2‏/9‏/2010

فضائيات ومسلسلات

أعزائي
فاضل لرمضان اسبوع وبعده العيد
كل عام وانتم جميعا بالف خير
وتقبل الله صيامكم وقيامكم وجعلنا واياكم من عتقاء الشهر الكريم
رمضان هو الشهر الوحيد في السنه اللي بيمر علينا بسرعه
يعني اول ما يمر الاسبوع الاول بنلاقي رمضان ابتدا يجري
وعلي رأي اهل الشام لما بيقسموا الشهر علي 3 وبيقولوا
عشره مرءوعشره حلق وعشره خرق
العشره المرء هما اول عشره ايام بالشهر بيمروا بسرعه
اما العشره الحلق دول اللي بيتعمل فيهم كعك العيد
والعشره الخرق اللي بنشتري فيهم لبس العيد
يارب ينعاد عليكم وانتم في خير وسعاده
اول سنه بيسمح وقتي اني اتفرج علي التليفزيون
واتابع المسلسلات لان ظروفي دايما ماكانتش بتسمحلي باني اتابع التليفزيون في رمضان
انما السنه دي تابعت شوي
انا مش ناقضه ولا حاجه انا بتكلم بعين المشاهد اللي بيتفرج وبس
وكمان سالت اهلي واصحابي وزميلي عن رأيهم
التليفزيون المصري والفضائيات نزلوا 89 مسلسل مش معقول حد تابع كل ده
تعالوا احكيلكم علي اللي شفتهم
المسلسل الاول هو بالشمع الاحمر
المسلسل بطوله يسرا الجديد في المسلسل ان تاليفه تم بورشه عمل
مكونه من ثلاث مؤلفات هم مريم نعوم - نادين شمس -ونجلاء الحديني
واخراج سمير سيف
المسلسل اطاره اجتماعي حول ظاهرة العنف الاسري
وما حدث من تغيرات في الاخلاقيات وقضايا مهمه
هو بيفرجنا عن عالم الطب الشرعي اللي ماحدش ابدا اتعرضله
وبصراحه عجبني جدا يمكن لان عمري مافكرت اقرا او اعرف حاجه عن الطب الشرعي
زي كتير منكم مافكروش فيه
ده مسلسل الجماعه اللي تناول تفاصيل تاريخ جماعه الاخوان المسلمين
دفع التليفزيون المصري 24 مليون جنيه نظير عرض المسلسل
واقام سيف الاسلام حسن البنا نجل مؤسس جماعه الاخوان
دعوة قضائية علي المؤلف والمنتج لان عائلة حسن البنا وحدها اللي ليها الحق في الانتاج
نقدر نقول اللي مايعرفش حاجه عنهم ممكن يشوف المسلسل
نجي بقي للحاجه زهرةوازوجها الخمسه
هو قصه امرأةفقيرة انتقلت من حياه الفقر الي السعادة
بزواجها من ثري وطلبها الطلاق منه لدخوله السجن
وتوالت زيجاتهاحتي اصبحت علي ذمه خمس رجال
واصبحت من اقوي سيدات الاعمال في السوق بعد ان كانت ممرضه
مسلسل هايف جدا وتافه جدا
وعند بدء عرض المسلسل تقدمت نقابه الممرضين في مصر
برفع دعوة قضائيه علي المسلسل للتعرض للممرضات
بانهم يسرقن الادويه من المستشفيات
ويتزوجون الاثرياء المترددين علي المستشفيات
اما مسلسل الكبير قوي بطوله احمد مكي
عامل فيه دورين دور عمده والتاني اخوه بس امريكاني
حاجه كده تفرح العيال بس الغريبه ان الكبار مهتمين بيه جدا وبيتفرجوا عليه
----
طبعا من احسن الممثلات هي يسرا تخلت عن الملابس الشيك والميك اب وتسريحات الشعر
ومثلت بس بصدق . كل اللي مثلوا معاها كانوا علي نفس المستوي من التمثيل
ماعدا محمد امام ابن عادل امام ده النسخه المقلده من عادل امام
يعني مش بيمثل لا بيقلد والده في كل حركه ولفته
وكمان احمد السعدني في مسلسل زهرة بيقلد والده صلاح السعدني
حتي في كلام بيردده صلاح السعدني زي ست الكل وروح قلبي
متهيالي ان برضه التوريث اتنقل للتمثيل
اما النجم اللي له ماضي مشرف وله مسلسلات تليفزيونيه
زي حياه الشيخ الشعرواي هو النجم حسن يوسف
بسال ليه يرضي بعمل زي ده مش حيضيف لرصيده الفني
بالعكس ده حينقصه انه يطلع واحد من ازواج زهره
طوني خليفه
---
اما قناه القاهرة والناس دي حكايه لوحدها هي قناة للفضائح والاباحيه
وبتقدم ثلاث برامج للفضائح ولا تخرج عن ثلاثه اشياء
الدين .الجنس.السياسه
القناه بتوصف حالها بانها اجرأ قناه فضائيه رمضانيه
قناه بتشتغل 33 يوم رمضان والعيد
وتقفل 11 شهر الا 3 ايام
العام الماضي غضب الجمهور من محتوي البرامج
بالذات من برنامج لماذا اللي بيقدمه طوني خليفه
السنه دي استنسخوه بثلاث برامج هم
بلسان معاضيك
بدون رقابه
مع نضال
برنامج بلسان معارضيك من تقديم طوني خليفه
كل اسئلته عن الحياة الشخصيه ببجاحه
اسئله مستفذه ليس بها ادني احترام لا للمشاهدين ولا للضيف
في حلقه الفنانه المحترمه فعلا والله محترمه نيللي كريم
ردت علي اسئلته السخيفه بانها نادمه علي الظهور معه في البرنامج
بيضغط علي الضيف وبيوجه اسئله تمس جوانب شخصيه من حياته
وطبعا بيستغل ان الضيف حصل علي مقابل مادي
يعني المال مقابل الفضائح
--

وفاء الكيلاني
---
البرناج التاني هو بدون رقابه
بتقدمه حسب ماالقناه بتصفها
الجميله الجريئه وفاء الكيلاني
تسال ضيوفها عن اسئله تتعلق بالخيانه الزوجيه والاديان
والعلاقات بين المشاهير واشعال نيران الخلافات بين المتخاصمين
بعض الضيوف اظهر اعتراضه
زي ماقالت فيفي عبده
( انتي نشفتي ريقي باكتر من الميت الف جنيه )
وطبعا ده كان اجر فيفي عن الحلقه
يبقي ميزانيه البرنامج قد ايه ؟
والاعلانات بتجيب قد ايه ؟
---
نضال الاحمدية
---
البرنامج الثالت هو مع نضال
الملقبه باجرأ صحفية في الوطن العربي
برنامج عن نبش الاسرارالشخصيه
وفي حلقه من حلقات البرنامج وكانت مع رولا سعد
ماتسالوش مين رولا لاني مش بعرفها
فهمت بس انها مغنيه
في الحلقه دي بالذات هاجمت نضال هيفاء وهبي
بمساعده ضيفتهاووجهت انتقادات حاده لهيفاء
ولم تفرق بين خلافاتها الشخصيه وعملها كاعلاميه
وهو عمل يتطلب الحياديه
وفي اخر الحوار قالت غني يارولا خلي الناس تعرف ان عندك صوت
الناس فاكرينك زي هيفاء ماعندك صوت
----
نشره اخبار الفراخ اللي بتقدمها نفس القناه
بتتضمن افيهات مبتذله تخدش الحياء العام
---
برنامج بحث ميداني زي العسل لنفس القناه بيورينا ان المواطن المصري
عبيط وابله سال مذيع البرنامج في حلقه منه واحد ماشي في الشارع وقاله
تفتكر عشان الهرم مايتعرضش للاتربه نغطيه بالمشمع والا بالزجاج
وحلقه تانيه كان السؤال ايه رايك لو نصمم الموبايل بقرص دائري
وسؤال تاني مستفذ جدا
عشان زحمه المرور نلغي باصات المدارس تفتكر التلامذة يروحوا احسن ماشين
والا باسكوتر والا باتيناج
واخرها زي الكاميرا الخفيه يسال نذيع
----
اعلان يسرا الجديد معاها محمد منير . احمد عز. عزت ابو عوف. هند صبري . دنيا سمير غانم
اتصالات كلفته 35 مليون بس يابلاش
---
سؤالي زي كل مره
كيف وافق انس الفقي وزير شئون التليفزيون الشهير بوزير الاعلام
علي هذه البرامج التي تسيء الي سمعه مصر
وتدمر العادات والتقاليد المصريه ؟
فهل فضائيات رمضان تجاره؟
كفايه عليكم وعليه كده
واوعوا تقلبوا الصفحه
ابقوا معي







هناك 5 تعليقات:

غير معرف يقول...

لولا الغاليه
معقول كمان بتنقضي المسلسلات والله يابنتي انتي عندك مواهب كتير مانعرفهاش . يالولا الفضائيات مافيش عليها رقابه ريحي نفسك . منتظرين المزيد من المقالات .
كل الحب للولا الغاليه
دكتور احمد الجمال

غير معرف يقول...

ليلي هانم
حقيقي بتتاخري علينا بس بترجعيلنا بمقال جديد وجميل . المره الاولي لمقال فني مش سياسي حقيقي قناه مستفذه جدا وكتير من المشاهدين بيغيروا المحطه . ياريت وزير التليفزيون زي ماوصفتيه ينتبه لبث الفضائيات . كالعاده مقال في الجون
كل الود لليل هانم
دكتور محمد عمر

غير معرف يقول...

يا ست لولو يا بنتي انتي فاكره انه دول عندهم دم يعني والا بيحسوا ومين قالك انهم مش عارفين انه ده عيب عارفين بس عايزين يلهوا الشعب الغلبان ده باي حاجه علشان ماينهش في جتتهم ويقولهم عايز اكل عيش حاف دي سياسه مقصوده وبعدين بتقولي ماينفعش اغير المحطه وانتي تفتكري حتي لوغيرتي المحطه حتروحي فين يعني علي مسلسل انيل منه ماهو كل القنوات كانت كده دي مقصوده بيحاصروا الشعب بالاسفاف مش مكفيهم البوظان اللي بوظوه للشباب بالقنوات العريانه كمان دخلوا علي المصريات 186 مسلسل ليه داخلين حرب الله يخرب بييوتهم ليه شعب فاضي مورهوش شغلانه وعاطل ليهم حق همه عارفين انه الشعب فاضي وقاعد علي الرصيف كله بيلهوه باي حاجه علشان يسكت وزي مانتي قلتي مفيش غير حسبي الله ونعم الوكيل فعلا هيه اللي هتحل المشكله دي متتعبيش روحك يا لولو دي عصابه

غير معرف يقول...

كل سنة والجميع بخير وأشكرك ليلى على مقالك الرائع لأنك عرفتيني بإيجاز موضوع معظم المسلسلات لأني الحمد لله لم أشاهدها مع إني كنت فاضي تماما ومش مشغول بس لقيت إن طرقعة الصوابع وأنا قاعد ومرتاح أفضل من حرقة دمي بهؤلاء وزمان كانت ستي الله يرحمها ويبشبش الطوبة اللي تحت راسها تقول إن جه العيب من أهل العيب يبقى مش عيب وأهل العيب هم الآن الفئة الغالبة بين الناس فلازم أهل العيب يقدموا لهم ما يرغبون في مشاهدته فكانت هذه التفاهات هي الغذاء الفكري لهؤلاء لأن الأمر أصبح أهل العيب يقدمون العيب لأهل العيب .
أما الحكومة فلم يعجبني تصرفها في إنفاق أموال على مسلسل الجماعة فكانت الدعاية المجانية وكما يقال أردتها الدولة جماعة محصورة لكنها أصبحت جماعة محظوظة وهنا يظهر الغباء ويتجلى عند المسؤولين عن هذا الأمر وبالتالي نعرف مصر ليه بقت في ذيل الأمم هذا إن كان للأمم ذيل .
حكيم عقول

نادر احمد يقول...

بخصوص برنامج بدون رقابة اسمحوا لى بالتعليق التالى
هل اصبح انتهاك حقوق الملكية الفكرية فى وطننا العربى فجا الى هذا الحد؟
واين ميثاق الشرف للاعلامييين، هل هكذا يسرقون الافكار والاسماء من بعضهم البعض علنا اعتمادا على ان ذاكرة الامة تنحصر فى الاكل والشرب والتزاوج
ان اسم بدون رقابة لطالما كان مقترنا بالاعلامى المصرى سعيد علام الذى قدم برنامجه الناجح والهادف حقا الى المجتمع المصرى والعربى من خلال القنوات المصرية الارضية والفضائية لمدة 9 سنوات من 1997 الى 2005
جروب بدون رقابة لسعيد علام
ع الفيسبوك
وعلى العموم هناك دعوى مرفوعة ضد كل من ال بى سى وداى دريمز يرودكشن ووفاء الكيلانى لانتهاكهم حقوق ملكية برنامج بدون رقابة الاصلى وتشويه سمعته المحترمة التى اكتسبها طوال هذه السنوات التسع