17‏/10‏/2011

وعد

أعزائي
المقال السابق  أهل الذمه كان له نصيب كبير من الجدل 
مابين معترض وموافق ومن وقف علي الحياد 
بشكر كل المعترضين والموافقين واللي واقفين علي الشط  
بيتفرجوا علي السمك
قريت شعر عامي هو نقدر نقول انها نصوص عامية 
باسم ابوك في الحزب  
الناشر هو مدبولي الصغير 
والشاعر هو يوسف المنيلاوي 
 حفيدالشيخ يوسف خفاجي المنيلاوي
الكتاب معاه سي دي بكل النصوص الموجوده في الكتاب 
بصوت الشاعر يوسف المنيلاوي
النص بعنوان وعد 
تعالوا نشوف يوسف المنيلاوي الحفيد بيوعد مين 
وبيوعد بآيه
---
وعد اني اعيش ليكي
واحني الارض تحتيكي 
واكون عاشق تراب ولهان ..
امدد راسي فوق الحجر
واصلي تحت رجلك فجر
وادعي لربنا يصونك 
واكون عونك 
علي المماليك وفرعون ..
واغنيلك ..
ولو ميلتي .. راح اشيلك 
علي كتافي ..
وادور بيكي ..
وانا الحافي !
وازين توبك المنقوش
وانسيكي زمن قراقوش ..
واحكيكي وانا تعبان
رواية حب ..
بحر حنان ..
واجيب سيرتك في كل مكان  
وارسم صورتك الحلوه ..
علي الوجدان ..
واكون انسان ..
واصلي ..
اصلي لربنا الواحد
في أي مكان 
ف ايد انجيل ..
وايد قرأن ..
وارتل 
ارتل بعد كل أدان
بأي لسان ..
واكون طاهر ..
واتوضا لصلاة باكر
واقرا الفاتحة ف القدس
واتشاهد مع الاجراس ..
وأحب الناس واتسامح ..
ونحرس كلنا بابك 
تكون قبلتنا محرابك ..
ونتكاتف ..
نتكاتف يزيد خيرك 
وشيخ لازهر يصون ديرك 
ونعبد ربنا ف نورك
بحرية ..
وعدل ونخلص النية .
وعد اني أكون طينك
واكون نخلك واكون 
نيلك ..
ونبنيلك في السما غيمة
تظلل كل اولادك 
بترنيمة ..
ونرقي بسورة الرحمن  ..
ونبقي كلنا خلان 
نعيش اخوان 
تعودي منارة زي زمان 
ويرجع مجدنا تاني .
------
الله عليك يامنيلاوي ياحفيد 
الله علي وعدك وعهدك لحبيبتنا كلنا ونور عنينا  
مصر امنا
طبعا مش معقول اكتب اي حاجه بعده 
ده حتي يبقي عيب  اطلعكم من المود الجميل
اوعوا اوعوا تقلبوا الصفحه 
ابقوا معي

هناك 3 تعليقات:

جحا المصرى المصرى يقول...

ممتازه مع الاحترام

ابراهيم الحماقي يقول...

جميله ورائعه ووعد ملهوش مثيل فى راي .
ابراهيم .
ياريت تلغى الكلمه التاكيديه لسهوله وضع التعليق

غير معرف يقول...

www.youtube.com/watch?v=Qu_BzysMzMI
شكر لكِ ليلى .. شكرًا على كلماتك وذائقتك .. وربنا يحفظ مصر من كل سوء
وإليكم النص بالصوت .. وجدته على النت منشور لمن يُريد أن يستمع إليه ،،
لكِ تحياتي وتقديري
يوسف المنيلاوي