18‏/2‏/2010

ربنا ع القوي ياعبدالقوي


أعزائي
وحشتوني جدا جدا جدا
حقيقي انا مقصره معاكم بس كان عندي ظروف صحيه
انما الحمدلله رجعتلكم تاني
الصورة لوزير الماليه الشهير بعبد القوي
قال ايه ياخوانا وزيرنا الله يخليه ويبعد عنه الضرائب العقاريه
بيلعب البوكر علي موبيله ماركة ( بلاك بري )في جلسه من جلسات المجلس
وتحت قبة البرلمان .. وعجبي
يعني الراجل مايرتحش مننا ويشوف حاله
دي كانت صور علي الماشي انما الموضوع هو الاتي
النائب محمد العمدة عن الحزب الدستوري كشف في المجلس عن فضيحه
لعبد القوي
مستندات تؤكد ان علاجه علي نفقه الدولةب مليون دولار
بسيطه ايه مليون دي حاجه ببلاش كده
مش وزير وماسك خزانه الدولة فاكرين انه حيتعالج في دار من الموجودين في المساجد
ده وزير ياجماعه عقبال عندنا وعندكم
رئيس الوزراء السيد نظيف جدا
اصدر خمس قرارات عام 2008
ارقامهم
932 - 1872 -1907 - 2061 -9293
لعلاج سياده عبد القوي بمستشفي هوبكنز بامريكا
بمبالغ تتراوح بين 5000 دولار و20000 دولار
واصدررئيس الحكومه السيد نظيف جدابرضه
خمس قرارات تاني عام 2009
بارقام
34 - 678 - 964 - 1119 - 3180
لعلاجه المره دي في امريكا وباريس
وده بالاضافه لسفره فيرست كلاس يعني بالدرجه الاولي
للي تعليمهم علي قدهم زي حالاتي
وكمان بدل سفر له وللمرافق علي كل ليله يقضيها خارج المستشفي
وقدم النائب محمد العمده استجواب
لرئيس الوزراء ووزير صحة الفنانين وعبد القوي
حول العلاج المتكررلعبدالقوي في الخارج
علي نفقة الدولة بالمخالفه للقانون
لان الوزراء عندهم تامين صحي تابع
لشركة الشرق للتامين
وهي المفروض اللي بتتحمل نفقات علاجهم بالكامل
سواء داخل او خارج مصر
يعني من الآخر ده بيعتبر استيلاء علي المال العام
معظم حالات علاج الوزيربتم في شهر ديسمبر من كل عام
وده اكيد طبعا عشان الوزير طول السنه الشعب مطلع روحه
يبقي لازم يروح يقضي النيو يير ويشوف بابا نويل
ويمكن برضه بيروح عشان يحصل ضرائب العام كله من بابا نويل
اقولكم ايه علي الغلابه اللي بيتمرمطو في التامين الصحي
وده يشخط فيهم والتاني يزع فيهم ويعاملوهم معامله البهايم
وبرضه مايتعلجوش
بس علي فكره عليا القوم تامينهم الصحي تابع لمستشفي دار الفؤاد
اللي بيملكها وزير صحه الفنانين
يعني زيتهم في دقيقهم
وياعيني علي الغلابه وياعيني عليكي يامصر
الكل بينهب فيكي
اوعوا تفكروا تقلبوا الصفحه
ابقوا معي


هناك 5 تعليقات:

غير معرف يقول...

والله أنت غريبة ياليلى ، يعني عاوزة تساوي الوزير بالغفير ، فعلا أنا مندهش من تفكيرك ، لأنك عايشة في عالم تاني غير عالمنا ، نحن يا سيدتي نعيش في بلد يقال إنها من دول العالم الثالث ، ولما سألت صديقي ذات مرة ، إذا كنا نحن من العالم الثالث إذن من يكون العالم الثاني ، نظر صديقي إليَّ في دهشة ومطَّ شفتيه في استغراب وقال بكل ثقة عالم الحيوان طبعا.
تحياتي عادل صقر

غير معرف يقول...

لولا الغاليه
عبدالقوي ده شاغلك انا عارف
بس مش هو لوحده اللي بيتعالج في الخارج كل الحكومه
مقال عشرين علي عشره
ياقرده جبتي الارقام دي منين ؟
ماتتاخرش علينا كده
كل الحب للولا
دكتور احمد الجمال

غير معرف يقول...

ليلي هانم
معقول الغياب ده كله
انا قلت ان حضرتك بطلتي كتابه
مقال ممتاز بس برضه مش الوزراء اللي بيتعالجوا علي نفقه الدوله برضه الفنانين وعليا القوم زي ما قلتي
ياريت ماتغبيش علينا تاني
شكرا علي المقال
كل الود لليلي هانم
دكتور محمد عمر

غير معرف يقول...

مظلوم يا عبد القوى
ياليلى هانم عبد الاقوى بك مكنشى بيلعب فى الموبيل , الحكايه انه بعد ما انتهى من الضريبة العقاريه كان بيحسب الضريبة الجديدة ضريبه الملابس ودى ضريبه هايدفعها المواطن على مايرتديه من ملابس والحقيقه الموضوع عاوز حسابات كتير علشان فيه فرق بين الملابس الشتويه والصيفه والداخليه والخارجيه ,كان الله فى عونه
bb_ss_5

غير معرف يقول...

مش عارف ليه تذكرت مقالك وانا عائد من فرح الى المنزل الساعه الثالثه صباحا وعند عودتى قابلت شيخ كبير فى السن يستوقفنى ويسئلنى اين مستشفى الكلى فاخذته فى طريقى وسئلته منين ياعم الحاج قالى دمياط طيب وايه الى جايبك من دمياط للمنصوره فى هاذا التوقيت رد على لكى اخد دورى فى الكشف عندك كام سنه ياعم الحاج رد 65 وصلنا الى مركذ الكلى القريب من منزلى حاولت اعمل معاه واجب واقوله تعالا شرفنى وفى الصباح روح المركذ رد على بطريقه فيها نوع من الاستنجاد متسبنيش الا لما يدخلونى يابنى حاولت الدخول معاه لكى اطمنه فائذا بهم يخبرونى انه لابد ان يذهب لدمياط من جديد حتى يحضر جواب تحويل للمستشفى من محافظته لانه من محافظه اخرى وعنها بكى الرجل المسن وبكى قلبى وشعرت بنار بداخلى وسؤال ياترى دمياط او اى محافظه اخرى تعتبر خارج الدوله؟ولماذ كل هاذا التعقيد والى متى هانعيش فى جبروت وروتين عقيم بدون مشاعر ولا احاسيس الله يهدك يا عبد القوى وكل من يقف موقف عبد القوى
وكل من يساند عبد القوى
ارحمو من فى الارض يرحمكم من فى السماء ويجعله عامرعلى عبد القوى