25‏/8‏/2011

يوم في الشارع المصري

أعزائي 
رمضان بيجري وخلاص كلها كام يوم ويخلص 
اسرع شهر بيعدي  وبننتظره بفارغ صبر يهل علينا 
العام القادم ويملا الدنيا خير وبركه 
كل عام وانتم جميعا بخير وعيد سعيد عليكم وعلي عائلاتكم 
وحبايبكم واصحابكم 
وتقبل الله صيامكم وقيامكم 
وجعلنا الله واياكم من عتقاء الشهر الفضيل 
ححكيلكم علي يوم مر عليه في الشارع المصري 
كان امس وزي ما انتوا عارفين اننا في رمضان 
يعني زحمه زياده وعصبيه زياده ونرفزه زياده من الناس 
مع ان الشهر ده المفروض اننا نهذب اخلاقنا واعصابنا 
المهم ما اطولش عليكم قولوا طولي 
كان لازم اروح المعادي لامر عائلي هام 
اختي سبقتني بتاكسي ده عشان الزحمه 
انا بما اني من سكان مصر الجديده  بروح المعادي عن طريق الاوتوستراد 
لاني مش بعرف اروح من طريق الكورنيش 
علي فكره انا خايبه جدا في الطرق والكباري والشوارع 
بس لهلوبه في كل مصرالجديده بعرف كل شبر فيها 
لما بكون عايزه اروح مكان ما اعرفوش بسال واتقصه
واذا كان زحمه مش بعرف اركن فيه يبقي التاكسي موجود 
المقدمه دي كلها عشان انا رصدت الشارع المصري في يوم من ايام رمضان 
نزلت من البيت وقلت ياهادي استرها معايا في الزحمه والجو الحر 
سلكت طريق صلاح سالم  وبعدها النفق اللي بيودي
يا جامعه عين شمس يا المنصه 
اللي بتطلعنا علي الاوتوستراد او اذا ركبنا كوبري اكتوبر تودينا علي الدقي والعجوزه والتحرير 
اخدتوا بالكم من سلكت  دي لغه مروريه باحته 
بدل ما انزل من تحت الكوبري ركبت الكوبري 
انتبهت بعد فتره يمكن لاني اتوماتك بركب الكوبري 
كان لازم لازم ولا مفر ولابد اوصل للتحرير 
وارجع تاني عشان مش بعرف اروح عن طريق الكورنيش 
وصلت التحرير لفيت ورجعت بس قلت بدل ما اطلع علي الكوبري 
امشي في شارع رمسيس وكان وياريت ماكان 
الطريق زحمه والعربيات ماشيه كانها واقفه 
اول شارع رمسيس لقيت ولدين مش اكتر من 12 سنه 
منظرهم عادي يعتبروا اطفال بس كل واحد بيدخن سيجاره 
تخيلوا اطفال بيدخنوا وايه في نهار رمضان جهارا ولا هاممهم 
بعد كام متر لقيت اتنين شباب واقفين بيشاوروا للعربيات وبيقولوا باور 
وكانوا عاملين انهم ماسكين دركسيون 
طبعا قصدهم باور الدركسيون 
بعد كام متر العربيات وقفت من الزحمه  لقيت شاب جه يخبطلي علي الشباك 
وبيشاورلي اني افتح . فتحت الشباك لقيته بيقولي الباور عايز يتصلح ؟
طبعا انا افتكرته بيسالني رديت قلتله لا 
اتاريه كان بيديني أمر مش سؤال 
لانه قالي لا عايز تصليح 
قلتله هو انت اللي سايق والا انا اللي سايقه 
وبعدين عرفت ازاي هو الباور اي حد يبص للعربيه يعرف ان الباور بايظ 
قالي ايوه بايظ قلتله امشي بعدين اخلي كل الشباب اللي في الشارع يضربوك 
وقفلت الشباك وكانت العربيات ابتدت تتحرك 
مافاتنيش اني ابص في المرايه اشوف في ايه ورايا 
لقيت ياحرام ست واقفه وفاتحه العربيه والاتنين اللي شاورولي الاول 
بيشوفوا فيها ايه 
عرفت ان دول فلول الميكانيكيه 
وبيوقفوا الستات بس لانهم اكيد بيقولوا اننا هبل ممكن نصدق اي حاجه 
والمعروف ان اي وحده بتسوق عربيه اعصابها بتبوظ لما بتعطل في الطريق 
قالوا يقلبوا الستات بشغلانه الباور 
هي الشرطه فين ؟ والجيش ؟ يعني حتي في عز الضهر النصب شغال 
علي خلق الله لا زابط ولا رابط
انا اهلي مديني تنبيه اني لا اقف لحد ولا افتح الشباك طول ما انا سايقه 
يعني لما يقروا المقال حيكون في سين وجيم 
وليه وعشان ايه بس معليش المهم انكم تعرفوا ايه اللي بيحصل 
طريق الاوتوستراد كان زحمه بطريقه بشعه 
في كل وسائل النقل ملاكي ونقل كبير ونقل صغير 
وميكروباصات وتوك توك حتي الكارو 
والنقل شايل كل حاجه ممكن تخطر في بالكم 
من الزحمه وبطء الطريق ابتديت اشوف عربيات النقل كاتبه ايه 
اللي كاتب اوعي وشك 
او ماتبصليش يا عبيط  العربيه بالتقسيط
سبع الليل صديق الليل 
ماتبصليش بعين رضيه  بص للمدفوع فيه 
والتاكسيات السوده ممكن صاحبها عنده ست اطفال 
كاتب اساميهم 
اما التاكسيات البيضه الجديده 
دي بقي عليها اعلانات مسلسلات رمضان 
او البرامج الجديده ومين بيذعها 
اللي سايقين بيسابقوا بعض وبيكسروا علي بعض
بالظبط زي العربيات المتصادمه في الملاهي حسيت اني في سيرك مش شارع 
الكل متعصب علي بعضه 
الكل بيتلكك عشان يتشاكل 
الكل اعصابه فالته 
اخيرا وصلت بعد عناء خلصت الامر العائلي 
وفي رحله العوده اللي كانت مع اختي 
كنا رايحين العجوزه نفطر هناك 
سالتها عارفه الطريق 
قالتلي ايوه وشاورتلي اطلع منين 
اطمنت لان لهجتها كانت لهجه ثقه 
بعد ربع ساعه لقيت اننا متسوحين وتايهين 
قلت اسال اطلع علي الكورنيش ازاي وهناك ربنا يحلها 
اسال يوصفولي حاجه غير اللي قبلها 
واحد يقولي شمال والتاني يمين وواحد يقولي بالطول وغيره يقولي بالعرض
لقيت واحد بيركن قريب من ميدان قلت اكيد يعرف يوصفلي 
سالته قبل ما اكمل لقيت واحد جاي يجري وبيسالني عايزه ايه 
الاول رد عليه وقاله انا حوصفلها مش حدخلها في الحيط 
حسيت انهم ممكن يضربوا بعض 
المهم وصفلي وبرضه كانت وصفه غلط 
لقيت شاب بعربيه جنبي سالته اروح الكورنيش ازاي 
قالي تعالي ورايا مشيت وراه بس الزحمه خلتنا نتوه من بعض 
ورجعت اسال تاني لقيت عسكري مرور وبعيد عنه شويه امين شرطه 
سالت العسكري ماردش نده الامين 
يمكن ممنوع يرد الا بعد الرجوع للامين 
الامين قالي حاجه جديده خالص 
ولما اعترضت وقلتله الكل قالي انه من هنا قالي اه ماخدتش بالي 
برضه كانت وصفه غلط   
اظرف حاجه اني سالت واحد ماشي قلتله اروح الكورنيش منين 
رده كان كوميدي ضحكني 
سالني وقالي قالولك فين ؟
ضحكت وقلتله انه صور وقدامه شويه ميه 
ثم ان لو قالولي فين تفتكر حسالك ليه ؟
لقيت راجل كبير وشكله طيب سالته هو ده اللي وصفلي صح 
وخلاني اغني زي الليله الكبيره  واقول دي وصفه سهله  دي وصفه هايله
ووصلت للكورنيش بعد ساعه ونص من التوهان في شوارع المعادي 
سالت اختي تاني تعرفي حنروح للعجوزه ازاي قالت ايوه 
طبعا ماكنتش مطمنه  لانها عملت زي كل الشعب المصري اللي ماينفعش يقول ما اعرفش 
الظاهر ان ما اعرفش دي كلمه حرام والا وحشه 
فكرتها بان بابا دايما بيقولنا ماتفتوش في اللي ماتعرفهوش وكمان دايما يقول 
من قال لا اعلم فقد افتي 
ردت وقالتلي امشي بس وبلاش لماضه 
قالتلي من تحت الكوبري امشي علي طول 
وقلت حاضر ماهي اكبر مني ماينفعش اقولها لا 
لقيت اننا داخلين علي المنيل قالتلي اطلعي برضه علي طول 
بعد شويه لقيت اننا وصلنا ميدان الجيزه 
وهناك بقي زحمه رهيبه 
واشغالات الطريق والزحمه وسوءالمروروالميكرفونات 
بيقولوا اربعه جنيه كل حاجه باربعه جنيه 
زي الاعلان اللي في التليفزيون 
وكمان زي فيلم عادل امام 
اتنين ونص وتعالي بص 
من شده الزحمه والعربيات اللي ماشيه عكس الاتجاه 
ميكروباص خبطني بس جت سليمه الحمدلله 
ولما وقفت وهو وقف وده مش عشان هو عايز يقف لا عشان الطريق زحمه 
قلتله انت مش شايف  لقيته فتح الباب وبصلي وبطريقه الصيع وولاد الشوارع 
لقيته بيقولي جري ايه يا ابله مالك وايه النظاره السوده اللي لبساها  
فاكره نفسك ناديه لطفي ووقفل الباب ومشي 
قلت الحمدلله انها جت علي ناديه لطفي ماطلعش شومه والا سنجه 
وفتح دماغي انا واختي بيها 
ووصلت العجوزه بعد المعاناه وقبل المدفع بنص ساعه 
طيب انا بسال ليه مافيش لوحات ارشاديه تقول الطريق ده رايح لكذا 
حتي لو في بتكون مبهمه  المفروض تكون في اماكن تتيح للي بيسوق 
ياخد يمينه او شماله 
تعرفوا اني بتحرك لما بسافر بره مصر كويس جدا 
لان في خريطه بمشي بيها 
هنا مافيش خريطه ولا في اي مطار من مطارات الجمهوريه تلاقي خريطه وحده 
الظاهر مبدلين الخريطه بالراجل اللي بيسال قالولك فين 
اما طريق العوده فكان سهل مافيش توهان لاني بعرفه 
بس الزحمه بتخنق تحس ان كل مصر في الشوارع 
زي مايكون العيد جه فجأة ولقوا حالهم اذ فجأتن في رمضان 
يعني اللي عايز يشتري حاجه ماينزل يشتريها لازم قبل العيد 
هي الفلوس لو فضلت معاه حتبيض والا حتولد ماهو حيصرفها حيصرفها 
المقال بقي طويل وممل 
بس حتقروه حتقروه لا مفر 
كل عام وانتم جميعا بالف خير
واوعوا اوعوا تقلبوا الصفحه 
ابقوا معي







هناك 4 تعليقات:

د/دودى يقول...

هههههه...باين عليه كان يوم طويل قوى ...

نصيحه حلوه قوى بتاعه عدم فتح الازاز فى العربيات هابقى اطبقها ان شاء الله لما اجيب عربيه :)

هههه تانى عشان وقعتى فى فخ السؤال على مكان فى مصر و يكون الرد المعتاد : هما قالوا لك فين...المصريين دول عسل

عارفه انا بطلت اسأل عساكر المرور لانهم توهونى اكتر من مره نظرا لان منهم اللى مش من القاهره اصلا و بيفتى و خلاص...

ماجد الجلاد يقول...

كل سنة وانتى طيبة
بوست جميل جدا ووصفك ثلاثى الأبعاد كأنى بتخيل الشخصيات والأحداث أمامى..
والأجمل التنهيدة بين السطور على مصر واللى فيها..
بفكر اكتب بوست عن الطريق من ميدان الرمايةالى ميدان لبنان عبرالدائرى..
بجد هتشوفى إنجازات مبارك فى تدمير اخلاق شعب بالكامل!

دمتى رائعة.

غير معرف يقول...

لولا الغاليه
مقال دمه خفيف وكوميدي
بس عايز اقولك حاجه انتي مش كفايه عليكي السين والجيم يعني المحاضر مش ليكي انتي يلزمك آمر اعتقال عشان تسمعي الكلام وماتتكلميش مع اي حد في الشارع . وبرضه ماتفتحيش ازاز العربيه
خلي بالك من نفسك اكتر من كده
كل الحب للولاالغاليه
دكتور مهندس احمد الجمال .

غير معرف يقول...

كل عام وأنت بخير ،، ده أولا طبعا ،، والحقيقة أعجبني الرسم الكاريكاتوري للشارع المصري ،، ولأني كنت في مصر من أسبوع فقط ،، فالموضوع ليس غريبا بالنسبة لي ،، لكن أنا عاوز أركز على نقطتين { على فكرة عاوز أصح من عايز لغويا } الأولى موضوع اللوحات الإرشادية لأني كنت على سفر على خط الصعيد على طريق يقولون إنه الزراعي ولمدينة قريبة من الجيزة هي العياط وظللت طوال الطريق أتساءل كم بقي من المسافة ،، فلم يكن هناك لوحة واحدة تدل على شيء ،، وأمر على مدن صغيرة وقرى ،، فلا أعرف أين أنا إلا بالفكاكة المصرية ،، والنقطة الثانية هي الغول المفترس والوحش اللاأدمي الذي يسيطر على الطرق في مصر الآن ألا وهو الميكروباص ،، كل سائقيه على مايبدو من عينة عبده بشلة ومحسن أبو مطوة ،، والحقيقة أصبحت أخشى الاحتكاك بهم ،، لأنه من الآخر لارادع في البلد لأي حد ،، وأقل واجب ممكن يعمله معايا أي واحد من هؤلاء أنه هايسمعني من الشتائم ماأنا في غنى عنه وطبعا أنا مش هاأقدر أرد لأني وبمنتهى الصراحة أخاف ألا أقيم حدود الله مع هؤلاء ،،المهم لما قرأت أنك وصلت العجوزة بالسلامة قتلني الفضول لأعرف فين بالضبط في العجوزة ،، لأني أعرف هذه المنطقة حارة حارة بيت بيت زنقة زنقة ،، وتحياتي للريس معمر ،، أخيرأ توجيه لغوي بسيط وده بس علشان أنت غالية علينا ،، كلمة ( سور )بالسين وليست بالصاد ( صور ) ،، تحياتي لحضرتك ولأختكم الكريمة ،، ولباقي أفراد الأسرة وعقبال رمضان اللي جاي نفطرك عندنا في ستة أكتوبر ،، وندخل التاريخ بمقال أكيد هايكون شيق ورائع ....
تحياتي
حكيم عقول