5‏/1‏/2010

هلوسه في الشارع السياسي

أعزائي
كل عام وانتم بخير بمناسبه العام الجديد
في الحقيقه كان نفسي اكتب حاجه تفرحنا كلنا
بس ظروف مصر مش مساعداني
اعتبروا اللي حتقروه ده هلوسه
----
علاءالدين فهمي كان مدير هيئة البريد
كان في مكتبه لغايه الساعه وحده ونص الظهر
يوم 3 يناير وفجأه نزل يجري الساعه اتنين الا ربع
عشان يحلف اليمين ويبقي وزير المواصلات
الوزير الجديد خصخص هيئه البريد
والفلوس حطها عالبركه في البورصة
ولما خريجي تجارة حلوان قسم بريد قدموا في الهيئه
رفض تعينهم وكمان دفع لجامعه حلوان
5 مليون جنيه عشان تلغي قسم البريد
وبالتالي جامعه حلوان لغت القسم وكتمت علي ال5مليون جنيه
من لا يملك دفع لمن لا يستحق
اطرف تعليق علي السكه الحديد سمعته من دكتور الاسنان بتاعي وهو
اختصار سكك حديد مصر
س . ح . م
سافر حتموت محروق
الوزير الجديد صاحب رئيس الوزارة الرشيده
بالاحري من شلة نادي المعادي
الشلة اللي بيرئسها رئيس الوزراه النظيفه
يوووووووه اقصد الرشيدة
والوزير كان اشتغل مع رئيس الوزراة قبل كده
يعني بقي زيتنا في دقيقنا
---
مجلس الشعب وافق علي الضريبه العقاريه
ورجع يدرس تاني الغاء الضريبه علي المسكن الخاص
او اللي مش بيدر ربح علي صاحبه
موافقون .موافقه بالاجماع
---
عبدالقوي الشهير بوزير الماليه
بيفكر يفرض ضريبه جديده علي ممرات الطائرات
بمطارات الجمهوريه
اللي مش عاجبه مايركبش
الشهير بوزير الطيران المدني
حيزعل من عبدالقوي
وممكن يصعد الامر لعم الحاج الكبير
ويشتكي عبدالقوي
وبم ان اللي مش عاجبه مايركبش كان زميل عم الحاج
يارب يارب ادعوا معايا ان عم الحاج يدي عبدالقوي استمارة 6
قولوا امين
---
السيد المحترم ابراهيم سليمان وزير الاسكان السابق
اخد 20 مليار جنيه بس رشوه
وخصص اراضي للمدام واخوتها والاولاد
والحبايب والمعارف والقرايب
وزغرتي ياللي مش دريانه
20 قطعه لاخوات المدام واولادهم
بواقع قطعه ارض وفيلا بمارينا لكل واحد
حسن دره رجل الاعمال 1500 فدان
بالقاهرة الجديده و6اكتوبر والشيخ زايد والشروق
وجدي كرار رجل الاعمال فندق بمارينا بحق الانتفاع
وباع له كمان سينما مارينا ومبني البولنج
كما باعتله مدام الوزير قطعتين ارض بالشيراتون
كما اعطي بالامر المباشر لشركة المهندسون المصريون
300 فدان
وللشركه المتحدة للاستثمارات 300 فدان
بشارع 90 بالتجمع الخامس سعر المتر 250 جنيه
ضيع 11 مليار جنيه
فين الحكومه من كل ده
دلوقتي جايين تحاسبوه
اكيد اختلف مع حد من كبرات البلد ودي قرصه ودن
عشان مايعملش كده تاني وبكره تختفي مستندات مهمه
ويطلع زي الشعرة من العجين
ويابخت من كان النقيب خاله
---
السكر غلي وبم انه غلي اي حاجه السكر
داخل في صناعتها حيغلي ودي هدية وزارة التموين
للمواطنين بمناسبه السنه الجديده
---
وزير صحه الفنانين الشهير بوزير الصحه
ساب الفنانين لان صحتهم عال العال
نشكر ربنا علي كده
وغير المسار وبقي عداد
كل شغله حاليا انه يعد وفيات انفلونزا الخنازير
---
وزير التربيه والتعليم السابق
اتطعم وخد استمارة 6 وراح علي اسكندريه
قال اصيف في الرواقه
---
الوزير الجديد لوزارة التربيه
دكتور احمد زكي بدر
لما كان رئيس جامعه عين شمس
وفقه الله وحول معيدين وباحثين لموظفين
وكان بيمشي في الجامعه وسط حراسه امنيه مشدده
ومعروف عنه الاستعانه بالامن والاستقواء به علي العاملين والطلاب
طيب ده حيتعامل ازاي مع تلاميذ المدارس الابتدائيه
بعد ماكان بيضرب طلاب الجامعه بالشلوت
---
تطعيم انفلونزا الخنازير مسئولي الوزارة بيقولوا
انه آمن آمن آمن بالتلاته
سؤال صغير حساله ؟
الموبيلات عمرها في مصر حوالي 14 سنه
وفي امريكا واستراليا واوربا موجوده من قبلنا
والي يومنا هذا لم يثبت اذا كانت أمنه او مضرة
يبقي امتي عملواتجارب علي التطعيم
واثبتوا انها آمنه بالتلاته
---
حقيقي قلبي وجعني عليكي يامصر
مش عارفه حيعملوا فينا ايه اكتر من كده
ولا حنصحي من الكابوس ده امتي
بس اكيد الظلم له نهايه
جالكم اكتئاب طبعا زي ماجالي
معليش بس اوعوا تقلبوا الصفحه
ابقوا معي

هناك 7 تعليقات:

غير معرف يقول...

استاذه ليلي
كلنا قلبنا وجعنا
واكيد في سبيل للخلاص
بشكرك علي المقال الموجع
كل الود
دكتور محمد عمر

غير معرف يقول...

لولا الغاليه
عدة مقالات في مقال واحد
تعليقي هو
حسبنا الله ونعمة الوكيل
سلامه قلبك
كل الحب للولا
مدمن مدونتك
دكتور احمد الجمال

غير معرف يقول...

لن تكفيكي مدونة ولا الف لكي تكتبي يا صديقتي العزيزة عن الفساد فلقد اصبح جزء لا يتجزاء من حياتنا اليومية
فليسقط الفساد والفاسدين في كل مكان
علاء الخيام

غير معرف يقول...

استاذه ليلي
مش قلبك بس اللي وجعك علي مصر كلنا قلبنا اتوجع
منظومه الفساد مستمره ومهما قلنا هي برضه مستمره مصر بتحتضر وطالبه مننا كلنا المساعده واحنا قاعدين بنتفرج لامتي مش عارف
تحياتي يااستاذه لجرأتك اكتبي كمان يمكن تصحينا من الثبات العظيم
دكتور عبدالفتاح الاباصيري

غير معرف يقول...

والله ياليلى أنا مش مصدوم ولا مندهش مما جاء في مقالك لأن في مصر ده الطبيعي بل والطبيعي جدا من أيام المماليك وأنت جايه لغاية يومنا هذا، لكن اللي مش طبيعي إننا نتفاءل وعلى إيه التفاؤل ووجع الدماغ ، التشاؤم حاجة مريحة للأعصاب لأن المصيبة لما تقع نبقى متوقعينها من البداية عكس التفاؤل بيجيب وجع القلب ، والقلب خلاص شرايينه تعبانه ، طبعا ماعدا قلب الكبار اللي زي الحديد أقصد زي حديد عز . تحياتي عادل صقر

غير معرف يقول...

من طبيب الاســــنان مرورا بمجلس الشعب ثم الاسكــان والتعليم والبريد انتهاء بالتطعيم اقول مصر محتاجه غسيــــل معــده واقترح على العلماء ان يتفانو فى صنع محلول او حبوب تدمج فى نهر النيل وتوزع وتخلط مع الشبه ونسميهااا حبه الاخــــــلاص للوطــــــن بشرط ان يكون العلمــــاء قد تناولو تطعيم ضد الفســــاد وتم زرع لهم اسنان لا تائكل مال اليتيم ولا الائيم مش عارف ليه اشعر انى محتاج طبيب نفسى بعد قرأه مقالك استاذه ليلى حتى يعيد لى الثقه فى انى ممكن اعيش ليوم يتساوى فيه الخفير مع الامير
هشــام ابو عيـــش

ماجد الجلاد يقول...

عندما انظر لنهر النيل اتخيل انه نهر من الدموع كما تقول الأسطورة الفرعونية القديمة..واكاد اصدق واتيقن بهذا الأن ..على قدر الجرح تذرف الدموع..ولم يبقى غير الجرح على رأى المبدع جمال بخيت :أهديكي عمري وحسي وجوارحي أهديكي جرحي هو اللي باقي ف دنيتي لما خلص فرحي.
شكرا استاذه ليلى