1‏/11‏/2009

ارتباك في المرور السياسي

أعزائي
النهارده في 4 مواضيع حكتب عنها
برجوكم تستحملوني اوبالاحري تستحملوا هلوستي
أقاله ام أستقالة
---
ياتري الوزير محمد لطفي منصور استقال ام اقيل
يعني كان برضاه والا اجبر بامر الحكومه الرشيدة
اللواء فاروق المقرحي في مداخله تليفونيه ببرنامج العاشرة مساء
قال لمني الشاذلي
انها اقالة وان البيان القصير اللي القاه كان بيلقيه من مجلس الوزراء
واتصور بكاميرات التليفزيون المصري الموجوده بالمجلس
السؤال هنا
لو هي فعلا استقاله وانه لقي حاله مش عارف يعمل حاجه
يبقي ده اول وزير ماشي بمبدا الرجل المناسب في المكان المناسب
ولقي انه مش مناسب قال انسحب وطبعا لو هي فعلا كده
تبقي دي حاجه تحسبله ونرفعله القبعه
اما اذا ارغم علي الاستقاله اللي بنسميها اقالة
تفتكروا ليه عشان الشعب يهدا ويقول ان الحكومه صاحيه
والا عشان ادي دوره ولاح في الافق وزير جديد
الحقيقه الحكومه عمرها ماكانت صريحه مع الشعب
ولا حتبقي صريحه. وياتري حنعيش لما نشوف حكومه خايفه علينا
قالوا ان الحكومه بقت شابه يعني جابوا وزراء شباب
الشعب المسكين ماحسش باي فرق
الا انهم بيقولوا ديموقراطيه طيب ماهما سايبنا ننبح في صوتنا ونتكلم
وسادين ودانهم من الاخر سايبنا نفضفض ونطلع اللي في قلبنا
ونطق حنك كتر خيرهم
---
حكومه الشباب وحكومه العواجيز
----
في سؤال ملح عندي وهو ان نظام العاملين في الدوله
بيطلعهم معاش في سن 60 سنه
الا من فئات زي القضاة بيتمدلهم
سنتين تلاته خمسه
والقافيه حبكت ونقول حسابك قبل ما انسي
طيب في وزراء فوق السبعين هو الوزير ياجماعه مش موظف برضه
والا انا فهمي علي قدي
يعني النظام بيمشي عليهم والا دول في جمهوريه المريخ الديمقراطيه
وزير بقاله ردح من الزمان مافيش انجازات له
يستنه ليه في الوزارة
نقول زي صلاح جاهين في الليله الكبيره
اللي حيطلب راح يقعد واللي مايطلبش يبعد
نقولها بصيغه تانيه
اللي حينجز راح يقعد واللي ماينجزش يبعد
---
اللي مش عاجبه مايركبش
---
من حوالي 10 ايام كانت برضه مني الشاذلي مستضيفه في العاشرة مساء
وزير الطيران الفريق احمد شفيق
وكان الحوار علي الطياره اللي اتعرضت لتهشم في زجاج احدي النوافذ
الطياره من طراز سوفرين الامريكية سعة الطائرة 10 ركاب
وهي ملك لشركه صغيره تابعة لمصر للطيران تسمي
(سمارت )
الطائره كانت متجهه الي اريتريا وكان علي متن الطائرة
السيد/ عمر سليمان مدير المخابرات العامة
والسيد / احمد ابو الغيط وزير الخارجيه
ولم تكمل الطائرة رحلتها وهبطت اضطراريا بمطار الاقصر
يعني مافيش متابعه ولا صيانه والطياره عليها اتنين من اهم الشخصيات
مدير المخابرات العامه ووزير الخارجيه
طيب ايه الحال مع الركاب العاديين اللي زينا
علي فكره الشركه دي لخدمة رجال الاعمال وتملك 3 طائرات صغيره
والمضحك انها اضافت طائرتين
لنقل المرضي ذوي الحالات الحرجة
وهي نفسها حاله طيارتها حرجه ومحتاجه اسعاف سريع
بس يكون معاه اوكسجين ينظم التنفس
الفريق احمد شفيق لما ابتدت فقرة الاتصالات التليفونيه
واحد اشتكي من الحجز والمعاملة في الطائرة
كان رد الوزير
مش عاجبك ماتركبش
بذمتكم ده رد لوزير علي قناة فضائيه يعني ناس كتيرقاعدين يتفرجوا
طيب لما الناس تهرب من المعاملة وتروح تتعامل مع الشركات الاجنبية
يبقي لزوم الشركه ايه يقفلوها ويرتاحوا
---
توريث او لاتوريث
----
الشعب عامل زي الاطرش في الزفة مش فاهم ولا عارف اي شيء
الاخوان حيكتفوا بالانتخابات البرلمانية
لانهم لا يستطيعوا ترشيح احد لعدم وجود حزب رسمي لهم
وذلك حسب نص المادة 76 من الدستور
في اكتر من واحد اعتقد انهم حيترشحوا لانتخابات الرئاسة لعام 2011
---
عمرو موسي
الامين العام للجامعة العربيه
لا يؤكد وكذلك لا ينفي
قال من حق كل مواطن لديه القدرة والكفاءة ان يطمح لمنصب
يحقق له الاسهام في خدمة الوطن بما في ذلك
منصب رئيس الجمهورية
--
دكتور محمد البرادعي
المدير العام للوكالة الدولية للطاقة الذرية
اعلن حزب الوفد علي لسان محمد صلاح الشيخ أحد ممثلي جيل الشباب
انهم شكلوا لجنه شعبيه لتأيد البرادعي
وسينتخبوة عضوا في الهيئة العليا للحزب
ليتثنه له الترشيح للرئاسة
---
النائب محمد العمدة
عضو مجلس الشعب عن الحزب الدستوري الحر
والذي يمثل حزبه في البرلمان
قال انه رجل قانون حاصل علي ماجستير في القانون العام
ويستعد لمناقشة الدكتوراة
وهو عضوا قياديا
--
ايمن نور
عن حزب الغد
اعلن عن نيته في التقدم للانتخابات الرئاسية
---
المحامي ممدوح رمزي
نائب رئيس الحزب الدستوري
اول مرشح قبطي لرئاسة الجمهورية عن الحزب الدستوري
ولكنه سيرشح نفسه دون الرجوع الي القيادات في الحزب
---
حسين راشد
مساعد رئيس حزب مصر الفتاة وامين لجنه الاعلام
كاتب ومفكر سياسي وفنان تشيكيلي وشاعر واديب
يعني 5 في 1
---
وطبعا مبارك الابن او مبارك الثاني
عامل شغل كويس في مؤتمر الحزب
واللي بيؤيدوه بيقولوا
اللي نعرفه احسن من اللي مانعرفوش
---
كما ادلي دكتور حسام بدراوي
عضو امانة السياسات
ان الحزب لديه العديد من الشخصيات
مثل دكتور علي الدين هلال
جمال مبارك
محمد كمال
ولم يستثني نفسة من الترشيحات
عايزه اقولكم اني بفكر ارشح نفسي عن حزب البالتوك
وبما ان ليه حوالي 4 سنين في هذا الحزب السنه الجايه حيبقوا خمس سنين
يعني اقدر ادخل الانتخابات وكمان انا عضوا قياديا في حزب البالتوك
اكيد حاخد تأيد 250 بالتوكي
انتظروني في الانتخابات
اوعوا تنتخبوا حد غيري
واوعوا تقلبوا الصفحه
ابقوا معي

هناك 7 تعليقات:

غير معرف يقول...

ليلي هانم
مقال ممتاز سياسيه جامده
منتظرين المزيد
حننتخبك اكيد
كل الود لليلي هانم
دكتور محمد عمر

غير معرف يقول...

لولا الغاليه
اربعه في واحد
ياظالمه 4 مقالات في مقال واحد
بس ممتازه
كل الحب للولا
دكتور احمد الجمال

غير معرف يقول...

استاذه ليلي
مقال يستحق جائزه .ليس مقال واحد بل اربع مقالات ولا يخلوا من الفكاهه التي نحسها من كلماتك . مصره علي اني اشوفك في برنامج من برامج التوك شو
وستنجحي نجاحا ساحقا لانك المعده والمقدمه
الي الامام دائما .
دكتوره تيسير مختار

غير معرف يقول...

استاذتنا ليلي
اللي حيقرا لازم يعلق واللي مايعلقش يبعد.. مافيش فايده لازم تدخلي الفكاهه في السياسه
مقال اكتر من رائع بصراحه تستحقي اننا ننتخبك رئيسه جمهورية البالتوك العالميه والعربيه
حننتخبك بس بشرط نقرا مقالات كتير
مشجعك البالتوكي
دكتور عصام كمال

غير معرف يقول...

عظيمه يامصر لقد جاء وقت نسمع فيه عن استقاله وزير- جميله يامصر وطيرانك امن يستقله كل الجنسيات بلا خوف ولا رهبه من المجهول- قويه يامصر بقضاءك الشامخ الممتد لعمر بعد السبعين
يسمونها ام العواجز واحياناا
ام المطاهربترش الملح مع سبع
مرشحين للرئاسه من ضمنهم
الواد بليه ودماغه
العاليا عمار
يطاهره
هشام ابو عيـــش

غير معرف يقول...

الأستاذة ليلي:
شكرا لللمقال الهام ورأيي المتنواضع هو كالآتي:
أولا : سوhء كان استقالة أم اقالة ، المهم هو ترسيخ مبدأ أن علي المسئول عن وزارة أن يستقيل اذا حدث مثل ما حدث في وزارته ودي بداية مش بطالة، ,انا شخصيا أشفق علي كل مسئول يتولي مسئولية في مصر لأن الفساد والاهمال وعدم الانضباط وغياب الضمير الخ أصبح صفة سائدة للأسف في جميع الأوساط والبلد تحتاج الي حملة كبيرة جدا لاصاح حال مصر.
ثانيا: بالنسبة للترشيحات للرئاسة فهناك الكثير من الواجب عمله ولن يصلح مصر رجل صالح واحد ، ويكفي أن نعلم أنه لا توجد بمصر مدرسة لتخريج القيادات الناجحة وذلك يأتي من أحزاب حقيقية يعمل بها سياسيون حقيقيون والطريق مازال طويلا وليحفظ الله مصر الي أن نقطع هذا الطريق، ولكني أقول يجب اعطاء الفرصة للنخبة الصالحة لكي تعمل في سبيل اصلاح حال مصر.
د.صلاح خليل

غير معرف يقول...

العزيزه ليلي..ليس جديدا على ماقراته هنامن انسانه لاتسير الا بعيون مصر تري ما تراه بهذه العيون..فتبتسم ساعه الفرح ..وتكون بركانا للغضب..ساعه المساس باسم مصر..والى الدكتور احمد اقول..عليك بسرعه الذهاب الى لندن لاستخراج ترخيص لجريده..(عيون من مصر)..حتى تصل كلمات ليلي..الى مستحقيها
والى ليلي ..تحياتى..محمود صابر الخطيب