2‏/8‏/2009

الحب علي التربيت

أعزائي
طبعا بتسالوا ايه هو التربيت ؟
التربيت معناه النت ده في البيت عندنا
يعني لما اكون قاعده فاتحه النت وحد يسال عليه
الاجابه بتكون اني قاعده علي التربيت
النهارده حبيت اكتب لكم علي الحب عن طريق التربيت
دايما لما كنا بنحتار في الروم في البالتوك نتكلم في ايه؟
كان الرايق زميلنا يقول تعالوا نتكلم علي الحب في التربيت

انا مش مؤمنه خالص ان ممكن يكون في حب علي التربيت
لان الحب له مقومات لازم تتوفرله
ودي حتقروها في اخر المقال
بصوا انا بشبه الحب ده بايه من وجهه نظري المتواضعه
اننا لما بنقرا قصه لاي كاتب معروف او مبتدا
بنعيش مع الاحداث بنتخيل الابطال اشكلهم واجسامهم وطريقه لبسهم
وحركاتهم وممكن نستنبط رد فعلهم ده حسب اللي بنقراه طبعا
تعالوا بقي نشوف نفس القصه بس لما تتحول لفيلم او مسلسل او حتي مسرحيه
ساعتها بتكون هنا الطامه الكبري ليه ؟
القصه هي هي مع تغير بسيط يناسب العمل الفني
يعني الاحداث كلها معروفه والبدايه والنهايه برضه معروفين لكن
الاشخاص اللي هما بالطبع حيكونوا الممثلين دول بقي مش عارفينهم
احنا عشنا مع ناس من صنع خيالنا ولما بقوا حقيقه قدمنا
لقينا انهم اغراب .. لا لا دول ناس تانيه
عقلنا رفضهم لاننا تخيلناهم غير الحقيقه اللي قدمنا
حسينا اننا ضايعين وان القصه كانت اجمل من المسرحيه او المسلسل او الفيلم
وندمنا علي اننا اتفرجنا عليها
ده بقي الحب علي التربيت
لما اتنين بيحبوا بعض وكل مقومات الحب صوت وصوره
لما بيتقبلوا بيحسوا انهم اغراب يعني كل اللي كان بينهم ده كان وهم وسراب
ساعتها كل واحد فيهم بيفكر الف مره يكمل مع التاني او ينسحب
ممكن اي طرف فيهم يصدم من تصرفات التاني
يعني ممكن حد يكون له حركه معينه وهو بيتكلم
زي مثلا يغمز بعينه او يحرك ايديه او يهز رجله او يهرش في راسه
وده اسمه
Body Language
او لغه الجسد
دي طبعا مش متوفره علي التربيت حتي في وجود الكام
وبعدين نسينا اهم شيء وهو الحضور وده برضه مش متوفر الا في الحقيقه
يعني لما بنحب احنا بنكتشف عيوب وحسنات اللي بنحبه
وبنرضي بيه وبنتقبلها او زي مابيقوا بيكون شاروه وحده علي بعضها
حتي لو مش بيعجبنا فيه حاجه بنقبلها وبنتاقلم عليها
لاننا بنحبه وبيكون الحب ابتدا بدايه صح
الاتنين شافوا بعض وعرفوا بعض وكل واحد فيهم اكتشف التاني
وحبه ورضي بيه
ياريت اعرف رأيكم في الحب عن طريق النت
واوعوا اوعوا تفكروا تقلبوا الصفحه
ابقوا معي

هناك 5 تعليقات:

غير معرف يقول...

ليلي هانم
والله وحشتنا مقالاتك
زعلانه مننا والا ايه الحكايه ؟
مقال في الجون
فعلا كلامك مظبوط الحب ماينفعش علي النت . لو سمحتي بلاش تتاخر علينا
دمتي لنا
دكتور محمد عمر

waly يقول...

للقلوب مفاتيح يا ليلي ولكل باب مفتاح وكل مفتاح مش زي ابدا التاني ...شكلهم من بعيد واحد اه بس من قريب مختلف و الحب علي التربيت باب من ابواب طرق القلوب زي ما حاجات كتيرة اوي ابواب ممكن يكون ...البرفان وممكن يون الصوت بس ... بل ممكن يكون صوت الكعب نفسة ,,,, ياما حبينا سعاد حسني و ياما حبينا نادية لطفي وناس تانية حبت مديحة كامل و ناس ثاثلة حبت سكينة فؤاد و كووووولهم ما حدش شاف حبيبتة عيني عينك
الانترنت اه باب من الابواب و لا يمكن نهملة او نقلل من شانة يا ليلي

غير معرف يقول...

تحياتى للرايق صديقنا الجميل وتحياتى لحضرتك
سؤالك من الصعب الاءجابه عليه ولاكن من خلال تواجدى على التربيت لسنوات وجدت ان الحب يتجه لحب الصوت او الاءسلوب او الجسد لو هناك تواصل بالكام او الصوره وكل هاذا ماهو الا نزوه او شطحه خيال واكيد هايكون حب فاشل مؤقت يزول مع بدايه كاميرا جديده او نيك نيم جديد او صوت اجمل وجسد ولاكن هناك حب من الصعب ان نجده وهوا -- حب الروح للروح اسمع الاءن صوت زميلى فى المدرسه عبد الحليم باشاا حافظ الله يرحمه -- الحلم كنا بنحلمه ونكمله مع بعضنا بالرغم ان مكنش فيه كابل داتا ولا وندوز 2009

غير معرف يقول...

الي زهره البنفسج:
طالعت المقال الخاص بزهرة البنفسج عن الحب عن طريق الانتزنت ، وهو موضوع هام جدا، لأنه بيحصل كتير اليومين دول، وربما كان لزهرة البنفسج وجهة نظر، ولكن يجب ان لا ننسي أن الحب ال>ي يعرفه الانسان ومير به، يتميز بشيء هام جدا ألا وهو اعتماده علي الخيال بشكل كبير، فكما قال شاعرنا الكبير نزار قباني: الحب في الأرض بعض من تخيلنا لو لم نجده عليها لأخترعناه،وفي ه>ه الحالة فان الانترنت يترك الخيال واسعا لكل من يريد أن يتخيل صاحبه، كما أن الانترنت، نظرا لعدم وجود أي قيود كالموجودة في حالة المواجهة، يترك للأشخاص العنان في الحديث دون حرج أو خجل، وقد يكون >لك سببا في خلق علاقات قد تتطور الي علاقات تبدو قوية، ولكن في نظري أنا شخصيا، علاقات خطرة ومعرضة تماما لصدمة اللقاء ومقابلة الحقيقة، وفي تلك الحالة اتفق مع زهرة البنفسج، أن الحب علي الانترنت تنقصه عوامل أساسية، ولكن في المجتمعات المغلقة وشبه المغلقة، ربما تسببت الانتلرنت في نمو علاقات وفي عودة علاقات حب قديمة، يكون أصحابها قد افترقوا من قبل وفجأة يكون الانترنت، وسيلة للقاء واعادةالز كريات والحياة الي الحب قديم، ربما يشتعل لهيبه مرة أخري ان الحب من أقوي العواطف التي يحتاج اليها الانسان، فلا شك عندي أن وجودالانترنت يساعد علي اشعال "حرائق الحب" سواء للعلاقات القديمة أو بدء علاقات جديدة ومرحبا بالحب علي أي حال، وحز`اري منه أيضا.
د.صلاح خليل

غير معرف يقول...

لولا الغاليه
انا بعارض علي طول الخط الحب علي التربيت . ده بيكون نزوة وبتمر بسرعه وممكن تسيب جرح في قلب احد الطرفين . بيكون حب صوت او طريقه كلام مش الحب المتعارف عليه .
دايما بتثيري الجدل في مقالاتك
لولا منتظرين مقال عن رمضان
بعتذر علي اني اتاخرت في التعليق لظروف سفري زي ما انتي عارفه
كل الحب للحبيبه الغاليه لولا
دكتور احمد الجمال