أعزائي
فاضل 3 ايام علي الشهر الكريم
وشاعرنا اللي اولاني شرف انه يختص مدونتي بكل جديد
الاستاذ محمود صابر الخطيب
هو وانا بنقولكم كل عام وانتم جميعا بخير
اعاده الله عليكم وعلينا وعلي أمه لا اله الا الله بالخير واليمن والبركات
دي مقتطفات رمضانيه كتبها خصيصا لمدونتي
تعالوا نبدا رمضان بدري شوي
او بالاحري نفتكر رمضان مع بعض
وسامحونا اذا كنا نسينا حاجه
وزي مابيقولوا جل من لا يسهو
رمضان
ياضيف تجينا فى السنه مره..
ومظبوطه اوقاتك
جايب معاك الخير لينا
وطيبه نفحاتك
ياريت تجينا السنه كلها
ياريت تجينا السنه كلها
ونعيش فى بركاتك..
يا شهر رمضان
يا شهر رمضان
الفانوس
زمان..لما كنت بالشمعات تقيد..
انا كنت زى اطفال البلد..بيك سعيد
تلسعنى الشمعه فى ايد..
امسكك ..بتانى الايد
واجرى ..واغنى..
وازعل لما تنطفى الشمعه منى
وبتفضل حبيبي..لغايه ما ييجى العيد
المسحراتى
من بيت لبيت على ندهتك..
بنقوم ونتسحر
محلاها فى الليالى دعوتك..
الكل يستبشر
نغم الدعا مع طبلتك..
فيه الخشوع يظهر
ليلاتى بتفرحنا جيتك..
وانت بتحبنا اكتر..وانت بتحبنا اكتر
مدفع الافطار
شوف قد ايه وانت بتضرب فى الحروب..
وتزلزل الاركان
وتصد غدر المعتدى ..لما تكون غضبان
النهارده بالسعاده بنسمعك..
لما تزغرد طلقتك من موقعك..
وقت الاذان
بياع العرقسوس
العرقسوس..العرقسوس..
قرب ودوق العرقسوس
طعمك جميل ..يا عرقسوس..
خد مني ومايهمك فلوس
بكره ببلاش يا عرقسوس..
بكره ببلاش يا عرقسوس
هتقول ياسلام الحلوانى
حلواني وفاتح دكانى..كل الايام
وعندى كنافه وقطايف..
وزلابيه.. مع بلح الشام
وحاجات محشيه ومسقيه..
هتدوقها حتقول ياسلام
===
يارب تعجبكم خلي بالكم مانسناش حاجه
ونقول تاني كل عام وانتم جميعا بخير وسعاده
وتقبل الله صيامكم وصيامنا
اوعوا تقلبوا الصفحه ابقوا معنا
هناك 4 تعليقات:
لولا الغاليه ... شاعرنا الخطيب
كل عام وانتم بخير ورمضان كريم
مقتطفات جميله وصور جميله متطابقه مع الكلام .. اكتر حاجتين عجبوني
بتقول بلسان رمضان ( جايب معاك الخير لينا )
وبتقول علي لسان المسحراتي ( نغم الدعاء مع طبلتك )
الجملتين لهم وقع جميل عندي بشكرك بحرارة
لولا كل عام وانتي طيبه وتنولي كل امنياتك مع خالص حبي
دكتور احمد الجمال
ليلي الغاليه تحياتى..كل سنه وانتى طيبه..لسه ابداعك فى اختيار الصور مستمر وبيكون دايما مطابق الكلام..احساس جميل انك تحسى الكلمه وترجميها بالصور.والى مذيد من المشاركات..تحياتى..والى الدكتور احمد العزيز جدا..تعليقاتكم بتدل على حب بين لصاحبه المدونه اسعد الله ايامكم ومن هنا تاكدت ان الاحساس المرهف احساس وراثى..كل عام وانتم بخير..محمود صابر الخطيب
ليلي هانم كل عام وحضرتك بخير
ورمضان كريم
كلام جميل وصور بتوافق الكلام
منتظرين الابداعات القادمه
كل الود
دكتور محمد عمر
بارك الله لكم في رمضان و بارك الله في كاتب الكلمات الجميله الرقيقه ترصد اجمل لحظات رمضان و بارك الله في صاحبة الإختيارات الرائعة للصور الجميله التي تعبر عن تلك اللحظات بكل معانيها
وكل عام وانتم بخير و بارك الله لكم و لنا في رمضان وتقبل صيامنا و قيامنا وجعلنا من عتقائه في هذا الشهر الكريم
حادي بادي
إرسال تعليق