11‏/2‏/2009

شرم برؤيه جديده


أعزائي
كل مره اروح شرم الشيخ كانت بتبقي زياره خاطفه
بيكون شغل اروح وارجع بسرعه او احضر فرح وبرضه ارجع بسرعه
اول مره اروح شرم واستمتع فعلا
قررنا اهلي وانا اننا نبعد عن كل مشاكل الحياه ونقضي اجازه اربع ايام
في اي مكان بعيد عن القاهره وزحمتها ودوشتها ومشاكلها
وكان الاختيار اننا نروح شرم
وصلنا قفلنا الموبيلات بطلنا نقرا جرايد او نشوف حتي تليفزيون
ماكانش عندنا وقت لاي شيء غير الاستمتاع بجمال شرم الشيخ
الوقت اللي بنكون فاضين فيه بننام عشان نقدر نكمل استمتاع
جربوا تعملوا كده انا اول مره بس اكيد حكررها كتير
شرم الشيخ تقع في محافظه جنوب سيناء مساحتها 424 كم مربع
منها بيتفرع خليجي العقبه والسويس
وحولها اهم محميات طبيعيه
رأس محمد ونبق
وقدمها جزيرتا تيران وصنافير عند مدخل خليج العقبه
اهم المناطق :- رأس محمد نصراني ورأس أم السيد
بتلاقوا هناك فنادق كتير جدا ومطاعم اكتر وديسكوهات كتير وكازينو للعب ده موجود كتير جدا
كل فندق فيه مكتب للرياضات البحريه والغوص
طبعا اهم مكان في شرم الشيخ هو خليج نعمه
بتلاقي فيه اكبر تجمع للكافتيريات والمطاعم والديسكوهات والمحلات التجاريه
وهناك بتشوف كل الاجناس والاشكال
يعني بتشوف الطويله والقصيره والتخينه والرفيعه والسمره والسوده والبيضه والحنطيه
وكل الملابس حجاب خمار نقاب
ميكرو جيب ميني جيب
بنطلون شورت هوت شورت
فستان سواريه او اسبور
بلوزه تي شيرت بدي هاف استومك
يعني اكبر كوكتيل ممكن تشوفه في مصر تلاقيه موجود في شرم
الوقت ده في السنه بيكون وقت اهل ايطاليا
تحس وانت هناك انك لو رحت روما مش حتلاقي حد فيها لان كلهم نزلوا علي شرم
الديسكو ده كل يوم بيكون قدامه قائمه انتظار للدخول
والصوره دي كانت يوم الاتنين 9 فبراير 2009
هنا بقي السوق التجاري القديم تلاقي فيه الخضار والفاكهه
والملابس واي شيء تعوزه حتلاقيه في السوق القديم
وكمان اسعاره حنينه وطبيعي بتكون ارخص كتير من الشانزليزيه الملقب بخليج نعمه
دي الف ليله وليله تلاقي فيه برضه تجمع كبير للمصريين والاجانب
هو فيه عرض خيول وبيعرضوا فيه شو فرعوني
مش غالي الشو لانهم بيعتمدوا علي المطاعم والكافيهات ومحلات بيع الملابس
مكان ظريف تقضوا فيه سهرتكم


دي كانت رحله السفاري وكانت اجمل رحله طلعتها في شرم
كانت ب bech buggy
بيطلعوا مجموعات بيكون فيه اتنين جايد واحد اول الطابور والتاني أخره
عشان يدلولنا علي الطريق وياخدوا بالهم مننا لو اي حد عطل منه البيتش باجي يصلحوه بسرعه
وكمان فيه عربيه نقل صغيره عليها مصور فيديو للي يحب ياخد فيديو للرحله
ممكن واحد يركب لوحده او اتنين مع بعض مش بيفرق
انا طلعت لوحدي خفت حد يطلع معايا يقع قلت خليني في السليم
اقولكم علي حاجه انا كنت خايفه جدا اني اقع علي ضهري وده خلاني اول عشر دقايق
مش مركزه وكمان قلقانه واهلي فضلوا يضحكوا عليه لانهم اول مره يشوفوني خايفه
وكمان عشان زي مابيقولوا اني اسطي سواق درجه اولي
البيتش باجي بطل مني كتير في الاول لكن عم سعيد عبد الحميد
ده كان اول الطابور اللي بيرشدنا علي الطريق غيرلي البيتش باجي
وقالي حتاخدي بعد شوي وعلي مهلك وانا جنبك المهم انك ماتقعيش ولا تتعوري
قال يعني انا كنت مطمنه عشان يقلقني ويقولي ماتقعيش ولا تتعوري
فضل عم سعيد قريب مني طول الرحله
طلعنا الجبل في حوالي ساعه وتلت . مناظر يا الله عليها سبحان الله
ماينفعش تسمعوا عنها لازم تشوفوها
نحت في الجبال واشكال الجبال وتلاقي شجره طالعه في وسط الجبال
وصلنا للكافتيريا البدويه وشربنا قهوه عربي وشاي علي الفحم وكتير شربوا شيشه وكركديه بارد
وكان ضمن الجروب بتاعنا اتنين خطيب وخطيبته من اسكوتلاندا
هو كان طويل وعريض علي راي عادل امام مشرئب الفلنكاتي
وهي كانت صغنونه ورقيقه جدا واموره علي رأي الصعايده
( جنزوره )
يعني ممكن يطبقها ويحطها في جيبه
لما وصلنا الكافتيريا في الجبل صاحبها من البدو
وهو بيجبلنا الطلبات لقيته معجب بيها خالص
فضحكت وغمزتله وهو ياحرام زي ماصدق قالي بزمتك مش خساره
العصفوره دي تجي مع الفيل ده وسالني شفتي فيلم تيتانيك
قلتله ايوه قالي دي شبه روز . لما دققت فيها لقيها فعلا شبه
Kate Winslet
الراجل ساب كل شغله وقعد جنبي عشان هي قاعده قدامي
وقالي نسائهم سبايا لنا .. قعدت اضحك عليه
كان فيه خيمه بدويه للغدا اكل بدوي ورقص وموسيقي الرحله دي ممكن تكون الفجر او الضهر او بالليل
في جمال للي يحب يركب ويتفسح في الجبل
وكمان فيه خيول لنفس الغرض . بس لازم وجود جايد عشان يعرفوا يرجعوا
في طريق العوده سبقت الكل اهلي ماكانوش عارفين يحصلوني
لاني عرفت اتفادي اي هضبه او طريق معرج
العوده كانت تقريبا نص ساعه لاننا رجعنا من طريق سهل
وكنا لفينا حوالين الجبال في طريق الذهاب
رجعنا مهدودين بس برضه نزلنا خليج نعمه بالليل


الرحله اللي بعدها كانت بحريه
بعتولنا الباص ياخدنا الساعه الساعه 8,30صباحا وصلنا للمارينا الساعه 9 صباحا
طلعنا البوت مع ناس كتير مصريين واجانب
اول ما طلعنا طلبوا مننا نقلع الشوز او الصابو
كان فيه اتنين زي جايد واحد شرح للمصريين بالعربي
والتاني شرح بالانجليش للاجانب
اللي شرح عربي كلفتهم
الشرح قال فيه اننا حنروح لرأس محمد
ولينا 3 وقفات في الطريق الاولي مدتها 45 دقيقه
والتانيه برضه 45 دقيقه عشان نعمل
Snorkeling
وسال مين بيعرف يعوم كويس ومين بيعرف نص نص ومين مش بيعرف
اللي نص نص واللي مش بيعرف لبسوا Life jacket
اما الوقفه التالته Ferr
وورانا انواع الاسماك اللي لو جت جنبنا مانلمسهاش
لان في منها مسمم وكمان طلب نقلع اي خاتم او سلسله
لان في اسماك ممكن تجي تشد السلسله او الخاتم وتكون مسممه
سلمونا النظارات والزعانف قبل ماننزل
الاطفال كلهم نزلوا ب Life jacket
طول الرحله مشاريب بارده وسخنه فري
والغدا اسماك بعد الوقفه التانيه
وكان open buffet
الوقفتين نزلنا ورا بعض اول وحده وصلنا للشط وارتحنا علي الرمل ورجعنا
الوقفه التانيه كان لها خط سير مافيهاش راحه
وطبعا واحد مسئول من الشركه اللي عملنا معاها الرحله في الاول والتاني في الاخر
وكل ما يوقف البوت لازم يرموا حبل عشان لو حد تعب يمسكه
بعد كل نزول لما نطلع المسئولين اللي معانا يتحفونا بفاصل رقص شرقي
انا ملاحظه ان الشباب حاليا بيرقصوا احسن كتير من الصبايا
الاسماك الونها واشكالها سبحان الخلاق الاعظم علي جماله
حاجه تخليك تسبح لربنا طول ما انت شايفها
جمال بصراحه مايتوصفش انما يتشاف
الوقفه التالته بسطت الاطفال جدا لانها كانت طويله
رحله العوده برضه ممتعه ولوانها مرهقه بس جميله
رجعنا علي المارينا الساعه خامسه
الجو كان جميل وحمدنا ربنا
انما قلب تراب امبارح واحنا راجعين بعد ماخلصنا رحلتنا
رجعنا القاهره وفتحنا الموبيلات والتليفزيون وقرينا الجرايد
والدوامه العاديه ابتدت تاني والحياه بقت عاديه
اوعوا تفكروا تغيروا المدونه ابقوا معي
اوعوا تروحوا بعيد























































هناك 5 تعليقات:

Unknown يقول...

كالعاده دائما تسعدينا برحلاتك الشيقه
سيان داخل مصر او خارجها
بس رحلة شرم دي بالذات مع الصور والشرح المميز والمشوق جعلني اكثر اصرار لزيارتها عند نزولي مصر ان شاء الله شكرا لك كلك ذوق
تقبلي خالص تحيااااااااااتي
سواح

غير معرف يقول...

ححوش واعمل جمعية واقبضها الاول وانزل شارم بس يا خوفي يمنعوني من الدخول ههههههههههههههه
وابقي خسرت تزكرة السفر
علاء الخيام
مصر ديما جميلة وحتفضل جميلة بس يا ريت جمالها يكون لاهلها

غير معرف يقول...

ليلي هانم
رحت شرم الشيخ كتير بس لما قريت اللي كتباه عنها حسيت اني معاكي في الرحله . وحروح تاني عشان استمتع زي ما استمتعت وانا بقرا موضوعك
بصراحه انتي لازم تشتغلي بالصحافه
رشاقه قلمك تؤهلك
تحياتي ياهانم
دكتور محمد عمر

غير معرف يقول...

السلام عليكم
والله انا سعيد للغاية بوصولى لطريقة النشر على المدونة بعد ما دخت السبع دوخات ... بس معلش .... العلمو نووووووورون
ليلى تسلم ايديكى والله على الأسلوب الجميل فى الكتابة .. خفة ظل راقية .. وفى الوقت نفسه معلومات ممتازة ... انا كنت هاموت من الضحك على المشرئب الفلنكاتى ده ..
أحييك والله بكل ود .. تسلم ايديكى وإلى الأمام دااااااااائما
أحمد البكرى

غير معرف يقول...

استاذتنا ليلى
تحياتى .. يمكن تستغربى انى انتظرت وقت لغاية مااكتب تعليقى على الموضوع ده بالذات
انا شخصيا ارى فيه علامة فارقة فى كتاباتك .. ليس معنى هذا ان كتاباتك السابقة واللاحقة لا تعجبنى بالعكس .. لكن حدسى وظنى انك تستطيعى ان تبدعى فى هذا النوع من الكتابة وهى ادب الرحلات .. اما لماذا انتظرت وام اكتب تعليقى الا الان .. لان كنت انتظر ان ارى ردود الافعال على الموضوع لكى اثبت لكى ماتكلمت به شفاهة معكى وهو ان هذا الموضوع مميز جدا .. وانك استطعتى ان تنقلى الاخرين معاكى الى شرم الشيخ رؤها بعينك وسمعوا اصوات الناس واشتموا رائحة البحر .. هذا هو المغزى وعلامة النجاح بالنسبة للكاتب لادب الرحلات
استغلى سفرياتك فى كتابة هذا النوع من الادب .. وتستطيعين اعادة كتابة ماسبق عن رحلاتك بنفس الاسلوب الذى يأخذنا معك الى رحلتك .. دائما وابد موفقة ان شاء الله
لكى كل التحية والاحترام
ذى يزن