أعزائي
كل عام وانتم سالمين
رمضان كريم
المفروض كنت كتبت عن رمضان .. بس بصراحه انا متغاظه جدا مننا
علي فكره انا مش بعرف اكتب في السياسه
ممكن اسمع سياسه ... بس قلت ممكن افكر معاكم بصوت عالي
أو بالاحري افكر كتابيا
ايه اللي حصلناأغلبنا كان شمتان يوم حريق مجلس الشوري
التجمعات والفرجه علي الحريق وعدم المشاركه الا بالفرجه
فين راحت اخلاق الشعب المصري اللي لما يطلع حد كبير في السن الاتوبيس يقوم كام واحد ويعرض عليه يقعد مكانه
ولما بيلاقي حد كبير في السن معدي الشارع بياخد بايده ويعديه الشارع
حصل ايه مش فاهمه كل واحد وقف يتفرج علي الحريق ويقول وانا مالي
هو انا حطفي الحريق .. وفي غيره قال ( ياريت تولع ) قد كده هانت علينا مصر
بقول يمكن يكون ده نتيجه ان الشعب مش بيشارك في اي شيء لا قرارات ولا انتخابات ولا ولا ولا
الشيء الوحيد هو انه بيجري ورا لقمه العيش .... حقيقي شعب مسكين
بيقف في طوابير العيش بالساعات .... ويقف في اشارات المرور برضه مده مش صغيره
ويجري ورا الاتوبيس وينحشر فيه زي علب السردين .... ويتشاكل مع سواق التاكسي اللي برضه طالع عينه وبيلف طول اليوم
او مع سواق الميكروباص او الصبي اللي معاه عشان ربع او نص جنيه
وياويله لو كان فيه تشريفه او حد من الوزراء معدي يقف في مكانه ومايقدرش يتحرك الا بتحرك الموكب
هو نفسه اللي بيجري ورا فرصه عمل او يدور علي وسطه لتعين ابنه او بنته بدل ما الولد يقف طول اليوم علي الناصيه
والبنت المسكينه ممكن تكون درست واتفوقت وتقعد في البيت منتظره فرصه عمل تفلي الجرايد وتجري هنا وهناك
وبرضه من غير فايده طالما مافيش واسطه
وهو برضه اللي بيقاسي من ارتفاع الاسعار
ونلاقيه هو نفسه اللي بكي علي ضحايا العباره وغضب وثار لما ممدوح اسماعيل اخد براءه
واتوجع قلبه علي حريق مسرح بني سويف
وحزن علي قطار الصعيد
ويتذل لو له شغللانه عايز يخلصها في مصلحه حكوميه يتقالوا فوت بكره وبكره مش بيجي
وبيشوف المدرس بعد اكتر من 20 سنه تدريس بيمتحنوه عشان الكادر الجديد
ويشوف البعثه الرياضيه وهي راجعه من بكين بتجر خيبتها
وبيسال وله الحق انه يسال فين محاسبه المقصرين وعقابهم
ليه مش بيحاسبوا اللي بيشتروا شاليه في برتو مارينا ب اتنين مليون بس
رخيص خالص نجيب منه لكل ولد وبنت واحد يلم فيهم اصحابه في الويك اند
في الاخر المصري مش ممكن يكون بيشمت ممكن يكون زعلان مش طايق نفسه
بس حنقول ايه غير ان الصمت لايعني الرضا
ولك الله يامصر
ويارب يديم الود بينا
هناك تعليق واحد:
لولا...اولا كل سنة وانتى طيبة وثانيا انا بضم صوتى لصوتك واسال معاكى بصوت عالى هووووووة فين المصرى واتمنى الا ياتى يون وتكون اخلاق المصريين المعروفة قديم يحكى عنها كما يحكى عن الحيوانات المنقرضة...بس عارفة انا لو تسمحيلى لية راى فى موضوع حريق المجلس وهو ان الشعب عندة حالة انفصال وطلاق بالثلاثة بين وبين الحكومة وحاسس ان اللى اتحرق دة بيت مرات ابوة مش بيت امة وعلشان كدة الشعب كان فرحان فى الحكومة قصدى فى مرات ابوة ههههههههههه واعتبر ان الحريق هو سقوط لاحد مراكز الهيمنة للحكومة...عموما انا سعيد جدا بيكى انك لما بداتى تكتبى سياسة او لما فكرتى سياسة فكرتى بعين مصرية بحتة..اشارك مرار الالم على المصريين ولاكن يبقى الامل دائما على ان لا يتسلل الياس الينا فهذا ما يراهن علية المتخاذلون...كنج
إرسال تعليق