10‏/11‏/2011

دعايات كوميديه

أعزائي
نقول تاني كل عام وانتم بخير العيد خلص ايامه عدت بسرعه
زي كل الحاجات الحلوه بتعدي بسرعه 
---
المرشحين الاسلاميين استخدموا المساجد للدعايه الانتخابيه في العيد
جماعات خطبت في الناس بدون تصريح بعد ان تخلي امام المسجد 
عن مكانه ليفسح الطريق للدعايه الانتخابيه 
وفي بعض المساجد الامام قال انتخبوا فلان وفلان 
هوجه وصاحبها غايب 
---
الشوارع والميادين كلها ازدحمت باليفط الانتخابيه 
موجود عليها اسم المرشح ورمزه ورقمه وصورته 
وفي كمان قائمه باسماء وصور المرشحين 
ودي بتكون للاحزاب  
وبما ان المرآه مسموح لها بالترشيح في الحاله دي 
الدعايه بتكون فيها الصوره والاسم والمنطقه اللي مترشحه فيها 
ورقمها الانتخابي والرمز
عادي زيها زي الراجل 
في جماعه استبدلت صوره المرأة بصوره ورده 
ولما لقوا الكلام كتر عن صوره الورده 
استبدلوا الورده بصورة  زوج المرشحه الكلام ده حصل فعلا 
وكتبوا انتخبوا حرم الاستاذ فلان  المرشحه لمجلس الشعب 
اكيد انتوا بتضحكوا وبتقولوا انا بمزح بس دي الحقيقه 
يعني اروح الانتخابات واكتب حرم فلان الفلاني 
بس نسيوا يكتبوا هي اللي حتحضر جلسات المجلس الموقر 
والا هو برضه حيحضرها بالنيابه عنها 
والله الورده كانت ارحم من صوره جوز الست النايبه 
وبينزلوا الجولات الميدانيه  بيبحثوا مشاكل النساء 
دون التحدث مع الرجال 
طب تجي ازاي هي لو لا قدر الله ونجحت 
حتروح المجلس وتقعد بعيد عشان ماتتكلمش مع اي راجل 
الست النايبه خاصه للمرأه فقد
 خلاص نعمل مجلس شعب رجالي والتاني حريمي 
---
 كتير من المرشحين كان  ضمن برنامجهم  الانتخابي  
محاربه العنوسه 
مش فاهمه حيعملوا ايه  حيتجوزا العوانس  
والا حيستوردوا رجاله للزواج من العوانس 
هو الجواز بقي فيه دليفراي
يا سبحان الله 
---
الرموز اللي وزعوها علي المرشحين رموز مضحكه جدا 
يعني مش سايبين اي حاجه ماعملهاش 
الرموز اللي شفتها طبعا مش كلها بس حقولكم علي اللي شفته 
 قسم الاجهزه الكهربائيه 
---------------------------
مكوه -مروحه سقف - تلاجه - خلاط -تكيف  - كمبيوتر 
راديو - تليفزيون -بوتاجاز -سخان -نجفه 
---
ادوات خاصه للمطبخ
----------------------
حنفيه -براد شاي - كوبايه- معلقه  -فنجان شاي
---
منتجات مزارع مصر من الفاكهه
------------------------------------
برتقانه -بطيخه -منجايه -عنقود عنب -تفاحه 
----
مستلزمات ترزيه 
---------------------
مقص  - كرافته - قميص رجالي 
وده بقي اللي فضلت اضحك عليه 
مرسوم قميص رجالي ومكتوب رمز القميص الرجالي 
واللي عايزه بشوفه حيلاقيه في مدينه نصر 
---
 مستلزمات موسيقيه 
----------------------
كمانجه - عود -ميكروفون 
---
زهرة الطاوله
للحريفه نبع الشيش بيش 
---
قسم الحيوانات 
-------------
تمساح - حوت -حمامه
---
متفرقات زي ايه 
--------------------------
مشط -بايب -خاتم - اشارة مرور 
موبايل - تليفون --طابع بريد - سياره
ريشه - نخله - سي دي  ساعه يد - فانوس - مركب شراعي 
نظاره - هلب  - مسدس - ميزان  - سماعه دكتور  
كف - ميزان
الرموز دي اللي قدرت اشوفها بس فيه حاجات تانيه 
ربنا يفوت الرموز دي علي خير 
---
دائره الساحل وروض الفرج وشبرا والشرابيه والزاويه الحمرا 
المقاعد الفرديه 
6 سائقين علي مقعد العمال 
جزار  مقعد فئات 
قهوجي  مقعد عمال 
وبيقول انه بيمثل القهوجيه في المجلس الموقر 
كهربائي  مقعد عمال 
3  نجارين مقعد عمال 
لا تعليق 
---
قبل العيد اختي  بطارية عربيتها كانت عايزه شحن 
رحت معاها لكهربائي السيارات  عشان ىيجي  يفك البطاريه وياخدها
بعت معانا صبي من الصبيان اللي بيشتغلوا عنده عشان ياخدها
يكشف عليها 
بعد ما فك البطاريه وركب معاناعشان نوديها للكهربائي 
لقيته بيقول لو الستات تقعد في البيت وتبطل شغل وسواقه حنرتاح 
اختي سالته هو انت اخوان  رد وقالها ان شاءالله اخوان 
قلت فرصه افتح معاه حديث قلتله هو انتوا لو حكمتوا البلد حتقعدونا في البيت 
قالي ياريت عشان الشباب يلاقي شغل 
قلتله تقصد اننا مزحمين الشباب قال ايوه 
وماتسوقوش كمان 
قلتله افرض ان في واحد عنده عربيه وسافر وكان بيوصل اولاده المدرسه 
مامتهم ماتوصلهمش قاللي ايوه
قلتله ولو ابوهم  ماعندوش قدره يدفع باص المدرسه يقعدوا الولاد من المدارس 
يبقي قياس علي كلامك مانعلمش البنات 
قالي لا يتعلموا بس يقعدوا في البيت 
قلتله حيعلقوا الشهاده في المطبخ تفكرهم بالتعليم وهيما بيطبخوا
والدكتوره اللي درست 7 سنين وخدت بعد كده ماجستير ودكتوراه 
برضه تقعد في البيت 
قال ايوه تقعد في البيت 
قلتله  ولما حضرتك تتجوز ومراتك تجي تولد حيولدها راجل 
رد وقالي مافيش مانع لو دكتوره كبيره تشتغل 
خدوا بالكم من الرد دكتوره كبيره يعني الصغيرين ماينفعش يشتغلوا 
لما يخلصوا تعليم يستنوا لما يكبروا ويشتغلوا 
ساعتها حيكونوا نسيوا الطب
وكنا وصلنا المحل رمي قنبله خلتني مش عارفه 
اضحك والا اعيط والا اتحسر علي مصر
القنبله انه قالي 
انا حترشح لرئاسه الجمهوريه 
يالله هيصوا رئيس جمهوريه مصر العربيه صبي ميكانيكي 
مين حينتخبوا
وبكده يبقي لازم نستمتع بالسييء لان الاسوا اتي 
حقيقي حزينه جدا  علي مصر 
مع اني دايما اقول بكره حيبقي اجمل من النهارده بس حقيقي مش قادره 
واوعوا اوعوا تقلبوا الصفحه 
ابقوا معي






هناك 3 تعليقات:

ماجد الجلاد يقول...

يا صبر أيوب!
ازاى قدرتى تستحملى الأخ ده ببروده وغباوته طول الطريق!

كده فعلاً ممكن حزب النور يعمل "تختة" للأعضاء وتخته للعضوات ويقسم الفصل نصين يا أما بقه يزرع جنينة ورد فى البرلمان وكل جلسة يقطف ورده تحضر عن الأخت النائبه!

ويا سلام بقا لما الورده تقدم إستجواب للحكومة ولا حاجة :)
بس برضة هنفضل نقول بكره أحسن من النهاردة.
تحياتى ودمتى بخير

غير معرف يقول...

تحياتي العزيزة ليلى .
جميل المنقال الساخر ،، وأعجبني أنه جمع الكثير من الأحداث التي تدور في مصر ،، وربما حضرتك نسيت تذكري بعض الرموز التي ربما لم تصادفيها في الشوارع مثل رمز الحمار لمرشح من الفلول مثلا ،، لكن لاحظت لهجة سخرية من وضع صورة وردة مكان صورة المرشحات السلفيات ،، لأني {وإن لم أنتم إلى هذا التيار وأوافقك الرأي أنه من الأفضل أن تضع المرشحة صورتها أو تلزم بيتها وتريحنا } لكني مع ذلك لا أفضل نقد شيء يتعلق بالحرية الشخصية لشخص لا من التيار الإسلامي ولا من التيار العلماني ،، دعوا كل واحد يفعل مايشاء حسب وجهة نظره طالما لم يتجاوز ،،دعونا نؤمن بالحرية الشخصية للكل دون استثناء ونترك الحكم لصندوق الانتخابات .
لكن بكل صراحة لم يعجبني في المقال استشهادك بصبي كهربائي كنموذج على فكر الإخوان بصراحة هذا فيه ظلم لهم وتعدي على أفكارهم ،، وأنا شخصيا لي احتكاك كبير بكثير من الإخوان وماجاء في مقالك هنا من أفكار فيه افتراء عليهم .. أرجو أن تكوني منصفة في المقال القادم وتعملي حوار مع واحد من قيادات الإخوان حتى نسمع منهم الفكر الحقيقي للإخوان وليس الفكر الكهربائي لبطارية خربانة .
حكيم عقول

elasaala.net يقول...

سمك ... لبن ..... تمر هندي ....