أعزائي
وحشتوني وبتاخر عليكم وكل مره اقول اني مش حتاخر بس بتاخر
ياريت تعزروني
حاله البلد مش مستقرةوخصوصا الوزارات اللي بتجي كل 3 دقايق
وتمشي يادوب الوزير يحلف اليمين وبعدها يتزحلق ويمشي
قريبتي اللي فضلت يكون اسمها اللهو الخفي في مقالاتي
حاليا كل كلامنا يوميا منصب علي مصر
ما اخبيش عليكم هي قلقانه جدا وقلقها زياده لانها عايشه خارج الجمهوريه
وبتسمع علي حاله عدم الاستقرار والانفلات الامني وده بيخليها مش مستقره
وهي خايفه جدا علي مصر ماهي في الاول والاخربلدها اللي اتربت واتعلمت فيه
قالتلي تفتكري لو محمد الله يرحمه ابن علاء مبارك بعت جواب لاهله ممكن يقولهم ايه ؟
طبعا مش حخبي عليكم انا شبطت واتعلقت بالفكرة
وكنت عايزه اكتب عنهم بس مش لاقيه مدخل مناسب
والحمدلله هي اديتني اول الخيط
الاستاذ هشام من قرائي الافاضل قالي باين انكم عاملين تشكيل انتي وقريبتك
وانا برضه ابتديت اقتنع بكلامه
تعالوا نشوف ممكن يقولهم ايه ؟
انا محمد علاء مبارك ببعت لعائله مبارك اللي هي عائله بابا وعائله راسخ
باعتبارها عائلة ماما
لازم تعرفوا ان انا في دار الحق وكلكم في دار الباطل
جدو حسني
انا زعلان منك لانك قهرت الشعب المصري اللي احنا منه
وعاملتهم بقسوة وسرقتهم وقمعتهم لمده 30 سنه ولما قامت الثوره فضلت قاعد
مش عايز تسيبهم يشوفوا رئيس يتقي الله فيهم
كان لازم تتقي الله في الشعب الغلبان اللي بمعاونه اللي كانوا حواليك سرقتهم وساعدتهم علي سرقته
لازم ترجع الفلوس اللي اخدتها لانها مش من حقك
ليه قفلت ملف العباره السلام هان عليك كل اللي ماتوا فيها
ليه داريت علي الفساد وانت عارف ومتاكد انهم لفقوا ورق عشان تاخد تصريح
بالابحار وانت عارف مين شريك ممدوح اسماعيل في العبارات اللي بتموت الشعب
املاكك ياجدو كتير كنت منتظر تصرفها امتي وانت وصلت للسن ده حتعيش كام سنه
يعني زي مابيقولوا رجل بره ورجل جوه . او في قائمه الانتظار اللي مع عزرائيل
الارصده اللي في بنوك سويسرا وبريطانيا والعقارات اللي في الولايات المتحدة ومصر
والارباح اللي بتاخدها من صفقات الاستثمار بالملايين
والشركات الكبري بتقدم 50% من ارباحها لاحد من افراد عائلتك سنويا
نسيت انك اخدت صفقات سلاح وصفقات عقاريه ب15 مليار دولار
والمبني الاداري الضخم في ميونيخ 15 دور وفيه مكاتب لكبري الشركات والبنوك
المبني بيدخلك ملايين اليورهات . وحاجات كتير غير كده
انا مبسوط ان ربنا تاب عليه من آكل الحرام وخدني عنده
جدتي سوزان
صاحبة المليارات في بنوك امريكا وعقارات في فرانكفورت
ومدريد وباريس ولندن ودبي
دخلتي نادي الميلياردرات سنه 2000
واستوليتي علي ارصدة مكتبه الاسكندريه وحطتيهم في حسابك
فاكره السفيرة نهاد زكري كانت مديره مكتبك وعينتيها سفيرة في سويسرا ليه ؟؟
لانها هي اللي بتدير ثروة عائله مبارك في المانيا
كنتي بتبعتي طيارة الرئاسة كل اسبوع لباريس عشان تجيبلنا الاكل
والشرب والحلويات والشيكولاته والميه المعدنيه
حتي كانت اداره مطار اورلي في باريس مخصصه مكان محدد للطيارة
كنتي بتبعتيها عشان تجيب لوازم قصر العروبه وشرم الشيخ وبرج العرب
وبتقولي انك بتعملي خير فين الخير ده ؟ده ظلم بصراحه انا مكسوف منكم
بابا علاء
عملت مؤسسه محمد علاء مبارك للخير بفلوس حرام
تعملي صدقه جاريه من الحرام
عندك طيارتين ويخت ملكي باكثر من 60 مليون يورو
وكمان 8 مليار دولار واملاك في شارع روديودراف بلوس انجلوس ومنهاتن بامريكا
فاكر السيسي اللي كنت بلعب بيه انا وعمر اخويا
بتسفرله طيارة خاصة لباريس عشان تجيبله علف اورجينك علي حساب الدوله
السيسي يابابا تاكله اعشاب آمنه سليمه طازجه
والشعب بيشرب من المجاري ومنهم بياكلوا من الزبالة
والشعب بياكل حاجات كتير مسرطنه
ماما هايدي
فاكره اكبر قصرين في مارينا اللي اخدتيهم وبعتيهم واتحرروا في الدفاتر الرسمية
انهم ارض فضاء . هو حضرتك كنتي محتاجهم وغير كده عندكم كتير .
جدو مجدي
حضرتك مش امين زيهم اخدت 2200 فدان في افضل اماكن بالشيخ زايد
ب30 جنيه للمتر ودفعت مقدم بسيط والباقي علي اقساط
وياعالم دفعتها والا قلت حين ميسرة
ونفس الشيء علي مشروع نيو جيزه ارض منتجع بيفرلي هيلز
اخيرا وصلت لعمي
عمو جمال
17 مليار دولار وحساب سري في بنك ubs وicm
وفندق غزالةبشرم الشيخ
مؤسسة بريستول اند وست للعقارات البريطانية
ومؤسسة فاينتشال داتا سيرفس بتدير صناديق الاستثمار المشترك
فاكر ياعمو لما سفرت الفرسه بتاعتك لدبي
عشان تتعشر من خيول الشيخ محمد ابن راشد
ساعتها خصصت طياره خاصه نقلتها وسافر معاها رئيس هيئة الخدمات البيطريه
ونائبه علي حساب الدوله ماهو مولد وصاحبه غايب
ورجعت بالسلامه وهي مهجنه بافضل الجنات الوراثية من الخيول العربيه الاصليه
وزعلتوا عليه ده ربنا رحمني منكم
كان لازم تتعظوا انما مافيش فايده الحرام عمي عنيكم
بصراحه مكسوف اني منكم
وبقول ان شباب التحرير كان عنده حق لما كان بيهتف ويقول
انتوا بتاكلوا حمام وفراخ واحنا الفول دوخنا وداخ
وسوزي بتلبس احدث موضه واحنا ياعيني التسعه في اوضه
اكيد ربنا حيوريكم ايام سوده لون عملكم
الامضاء محمد
اخيرا قرائي الاعزاء
اوعوا تقلبوا الصفحه
ابقوا معي
هناك 4 تعليقات:
السلام عليكم\ كل عيد ام وانتى بخير والهو الخفى بخير وان شاء الله مصر دايما بخير اللهم بارك لكم فى اولادكم وجنبهم الفتن ما ظهر منها وما بطن المال فتنه السلطه المطلقه فتنه الولد فتنه هكاذا قال رب العالمين فى كتابه الكريم
وكنت اتمنى ان يكون وفاه نجل علاء مبارك رحمه الله - انذار وبمثابه كارت احمر للعائله المالكه - ولاكن ان لم يكن للأنسان من الموت واعظ فلن تنفعه المواعظ (يوم يفر المرء من أخيه وأمه وأبيه وصاحبته وبنيه) اتضح لى ولغيرى ان ربنا امهلهم ليتذكرو فان الذكرى تنفع المؤمنين وبما انهم لم يتذكرو فانهم الأن عبره لمن يعتبر
اللهم اتنا فى الدنيا حسنه وفى الأخره حسنه وقنـا عذاب النــار
لولا الغاليه
الجماعه دول نحسوا ماينفعش معاهم اي حاجه . لو بيتعزوا كانوا اتعزوا من زمان في حاجات كتير حصلت للبلد وهما برضه مافيش اي شيء يأثر فيه الزلزال مثلا واللي حصل فيه او صخرة الدويقه مش دي بلدهم انما هما ولا بيهمهم . الولد مات وزعلولهم كام يوم وقالوا الحي ابقي من الميت . الحمدلله انهم انزاحوا من علي قلوبنا
مقال ظريف يالولا كالعاده
كل الحب للهو الخفي اللي بقولها ياريت تكتبي لان روحك كوميديه يعني تشيلي من همنا شويه ولكي يالولا ياغاليه كل الحب .
دكتور مهندس احمد الجمال
ليلي هانم
لو بيحسوا ماكانش ده بقي حال البلد
يعني الكلام معاهم مش جايب همه زي مابيقولوا .مقال عاطفي وجميل
كل الود للهو الخفي اللي بتشير عليكي بمقالات حقيقي غريبه . وكل الود لليلي هانم
دكتور محمد عمر
السلام عليكم كل عام وكل أم بخير ، وكل عام وأمنا الكبيرة مصر بصحة وعافية ، شكرا للهو الخفي الملهم لك ياليلى بالأفكار الجميلة ، ورحم الله محمد علاء مبارك اللي واضح إن ربنا بيحبه جدا واختاره إلى جواره ولم يعش ليسمع أن أسرته كلها للأسف لصوص وحرامية بالعربي مافيا أموال يعني ، لكن ياليلى اسمح لي أكمل بعض أجزاء على رسالة محمد وهي الجزء الخاص برسالته لشعب مصر: " إخواني أبناء شعب مصر الكرام كان الله في عونكم ، وياريت تعتبروني واحد من شهدائكم ،أنا ماليش ذنب في كل اللي حصل ده، وأنا باقول لكم وعلى الملأ أنا بريء من هؤلاء ولايشرفني إلا أن أكون ابن أبسط عامل في مصر بس تكون إيده نظيفة ، وماله حلال ، ولقمته حلال " .
تحياتي ليلي وكل سنة وأنت طيبة .
حكيم عقول .
إرسال تعليق