10‏/12‏/2009

من أي بند في ميزانية الدوله ؟

أعزائي
السيد وجيه سياج حصل علي 650 الف متر مربع
اكثر من 160 فدان في منطقة طابا علي البحر مباشرتا
علي الحدود مع اسرائيل
وقد قدرت الحكومه الرشيدة حين ذاك سعر المتر
بمبلغ 150 قرشا يعني اكتر من ربع دولار بشوي
يابلاش رخيصه يا ارض مصر
والسيد سياج دخل في مشروع استثماري مع
شركة اسرائيلية
ولكن الحكومة الرشيدة بمقتضي القرار الجمهوري
رقم 205 لسنه 2002
سحبت منه الارض
واصدر دكتور عاطف عبيد رئيس الوزراء
القرار رقم 315 لسنه 2003
بتخصيص هذه المساحة لشركة غاز الشرق
وبعدها تم التخصيص لمستثمر أخر
وحصل السيد سياج علي 3 احكام نهائية
امام القضاء المصري من مجلس الدولة
بتعويضات تتراوح بين
نص مليون وخمسة ملايين جنيه مصري
ولكن الحكومه لم تنفذ هذه الاحكام
وبم ان السيد سياج يحمل الجنسيه الايطاليه
لان والدته ايطاليه الجنسية
فانه قدم شكوي للمركز الدولي للنزاعات
لتسوية منازعات الاستثمارفي البنك الدولي
وحصل علي حكم نهائي بتعويض
لو سمحتوا ماتتخضوش
قدرته المحكمة الدولية ب
134مليون دولار
حاجه بسيطه جدا
وبعد المفاوضات بين الحكومة الرشيدة والسيد سياج
وافق ان يحصل علي 74 مليون دولار وينهي النزاع
وقام بالحجز علي بنكي مصر والاهلي
بباريس ولندن
التساؤل هنا
لماذا غفلت الحكومه عن تنفيذ حكم القضاء المصري
هي برضه عندها عقدة الخواجه
وسيتحمل المواطن المصري الغلبان
تعويض السيد سياج ب400 مليون جنيه
كان من الاجدر ان تنفق الحكومه الرشيده هذا المبلغ
في انشاء مدارس ومستشفيات صغيره في الاقاليم
او تزيل العشوئيات وتبني مكانها منازل اقتصاديه
او تعين العاطلين من شباب الخريجيين
ولماذا تبيع الحكومة الاراضي لرجال الاعمال والسماسرة
في الغردقه وشرم والقاهرة والاسكندريه والساحل الشمالي
ومرسي علم
باسعار تتراوح بين دولار وخمسة دولارات
للمتر الواحد
ويوجد الان حوالي 15 قضية دوليه ضد مصر
وسيحصل اصحابها علي احكام
وستدفع الحكومه هذه التعويضات فمن اين ستدفعها ؟
من اي بند من ميزانية الدولة
من المؤكد دافعها هو المواطن
يجوز انها ستدفع من اموال التامينات الاجتماعيه
التي استولي عليها وزير الماليه بدون وجه حق
يجب علي حكومه نظيف ان تحاسب دكتور عاطف عبيد
رئيس الحكومه السابق وجميع الوزراء المشاركين له
الذين خصصوا هذه المساحات من الاراضي وبيعها
الي من لا يستحقها
ويجب ان يحاسب كل من شارك في هذه الصفقة
كلمه أخيرة
السيد سياج مدين للبنوك المصرية بالكثير
وكانت هذه المديونيه بضمان ارض طابا
فهل ستسقط هذه الديون ؟
ام ان البنوك ستنتبه وتحصل علي حقها
ياعيني عليكي يامصر
حتلاقيها منين والا منين
اوعوا تكتئبوا وتغيروا الصفحة
ابقوا معي

هناك 5 تعليقات:

غير معرف يقول...

أجمل عبارة في المقال كله هي عبارة ياعيني عليك يامصر وممكن كمان تحطي لنا أغنية ياعيني عليك ياطيبةتعرفي ياليلى مشكلة مصر الأساسية إن إحنا ولادها بالعربي هي ماكنتش تستاهل ناس زيناوماكنتش تستاهل جيران زي جيرانها مصر دي كان المفروض يكون يكون مكانها على أرض تانية ونغير ناسها بناس تانية وجيرانها بجيران تانية وأنا أقترح على سعادة رئيس الحزب أن تضعيي في البرنامج التأسيسي لحزبكم المزمع إنشاؤه (حزب وداد)اقتراحا أن يتم نقل أرض مصر إلى سطح القمر علشان العالم كله يشوف جمالها الحقيقي وهي منورة في الكون تحياتي حكيم عقول مجنون

غير معرف يقول...

ليلي هانم فعلا ياعيني عليكي يامصر
ياريت نلاقي ر\نص اهل مصر مخلصين لها زيك ساعتها حيكون الوضع غير كده
ماحدش ممكن يغير مصر الا اهلها
مقال مش غريب عليكي
كل الود لليلي هانم
دكتور محمد عمر

غير معرف يقول...

لولا الغاليه
مقال اكثر من رائع
كل مره بنفاجاه بمقالات ليست في الحسبان .حقيقي حبك لمصر حب قوي
منتظرين مقال جديد ساخن
كل الحب للولا الغاليه
دكتور احمد الجمال

غير معرف يقول...

ابنتى الغالية لوللا,,,
عجبنى مقالك بخصوص موضوع مستر سياج وأنا شايف ان الحل فى مثل هذه الأمور هو تنفيذ قانون محاسبة الوزراء والمسؤلين سواءالحاليين منهم أو السابقين حتى يضع كل منهم أمام عينه وقبل اتخاذ أى قرار هام أنه سوف يخضع للحساب والمسآءلةأمام القانون.. ولا يظن نفسه أنه يتصرف فى وسية دادى يبرطع فيها كيفما شاء آسف جدا على استعمال لفظى وسية و يبرطع ولكن لم تسعفنى حصيلتى اللغوية بألفاظ أكثر مناسبة.

أما بخصوص المقال السابق وهو دستور تفصيل والخاص بترشيح الدكتور محمد البرادعى للرئاسة.. فبمنتهى الصراحة يالوللا مقالك فاجأنى وصدمنى جدا..!
فأنا أعترض معك وبشدة.. ولا أوافقك تماما وبتاتا على ماكتبتى.. فلأول مرة منذ بدأت اتابعك كتاباتك أشوفك ترددى كلام الجرايد دون دراسة أو تمحيص..
لا يالوللا..
الراجل مش عاوز دستور تفصيل زى مابيقولوا عنه.. بالعكس.. الراجل بيقول عاوز يغير الدستور اللى سبق تفصيله على مقاسات الحاكم وحاشيته.. وياريتك قبل كتابة مقالك كنتى راجعتى بنود الدستور المنظمة لشروط الترشيح لرئاسة الجمهورية.. والتى تم تعديلها وتفصيلها على المقاسات المطلوبة عشان تتأكدى فعلا.. هل الدستور بشكله وبوضعه الحالى هو التفصيل أم الدستور المقترح؟

بنوتى لوللا.. اعتراضى لا يقلل مطلقا من حبى واحترامى لك واعتزازى بك.. وكما يقولون.. ان اختلاف الرأى لا يفسد للود قضية..
وياريتك لوللا اذا اقتنعتى بكلامى تكتبى ملحق للمقالة.. أو تعلقى على رأيى مثل ماسبق ماوعدتينى.. لانى أرى ان تعليقك على اللآراء المنشورة.. سوف يعطى حيوية وديناميكية لمقالاتك التى أحييكى عليها.. ومش عيب أبدا انك تتراجعى عن رأيك اذا اكتشفتى أن هناك رأيا أكثر منه صوابا.. وطبعا لا أقصد ان رأيى هو الصواب.. ولكنى أكلمك بشكل عام.

وبمناسبا كلمة صوابا فأنا ضحكت جدا لما قريتك كاتبة كلمة مباشرتا..!!! بتتكتب مباشرة يابنوتة هههههههههه..

وتقبلى منى تحيـة التقدير والاعتزاز,,,

عمـــو أبــو أدهــــم

غير معرف يقول...

بجد بجد توقف كثيرا امام كلمه حضرتك اوعوا تكتئبوا وجدتهااا اجمل شىء قراءته فى المقاله فى مثل فلاحى بيقول اذا اتخرب بيت ابوك خدلك منه قالب وبصراحه وجدت البيت خربان لدرجه محزنه حتى القالب سرقوه عليه العوض باااا عــــوهـــااا با عــــوهــــااااا با عـــوهـــااااا اوعدكم ليل نهار هاغنى هاذه الكلمه---- هههه ال ايه اوعو تكتئبووووا قال لنا الله
هشــــام ابو عيــش