23‏/2‏/2011

وقفه للتأمل مع اللهو الخفي

أعزائي
البدايه بصوره علم مصر القديم اللي كان لونه اخضر وابيض بس
اللي كان بلون الخضره والصفاء
الف مبروك علينا جميعا الثورة والحريه
جت بعد طول انتظار
الحمدلله علي كل شيء
بقالي مده مش بكتب لاني بتامل اللي بيحصل حوليه
متلخبطه من الفرحه  مش مستقره قلقانه عايزه الجاي يكون احسن من اللي فات
كل المتناقضات موجوده عندي
اللي خلاني اكتب النهارده تليفون جاني من احدي قريباتي
المقربات جداجدا ليه ومش عايشه في مصر
طرحت عليه اسئله وانا كمان طرحت عليها اسئله
بعض اسئله لقينا لها اجابات والبعض الآخر لم نجد
اقترحت عليه اني اعرضها عليكم في مقال
قلتلها احط اسمك معايا بما انك شاركتيني الافكار والاسئله
قالتي ممكن تكتبي اني
اللهو الخفي
حنقف وقفه تأمل ونشوف ايه اللي عايزينه من رئيس الجمهوريه الجديد
بس الاول نقول لعم الحاج مبارك اننا قسمنا رياسته علي تلاته كل 10 سنين كان بشكل مختلف
اول 10 سنين في حكمه كان كويس الشعب ماشافش منه حاجه وحشه
حتي كان لسه بيفصل بدله عند ترزي في المحله الكبري
ال10 سنين التانين بقي مش قد كده يعني ابتدا يتعوج
تعالوا للباقي او بالاحري ال10 سنين الاخيره
كان لعنه ربنا ابتلانا  بيها  هو وعائلته اللئيمه
تفتكروا مين اللي خلاه كده هو والا الشعب ؟
بقصد الشعب اللي حوليه يعني بطانته ماهو برضه بطانطه من الشعب المصري
مش من شعب كمبوديا
يعني الرئيس الجديد حيبقي زي عم الحاج يعني بدايه طيبه وحسنه
ونهايه مايعلم بيها الا ربنا ؟
وده برضه بفضل الحشكيش اللي بتكون حوالين الرؤساء
ولو بقي زي عم الحاج امتي حيبقي كده بعد كام سنه من حكمه ؟
حيحط قوانين للاقارب والمعارف والبطانه والمحاسيب والا حيمشوا علي قوانين الشعب؟
وياعالم الدستور اللي بيفصلوه حاليا حيمشي عليه والا حيغير فيه حسب مزاجه ؟
الرئيس الجديد لازم يخاف ربنا في نفسه واولاده وشعبه
ويعرف انه حيقف قدام ربنا يوم القيامه وحيتحاسب
علي كل مسيحي ومسلم جاع في عهده او اتظلم
عايزين رئيس يقدر العلم والعلماء
ويحاسب اللي بيسرقوا شعبه ويعرف ان الشعب كله امانه في عنقه
مايكونش 70 سنه ومافوقها
السن له حكم والبني ادام لما بيكبر بيضعف
يعني عم الحاج مبارك اللي فوق 80 سنه بيفهم في الفيس بوك ؟
حفكركم بخالد ابن الوليد لما ابنه ضرب ولد صاحبه
ابو الولد اشتكي لخالد كان رده انهم بيلعبوا مع بعض
ولما ابو الولد اشتكي لسيدنا عمر ابن الخطاب رضي الله عنه وارضاه
فما كان من عمر الا انه عزل خالد ابن الوليد
ياالله  هل ممكن نلاقي الاخلاق دي  في رئيسنا القادم ؟
الاحزاب لازم الكبار منهم يسلموا الرايه للاصغر
لازم يكون في تداول سلطه
الكبار بنحترمهم وبنقدرهم وفوق راسنا
بس الزمن بيتغيرومتطلبات الشباب بتتغير
لازم الشباب يشارك واحنا شفنا الشباب عملوا ايه
الدستور اللي بيتفصل  حيكون في ماده لمحاسبه رئيس الجمهوريه والبطانه اللي حواليه ؟
حيسالوا عن الذمة الماليه ؟
و زي ماكلنا عارفين في قضاه ووكلاء نيابه فاسدين زيهم زي كل مهنه
حيتحاسبوا والا هما فوق القانون ؟
علي سبيل المثال القضاه بعضهم مش كلهم اللي شاركوا في مهزله الانتخابات الاخيره
حيتواجدوا في الانتخابات القادمة ؟
الرئيس الجديد حيراسنا كام مده برضه 30 سنه ؟
سؤال مهم جدا وهو
ماهي التغيرات اللي حنحس بيها بعد ثوره25 يناير غير الحرية والديمقراطيه و15% الزياده؟
الحكومه حتقدر تأكل الغلابه لحمه كل 15 يوم ؟
اقسام الشرطه اللي حاليا بيعاملوا المواطنين باحترام وممكن يعظموا للشعب
بعد ماتهدا حاله البلد وتستقر حيرجعوا يضربونا بالجزم زي الاول ؟
ازاي حيحلوا مشاكل العشوئيات والميه والمجاري ؟
والا ده كلام كلام علي رأي الصبوحه
مش عايزين شعارات زي ثورة 52
ثورة الشباب مختلفه مافيش فيها جدال
الاحزاب اللي بيساندوا حاليا ثورة الشباب بعد نجاحها
كانوا فين ايام ماكان منهم اعضاء في مجلسي الشعب والشوري
فين الاصلاحات اللي حاولوا يعملوها  طبعا مافيش لانهم كانوا مستفدين من الوضع القائم
وكلامهم حاليا ماهو الا تصفيه حسابات مع النظام القديم ؟
والقضاه حيبتوا في قضايا الشعب سريعا والا بسرعه النملة وتتاجل  القضايا لسنوات وسنوات
تماشيا مع المثل اللي عارفينه كلنا وهو
في التاني السلامه ؟
ياتري الدرج المفتوح الموجود في المصالح الحكوميه حيتقفل ؟
والا لسه الفرده موجوده التي تتمثل في
الشاي  والقهوة والنسكافيه او حلي بق العيال لما تروح ؟
كناس الشارع حيكنس بذمه ويشوف شغله والا حيقف في الشارع
ويقول للرايح واللي جاي الجمله الشهيرة
كل سنه وانت طيب  لو في عيد اوما فيش عيد
يعني من الاخر واقف يشحت
ياتري ممكن نلاقي رئيس يمنع كل التجاوزات دي
ادعوا معايا وقولوا يارب نلاقيه
واوعوا اوعوا تقلبوا الصفحه
ابقوا معي




هناك 5 تعليقات:

غير معرف يقول...

ليلي هانم ..كله متوقع وعوده الروح للفساد مره تانيه لانه اصبح فى دم بعض الناس..المشكله فينا انا وانتى طلعنا مرضى بحب الوطن..واللى اقدر ااقوله ان الشعب المصري لازم يستغل هذا المد الثورى ويتخلص من كل الافاعى..ويبنى هرمه الجديد بالشكل الطبيعي بدايه من القاعده حتى قمه الهرم..ويغير سلوك الصمت ويخرج ليعلن كلمته..لكشف كل ماهو مخالف دون خوف ..مثلما..يوم خروجه الاخير..بدون من احد ليعلن الثوره..شكرا ليلي هان وتقبلى تحياتى..محمود صابر الخطيب

غير معرف يقول...

صباح الخير ليلى أولا شكرا لك وللهو الخفي وثانيا لن يغير الله مابقوم حتى يغيروا مابأنفسهم واحنا عرفنا الطريق خلاص ياليلى طول عمري عارف ميدان التحرير وبامشي فيه ربما آلاف المرات وكل مرة كنت بازهق منه ومن زحامه لكن أكيد لما أنزل مصر إن شاء الله هاشوفه بعين تانية وشكل تاني وهاشم رائحة دماء شبابنا الطاهرة اللي أشعروني بعجزي وخيبتي القوية أنا وجيلي من الحنجوريين بتوع الكلام وبس مش عارف أول مرة أشعر بالحياة وأشعر بالتفاؤول وأنا أصلا أخو أبي العلاء المعري ولأول مرة أكتب دون توجيه نقد للحكومة بل أدعو لها ربنا يوفقها علشان نعيش بقى ونبقى بني أدمين واللي مش هايسمع كلامنا نقوله شي يس ونربطه في ميدان التحرير تحياتي لك وكل ثورة وأنت طيبة .
حكيم عقول

غير معرف يقول...

لولا الغاليه
الف مبروك لكي وللهو الخفي علي الثوره
وكمان شكرا ليكم علي المقال الجميل .لولا انتم بتطلبوا ساحر مش رئيس جمهوريه . مانقدرش نقول اللي جاي احسن من اللي فات لان النفس البشريه لا ليها رابط ولا ظابط . نتمني اننا نحقق ولو نص الطلبات الموجوده بالمقال . مقال رومانسي حبتين صح يالولا انتي واللهو الخفي . كل الحب ليكم .
دكتور مهندس احمد الجمال

غير معرف يقول...

عودا حميدا ومبروك الحريه
وتحياتى للهو الخفى ولحضرتك واضح انكم فى بدايه تشكيل ------ ربنا يستر
بعد قرأه متأمله فى اسئلتك وعلامات استفهامك اجد نفسى اقول ان اى فشل للثوره او فى رئيس الجمهوريه القادم ايا ما يكون سيكون سبب الفشل الشعب والمنظمات الأهليه والرقابيه ولا نلومن الا انفسنا من السهل ان ترقتى على القمه ولاكن الصعب ان تستمر على القمه
هشام ابو عيش

غير معرف يقول...

ليلي هانم
وحشتينا ومقالاتك وحشتنا الف الف مبروك علي الثوره واتمني تكوني مبسوطه بيها زي كل شباب الثوره لان مقالاتك الناريه السابقه كانت بتطالب بالثوره بين السطور . عهد سيدنا عمر ابن الخطاب غير موجود حاليا ومطالبتك برئيس جمهوريه شبيه بسيدنا عمر درب من الخيال . وزي ماقال دكتور الجمال انكم عايزين ساحر . انما ممكن يكون راجل كويس بس الشعب
مايمجدش فيه لغايه مايبقي فرعون زي مبارك
سعيد جدا بعوده مقالاتك . وبشكر اللهو الخفي اللي اعادك لينا وتمنياتي لليل هانم واللهو الخفي برئيس يحقق كل طلباتكم . كل الود
دكتور محمد عمر