21‏/1‏/2011

مجزرة الاسماعلية

أعزائي
بعد ايام تاتي زكري مجزرة الاسماعليه يوم الجمعة 25 يناير عام 1952

ممكن كتير مننا بيعرفوا ان يوم 25 يناير عيد الشرطه انما ليه بيحتفلوا باليوم ده مش عارفين
تعالوا نحكي ونعرف
نرجع للتاريخ لعام 1952
نشطت اعمال التخريب والانشطة الفدائية ضد المعسكرات البريطانية 
وانسحب العمال المصريين من العمل في معسكرات الانجليز
وبذلك وضعوا القوات البريطانيه في حرج
واعلنت الحكومة عن فتح المعسكرات للراغبين في ترك عملهم
والانضمام للكفاح الوطني
وتم تسجيل (91572) عاملا اسمائهم
وذلك في المدة من 16 اكتوبر 1952
حتي 30 نوفمبر 1952
حوالي شهر ونص
كما توقف المتعهدون عن توريد اللحوم والخضروات وكل مايلزم اعاشة
80 الف جندي وضابظ بريطاني
وكان رد فعل بريطانيا الاتي
استدعي ( البريجادير أكسهام ) القائد البريطانيه لمنطقة القناة
ضابط الاتصال المصري وانذره بسرعه تسليم قوات الشرطة المصرية
اسلحتها للقوات البريطانية وترك الثكنات ومحافظة الاسماعيلية
فرفض ضابط الاتصال الانذار البريطاني وابلغ بذلك
وزير الداخلية المصري فؤاد سراج الدين باشا
فرفض المثول وطلب منهم الصمود والمقاومة
فاطلق البريطانيون قنابلهم بتركيز اكثر من ساعه
ولم يكن لدي الضباط المصريين التابعين لبلوكات النظام
غير بنادقهم القديمة والعصي
( البنادق القديمه اللي بتشتغل بالمنفله )
وكانت هذه المعركة الشرارة التي غيرت مجري تاريخ مصر
دي كانت مقدمه لما اريد ان اطرحه
كثير من الشباب والاحزاب حاليا ينادي بمظاهرات يوم 25 يناير  اي بعد 4 ايام
وفاكرين انهم حيغيروا حالنا  او ممكن فاكرين اللي حصل في تونس ممكن يحصل هنا
وبيحفذوا الناس علي المظاهرات وبيطالبوهم بتخزين المواد الغذائيه
قال يعني الداخليه والحكومة مش دارين ونايمين علي ودانهم
وحيسيبوهم يغيروا حال البلد في غمضه عين
والمضحك انهم بيعلنوا انهم حيقفوا امام وزارة الداخليه يوم 25 يناير
زي بالظبط لما سواق الاتوبيس يقول محطة المطار السري
الاخوان وحزب الوفد اعلنوا عدم اشتراكهم في مظاهرة يوم الثلاثاء
وكتير من اللي بيحفذوا الشباب ويوزعوا المنشورات
مش حيشتركوا في المظاهرات ولا الوقفات
ممكن يتفرجوا علي اللي بيحصل
انا مؤمنه بان معظم النار من مستصغر الشرر
والمثال علي كده
شاوشيسكو كان بيخطب في امان الله والمؤيدين بيهللوا
واحد هتف بسقوطه الكل ايده
وهاجموا القصر وهرب هو وايلينا زوجته بالهليوكوبتر
والجيش انضم للشعب وقدروا يقبضوا عليه ويعدموه هو وايلينا
انمااللي حيحصل او بالاحري اللي عايزينه يحصل مش حينجح
لازم قبل مانعمل الشيء ندرسه ونشوف امكانيه نجاحه
مش نعمل اي حاجه
وعلي رأي جدتي لما بتقول هوجه عرابي
دي بقي حتكون هوجه 2011
حنقول ايه غير ربنا يحمي مصرنا الحبيبه
ويرفع عنا الغمة
ممكن يكون رائيي صادم لكتير منكم
ومستعده جدا لاي نقد وبرحب بيه
والاختلاف في الرأي لا يفسد للود قضية
وبقولكم اوعوا اوعوا تقلبوا الصفحه
ابقوا معي

هناك 3 تعليقات:

غير معرف يقول...

السلام عليكم ورحمة الله وبركاته هذه ليلى المتشائمة وكنت أظنني الوحيد المتشائم في هذا البلد , لكن على كل حال لازم تعرفي ياليلى أن سعد زغلول قالها من زمان وكان صادقا في قوله , فلم يعرف تاريخ مصر أبدأ أن هذا الشعب ثار يوما ما وكانت ثورته سببا في تغيير أو الحصول على الحرية وأنا عندي للمصريين اقتراح لتغيير النظام تعالوا نقعد في بيوتنا ونتوضأ ونرفع أيادينا ( واحنا قاعدين ) ونقول يارب يارب يارب ( ثلاث مرات قبل الأكل وبعده ) خد الناس الوحشين دول خدهم بعيد خالص ( واحنا قاعدين ) وبكده يبقى ثورتنا هاتجيب نتيجة أكيدة وطبعا النتيجة هي أن أحفادنا هايعيشوا في عهد هيثم جمال مبارك الثالث عشر (واحنا قاعدين ) وسلم لي على الثورة .
تحياتي للثوار الذين حرروا بلادهم ( واحنا قاعدين ).
حكيم عقول

غير معرف يقول...

استاذه لينا كلامك فيه كل شىء من اصل الوطنيه المصريه القديمه بكل قيمها ومبادئها كانت هناك حميه داخليه قوامها الصدق ومصلحه البلد لكن فى زماننا للاسف ضاع كل شىء جميل وكما قال تعالى (ان الله لايغير مابقوم حتى يغيرو مابانفسهم )تحيااااااااااااااتى
رجب عثمان محمد

غير معرف يقول...

ليلي هانم
كل عيد شرطه وانتي بخير . فعلا كتير مش عارفين ليه عيدالشرطه 25 يناير وخصوصا الجيل الصاعد كل اللي بيعرفوهعنه هو فيلم حياه او موت الدواء فيه سم قاتل والاطفال بينتظروه . اشكرك بشده لانك شرحتي شرح بسيط وموجز ليه اليوم ده بالذات عيد الشرطه . انا برجح رأيك لان اي ثوره لازم يتخطط لها واحنا مش زي تونس مناخنا مختلف تماما .
كل الود لليلي هانم
دكتور محمد عمر