وقفه مصرية

أعزائي

واحنا ماشيين في الشارع في مصر بنلاقي يفط كتير مكتوب عليها الاتي :-

وقفه مع نفسنا لمصلحتنا كلنا قبل مانزيد مولود لازم تتاكد ان حقه علينا موجود .

نحكم عقلنا ..... نتعلم كلنا

نحكم عقلنا ..... نشتغل كلنا

نحكم عقلنا ..... ناكل كلنا

نحكم عقلنا .....نشرب كلنا

نحكم عقلنا ..... نشبع كلنا

نحكم عقلنا ..... نتعالج كلنا

نحكم عقلنا ..... نستريح كلنا

السؤال هو ..... هل تناقص النسل يؤدي الي زيادة الدخل ؟

ام عندما يزيد دخل الاسرة ويرتفع مستواها الثقافي والتعليمي والصحي تحدد النسل ؟

العامل والفلاح يمثل له النسل عزوة وعائله كبيره بها خمسة او ستة أبناء وربما أكثر. فمن هنا نجد ان زيادة السكان في مصر تحدث في البيئه غير المتعلمة والاقل ثقافه والاكثر فقرأ. ولذلك لم تنجح برامج تنظيم الاسرة خلال السنوات الماضية .

ارتفع عدد السكان حسب الاحصائيه الاخيرة للجهاز المركزي للتعبئة والاحصاء بنسبة 24.73 % ليصل الي 76 مليونا و699 الف نسمه

مقابل 61 مليونا و492 الفا في تعداد عام 1996.

كما بلغت الزيادة السكانية في السنوات الاخيرة نحو 23 % ومن المتوقع ان يصل عدد سكان مصر 100 مليون بعد 12 سنه .

بس اكيد الاحصائيات دي مش صحيحه 100% لان لما مندوب التعداد بيروح يسال في كتير مش بيقولوا علي عددهم الاصلي وده له اسباب كتير منها عدم قيد كل المواليد لاي سبب ... التهرب من التجنيد .... خوفهم من الحسد لان عددهم ماشاءالله كبير .... وساقطين القيد من المسنين .... وفي مناطق مش بيوصلولها مندوبين التعداد مثل العشوئيات . الاماكن البعيده عن العمران .ومعقل اللصوص وتجار المخدرات .

ويقول الخبير السكاني ومستشار المركز الديمغرافي الدكتور / محمود فرج ان الوضع ينذر بخطر شديد ويتوقع وصول السكان الي 78 مليونا .

وكان أول من حذر البشرية من خطر تكاثر السكان في العالم البريطاني توماس مالتوس (1766 _ 1834 ) ونشر نظريته عام 1798 وتفيد بالاتي :- سرعة الزياده في السكان تفوق سرعه الزيادة في انتاج الغذاء .. والزيادة النسبية في انتاج الغذاء تحفز علي زيادة السكان ... ولكن هذه النظريه لاقت معارضه شديده في حينها .

اما شيخ الازهر فانه يرفض وبشدة قانون تنظيم الاسرة باعتباره شأنا خاصا ومتروكا لكل زوجين . ولكنه يوافق علي ضرورة ارشاد الاسرة ونصحهم بخطورة الانجاب المتكرر واهميه تنظيم الاسرة ..... يعني بيحير الناس وبيخليهم يقولوا نعمل ايه نفتح الشباك والا نسده.

وكذلك يقول دكتورعبدالله ربيع استاذ الشريعه بجامعه الازهر . انه في حاله تدخل السلطه في دوله ما واصدار قانونا ينص بعدم انجاب أكثر من ثلاثة اطفال فانه غير جائز شرعا ..... كما انه لايجوز ان يجري الرجل او المرأة عملية جراحيه لايقاف القدرة علي الانجاب لان تحديد النسل ممنوع شرعأ اما التنظيم فمطلوب .

ويتفق معاه في الرأي الشيخ جمال قطب رئيس لجنة الفتوي السابق بالازهر الشريف .

تعليق صغير . هي السلطه فاضيه للتحديد او المنع اصلا واكيد بتقول خلي الناس تخلف عشان يحلوا من علي سمانا ويتلهوا في عيالهم . هما يعني حيكتبوهم علي اسامينا .

أخيرا راي الدكتوره سعاد صالح استاذ الفقه المقارن بجامعه الازهر ... تري ان قله الوعي بالمشكله السكانيه ليس مسئوليه الدعاه فقط واضافت انه من الضروري أعادة قراءة حديث الرسول الكريم عليه الصلاه والسلام .الذي يقول

( تناسلوا تكاثروا فاني مباه بكم الامم )

فالمباهاة ليست بالكثرة العددية وانما الكثرة التي تؤدي الي الاستفاده منها .

والله انا احترت واكيد انتوا كمان محتارين لكثره الاقاويل وتضاربها ... تفتكروا في حل ؟

والا حنقول لك الله يامصر

ويارب يديم الود بينا