شواطيء الصفوة

أعزائي

النهارده حنروح مشوار صغير لحد العجمي نشوف فيه شواطي الصفوة

ضاحيه العجمي تقع غرب مدينه الاسكندريه وتحوي عدد من شواطيء الاسكندريه

تتميز برمالها البيضاء الناعمه .

كاربيانو

------

مصيف الصفوة وابناء الذوات . يمنح عضويه مجانيه لفئه معينه معروفه بالاسم

هذا الشاطيء لنجل احد الوزراء المخضرمين .
يمنح كارنيه بصورة صاحبه (ميمبر شيب )

تجد حراسات مشددة علي البوابه رجال امن يرتدون زي موحد ومنهم فتايات لزوم تفتيش الجنس اللطيف عند الدخول .

وكذلك حراسات علي نقاط التقاء الشاطيء بالشواطيء المجاوره لعدم التسلل عن طريق البحر .

به مكان للرقص والموسيقي صاخبه جدا ( ممكن تتعصب منها ) الشباب والكبار والعواجيز كله بيرقص لدرجه اني سالت هو الرقص هنا اجباري زي ما بنشوف في الافلام القديمه عباره (الدخول بالمشاريب )

في اماكن لبيع الاطعمه والمشروبات والشيشه . وفي حاجه مهمه جدا بتلاقي بياعين شايلين ( ايس بوكس ) وبيبيعوا جندوفلي مستوي

طعمه حلو مش بطال . في البلاجات العاديه بتلاقي البياعين ممكن يبيعولك لب وسوداني انما هنا تلاقي البياع بينادي ويقول

ايوه فزدق كاجو . يمكن ده نتيجه العولمه ممكن والفريسكا هي الوحيده اللي ما اتغيرتش .

كل ليله في كاربيانو سهره ممكن يجيبوا مطرب مش مهم يكون له اسم المهم انه يغني .

بيكون رسم الدخول مع العشاء للفرد الواحد 1000 جنيه الف جنيه فعلا. وماينفعش يدخل واحد لحاله لازم يكون كابل .

ماينفعش انك تروح البلاج بدري زي خلق الله الطبيعيين بما انه بلاج للصفوه لازم تروح حوالي الساعه 2 او 3 بعد الظهر

وتقعد ممكن لغايه الساعه 9 مساء وتروح عشان تقدر ترتاح وتستعد للسهره اللي مش بتبتدي قبل الساعه وحده صباحا .

يوم الجمعه من كل اسبوع بيكون فيه مهرجان بتلاقي كتير من نجوم السينما والمسرح والتليفزيون ولعيبه الكوره ورجال الاعمال

موجودين بالشاطيء

بتتفرج طول الاسبوع علي احدث موديلات البكيني والكاش مايو والاكسسوارت والصراعات الجديده وبتبلغ الذروه يوم الجمعه .

الرعاه الرسميون لهذا العام .

مصر للطيران .. بنك HSBC .. فيروز ..دوريتس ..جريده اليوم السابع ..نجوم اف ام ..نستله ..مجله ايليت ..بارسوشي ..

كونكورد السلام اوتيل .. TE data ..مشروب بوكاري سويت .. طعمه وحش جدا اعوذ بالله .

الشاطيء التاني :-

البراديس

____

شاطيء خاص بمنطقه جمعيه شاطيء الفردوس من اصحاب الفيلات والشقق والشاليهات

لدخول الشاطيء يجدد الاعضاء الكارنيهات سنويا وكذلك الكارنيهات الخاصه بالشماسي والكراسي

الشاطيء مقسم الي اقسام وله رعاه

قسم برعايه كوكاكولا

قسم برعايه فيروز

قسم برعايه ايديال استاندر

قسم برعايه براديس بيتش

يقام به حفلات اسبوعيا . كما يوجد به عدد كبير من الفنانين ورجال الاعمال .

به ملعب خاص بالراكت . ودي اللي ممكن بينزل البحر فيها المحجبات

الظاهره اللافته للنظر هذا العام هي ارتفاع عدد المحجبات .

تجد جميع المتناقضات في هذه الشواطي الحجاب والشورت ... المايوه الشرعي والبكيني

الاطفال في سن التانيه عشر يدخنون الشيشه والسجاير . العواجيز بيرقصوا الرجاله منهم بالشورتات والتي شيرت اما عواجيز الفرح بالبكيني والمايوهات وبرضه ممكن شورتات .

من سوء حظي اني بروح اتفرج كل سنه واقول اخر مره بس الفضول بيخليني ارجع السنه اللي بعدها اتفرج تاني واشوف الجديد

اخيرا اقولكم ان الشواطيء الخاصه بوضعها الحالي اصبحت ظاهره غريبه ودليل علي التغيرات التي طرات علي مجتمعنا خلال

السنوات الاخيره .

مافيش غير اني اقول زي ما سعد زغلول قال مافيش فايده

ويارب يديم الود بينا