عم الحاج بفتح مساحه اعلاميه
واقنعته بان لازم الشعب ينفث بدل ماينفجر
او يلجئوا للتيار الاسلامي
يعني من الاخر كله طق حنك وخلي اللي يهوهو يهوهو
والحكومه ودن من طين وودن من عين
وبلاش نحط السيخ المحمي في صرصرو ودن اللي يبعبع
وطبعا عم الحاج بلع الطعم الست امريكا بقت تشكل في التيار
وده من خلال جناحين واحد سياسي والتاني عسكري
طبعا العسكري كان لازم تحسبأ لاي صدام
اما الجناح السياسي كان من الحركات الموجوده
زي الاعلاميين العلمانيين والنشطاء السياسيين الحقوقيين
اللي بيتبعوا لحموم يوووووه بقصد حقوق الانسان
نجي للجناح العسكري
الالتراس بتوع الكوره والبلطجية
ومتعاطي ومروجي المخدرات والعاطلين وسكان العشوئيات
وكان كل ده بيكبر قدام عمنا الحاج وهو يا مطنش او مش علي باله
كان كل همه التيار الاسلامي يحجمه
وبعدها جاله الطوفان وكان علي يد الثورة
وبرضه التيار الاسلامي خرج كالمارد وقدر يبقي اغلبيه في البرلمان
ده كان ملخص الاحاديث بيني بين نهاد باشا
وانتظروني بعد كام يوم جيبالكم حاجه جديده
واوعوا اوعوا تقلبوا الصفحة
ابقوا معي