8‏/5‏/2010

جرعة جديده لرفع ضغطكم وحرق دمكم

أعزائي
لم يسمح أمن الدكتور احمد نظيف دخول الصحفيين والآعلاميين
من الصحف والقنوات الفضائية الخاصة تفقد المرحلة الثانية
لتطوير شارع المعز لدين الله مساء الثلاثاء الماضي
لكنه سمح للتليفزيون المصري بالتصوير والتصريحات
بثت من داخل أحد المساجد الآثرية
وكان بصحبة نظيف الوزير الفنان فاروق حسني وأخرين
واثناء مرور نظيف وقف أحد البائعين بالمنطقة وهتف لنظيف
ولما رد نظيف التحيه ورفع يده قال البائع
اللحمة والله اللحمة ياريس عايزين لحمة
وفي نفس اليوم جمع نظيف رؤساء تحرير الصحف الحكومية
وتحدث عن قضايا مهمة للمواطنين
ولم يدعي لا الصحافة الحزبية ولا المستقلة
وده لان مجلس الوزارة بقي املاك خاصة وحدد للشعب اذا اراد المعرفة
عليه بالجرائد التابعة للحكومة
وبكده التصريحات تبقي ملك شخصي
ياعم نظيف انت وكل الوزراة بتاخدوا مرتباتكم من الضرائب
اللي بيدفعها الشعب وفي نفس الوقت مالوش الحق انه يقرا الجريدة اللي يختارها
ماهي فعلا حكومة تعتيم
---
ارفع لكم الضغط واحرق دمكم اشمعني انا اترفع ضغطي ودمي اتحرق
املاك الدكتور نظيف
شقه في المهندسين
3 قصور في وادي النيل الكيلو 52 طريق مصر اسكندرية الصحراوي
واحد له واتنين للنبي حارسهم الاولاد
3 شقه في سان استيفانو اسكندريه
ثمن الوحده 2 مليون دولار يابلاش
4 شقه بالمنتزه
5 شاليه بالمعمورة
واخيرا فيلا الغردقه
عقبال كل الحبايب
---
عمال المعدات التليفونية وتحسين الاراضي والنوبارية
معتصمين علي رصيف مجلس الشعب بيطالبوا بتحسين مرتباتهم وتثبتهم
وعودة العمال المشردة والتامين عليهم ضد مخاطر العمل
عمال الهيئة العامة لتحسين الآراضي بالبحيرة
معتصمون من 35 يوم
المهندس حسن البنا مدير الهيئة طالبهم بفض الاعتصام
وقبول التفاوض مقابل عقود لجميع العمالة المؤقتة
رفضوا وتمسكوا بالتثبيت بأثر رجعي
ورفص عمال النوبارية العرض المقدم من رئيس مجلس الآدارة
ووصفوا قرار الست الوزيرة عائشه عبدالهادي
وحسين مجاور رئيس اتحاد عمال مصر
بنقلهم للهيئة المصرية للاتصالات
اللي شعارها ( اتكلم أرضي يا ابن بلدي )
بانه نقل تعسفي وسيطعنوا عليه امام محكمة القضاء الاداري
ونقول ايه ربنا معاهم يعنيهم علي ما ابتلاهم
---
وافقت وزارة المالية علي 27 مقترحا من 38 تقدم بها
الاتحاد العام لنقابات عمال مصر وذلك في الاجتماع الذي ضم
يوسف بطرس (عبدالقوووووي) وحسين مجاور
والوزيرة عائشة عبدالهادي
لمناقشة مشروع التامينات الجديد
وقال عبدالقوي ان دوره في الحكومه صراف
تقولولي هات فلوس اقولكم لا لا لا
وبيقول كمان انه دخل رحلة قانون التامينات راكب توك توك
وخرج راكب مرسيدس
حمدالله علي سلامتك ياعبدالقوي
وده لحرصة علي توفير الحماية التامينية والرعايا الاجتماعية الشاملة
لاصحاب المعاشات والحصول علي افضل الامتيازات
انتوا بقي عايزين ايه منه الراجل تعب معاكم يرضيكم وانتوا مافيش فايده
مش عاجبكم انه حط اموال التامينات في البورصه
انتوا علي فكرة شعب نمرود
لازم تقدروا جهد عبدالقوي وتعبه
وكمان مش مكفيكم انه غير قانون الضرائب والجمارك والضريبة العقارية
ودي زي ماقال انها مزايا لرفع العبء عن محدودي الدخل
ده بيكلم هنود والا ايه شايف الشعب كل واحد من الشعب
رابط الفيل الابيض في الشجره او عمود النورد اللي تحت بيته
وبيقول ان القانون الجديد مناسب ل 75 سنه مش 10 سنين
وبعت نسخه لحبيبنا عم الحاج الكبير ونسخه لمجلس الشعب وكمان نسخه للشوري
والحمدلله رب العالمين اقتنعوا بيه يالله عالبركة
واعتبر حسين مجاور ان القانون انجاز تاريخي
ياللي بقي زغرتي يا اللي مش دراينه
---
الابعاء الماضي فتحوا معبر رفح في اتجاه العوده لقطاع غزة
مدة 24 ساعة لعودة المرضي اللذين انهوا علاجهم بالمستشفيات المصرية
---
خلاص جرعه حرق الدم ورفع الضغط انتهت
ونشوفكم في جرعه جديده
بس وحياة النبي اوعوا اوعوا تقلبوا الصفحه
ابقوا معي

هناك 6 تعليقات:

غير معرف يقول...

لولا الغاليه
فعلا نجحتي في رفع ضغطتنا وحرق دمنا
بس يابنتي الفساد موجود والظاهر ان مالوش اخر
كل الحب للولا
مدمن مدونتك
دكتور احمد الجمال

غير معرف يقول...

ليلي هانم
\مقال جريء جدا
بس ياتري في الوان للفيل غير الابيض
بصراحه مش عارف بتجيبي الكلام ده منين
بس اقول ايه صحفيه
كل الود
دكتور محمد عمر

غير معرف يقول...

الحمد لله تنويهك عن المقال بعنوان جرعه لرفع الضغط جعلنى قبل تصفح المقال ابحث فى صديليه المنزل عن مهدىء قوى المفعول وبصراحه تصفحت المقال ولم تفلحى فى رفع ضغطى لاننى كنت اقرأ وانا فى حاله شبه مغمن على ولاكن بعد الانتهاء من القرأه اكتشفت اننى اصبحت اعيش اشبه بالسمك يعنى دمى اصبح بارد- ايه ياعنى البلد بلدهم يعملو فيها كل ما بدا لهم \ ولاكن هايجى يوم ينتفض الدم فى عروقى من جديد وفى وجدان الشعب لطرد هاذا الفيرس العين وان غدا لناظره قريب
تحياتى يا برنسيســـه بارك الله لنا فيكى وفى كل المخلصين امثالك
هشــام ابو عيـش

عماد عمر الجمال يقول...

يا ليلاك هانم هذا هو الشعب المصري والحال ماشى من سيئ الى اسوأ طالما ظل هذا الشعب هغرما بغنوة فريد الأطرش : خليها على الله

ماجد الجلاد يقول...

اللحمة يا ابن المحظوظة اللحمة...بجد يا ليلى حاجة ترفع الضغط ..وبعدين لما على بابا نظيف افندى بكل ممتلكاته وشاليهاته وعربياته وبابا غنوجه وبرفاناته وكاميراته وتلفزيوناته وتكيفاته وتنابلة السلطان فى الصحف القومية ..ويجى بتاع كده جربوع اسمه ايه كده؟؟ اه افتكرت مواطن!!
لما يجى مواطن عرقان ويقوله اللحمه اكيد هيعكر مزاج معاليه بصراحة ميصحش كده دماغ الناس دى متكلفة ولازم يتظبطوا الأول عشان يظبطونا..
استاذه ليلى تقبلى تحياتى ويا ريت برشامة ضغط سلف .

غير معرف يقول...

استاذه ليلي
انا مش شايف اي مبرر لرفع الضغط الرجل اشتغل واجتهد وحوش لحد ماقدر يتجوز ويشتري الحاجات دي اضافة الي انه رجل مؤمن بدليل انه بيرد علي تحية البائع المسكين بدل ما يضربه بالنار
تحياتي
د. مصطفي عبد العال