أعزائي
حضره وزير الداخليه نايم في العسل نوووم
ولا بيهمه آمن المواطن ولا حتي المواطن نفسه
ولسه الشرطة مرفوعه من الخدمة لحين اشعار أخر
بس الاشعار ده امتي جاي الله اعلم
فاكرين طبعا عربيه الروبابيكيا هي مش بتظهر كتير
بس ظهرت المفروض ان بيكون جواها حاجات قديمه
الناس بتبعها لبياع الروبابيكيا
انما بعد الثورة الروبابيكيا كمان اتطورت تفتكروا بقي جوه العربيه ايه ؟
جوه العربيه عدد من السيوف والشوم والمطاوي والسنج
والبياع زمان كان بيقول روبابيكيا
انما التطور طال الروبابيكيا
بقي ينده ويقول وسائل امن للبيع
ماليش نفس اعلق
---
كنت شاهده علي اللي حصل يوم الاثنين 23 مايو 2011
حادث في ميدان تريومف بمصرالجديدة
محل شاورمه حصل قدامه مشاده كلاميه بين اتنين ضربوا بعض
ولم يتمكنوا عمال المحل من فض الاشتباك
وبقي فيها سب بالام والاب
الشباب اللي واقف عدد منهم كل واحد ماسك الموبايل وبيتكلم
بعد حوالي 5 دقايق كان شباب كتير وصل البعض جاي جري من الشوارع الجانبيه
والبعض جاي بعربيات ونزلوا الشباب والعربيات تجري
وكل اللي جاي ماسك شومه او سيف اوسنجه و اقل حاجه عصايه
المرور اتلخبط والشارع بقي زي السوق
وابتدا الشباب يضربوا نار في الهوا
رصاص حي مش مسدسات صوت
غير مسدسات الصوت اللي بترفع درجه حرارة الضرب
لما السكان استغاثوا بالشرطه
النجده وصلت وطبعا بعد مده
عربيه من العربيات الجديده للشرطه زي العربيات المتصادمه
اللي بنشوفها في الملاهي
الظابط النبي حارسه قاعد قدام جنب السواق
ووراه 3 افراد شرطه
نزل الظابط وكان حاطط الطبنجه علي وسطه
افراد الامن التلاته كان معاهم سلاح ألي
بس مش قريب العمدة الالي
الظابط بص حواليه
الافراد نطوا يمين ونطوا شمال استبشرنا خير
\ولقيناهم ركبوا العربيه بتاعه الملاهي وقالوا يافكيك
حتي مشيوا رونج واي
الشرطه هربت الظاهر خافوا من ضرب النار
المهم لما نزلوا افراد الامن كانوا بيضحكوا
مش عارفه بيضحكوا علي الناس والا الخناقه كانت كوميدية
تصدقوا فكروني بالعصابات اللي بتلبس شرطه في الافلام
زي فيلم عفريت مراتي لشاديه وصلاح ذوالفقار
لما كان اسمه حواش وعادل امام كان اسمه سن الفيل
فضل الشارع زي ماهو لغايه ما اصحاب المحلات فضوا المشكله بنفسهم
بس بعد ساعه ونص من المحايلات علي كل اللي واقف
اللي حصل ده انا شفته بعيني مش اتحكالي
---
الموضوع التاني اتحكالي
بواب في عماره في نفس الشارع
الساعه وحده صباحا في نفس الميدان كان ماشي
لقي عربيه ملاكي وقفته ونزل منها ناس لابسين شرطه
قالوله الرائد مدحت عايزك
ثبتوه وفتشوه كان معاه ظرف فيه 2000جنيه
خدوه منه وشافوا بطاقته
وبعدها رجعوله البطاقه والظرف
فتح الظرف لقه فيه ورق جرايد
طبعا الفلوس دي كانت للسكان مش للبواب كان حيدفع الميه تاني يوم
جري علي قسم النزهه
لقي هناك شاب بيشتغل دليفري في محل اكل
بيقولهم ان في عربيه ملاكي وقفتني وخدت بطاقتي
وموبايلي والاكل اللي كنت رايح اوصله و700 جنيه بتوع المحل
وقالولي روح خدهم من اللواء مدحت في قسم النزهه
القصه دي سمعتها من البواب شخصيا
يعني لما بيكون في اكتر من بلاغ في مكان واحد مش بيكون في دوريه
او حتي امين شرطه يروح يشوف اللي بيحصل
اوحتي الجيش يحط دبايه في اي ميدان في قلق
وفين عسكر الشرطه العسكريه
كل اللي قالوه في القسم هو مدحت كل شوي يبعتلنا حد
ومره يبقي رائد و مره لواء ومره ملازم اول
سؤال لحضره وزير الداخليه
هو امن المواطن ده بقي حاجه غاليه ومش متوفره لاهل المحروسة ؟
بصراحه انا لو مكان وزير الداخليه كنت استقلت
طالما اني مش عارفه احقق الشعور بالامان للمواطن
لا عارف يحققهولنا لا في البيت ولا الشارع
---
ناس كانوا في الهوجه اللي من اسبوع بيطالبوا اننا نعفو عن مبارك
وقرينا انه حيصدر بيان يعتذر فيه
بامارة ايه الاعتذار او ممكن يقول ايه
انا كنت ناسي اني سرقتكم ونهبتكم وطلعت بكل بجاحه
اقول ان انا وولادي ماعندناش حسابات في الخارج
وان الفلوس اللي اخدتها بتاعه شعبي بس نسيت واخدتها بالغلط
والا حيقول معليش بقي وعفا الله عما سلف
في اني قتلت اولادكم في موقعة البغل الشهيرة
وسامحوني بقي في دم ابنائكم اللي راح هدر
وماتاخذنيش اني عملت قصر لحفيدي اللي مات مش تربه
ولو سامحناه يبقي لازم نسامح حبيب العادلي علي اعتبار انه اخد منه الاوامر
لان كلهم مربوطين ببعض
---
بيقال ان السفير الاسرائيلي آمر حراسه باطلاق النار علي المتظاهرين
في المظاهره امام السفاره الاسرائيليه
السفاره في الادوار 17و18و19
والدور الرابع مقر الملحقيه الثقافية
اثناء التجمهر طلب السفير الاسرائيلي
واحد الدبلوماسيين بالسفارة من الجيش التعامل مع المتظاهرين
رفض ضباط الجيش ووضعوا سيارات الشرطة العسكرية
والجيش علي مخارج ومداخل الشارع وانتشروا في الجراجات
والعمارات ورفضوا التعامل مع المتظاهرين او بالاحري
رفضوا اطلاق النار لتفريقهم
لكن سمع صوت اطلاق رصاص من أعلي عماره السفارة
وان احد المتظاهرين اصيب بطلق ناري
وكانت تعليمات السفير اطلاق النار
وحضرت قوات الامن ولم يطلقوا رصاصه واحده ولا الجيش
ولكن لماذالم يحققوا في هذه الواقعه ؟
واين انت ياوزير الداخليه من كل هذا
نايم و الا مزاجك شبه منحرف ؟
سؤ ال ياريت القي اجابه عليه
كيف نجح الامن في تامين ماتشات الكورةوفشل في تامين
اقسام الشرطة والكنائس؟
---
الدكتور المعتز بالله عبدالفتاح
استاذ العلوم السياسية
اصبح المستشار السياسي لرئيس الوزراء
للامن المركزي
لوح باستخدام العنف للمعتصمين
وزير الداخليه ماقدرش يعمل كده
ده اللي بيعبر عن رئيس الوزراء
والا بيرعبنا وقال كمان عن اعتصام ماسبيرو
لو كان بين اخواتنا الاقباط عدد كافيء من المسلمين
كنا فتحنا عليهم النار
الكلام ده متسجل علي سي دي
وحيتقدم للنائب العام
---
دكتور عصام شرف بدل ماكنت تسافر باريس كنت مشيت الامور
دكتور عصام قلت في التحرير اذا فشلت في مهمتي
سأعود الي ميدان التحرير
طيب اذا الحاصل حاليا ده مش بتعتبره فشل
فاين النجاااااح ؟
ياتري ايه الاعاقات اللي واقفه في سكتك
ياريت تكلمنا بصراحه لان كلنا موجعين من اللي بيحصل
وكلنا جالنا ضغط
واوعوا اوعوا تقلبوا الصفحه
ابقواااااا معي
هناك 3 تعليقات:
لاسف فالمراحل الانتقالية مش معروف المتظاهر من البلطجى الظابط اللى بيدافع من الظابط اللى بيعذب الامور كلها ملخبطة والناس رافضة الشرطة والشرطة عاجبها الوضع الطيبة وحدها لا تكفى المسالة كدة زى الاكلة اللى فيها كل حاجة ومالهاش طعم او فايدة او زى العقل اللى فيه كل المعلومات بس مش فاكر حاجة على راى سعيد صالح كل حاجة سليمة بس لوحدها لان مفيش حكومة ويا شماتة ابلة ظاظا فيا.
حسين محمد
بصراحة حبيت اقولك ان لديك مدونة رائعة طريقتك في الكتابة لفتتني
من تقدم الى تقدم ان شاء الله
شوفي بقى ياستي موضوع الأمن المسؤول عنه طنطاوي وعصابته ( كلمة عصابة في اللغة تعني الجماعة علشان ماحدش يفهمني غلط ) لأن الشرطة فقدت هيبتها واحترامها عند الناس لعوامل كثيرة يعني من الآخر لو عاوزة تلومي حد على الانفلات الأمني في البلد لومي طنطاوي باشا لأن أي وزير داخلية الآن مش ممكن ينجح في هذا الجو من الغوغائية والفوضى أما رئيس الوزراء فأنا أشعر أنه رجل محترم وهو الرجل المناسب في الوقت غير المناسب ، بصراحة احنا نحتاج إلى عربجي يحكمنا هذه الأيام وفي الختام العقيد مدحت بيسلم عليك هههههههه
حكيم عقول
إرسال تعليق