14‏/9‏/2011

طق حنك

 أعزائي
الحقيقه اني متاخره عليكم لان  الكتابه في الوقت ده صعبه 
الكل بيتكلم في السياسه والدين 
الكل بقي ضليع فيهم من الصغيرللكبير 
الاول بس خلوني اشكر اصحاب التعليقات علي مقالي الاخير 
دكتور دودي سعدت بمرورك الكريم 
ومدونتك جميله بس ماعرفتش اعلق 
بيني وبينك اصل معرفتي بالتربيت زي معرفه حضرتك باللغه اليابانيه 
يعني بستعمله بالقدره وبعافر معاه 
ياريت تعرفيني ازاي اعلق  
---
الاخ العزيز ماجد الجلاد شكرا علي تعليقك 
كنت فاكره انك نسيت المدونه بس سعدت فعلا بتعلقك 
---
دكتور احمد الجمال زعلانه ومقموصه عايز تعملي آمر اعتقال
كل ده عشان فتحت شباك العربيه وكلمت واحد من فلول الميكانيكيه 
حاضر حبقي احاول اسمع الكلام 
---
اما الاخ العزيز مصحح لغتي العربيه التعبا نه حكيم عقول 
بالنسبه للوحات الارشاديه دي موجوده في العالم كله ماعدا عندنا 
دي حاجه انقرضت مع الديناصورات
اما الفك المفترس اللي الصيع بيسموه
ماكرباز  ده حدث ولا حرج 
واول مابيلاقوا وحده سايقه بتجلهم ارتكاريا ويزنقوا عليها 
ولازم وحتما يسبقوها عشان الرجوله علي رأي اللمبي مش هز اكتاف 
الرجوله انه يسبق المزه اللي سايقه حتي لو كانت مرضعه قلوان 
وبما ان معاليك حافظ العجوزه حاره حاره وبيت بيت
انا كنت في الحاره اللي بعد مستشفي العجوزه 
وورا زنقه عماره السعوديين 
وتحياتي للريس معمر 
والله كنت حكتب سور مش صور
بس خفت يطلع غلط 
وتضحكوا عليه وتفتكروني بقلد شويكار وبنطق الصاد سين 
والقاف كاف 
منتظره رمضان الجاي عشان اجي انا واختي نفطر عندك حسب عزومتك 
وبكده ابقي دخلت معقل اللغه العربيه من اوسع ابوابه 
واغني واقول اللغه العربيه الفصحي 
استيقظ وركز واصحي وترالا ترالي ترالم 
----
كفايه كده نبتدي المقال دي كانت مقدمه بس عارفه انكم مليتوا 
عمنا شرف شرف بعد ماركب الوزارةوتولي مهام منصبه 
عين ابن اخت معاليه السيد احمد عادل في شركة ثروة للبترول 
وده طبعا بمعرفه ومباركه المهندس عبدالله غراب وزير البترول
علي فكره معظم موظفي هذه الشركه من ابناء الوزراء والمسئولين 
وابن اخته التاني النبي حارسه وصاينه 
اتعين في وزارة الطيران المدني 
السيد المحترم محمد الدمرداش مدير مكتب رئيس الوزراء
اتصل بوزير الطيران المدني وطالبه بتعين ابن اخت رئيس الوزراء
وقال معالي الدمرادش لوزير الطيران 
عايز أخد تمام بكره بانه تم تعينه 
لهجه أمره وقويه قويه من التسوس محميه 
ويابخت من كان النقيب خاله او عمه 
___
دكتور عصام شرف عين  مستشارين لمعاليه تتراوح مراتبتهم بين
18 الف و 25 الف جنيه مصريا فقد لا غير 
محمد حجازي  مستشار شئون خارجية
نجلاء الاهواني  مستشار اقتصادي 
عمر باسم  مستشار تكنولوجيا المعلومات
وده خريح هندسه اتصالات دفعه 2004
ويمتلك شركتين في مجال الاتصالات وشريك لرجل اعمال 
في مركب سياحي اسمه ( كوين )
بس تفتكروا دول كانوا في التحرير مع شرف بيسندوه 
وارجع اقول تاني
احلي م الشرف مافيش ياآه يا آه
مع تحيات توفيق الدقن 
-----
فرق كبير بين الثوريه والفوضوية 
اقتحام السفارة فوضه 
هدم الجدار ثورة 
---
ليه الامعان الزايد في ازلال الشرطه 
ماهي برضه فيها ظباط عندهم شرف ومبادي
ومنهم اخوتنا واولاد عمنا وخالتنا وعمتنا وخالنا 
بلاش نقصي علي الكل نديهم فرصه ونشوف 
والميدان موجود مش حيطبئوه ويحطوه في علبه
---
انا بشوف ان النظام اتبع سياسه فرق تسد
وكل واحد بيلقي اللوم علي التاني 
---
ياجماعه ماحدش شاف او لمح وائل غنيم ؟وغيره
هما اختفوافين والا كانت مأموريه عليها بدل سفر 
ورجع اخوك عند ابوك 
 ---  
كنا محتاجين من البلاد اللي بتمارس الديمقراطيه 
كتالوج بس يكون مبسط عشان نعرف نفهم اللي لينا واللي علينا 
----
الاطباء اضربوا يوم السبت 10 سبتمبر لمده 4 ايام 
وزير الصحه الهمام نزل الاطباءالمحالين علي المعاش 
لجميع مستشفيات الوزارة لمتابعه المرضي اثناء الاضراب 
الاطباء مطالبهم مش كتير وكلها مطالب عادله 
بيطالبوا بتامنهم من عمليات البلطجه المتكررة
ورفع الحد الادني للاجور 
وعزل جميع التيارات الفاسدة 
كان من ضمن لافتات شباب الاطباء الاتي 
انا دكتور انا انسان .ليه ابات مديون وجعان 
حوفزنا تخس النص . نقابة هس هس 
جبلي .. حلمي .. اشرف حاتم .نفس الظلم ونفس الحاكم 
بقترح علي معالي رئيس الوزراء انه يخفض مرتبات مستشاريه 
ويرفع مرتبات شباب الاطباء 
والا دول ولاد البطه السوده والتانين ولاد البطه البيضه 
-----
ياتري ليه سحب التليفزيون الرسمي للدوله 
نبأ تقدم رئيس الوزراء استقالته ورفض المجلس العسكري لها ؟!
----
سؤال خبيث الا لو رئيس الوزراء استقال المستشارين 
واولاد اخو معاليه حيفضلوا مستمرين في وظايفهم 
والا حياخدوا استماره 6 ؟
---
3 محامين كويتين تطوعوا للدفاع عن المخلوع مبارك 
واسائوا لبلادهم 
و4 محامين كويتين برضه تطوعوا للدفاع عن آسر الشهداء
شتان بين الموقفين 
بيتي وبيقول بيته اللهم لااعتراض
----
من اقول  السيد عمروموسي المرشح لرئاسة الجمهورية 
الدستور يحمي الدولة المدنية وليس الجيش 
دستورياسيادي اشتاتا اشتوت 
---
محافظ الجيزه دكتور علي عبدالرحمن قال 
المحافظة ازالت المتبقي من الجدارالخرساني المقام اما السفارة
ولن تتم اعادة بنائة
هما ليه بنوه من الاصل
ده يفكرني بافتح الشباك والا اسده 
عشان بس تكونوا عارفين انها قرارات عشوائيه بدون دراسه 
يعني السور اتكلف قد كده كان لزمته ايه 
---
العجيب ان السياسه فرقتهم والسفاره لمتهم 
---
بهني الشعب المصري 
علي انه لبس قطونيل 
واختار الفستان البمبي  
وهش السلعوه ورقصلها وسمعها اغاني 
وخد نفس طويل وقال هوووووووووووب
مع تحياتي لاعلانات رمضان 
---
اخر سؤال وهو برضه خبيث 
الداخليه ماقدرتش تحمي شقه في عمارة 
حتي لو تبعه للسفاره الاسرائليه 
ازاي حتحمي 20 الف لجنة انتخاب ؟
----
بصراحه وما اخبيش عليكم انا بشفق عليكم من طول المقال 
بس حتقروه حتقروه 
وحتعلقوا حتعلقوا 
يالله بقي نظام بلطجه 
واوعوا اوعوا تقلبوا الصفحه 
ابقوا معي









 

هناك 6 تعليقات:

Unknown يقول...

احمد رجب بنفسج دا انت غلبتنا انت العم بقى خلاص راحت على جحا جميله كل حرف يؤدى لمعنى

غير معرف يقول...

مصر عاشت سنوات كثيرة فى ظل القهر وتحتاج بعض الصبر لتنفض عن كاهلها غبار السنيين.

عن جد المقال جامع ، ويمس بلطف جراح هذا الوطن .

عبدالعزيز

غير معرف يقول...

وهى دى مبادئ الثورة (فوضى - ديكتاتورية ظلم اجتماعى - حلول بوليسية - تليفزيون هايف ) الحمد لله شفت مصر من غير حسنى مبارك بس فيها كل حاجة زى ماهى كل حاجة سليمة بس لوحدها مقال رائع جامع شامل كامل .
ابو روتا

غير معرف يقول...

العزيزة ليلى
أسعد الله أوقاتك ،، شوفي ياستي بخصوص أقارب عصام شرف اللي تم تعيينهم في البترول والطيران ،، فالحقية أنه صدر تعليق من رئاسة الوزراء أن الموضوع ليس له أساس من الصحة ،، وأنها مجرد إشاعة ،، هذا فقط للإنصاف،، أما بخصوص سور السفارة فوجهة نظري الشخصية أنه تم بناؤه ليهدموه ،، وتم إتاحة الفرصة لشوية عيال صيع { لايمكن يكونوا ثوار أبدا} لاقتحام شقة تحت السفارة وليست السفارة كل ده علشان فرض الطوارئ والمجلس ياخد راحته في البلد ويكسب تعاطف الناس ،، بخصوص العزومة أكيد أنا في انتظارك إن شاء الله ،، أما موضوع إضراب الأطباء فكنت أتوقع منك أن تعلقي على إضراب المعلمين لأن حضرتك تعلمين وأنت ست العارفين أ، أول طريق لإصلاح أي بلد يكون ثورة في التعليم في جميع اتجاهاته بناء على دراسة لاحتياجات البلد ،، فالمعلم الآن أولى بالرعاية من الطبيب الذي يأتي في مرتبة لاحقة ،، وهنا دعني أذكرك بمقولة الزعيم الهندي نهرو إن لم تخني الذاكرة الذي قال : ( إن الهند بلد فقير جدا لدرجة أننا ينبغي أن نزيد ميزانية التعليم ).
حكيم عقول

غير معرف يقول...
أزال المؤلف هذا التعليق.
غير معرف يقول...

جميلة جدا المقالة اكتر شي لفتني وائل غنيم راح فين ...فعلا سؤال يستحق الطرح أخد جائزة واحد من أكتر 100 شخصية مؤثرة في العالم بعدين راح ولا حدن رجع شافو