حاجات حلوه لاعزائي عشان رمضان

أعزائي

فاضل 3 ايام علي الشهر الكريم

وشاعرنا اللي اولاني شرف انه يختص مدونتي بكل جديد

الاستاذ محمود صابر الخطيب

هو وانا بنقولكم كل عام وانتم جميعا بخير

اعاده الله عليكم وعلينا وعلي أمه لا اله الا الله بالخير واليمن والبركات

دي مقتطفات رمضانيه كتبها خصيصا لمدونتي

تعالوا نبدا رمضان بدري شوي

او بالاحري نفتكر رمضان مع بعض

وسامحونا اذا كنا نسينا حاجه

وزي مابيقولوا جل من لا يسهو

رمضان
ياضيف تجينا فى السنه مره..
ومظبوطه اوقاتك
جايب معاك الخير لينا

وطيبه نفحاتك
ياريت تجينا السنه كلها

ونعيش فى بركاتك..
يا شهر رمضان

الفانوس
زمان..لما كنت بالشمعات تقيد..
انا كنت زى اطفال البلد..بيك سعيد
تلسعنى الشمعه فى ايد..
امسكك ..بتانى الايد
واجرى ..واغنى..
وازعل لما تنطفى الشمعه منى
وبتفضل حبيبي..لغايه ما ييجى العيد



المسحراتى
من بيت لبيت على ندهتك..
بنقوم ونتسحر
محلاها فى الليالى دعوتك..
الكل يستبشر
نغم الدعا مع طبلتك..
فيه الخشوع يظهر
ليلاتى بتفرحنا جيتك..
وانت بتحبنا اكتر..وانت بتحبنا اكتر



مدفع الافطار
شوف قد ايه وانت بتضرب فى الحروب..
وتزلزل الاركان
وتصد غدر المعتدى ..لما تكون غضبان
النهارده بالسعاده بنسمعك..
لما تزغرد طلقتك من موقعك..
وقت الاذان




بياع العرقسوس
العرقسوس..العرقسوس..
قرب ودوق العرقسوس
طعمك جميل ..يا عرقسوس..
خد مني ومايهمك فلوس
بكره ببلاش يا عرقسوس..
بكره ببلاش يا عرقسوس





هتقول ياسلام الحلوانى
حلواني وفاتح دكانى..كل الايام
وعندى كنافه وقطايف..
وزلابيه.. مع بلح الشام
وحاجات محشيه ومسقيه..
هتدوقها حتقول ياسلام
===
يارب تعجبكم خلي بالكم مانسناش حاجه
ونقول تاني كل عام وانتم جميعا بخير وسعاده
وتقبل الله صيامكم وصيامنا
اوعوا تقلبوا الصفحه ابقوا معنا

بطلة الآحلام

أعزائي

دي القصيده رقم 3 لشاعرنا محمود الخطيب

انشاءالله حتعجبكم واتمني اكون وفقت في اختيار الصورة

زى ما شوفت اللى قبلك..
شوفتك انتى بتخدعى نص البلد
تضحكى للى انتى عايزه تضحكيله..
تهمسى للى انتى عايزه تهمسيله..
تاخدى اللى فيهم يعجبك ..وتلفى ويّاه البلد..
...
تكتبى اسمك واسمه فوق مسله فى الميدان ..
ترسمى قلبك وقلبه فوق اساميكو كمان
ترقصوا الرقصه الجديده..
تضحكوا الضحكه السعيده..
وتسبيه فى نفس المكان..
اللى سبتى فيه ما قبله ..يوم ما كنتى معاه زمان..
...
اللى كان يعجبى فيكى ..
انك انتى بتقدرى بين يوم وليله تغيّرى..
انسان حديد مخدوع بحبك ..لولشخصه تقدّرى
تقنعيه انك حبيبته .. وان طبعك من طبيعته..
واما يشعر بالامان..ترمى قلبه فى التراب...
...
شىء طبيعى من بنيّه لسه فى بداية السنين
سايقه الدلال على قدّها .. شايفه الكتيرم المعجبين
اللىيكتب شعر فيها ..واللى يوصف فى عنيها ..
واللى يطلب انها.. تكتبله مره كلمتين.
واما دورك جه عليا لجل اكون بطل الروايه..
ابتديتى تعدّى ليّا الكمين زى الضحايا...
نظره ..همسه ..كلمتين..بسمه صفرا ضحكتين..
وتضيّعى ايام هنايا....

.لأ يابطله الاحــــــلام كفايه..
آخر خطوط الغدر وصلت للنهايه.
مش انا الى بسهوله يمكنك ان تخدعيه..
مش انا اللى بكلامك..تفرحى وتفرحيه
مش كل طير فى الدنيا دى ياكله البشر..
مش كل طير فى الدنيا يقدر ع السفر ..
وانا قلبى عاش كام تجربه..وقفل الكتاب
انا قلبى شـــاب..
وانا لسه فى بدايه الشباب.
...
فعلا مش كل طير في الدنيا يقدر ع السفر

اوعوا تقلبوا الصفحه

ابقوا معي

من المعز لدين الله الفاطمي للمفتش كرومبو

أعزائي

احنا حاليا في العد التنازلي لقدوم شهر رمضان

كل عام وانتم جميعا سالمين

وينعاد عليكم بخير وبركه وصحه وسعادة

رمضان كريم

مع قدوم رمضان اول شيء ممكن نفكر فيه هو فانوس رمضان

الكبار قبل الاطفال

تعالوا نشوف ايه أصل فانوس رمضان

معني كلمه فانوس

----

يقول ا لفيروز أبادي في كتابه القاموس المحيط

كلمه فانوس تعني نمام

واطلق عليه هذا المعني لان حامله يظهر في وسط الظلام

فكرته بدأت في صدر الاسلام وكان الهدف منه الاضاءة ليلا

للذهاب الي المساجد وزيارة الآهل والاصدقاء

ولكن فكره فانوس رمضان بدات عمليا

في 15 من شهر رمضان عام 258 هجريا

وقد وافق هذا التاريخ دخول الخليفه المعز لدين الله الفاطمي

لمصر فخرج اهلها لاستقباله بالمشاعل والفوانيس

وكان لجمال المنظر في تلك الليلة ان اصبحت من العادات في تراثنا الاسلامي

وتحول الفانوس من الآضاءة الاصلية الي وظيفة ترفيهيه

في عهد الدولة الفاطمية

وكان يصنع قديما من الالمنيوم والنحاس المزخرف بالزجاج الملون

وبه فتحه خاصة لوضع الشمعة

وكانت فوانيس الميسوريين لها شكل وزخارف خاصة

اما الفقراء فكانت لهم ابداعتهم المتواضعة

وللفوانيس قديما اسماء أطلقها العرب منها

أبو لموز ..أبو حشوة .. أبو للجم

الصاروخ .. أبو شرف .. الدبابة

شقة البطيخ .. الترام .. المسدس

علامة النصر .. وغيرهم

وكان يطلق علي أكبرهم ( ابوولاد )

وهو عبارة عن فانوس كبير الحجم معلق به اربع فوانيس في جوانبه الاربعة

وتنتشر ورش صناعة الفانوس القديم في منطقة

بركة الفيل بالسيدة زينب وباب الشعرية

وحاليا في جميع محافظات الجمهورية

وقد عشق الاطفال فانوس رمضان

حتي تحول من الفانوس ابو شمعة للفانوس الصيني

الذي نجح في ازاحة الفانوس المصري عن عرشه

وقد استعملوا له اشكال من عالم والت ديزني

لابهار الاطفال لحبهم في هذه الشخصيات

اما فانوس المفتش كرومبو فهو المكتسح هذا العام

وذلك لحب الاطفال والكبار ايضا في شخصيته

وقد جاء باشكال متعددة

منها وهو واقف وبيده عدسته الشهيرة

ويتدلي منه فانوسان صغيران

واخر جالس علي كرسي هزار يقرا مذكراته

والثالث يركب دراجه بخارية

والرابع بجواره مصباح علاء الدين

وخامس يركب التوك توك

وجميعهم يغنون اغاني رمضان عند الضغط عليهم

ومنهم من يرقص مع الغناء .

وقد تراوحت اسعارة بين 35 جنيها الي 95 جنيها

حسب المقاس واذا كانت نوعيته بلاستيكيه

او يرتدي ملابس مصنوعه من القماش

لاضفاء المصداقيه للاطفال

وده بقي حنعتبره التحول الطبيعي للحاجه الساقعه

زي الاعلان ماقال

لا بديل عندي للفانوس ابو شمعه فهو الاجمل دائما

ومش حقول زي ماكتير بيقولواالله يرحم الفانوس ابو شمعه

لانه موجود وسيظل دائما موجود

كل عام وانتم سالمين ورمضان كريم

بس اوعوا اوعوا المفتش كرومبو يخليكم تقلبوا الصفحه

ابقوا معي

وبشتاقلك

أعزائي

القصيده التانيه للشاعر محمود صابر الخطيب

بيكون ويانا تقريبا يوميا في الروم علي البالتوك

انشاءالله حتعجبكم

تعالوا نقرها سوا

----
وبشتاقلك ..
ولما الشوق يعاندنى
اعافرفيه واندهلك
ويرجعلى صدى صوتى
بنفس اللحن يندهلك
انا فى البعد يا غاليه
بكل الحب مشتاقلك
وبشتاقلك
...
كلامك لسه رنّاته
في ليل البعد تطربنى
وتاخد روحى من روحى
وعن احزانى تبعدنى
ولما ارجع لجواباتك
عشان م اعد فى حروفك
الاقيكى على بابى واتسامرمع طيفك
وارجع تانى بالذكرى .. ليوم ما كنتى بتجينى
ببسمه حب ما تخلص .. يداعبها الهوا تنعس
واشوف الشوق على جبينك
دانا فى البعد ياغاليه

بكل الحب مشتاقلك
وبشتاقلك
...
قريب جدا ح اكون جنبك
واحط ايديّا فى ايديكى
وتاخدينى .. تضمّينى .. بفستانك تلفينى
واشوف الفرحه فى عنيكى
اشاورلك تطاوعينى .. تغطّينى .. تدفينى
مع قلبك تخلينى .. اعيش العمر اغنيكى
دانا فى البعد يا غاليه
بكل الحب مشتقلك
وبشتاقلك

اوعوا تفكروا تقلبوا الصفحه

ابقوا معي

حب الاطفال

أعزائي

بما اننا اتكلمنا عن الحب علي التربيت

يبقي نشوف حب الاطفال شكله ايه

وقولولي رأيكم ايه في الحب العيالي

مرات بيفضل الحب موجود من الطفوله للكبر

ومرات برضه بيكلل بالزواج

الله علي الحب . جميل صح الكلام

اسيبكم مع الصور

ياتري مخبي ايه ورا ضهره

وردة الحب الصافي

ممكن تكون أخويه ههههههه



عايز اشرحلك اللي في قلبي


تعالي شوفي بابي ومامي
لا تعال انت مع بابي ومامي اطلبني من اهلي





بحبك وبموت فيك

دي عشان ماتنسنيش

شوف الدنيا حلوه ازاي واحنا مع بعض

الورد الاصفر ده معناه ياحياتي اني بغير عليكي

دي بقي عشان الكبار يفرحوا بيها

اوعوا تفكروا لحظه انكم تقلبوا الصفحه

ابقوا معي

الحب علي التربيت

أعزائي

طبعا بتسالوا ايه هو التربيت ؟

التربيت معناه النت ده في البيت عندنا

يعني لما اكون قاعده فاتحه النت وحد يسال عليه

الاجابه بتكون اني قاعده علي التربيت

النهارده حبيت اكتب لكم علي الحب عن طريق التربيت

دايما لما كنا بنحتار في الروم في البالتوك نتكلم في ايه؟

كان الرايق زميلنا يقول تعالوا نتكلم علي الحب في التربيت

انا مش مؤمنه خالص ان ممكن يكون في حب علي التربيت

لان الحب له مقومات لازم تتوفرله

ودي حتقروها في اخر المقال

بصوا انا بشبه الحب ده بايه من وجهه نظري المتواضعه

اننا لما بنقرا قصه لاي كاتب معروف او مبتدا

بنعيش مع الاحداث بنتخيل الابطال اشكلهم واجسامهم وطريقه لبسهم

وحركاتهم وممكن نستنبط رد فعلهم ده حسب اللي بنقراه طبعا

تعالوا بقي نشوف نفس القصه بس لما تتحول لفيلم او مسلسل او حتي مسرحيه

ساعتها بتكون هنا الطامه الكبري ليه ؟

القصه هي هي مع تغير بسيط يناسب العمل الفني

يعني الاحداث كلها معروفه والبدايه والنهايه برضه معروفين لكن

الاشخاص اللي هما بالطبع حيكونوا الممثلين دول بقي مش عارفينهم

احنا عشنا مع ناس من صنع خيالنا ولما بقوا حقيقه قدمنا

لقينا انهم اغراب .. لا لا دول ناس تانيه

عقلنا رفضهم لاننا تخيلناهم غير الحقيقه اللي قدمنا

حسينا اننا ضايعين وان القصه كانت اجمل من المسرحيه او المسلسل او الفيلم

وندمنا علي اننا اتفرجنا عليها

ده بقي الحب علي التربيت

لما اتنين بيحبوا بعض وكل مقومات الحب صوت وصوره

لما بيتقبلوا بيحسوا انهم اغراب يعني كل اللي كان بينهم ده كان وهم وسراب

ساعتها كل واحد فيهم بيفكر الف مره يكمل مع التاني او ينسحب

ممكن اي طرف فيهم يصدم من تصرفات التاني

يعني ممكن حد يكون له حركه معينه وهو بيتكلم

زي مثلا يغمز بعينه او يحرك ايديه او يهز رجله او يهرش في راسه

وده اسمه

Body Language

او لغه الجسد

دي طبعا مش متوفره علي التربيت حتي في وجود الكام

وبعدين نسينا اهم شيء وهو الحضور وده برضه مش متوفر الا في الحقيقه

يعني لما بنحب احنا بنكتشف عيوب وحسنات اللي بنحبه

وبنرضي بيه وبنتقبلها او زي مابيقوا بيكون شاروه وحده علي بعضها

حتي لو مش بيعجبنا فيه حاجه بنقبلها وبنتاقلم عليها

لاننا بنحبه وبيكون الحب ابتدا بدايه صح

الاتنين شافوا بعض وعرفوا بعض وكل واحد فيهم اكتشف التاني

وحبه ورضي بيه

ياريت اعرف رأيكم في الحب عن طريق النت

واوعوا اوعوا تفكروا تقلبوا الصفحه

ابقوا معي