3‏/11‏/2008

تعدد الزوجات


أعزائي
في استبيان عملته في اوائل الصيف عن تعدد الزوجات
وكنت نشرته في مدونتي اللي بقدره قادر مالقتهاش
والله عن جد ما لقتها وبدخل بلاقي مكتوبلي ان مافيش ولا تدوينه
بس برضه مش بيأس عملت وحده غيرها
المهم ده استبيان شوفوا وياريت اعرف رايكم
بالمناسبه الصوره دي بتوضح ان في قلوب بتساع من المحبين كتير
او يعني زي مابيقولوا وسعه زي رحمه ربنا
تعالوا نشوف الاستبيان
أضع اليوم الإستبيان أمامكم بلا إضافات ولا اي تغير في كلمه او حرف . ولم انسى رأي الأرامل والمطلقات .
السؤالين هما
1 - هل تقبلي ان يتزوج زوجك من زوجه ثانيه ؟
2 - الشرع حلل له 4 زوجات هل تخالفي الشرع ؟
في حالة الاجابة علي السؤال الاول بنعم فلا اقوم بطرح السؤال الثاني
========================================
جوليا : 21 سنه متزوجه من سنتين ولها ابن سنه وشهرين . طالبه جامعيه
-
طبعا لا............ يموت أهون مايتجوز عليه .
-
هو احنا ماشين علي الشرع في كل حاجه ؟ ماجاتش علي دي .
----------
باكينام : متزوجه من 8 سنوات ولها ابنه 6 سنوات .ومقيمه بنيويورك
- لا ما اقدرش .... يتجوز عليه ؟
الشرع حلل بس مش كل حاجه ممكن المرأة تستحملها وانا مش حستحمل .
---------
ساره : 28 سنه متزوجه من مسلم من 9 سنوات ولديها طفلين وتقيم في فلوريدا
-
لا ما اقدرش اشوفه مع وحده غيري .
-
انا اقتنعت بالاسلام واسلمت بس انا مأقدرش حد يشاركني فيه .
---------
وصال : 42 سنه لبنانيه متزوجه من 15 سنه ولها 3 ابناء ومقيمه بالقاهرة .
-
لا حبيبتي ما بستحمل ضره بموت .
-
ما بستحمل يكون الي ضره ، الشرع علي راسي بس ما بستحمل .
---------
فريده كويتيه 34 سنه زوجه من 14 سنه ولها 4 اولاد
-
مايخالف هو متجوز وهاده حجه تبوني ارفض واخالف شرع الله .
---------
نرمين مصريه تقيم في الامارات 34 سنه متزوجه من 14 سنه ولها 3 ابناء .
-
ضحكت ضحكه عاليه وقالت ... مش مدياله الفرصه ولا الوقت انه يتجوز عليه
بس لو عايز ياخد ولاده معاه .
-
شرع ربنا ما اختلفناش بس لو حصل يبقي اكيد في عيب في علاقتنا ويمكن المسئوليه الاكبر عليه انا
وبعدين التعدد مش علي الفاضي والمليان ده له ضوابط والا يمكن انا متجوزه الحاج متولي سعيد .
---------
بثينه 43 سنه (شغاله) مقيمه بالقاهره متزوجه من 23 سنه لها ابن وابنه .
يا ستي ماهو متجوز عليه وماله ده حتي انا وضرتي بنساعد بعض بس برضه بغير عليه منها ومش حقدر اعمل حاجه .
---------
ورده . 31 سنه فلبينيه مسلمه مقيمه في دبي مربيه اطفال لها ابن ومتزوجه من 12 سنه
-
لا ماما مايصير يتجوز انا جاعد هون بشتغل وهو جاعد مع الابن وما يقدر يتجوز واحد غيري
انا بعرف القرأن وبصلي بس الشرع ما بعرفه .
---------
علا 42 سنه امريكيه مصريه منقبه زوجه من 14 سنه ولها بنتان ومقيمه بنيويورك .
-
انا لو قصرت يبقي لازم يتجوز عليه ولو انه شيء صعب .
-
شرع ربنا .. مين انا عشان اقول لا ؟.
---------
زوجه حارس البيت صعيديه من دشنا 38 سنه مش فاكره اتجوزت امتي بس كان في العيد الصغيرعندها 5 اولاد .
-
يتجوز ازاي وانا حصرف علي العيال منين دول كلهم في المدارس ،واذا اتجوز ، حسيبله العيال ومصر كلها وارجع بلدنا .
-
ياست هو الشرع حيصرف علي العيال لما وحده تانيه تاخده وتبعده وتجيبله عيال .
هو يعني ايه الشرع بيقول كده انا مش بفهم انا مش متعلمه زيكم .
---------
الخضريه اللي في السوق
فكيهه. بتقول 30 سنه وماجاوبتش علي اي حاجه الا :-
ايوه وماله ياست هانم ماهي برضه لما بتعب بتنزل عالفرشه بدالي تبيع . والدنيا كلها شقي ولازم نتحمل بعض .
---------
كريستين 35 سنه متزوجه من مسلم وعايشه في لوس انجلوس .لها بنتان
لا ما اقبلش .
معليش انا مش بفهم في الشرع لاني مش مسلمه بس اولادي مسلمين زي ابوهم .
انا حبيته واتجوزته وهو مسلم وانا مسيحيه يبقي ازاي يتجوز عليه وانا بحبه
----------
-
سهام 48 سنه متزوجه من 30 سنه ولها 3 ابناء .
-
حصل وكان عرفي وسابها وكل شويه وحده جديده .
-
اعمل ايه هو بيتحجج بالشرع وانا راضيه وبقول ضل راجل .
---------
اما راي الارامل فكان
--------
زوزو مصممه ازياء . لا ماكنتش اقبل بصي اصل دي صعبه عليه لاني وقفت جنبه كتير
وعملتله حاجات كتير شقيت وتعبت وربيت وكبرت وده صعب علي كرامتي .
--------
نجلاء مقيمه بين القاهره ونيويورك ودبي
لا طبعا لو فيه عيب معليش يدور علي الشرع
انا ست بيت وموظفه وبساعده في كل حاجه خاصه بالاولاد
ومافياش عيب يخليه يدور علي وحده بحجه الشرع
---------
( غ ) رفضت زكر اسمها .
ياريته كان عاش واتجوز عليه 3 مش وحده .
---------
(ج) رفضت زكر الاسم .
تقيم بين القاهره وملبورن باستراليا
-
لا طبعا وماكانش ممكن يبص لغيري اصلي كنت كذا ست في بعض .
-
الشرع علي عيني وراسي بس انا بني ادمه ما اقدرش احس ان جوزي نايم في حضن وحده تانيه .
---------
اما رأي المطلقات :- فكان
------
ريم مديره في احدي الشركات 43 سنه .
لا ماكنتش اقبل . وده كان سبب طلاقي عرفت انه ناوي يتجوز قلبتها علي دماغه واطلقنا .
-
معليش الشرع لما بيوصل لبيوتنا في حاجه زي كده احنا بنهرب منه .
---------
سماح مضيفه 33 سنه
لا طبعا ازاي اوافق . انتوا كل حاجه تقولوا الشرع
انتي بزمتك ماشيه علي الشرع في كل حاجه ؟ . طيب لو انتي مكاني حتوافقي .؟
---------
امينه معيده في الجامعه 29 سنه .
-
لا طبعا انا مش عايزه لا نص ولا ربع ولا تمن راجل انا عايزه راجل كامل ليه لوحدي
زي ما انا كامله ليه لوحده .
-
بلاش تتمسحوا بالشرع بطلوا شعارات .
**********************************************************
كفايه كده عندي امثله كتير
بس ماينفعش تتنشر .
تارجحت الأ قوال بين رافضه ومؤيده
أو مغلوب علي أمرها .
ماعنديش تعليق
تحياتي لكم جميعاوإلى لقاء في موضوع آخر
ويارب يدوم الود بينا .
------
المدونه الجديده اذا حبتوا تشوفوها

هناك تعليقان (2):

غير معرف يقول...

انا باحى السيدات اللى اتكلموا بصراحة منهم من ذكر اسمة واحى السيدات اللتى لم تذكر اسمخا كمان الموضع سطرح بعض الاسئلةهل صحيح احنا عاملنا بالشرع فى كل الامور حنى وصلنا الى الزواج 0
الاحرى ان نبحث عن الدوافع التى تجعل الرجل يقدك على عملية الزواج0
ودى اسباب كتير لو كام الايمان فى تلاسرة لتناقشوا بهدوة وهذا الذى ااكد علية0
فى راى التعددكما علمت من اشرع ان يكون هماك اسباب اولها ايمانية وهدا يرجعنا الى كلامة فى الاول لو الاسرة متفقة فى الدين ان الزواج من ارملة لحكايتها من المجتمع0
اذا كانت الزوجة لاتنجب يقدم الرجل على الزواج بعد نوافقة الزوجة وبهدوء0
جبر خاطر من من الرجل لبنت تعدت السن فى الزواج
وهطذا المقصود منها فى المقام الاول المعاملة الحسنة
وفى حالة ان كانت الزوجة غير مريحة فى الحياة مع الزوج0
وانا لست ضد المرأة فى ان تحافظ على زوجها ومنزلها ولقينا تعليقت من بعض السيدات بتقول انا مش مدياة فرصة اى انها تريجة فى حياتة0
اذ نستنتج ان الشرع شىء جميل ويحافظ على التكافل الاجتماعى بين البشر

كاتب الأنثى يقول...

بصراحه من حق اي زوجه انها تحتفظ في زوجها ولكن لا ننسى انه من حق الزوج ان يتزوج ولكن احيان ينسى الرجل انه من حق الزوجه ان يعدل معها

بكل صراحه الاستطلاح حلو وفيه فايده ولكن ... السؤال المنسي هناك ... هل زوجه مريحه زوجها للأخر .. بالتأكيد جواب العقل لا مافيهاحد مرتاح ولكن هل يمل الزوج المنزل هذا السؤال المهم ؟

اشكرك على الدعوة واعجبني استطلاعك ولكني تمنيت لو لميتي الموضوع بشكل اكبر وتركتيه على شكل اجزاء افضل لأن الموضوع كبير وانتي تناولتيه من جاب واحد فقط

دمتي بود
عبدالله