5‏/8‏/2010

من كل بستان زلطه

أعزائي
كل عام وانتم جميعا بالف خير
رمضان علي الابواب
قال النبي صلي الله عليه وسلم
كل عمل ابن آدم يضاعف الحسنه بعشر امثالها الي سبعمائة ضعف
قال الله تعالي
الا الصيام فأنه لي وانا أجزي به
يدع شهوته وطعامه من أجلي
للصائم فرحتان فرحه عند فطره وفرحه عند لقاء ربه
ولخلوف فم الصائم اطيب عندالله من ريح المسك
متفق عليه
ربنا يقبل صيامنا جميعا .
-------
الريس بتاعنا عل طول خارج القاهرة مقره المفضل شرم الشيخ
كل المقابلات والاجتماعات والمناسبات بقت في شرم
يمكن لان القاهره بقت زحمه والا عشان احنا موجودين فيها
طيب ليه مش بيسافر افريقيا يشوف مشكله مياه النيل
يزور فيها دول المنبع السبع اللي مش فاكرهم هما
اثيوبيا -الكونغو - تنزانيا -روندا - بورندي - اوغندا -وكينيا
يعني يزورهم ويحسسهم باننا عيله وحده وفي بينا روابط مشتركه
قبل ما بعض دول المنبع يقيموا مشروعات مائيه منفرده
ونرجع نلطم ونحلي ميه البحر المتوسط بالطاقه الشمسيه
حتي تبقي نوع من انواع الدعايه لانتخابات 2011
وبلاها سفريه باريس مره او روما
والنبي ياعم الحاج تطمن الشعب علي ان الميه مش حتغلي
-------
قانون المناقصات بينص علي ضرورة مشاركه اكبر عدد ممكن من الشركات في المناقصات المختلفة
وده لتحقيق مصلحة الجهه الطارحه للمزاد
واقر القانون علي اعطاء كراسات الشروط للشركات الصغيرة مجانا
طبعا مش بيحصل وبيكون سعر كراسة الشروط غاليه وكمان الشروط بتكون صعبه
يعني كراسات المناقصات في القطاع الطبي بتكون 40 الف جنيه
والتامين الابتدائي بيتجاوز 2 مليون ونص
وصلاحيه خطاب الضمان 4 شهور علي الاقل
وده بيحمل الشركات مصاريف بنك مضاعفة
والفتره الزمنيه بين الاعلان عن المناقصه وجلسه فتح المظاريف اسبوع او 10 ايام بالكتير
ودي طبعا فتره صغيرة مش بتكفي الشركات معرفه تفاصيل المناقصه
اما كراسات بعض المناقصات المطروحه من مستشفيات جامعه عين شمس
في الشهرين الماضيين التامين الابتدائي تدرج بين 15 الف جنيه و2 مليون ونص
وده اكيد منع الشركات الصغيرة من المشاركة
وفي شرط تاني عجيب
الشرط كان علي جهاز طبي بأن يكون قد مضي علي استعمال الجهاز
في مصر اكتر من 10 سنين علي الاقل
وده جهاز قديم متخزن عند شركه معروفه
وممكن يكون انتاجه توقف وفي المقابل فيه جهاز افضل منه
واحدث وارخص
ومولد ياوكالة الصحه ومدد ياجبلي
-------
في مدينه نصر العقار رقم 29 بعمارات الشروق
خلف النادي الاهلي
ساكن الدور الارضي انشاء شقه كامله ملحقه بشقته علي الرصيف
وده من سبتمبر 2008
فين المحليات مش شايفه ولا عارفه بقالها سنتين
والا شايفه وعامله حالها مغمضه عنيها
مافيش ولا مهندس مر في الشارع ولا التفتوا لاي شكوي من باقي السكان
اللي الضرر لحقهم
والا المهندس اللي بيعدي بيكون مغمض عنيه من الشمس
يعرفوا بس يتشطروا علي اي بياع غلبان واقف في الشارع
وحجتهم اشغال طريق طيب اللي بني شقه فوق الرصيف ده
اسمه اشتغال بالهبل
-------
هجوم علي دكتور علي الدين هلال لانه قال في حديث له
ان الحديث عن ضرورة تحديد الحزب الوطني مرشحه للرئاسه
قله ادب
لان الرئيس مبارك اطال الله في عمره ومتعه بالصحه مازال يحكمنا
هو المصريين امتي اختروا رئيسهم بدا من محمد نجيب وعبدالناصر والسادات واخيرا مبارك
مين اللي اخترهم
والا احنا حنصدق الاغنيه ونغني ونقول
اخترناك اخترناك
-------
قال ايه النحل حينقرض لان الخبراء لحظوا تناقص انتاج العسل من عام 2008
لان مليارات من النحل في امريكا وكندا ماتت وبدرجه اقل في اوربا
لاحظ الخبراء مرض جهاز الرادار الطبيعي داخل النحل
الجهاز ده بيرشده للخليه اللي بيفرز فيها العسل
ولو فشلت بتنهار وتموت وبعدها بتنهار الخلية
والسبب مضحك او انا ضحكت لما قريت السبب
وهو الاشعاعات الصادرة من الموبيلات
اللي ضحكني ان صحتنا مش مهمه يعني اشعاعات الموبايل لو موتتنا
ماحدش حيهتم بينا الخبراء حيقولوا في ستين داهيه
انما النحل باشا بعد الشر عليه
-------
بقول كفايه عليكم كده خليكم تصوموا وانتوا مرتاحين كفايه ارتفاع الاسعار في كل حاجه قبل رمضان
رمضان كريم
بس برضه اوعوا اوعوا تقلبوا الصفحه
ابقوااااااااا معي

هناك 6 تعليقات:

غير معرف يقول...

ما اجمل البستان وما اقوى من الظلت والحجر ولا حياه لمن تنادى للاسف
موضوع المياه واضح جداا التواطىء البين بين حكومه الجزب الوطنى لصالح اسرائيل التى يعلم الجميع اطماعها فى نقل حصه لها من مياه النيل عبر مصر وطبعا اسيادهم الامريكان اغروهم بقطعه من الحم الثمين
اما المحليات فحدث ولا حرج رشاوى ومحسوبيات لصالح رؤساء الاحياء والمحافظين وظروف شهريه للقائمين على التكيه
اما المناقاصات فهى مسرحيه هزليه بطلها الشركه المورده ومن يقومون بكتابه شروط كراسه الشروط وللاسف كنت فى فتره من فترات حياتى اعمل بالقطاع العام وقد شاهدت المسرحيه امام عينى اكثر من مره ولم اجد امامى غير الاستقاله والهروب من تئنيب ضميرى لانى كنت اشعر انى شيطان اخرس
اما زياده الاسعار ربنا يجعل مؤائد المحسنين عمار ناوى اعمل جدول وحصر لموائد الرحمن فى جمهوريه مصر العربيه من اقصاها الى ادناهاا وعمار يامصر
كل عام وحضرتك بخير واسرتك الكريمه والعالم العربى والاسلامى بخير واتمنى ان نستغل هاذا الشهر فى الدعاء على الظالم والظالمين ويخرجنا من بينهم سالمين
هشــــام ابو عيــش

غير معرف يقول...

ليلي النقاء تحياتى لحضرتك والاسره الكريمه وكل عام وانتم بخير بمناسبه شهر رمضان الكريم..وبعد..انا متاكد جدا من صحه ماكتبتى فى مقالك هذا او فى غيره من المقالات..لكن ماهو الحل لهذه المشكلات التى يصنعها اصحاب القرار..واحب ان اذكرك بكلمات صلاح جاهين (ورجال سكر على مكاتبهم..تخدم بالروح لما تعامل)..والتعامل دلوقتى اصبح بامعامله يعنى لما العمله تظهر تختفى الحقوق..يعنى ممكن اى حديقتل واحد عامدا متعمدا ولما العمله تظهر يطلع المرحوم غلطان وبلاش اكمل..ليلي تحياتى..محمود صابر الخطيب

غير معرف يقول...

ليلي هانم
كل سنه وانتي طيبه
بتتاخري علينا كتير بس كل مره تكتبي مفالات ناريه .
الفساد موجود وحقولك اكتبي اكتر يمكن ربنا يرضي عنا ويحسوا بينا
وكل الود لليلي هانم
دكتور محمد عمر

غير معرف يقول...

بجد حلو اوى مقالك دة و احلى حاجة صدقك انا من اشد المعجبات بمقالاتك و انا قولتك انا كنت فكرة انك صحفية من مقالاتك دى بس حنعمل اية فى المشاكل الى محوطانة فى كل مكانرنا يسهل و نغير الحاكم و يكون الى بعدة افضل بكتير خلاص حشترك مع الجمعية بتاعت التغير و علاء يفرح بدة اوى ...اكيد عرفتينى د0ع

غير معرف يقول...

لولا الغاليه
ياحاجه ياجميله تناقص اعداد النحل له تاثير علي نمو النباتات والزهورلان النحل لا يستطيع اللاقح بدونها. بس اللافت للنظر ان ذبذبات الرادار ماكانش لها تاثير علي النحل
حنقول ايه غير الله غالب . بس حقولك اخترناكي .
كل الحب للحاجه لولا
دكتور احمد الجمال

ماجد الجلاد يقول...

كل عام وانت بخير
الموضوع جميل والعنوان تحفة..ونبرة سخرية رصينة على احداث تستحق السخرية بالفعل يجعل القراءه متعة...ويبقى السؤال الأهم بالفعل..لماذا لا يذهب الرئيس مبارك الى دول حوض النيل؟!
ما سر الغياب عن افريقيا؟!
ما تعريف قلة الأدب بالنسبة لمطلب التغيير؟ شئ مستفذ دائما يخبرونا ان التفكير فى تداول السلطة انقلاب..لكن قلة ادب دى جديدة بصراحة..وعلى كل حال مش جديد على الحكومة واللى ناسى يراجع مضبطة مجلس الشعب وسيجد الوزير الغالى سب الدين للشعب سابقا!!
واقبلى تحياتى وتقديرى