18‏/12‏/2009

ياساتر ياساتر... ياعبدالقوي

أعزائي
حكومتنا الرشيدة الزمت كل مالكي العقارات
ولو كان العقار مهلهل ومش بيجيب تمنه حتي لو في العشوئيات
اي ارض متصوره ولها باب
بان يدفع الضريبه العقارية ووزارة الماليه ادتهم مهله
لاخر ديسمبر 2009
يعني فاضل 18 يوم وتنتهي المهلة
وبعدها غرامه تتراوح بين
200 جنيه و2000 جنيه
ولكن السيد طارق فراج رئيس مصلحة الضرائب
صعبت عليه المصلحه
وقال ان الناس عندهم كتير فاعلن ان الغرامة ستتراوح بين
2000 جنيه و10000 جنيه
ومين يذود ماهو كله للحكومه مش لحد غريب
هو ارهاب للناس وخلاص
تعالوا نشوف عينه من الناس المالكين العقارات
لو واحد اشتري شقه من 20 سنه
شقي وتعب وممكن يكون اتغرب او ورث
والشقه كل اللي حيلته في الدنيا وسكن فيها
واصبح سعرها النهارده مليون او اقل او اكتر
الحكومه تدفعه عليها ضرايب ليه ؟
وهو اصلا كان بيدفع ضريبه الدخل
ياحكومه الضريبه بتكون علي عائد العقار مش علي قيمته
كل ذنبه ان العقارات ارتفع سعرها
افهم ان الحكومه تحصل منه ضريبه لو باعها او اجرها
والمصيبه الاكبر لو كان علي المعاش
يادوب معاشه علي قده ومش حيزيد
حيزيد منين واموال المعاشات ضاربوا بيها في البورصة
بس برضه حيضطر يدفع الضريبه العقاريه
وتيسيرا من وزارة الماليه علي الملاك
يسروا لهم الدفع علي قسطين
يونيه وديسمبر
ومن حق المالك التظلم من التقيم
امام لجأن الطعن بمأمورية الضرائب
واذا لم يعجبه امامه المحاكم
قال يعني المحاكم فاضيه مافيهاش قضايا
ياريت اصحاب القصور في المريوطيه ومارينا وبرتو مارينا وبرتو السخنه
يدفعوا الضرائب العقاريه زي الغلابه
والمواطن البسيط بيسال عن طريقة ملء الاقرار
ومش لاقي حد يساعدة
وكمان الاقرار شبه اختبارات مدارس اللغات الامريكيه والبريطانيه
وعمار ياماليه
ارحموا من في الارض يرحمكم من في السماء
والمره دي بقولكم الاكتئاب قادم لا محاله
بس اوعوا تقلبوا الصفحة
ابقوا معي


هناك 5 تعليقات:

غير معرف يقول...

لولا الغاليه
فين باقي العنوان ياساتر ياساتر من قنطرة الدفاتر ياعبدالقوي
مقال عجبني جدا فعلا الناس الغلابه يعملوا ايه . كل كلامك صح
الي الامام دائما
كل الحب للولا الغاليه
دكتور احمد الجمال

غير معرف يقول...

ليلي
مقال ياريت الحكومه تقراه
مش بقولك لازم تكتبي في جريده او برنامج تليفزيوني
والله انتي خساره انك تكتبي علي النت بس
فكري واكيد غيري قالك كده
تحياتي وكل الود
لمياء صالح

زهرة البنفسج يقول...

ليلي هانم
كل مقال له الف معني
ده مش علي الضرائب العقاريه ده كمان علي اموال المعاشات اللي ضاربوا بيها في البورصه
بصراحه كل تفكيرك في مصر
كل الود لليلي هانم
دكتور محمد عمر

غير معرف يقول...

السلام عليكم
الحكومة لأنها رشيدة لازم ترشد كل حاجة في حياتنا واللي يقل أدبه ومايرشدش يبقى لازم يتفرم ويتعاقب كمان حد قال للمواطن يشتري شقة تلمه هو وعياله فيها إيه يعني لما يكون مستأجر هما المستأجرين كفروا لازم يتنيل على عينه ويشتري شقة ما يعيش عيشة أهله وعلى فكرة عاوز أقول لكم حاجة الحكومة بتقول القانون مدته خمس سنوات لو رنا أحيانا بعد خمس سنوات ها تشوفوا الحكومة الرشيدة ها تعمل إيه كله في مصر هايدفع ضرايب عقارية واللي مش عاجبه يخبط راسه في حدار شقته يستاهل

حكيم عقول مجنون

غير معرف يقول...

ليلي النقاء اكرر لابد من استخرج ترخيص جريده حتى تصل كلماتك لمستحقى سماع
وقراءة هذه الكلمات..استمرى ..وفقك الله..تحياتى.. محمود صابر الخطيب