انتخابات مجلس الشعب 2010

أعزائي

كل خمس سنين وانتم بخير  النهارده كانت انتخابات مجلس الشعب

قلت اعمل جوله علي لجان مصرالجديده بصفتي من سكانها 

اول شيء شفته الصبح الساعه 9 ونص صباحا في التليفزيون

عمنا الحاج الكبير لما انتخب هو ومرات عمنا واولاد عمنا في لجنه

مصر الجديده الثانويه النموذجيه للبنات

ودي تعتبر اشيك وانضف لجنه في مصر كلها

اللجنه دي بالذات لما لها من اهميه تلاقوها دايما هادية

نقول الاول عن نظام الانتخابات

المرشحين 508 نصفهم عمال وفلاحين والباقي فئات

منهم 64 سيده ودي كوته المرأة

فتحت ابواب اللجان في الثامنه صباحا

واغلقت في السابعه مساء

222 لجنه انتخابية بيتبعها   144.500 لجنه علي مستوي الجمهورية

تحت اشراف 2286 قاضيا و276 الف موظف من العاملين

بالحكومة  والهيئات والمؤسسات وذلك لتولي رئاسه وعضوية اللجان

لما تدخل اللجنه تلاقي بوستربيوضح كيفيه الادلاء بصوتك

بعد ما تنتخب ستجد صندوقين الاول للمقاعد العادية اما الثاني فهو الخاص بمقاعد المرآة

لجان هاديه جدا ولجان ساخنه جدا

طبعا انا كنت حكتفي باني الف علي لجان مصر الجديده انما جاني تليفون اثناء مروري علي اللجان

قلب كل شيء  بوفاة احد اقاربي وكانت الجنازه من السيده نفسيه

طبعا وصلت قبل صلاة العصر بدقايق لقيت هدوء غريب

بعد صلاه الجنازه علي المرحوم  رحنا ندفنه في مقابر الامام الشافعي

المهم بعد كل ده رجعت اكمل المرور علي الدوائر وكان من حسن حظي اني تهت

اه والله تهت ولقيت نفسي في ازقه وحواري وزحمه رهيبه في الامام الشافعي وتحت كوبري التونسي وزينهم

والمنيل وشارع الهرم 

شفت بصراحه حاجات ماكنتش اعتقد اني ممكن اشوفها

وقابلت ناس غلابه جدا رايحين ينتخبوا  سالت ست هو حضرتك بتنتخبي ليه

قالتلي اصل اللي حنتخبه وعدني انه حيطلب انهم يزودا معاشي

ووحده تانيه سالتها ليه بتنتخبي  قالت عشان بيدوني 100 جنيه

طبعا الكارت الدوار  بقي حاجه عاديه واللي مش عارف ايه هو  حعرفه

تدخل اللجنه ومعاك بطاقه ادهولك بره هما محددين اللي حتنتخبه

بتدخل  وطبيعي انهم يدوك بطاقه عشان تعلم علي اللي انت عايز تنتخبه

بتطبقها وتشيلها وتحط اللي معاك من الاول ولما تخرج تديها للي كان ادالك البطاقه اللي علموا عليها

وتاخد المعلوم  وهو غالبا بيكون 100 جنيه

وحده ست كبيره لقيتها بتبكي سالتها مالك قالتلي اصلي حطيت الفاضيه

وضاعت عليه الفلوس

سالت واحد راجل  مسن هو حضرتك بتنتخب كل مره قالي ايوه

قلتله منتظر ايه من اللي حتنتخبه

قالي هو وعدنا انه يكون معانا ولو لينا طلبات حيحققلنا طلباتنا

لقيت ست  مسنه ومعاها ولد حوالي 10 او 11 سنه مسندها

سالتها حضرتك عندك تذكره انتخابيه قالتلي ايوه سالتها جايه تنتخبي حد تعرفيه

قالتلي ايوه انا بنتخبه كل مره

قلتلها وهو بيساعدكم قالتلي كل مره يوعدنا  طبعا مفهوم الباقي

ناس غلابه وطيبين وبيصدقوا كل حاجه

هما دول اغلب الشعب المصري

اغلب اللي راحوا الانتخابات هما المسنين والغلابه 

انما الشباب بيهتف ويرقص ويهيص

في الازقه والحواري اللي رحتها لقيت الطبل والرقص والميكرفونات

  وده مايمنعش من وجود البلطجيه  والبادي جارد للمرشحين

سالت واحد كان متطوع انه يمشي المرور عشان سياره فولكس باست سوده

كانت عايزه تركن في الزحمه .سالته بعد ماوقفني عشان يخليها تركن

قلتله مين ده اللي وقفتني عشانه قالي ده ابن الدايره

طبعا ضحكت من كلمه الدايره وسالته هما هنا في ابناء كتير للدايره

قالي ايوه طبعا  وسابني وجري عشان ابن الدايره نزل من العربيه

في دائره مدينه نصر الدعايه مكثفه امام شركات البترول

وطبعا كلها لوزير البترول سامح فهمي

كل مندوبي مرشحي الحزب الوطني هادين جدا

انما مندوبي المستقلين والاحزاب  في غايه العصبيه

الشرطه موجوده بكثرة وكمان عربيات الامن المركزي

طبعا رحت انتخب حوالي الساعه 6.10 مساء

دخلت اللجنه  الشرطه وقفتني علي الباب عشان تشوف بطاقتي الانتخابيه قلتلهم انا بنتخب بالبطاقه

قالولي طيب ادخلي بصراحه كانوا في منتهي الادب

دخلت  سالوني انتي لجنه كام قلتلهم لا مش عارفه  لاني فعلا ناسيه

قالتلي وحده ممكن تروحي الكمبيوتر تعرفي لجنه كام  سالت فين هو

شاورتلي علي ممر  دخلت لقيت ناس كتير قاعده

سالتهم فين الكمبيوتر فوجئت ان مافيش كمبيوتر 

وحده اتبرعت وخدت اسمي واتصلت بحد علي الموبايل وقالتله اسمي

اقل من دقيقتين وقالتلي لا مش موجود

قلتلها ازاي قالتلي في كتير مالقوش اسمائهم قلتلها ايه الحل قالتلي مافيش حل

قلتلها يعني اروح  وبلاش انتخب قالتلي ايوه

قلتلها لا انا حنتخب بالرقم القومي قالتلي لا مش حينفع

لقيت مافيش فايده من الصوت الواطي  وبصوت عالي سالت الموجودين

هو احنا لما بنطلع باسبور مش بيطلبوا منا الرقم القومي

ولما بنصرف شيك في البنك برضه بيطلبوا الرقم القومي

ولما بننزل في اوتيل بيطلبوا الرقم القومي

ولما يطلب مني اثبات شخصيتي بيكون برضه عن طريق الرقم القومي

وفي خانه في استماره الرقم القومي بتخيرنا ننتخب في مكان اقامتنا والا في مكان ما اتولدنا

 وده علي اعتبار ان مش كلنا مواليد القاهرة

ماحدش رد زي ما اكون بحكي مع حالي 

طلعت الموبايل وقلتلهم خلاص انا حطلب بوليس النجده يجي يعملي محضر

اثبات حاله انكم مش عايزني انتخب او بالاحري بتسلبوا مني حقي الانتخابي

لقيت الكل قام وجريوا ندهولي رئيس اللجنه

جالي وقالي ايه اللي مزعلك  قولتله مش حعيد تاني  هما حكولك

قالي خلاص هاتي الرقم القومي وراح معايا بنفسه اللجنه وانتخبت والحمدلله

ماهو انا دايما ارازيهم في الانتخابات

واقولكم اوعوا تقلبوا الصفحة

وللحديث بقيه بعد الاعاده

ابقوا معي

لعبه الكراسي الموسيقه

أعزائي

كل عام وانتم جميعا بخير بمناسبه عيد الاضحي المبارك

والسنه الجايه ان شاءالله نكون جميعا صحبه علي عرفات

بصراحه اشتقتلكم جدا وانا عارفه اني وحشه خالص خالص لاني بتأخر عليكم

بس والله الظروف والجو الغير مستقر  وحرق قش الرز كل دي عوامل مساعده

للحساسيه  الصدريه . شفاكم الله وعافاكم

طبعا مستغربين من شعار الحزب الوطني بس قلت افكركم بيه

طالما اني حكتب عن الحزب ولو اني مش عضوه فيه

ولا في اي حزب تاني الا حزب وداد قلبي

طبعا اتفاجئت زيكم من ترشيحات الحزب الوطني اللي كانت مفأجاه

وليه رشحوا اكتر من عضو في كل دايره وفي دايره منهم رشحوا  فيها

ست قدام 4 رجاله  والله دي حقيقه

طب الشرع بيقول ان الراجل له 4 ستات انما الست مالهاش الا راجل واحد

هي دي الحاجه زهرة والا ايه

معليش بقي اصل القافيه حبكت معايا

والسؤال هو حيضحوا بمين لصالح مين والتضحيه دي لزوم عيد الاضحي

يبقي لازم نضحي باكتر من مرشح لكل دايرة

عشان المرشح اللي عليه العين ومظبط اموره هو اللي حينجح في الانتخابات

اكيد النتيجه في الكونترول قالت ان كل الوزراءالحاليين نجحوا نجاح ساحق

وحينالوا شرف التواجد في المجلس الموقر او ( سيد قراره )

بس برضه في دواير مقفوله من 32 سنه زي دايرة الباجور

كانت مقفوله للمرحوم كمال الشاذلي

بس اكيد الحزب حيرشح حد تاني واعتقد ان التاني ده ممكن يكون ابنه

دي مجرد تخمينات بس الايام الجايه حتورينا الكتير

عارفين الانتخابات دي شكلها زي الكراسي الموسيقيه

بس المرشح اللي عليه العين والنيه بيفضل واقف

جنب الكرسي والباقي بيلف علي الموسيقي

واول مايشار للمرشح ان الموسيقي حتقف يقعد علي الكرسي وبكده ضمن الدايره

وباقي المرشحين في الباي باي وسعيهم مشكور

في حاجه تانيه شغلتني جدا  وفكرت فيها كتير لغايه مالقيت تفسير انا اقنعت حالي بيه

عاملين شعارين للحزب الهلال والجمل طب مين حياخد الهلال ومين حياخد الجمل ؟

الهلال اكيد اللي حينجح وحيعلا زي الهلال في السما

اما رمز الجمل ده بقي للي حيشيل الهم ويقعد يفكر ياتري ياهل تري

ناجح والا لا حنول الشرف والا لا

وفي الاخر يطلع من المولد ويقعد علي دكة الاحتياطي لمده 5 سنوات

ياعالم حيحصل فيهم ايه ؟

تفكير جاني من ايام فجأة وهو لو انا رشحت حالي حيكون ايه شعاري

هما شعارين فكرت فيهم الاول الجردل ماتضحكوش مش بقلد عادل امام  في الجردل والكنكه

بس لقيته رمز مناسب ليه  لاني مش حفهم حاجه واكيد حبقي زي الجردل ويجي اي حد يدلقني

والشعار التاني برضه مناسب جدا جدا  برضه اوعوا تضحكوا

هو شعار الحمار لاني اكيد في مساله الانتخابات حشبه الحمار في عدم الفهم

والله يسهل علي عبيده

معليش انا طالعه من دور مرض جامد وممكن يكون مقالي هلوسه برلمانيه

استحملوني زي كل مره امركم لله انا برضه اخف من الانتخابات والترشيحات

وللحديث بقيه بعد النتيجه

بس اوعوا اوعوا تفكروا تقلبوا الصفحه

ابقوا معي



لمصلحه من ؟

أعزائي

ترددت كثيرا قبل الكتابه ولكن وجدت ان قلمي لا يطاوعني علي عدم الكتابة

فالمسائل الدينيه لا يجب ان يكتب فيهاالا المؤهلين دينيا

ولكني اكتب بدافع مصريتي وحرصي الشديد علي ما تعلمناه ونحن صغار

الدين لله والوطن للجميع

فهل فعلا انتهت الازمة التي حدثت من جراء تصريحات

الانبا بيشوي

سكرتير المجمع المقدس للكنيسة المصرية ا\لارثوذكسية

عندما اعلن أن المسلمين حلوا ضيوفا علي مصر في القرن السابع الميلادي

والضيف لا يستقر وله وقت محدد فهل سيرحل من مصر 80 مليون ؟

كما قال ايضا

اذا قالولي ان المسلمين سيرعون شعبي بالكنيسة

اقتلوني او ضعوني في السجن حتي تصلوا لهذا الهدف

كذلك ابدي قلقه من النص القراني في سورة المائدة

بسم الله الرحمن الرحيم

لقد كفر الذين قالوا أن الله هو المسيح ابن مريم

صدق الله العظيم

فهل باعتذار البابا شنوده المذاع تليفزيونيا قد اغلقت الابواب التي فتحت علي مصراعيها

فهل فعلا المسلمين سعدوا بهذا الاعتذار الذي اسماه البابا شنوده

آسف علي ماقال الانبا بيشوي وليس اعتذار!

كما حاول البابا تهدئة الجو في حوارة علي القناة الاولي بالتليفزيون المصري

مع الاعلامي عبداللطيف المناوي

قائلا أن الارض ملك لله وكلنا ضيوف عليه

ولا نستطيع ان نقول ان المسلمين ضيوف الاقباط

انني مستعد ان اقول اننا نحن المسيحيين ضيوف علي

اخوتنا المسلمين فهم الآغلبية

ونجد ان هذه ليست المرة الاولي للانبا بيشوي في الخطأ

لكنه اخطاء منذ عامين في حق الانجيليين

واصبح الان له اتباع  وللاسف الشديد فاننا نجد من كان يكتب ضده بالامس

اليوم دفع آجر اعلانات تسانده

أما المؤسسة الدينيه الآسلاميه المتمثلة في الآزهر الشريف

اصدرت بيان للتركيز علي الهوية الاسلامية للمجتمع

ونجد حاليا علي صفحات الجرائد والفضائيات

ان النزاع اصبح بين الانبا بيشوي ومحمد سليم العوا

الذي تحدث باسم المسلمين

فمن اعطاة هذا الحق ؟

هل وجد أن فضيله الامام الاكبر شيخ الازهر

لا يستطيع ان يصدر بيأن متعقل ومتفتح ؟

ولماذا لم تكن مصر تعاني قديما من الطائفية

وكان الشعار السائد دوما

يحيا الهلال مع الصليب

اليوم اصبح الموقف اكثر تعقيدا

ولماذا تثار المشاكل في هذا الوقت  ؟ولمصلحت من ؟

لا اجد اجابة غير ان الانتخابات علي الابواب

والبلد ليست في حاله تسمح بكل هذا التمزق

يجب ان ننزه الدين عن هذه التفاهات

فالاسلام دين العمل

والمسيحية دين المحبة

والله علينا جميعا لو جمعنا العمل بالمحبة

ومن اجمل ما قال الانبا شنودة

الاسلام والمسيحية وجهان لعملة دينية واحده

فهل تمت فعلا المعالجة

أشك

ولا يسعنا جميعا الا ان ندعو لمصرنا  الحبيبه بالاستقرار

واوعوا اوعوا تقلبوا الصفحة

ابقوا معي



اتهامات لا نعرف مدي صحتها ؟

أعزائي

يوم السبت الموافق 18 سبتمبر 2010 قدمت السيده رقيه السادات بلاغ رقم 16496

الي المستشار عبد المجيد محمود النائب العام

ضد الكاتب المعروف محمد حسنين هيكل

ومن المعروف ان السيده رقيه هي كبري بنات الرئيس الراحل

من زوجته الاولي السيده اقبال ماضي

بعد حديثه في قناه فضائيه وتلميحه عن قتل الرئيس الراحل عبدالناصر

بواسطه الرئيس السادات

وكان ملخص الحديث هو

كان الحوار بين عبدالناصر وياسر عرفات في حضور السادات وهيكل

وذلك بجناح عبدالناصر بفندق هيلتون النيل

واحتدت المناقشه بين عبدالناصر وياسر عرفات

وتسبب هذا في ضيق عبد الناصر ولاحظ السادات فقال له

ياريس انت محتاج فنجان قهوة حعملهولك بايدي

ودخل السادات المطبخ الملحق بالجناح وكان هناك

المسئول عن مطبخ عبدالناصر

النوبي ( محمد داوود )

واخرجه السادات من المطبخ وصنع القهوة بنفسه وقدمها لعبدالناصر بنفسه ايضا

وشربها عبدالناصر امام هيكل

يمكن القول بان السادات وضع سم بطيء المفعول في فنجان القهوة

هذا حسب روايه السيد هيكل

وتوفي عبدالناصر بعد هذه الواقعه بثلاثه ايام

وبعدها استطرد هيكل بقوله لا احد يمكن ان يجزم بوضع

السم لعبد الناصر

اعتبرت السيده رقيه هذا الحديث اتهام لوالدها الرئيس الراحل انور السادات

لا احد ينكر حقها في الدفاع عن والدها باي طريقه تفضلها

لان من الطبيعي ان تدافع عنه وهو حي

فما بالكم وهو في دار الحقونحن في دار الباطل

سؤالي المعتاد في كل مقال هو

لماذاذكر السيد هيكل هذه الواقعه بعد مرور 40 عاما ؟

ولماذا في هذا التوقيت ؟

انا لا اهاجم السيد هيكل فانا لا اجروء علي مهاجمته

فقط اسال هل هذا الحديث كان تصفيه حسابات قديمه ؟

لان السادات رحمه الله عليه منعه من الكتابه في الصحف المصريه

ولكنه لم يتوقف عن الكتابه فكتب في الصحف العربيه

واذا كانت فعلا تصفيه حسابات فمع من ؟
وماذا يستفيد هيكل حاليا من تشويه صورة السادات

ومع رجل توفاه الله اليس للاموات حرمه يجب الا نتعدها

دائما يقولون اذكروا محاسن موتاكم

والميت لا تجوز عليه الا الرحمه

وهل يرضي هيكل ان تشوه صورته بعد وفاته اطال الله في عمره

ومتعنا بمقالاته

المقال هذا ليس لاني ناصريه ولا سادتيه ولا حتي مباركيه

المقال ده لاني مصريه مصريه مصريه

واملك قلما مصريا ايضا

تعرفوا محتاجين فعلا لقدوة ورمز يعدينا ونعمل زيه

واقولكم اوعوا اوعوا تقلبوا الصفحة

ابقوا معي

لوح مسروقه للبيع

أعزائي

طبعا كلكم تابعتوا سرقه لوحه زهرة الخشخاش

تعالوا نتعرف عليها وعلي سير التحقيق

لوحه زهرة الخشخاش

متحف محمد محمود خليل

فينست فان كوخ

تمثال بآزوجه شيخ البلد

لوحه زهرة الخشخاش

Poopy flowers

ومعروفه ايضا باسم

Vase and flowers

وهي للفنان الهولندي فينست فان كوخ

وقام برسمها عام 1886 قبل ثلاث سنوات

من مقتله بطلق ناري

اشتراها السياسي محمد محمود خليل من متحف بباريس عام 1953

ب 40 جنيه استرليني. وقد قامت زوجته

وهي من الاصدقاء المقربات لسوزان مبارك

باهداء الحكومه المصريه هذا القصرليكون متحفا باسم زوجها

وبه 4 الاف قطعه نادرة قيمتها حوالي 7 مليار دولار

اهم شيء ان المتحف غير مؤمن عليه

تعرضت اللوحه

من قبل للسرقة عام 1978

علي يد لص يدعي حسن العسال

واعيدت للمتحف

وتعرضت في اغسطس 2010للسرقه

ويقال انها نسخه مقلدة وان الاصليه بيعت عام 1988

في اكبر صالات المزادان بلندن

بمبلغ 43 مليون دولار

واتهم فاروق حسني وزير الثقافه قطاع الفنون التشكيليه بالتقصير والاهمال

واستمعت النيابة علي مدار 6 ايام متتاليه لاقوال 32 شاهدا

وقررت حبس 6 منهم محسن شعلان رئيس قطاع الفنون التشكيليه

لمدة 15 يوم علي ذمة التحقيق

بتهمة الاهمال والضرر للجهة التي يعملون بها

كما استمعت النيابة لاقوال صلاح المليجي

رئيس الادارة المركزية للمتاحف

وقال انه كان يريد ادخال خطه تطوير متحف محمد محمود خليل

في الموازنه الا ان محسن شعلان طلب الانتظار

واستغلال اموال الموزانة في تطوير متاحف آخري

وقال له شعلان انه سيضغط علي فاروق حسني

لينفق علي متحف محمود خليل

من اموال صندوق التنميه الثقافية

وطلب فعلا ووافق الوزير

وقال موظفون بقطاع الفنون التشكيلية للنيابه

انه كان مقرر نقل متحف محمود خليل الي متحف الجزيرة

ولكن النقل تاخر عاما لان متحف الجزيرة

كان في حاجة للصيانة

كما قدم دكتور سمير صبري محامي شعلان بلاغا الي

المستشار عبدالمجيد محمود النائب العام

ضد وزير الثقافه فاروق حسني

بتهمة التأثير علي القضاء والهروب من المسئولية

من خلال تصريحاته في مؤتمرة الصحفي

الذي تزامن مع انعقاد جلسة المحكمة

والذي يراه دكتور سمير صبري ان الغرض منه

هو التأثير علي القضاء ويعاقب عليها طبقا للماده 187 من قانون العقوبات

كما اوضح في بلاغه ماقاله فاروق حسني وهو مايعني به

انه تستر علي وقائع واتهامات يزعم قيام محسن شعلان بارتكابها

ويري وجوب معاقبه الوزير طبقا لقانون العقوبات

وطلب ضم محضر الشرطه الذي يفيد بنشوب حريق

بقطاع الفنون التشكيلية في نفس يوم سرقة اللوحة

ونفس التوقيت

وقال فاروق حسني نحن لم نتهم شعلان وهو من اتهمنا بالباطل

وبيننا وبينه القانون كما اضاف

( احنا شايلين عنه بلاوي )

ورفض الافصاح عن هذه البلاوي

وقال ان سرقه لوحه ليست نهاية العالم

ولا تعني ضياع الدنيا

وفي الجلسة اتهم احد المحامين فاروق حسني باهدار المال العام

بانفاق 9 مليون دولار علي الاحتفال بذكري الثورة الفرنسية

كما طالب بوقف الدعوة المقدمة من النائب العام ضد الوزير

لما وصفه بتضخم صحيفه سوابقه الفنية والسياسية والجنائية

وطلب اعاده فتح التحقيق وضم فاروق حسني والفت الجندي

مدير الادارة المركزية للشئون المالية والادارية

بوزارة الثقافه

يامعالي الوزير الفنان

23 سنه خدمه في الوزارة بدرجه وزير

نتج عنها سرقه أكثر من 600 قطعة أثرية

وسرقه 8 لوحات نادرة من متحف محمد علي باشا

بشبرا الخيمه

واهدار 9 ملايين دولار علي احتفال الحملة الفرنسيه

واهداء تمثال بازوجه شيخ البلد لاولبرايت

التمثال من الخشب وقيمته 2 مليون دولار

وصرف 10 الاف جنيه شهريا لزوجه محمد فودة

المستشار الاعلامي السابق لمعاليك

من صندوق التنميه الثقافية

وعشرات المسرحيين الذين حرقوا في قصر ثقافة بني سويف عام 2005

مش برضه الملاين دي كانت اتصرفت علي الشعب المسكين

والنبي الشعب حيعمل ايه بالاحتفال

الموظف الصدمان العدمان يهمه ايه من الثوره الفرنسيه

والا حتي الثوره البرتقاليه

لا حتاكله ولا حتلبس عياله ولا حيستفيد منها باي حاجه

حنقول ايه غير

لعن الله امه ضاع الحق بينهم

واوعوا تقلبوا الصفحه

ابقوا معي

حسبي الله في التليفزيون المصري

أعزائي

كل عام وانتم بخير وعيد سعيد عليكم يارب

وينعاد عليكم بالف خير

رمضان خلص بسرعه والعيد كمان اخر يوم النهارده

افتكرنا اننا خلصنا من المسلسلات اللي قلبت رمضان

انما فوجئت انهم ابتدوا يعيدوها تاني وفي كل القنوات

بقت مطارده للمشاهدين وحرق دم ورفع ضغط

وده نتيجه مشاهدتنا للاسفاف وسماعنا الفاظ خادشه للحياء

وبيقال انها دراما واقعيه ومناقشه لقضايا المجتمع

ابتداء بقمصان النوم المثيره ومرورا بالشتائم بالاب والام

والخيانه الزوجية والدعارة وتعدد الازواج وليس الزوجات

فهناك فرق بينهم

وكمان بيعرفونا او بالاحري بيعرفوا الشباب والمراهقين وكمان الاطفال

الاثر النفسي بعد تناول الخمور والمخدرات

بعباره بقت حاليا شهيره وهي

سيبني انا عامل دماغ وطاير في السما

اسفاف وسوقيه وتدني بلا حدود

بنجد الملابس والحوار والالفاظ والحركات

والمط الشديد وتكدس معظم الاحداث في آخر حلقتين من كل مسلسل

والمرآة في أغلب المسلسلات من تجمع بين الازواج وتغيرهم كل فتره

او اللاهثة وراء الثراء وتتزوج من هو في سن والدها وممكن اكبر

او الفقيره التي تتزوج سرا وتقوم بدور العشيقه في حياة زوجها

او الباحثه عن عريس

ونجدها في اكثر من مسلسل تهان وتضرب

فهل هذه هي المرآة المصريه؟

مناظر كثيره من العري والخمور بكل انواعها والشيشه والمخدرات

ورقص خليع ومناظر جنسيه تثير اشمئزاز من يراها

ولم يسلم الصعايده من هذه المسلسلات

فاتحفونا المؤلفين بمشاكل الثأر والقتل والعنف من اهالي الصعيد

اعتقد ان مؤلفي المسلسلات الصعيدية لم يقوموا بزياره الصعيد اصلا

اما اللغه السوقيه في اللغه فحدث ولا حرج

كيف نمنع الاطفال من ترديد هذه الالفاظ ؟

استفاد ماسبيرو والعاملين به بميزانية تقدر بحوالي مليار جنيه

ياريت كان استفاد بها الشعب العدمان الفلسان التعبان القرفان

البرامج الحواريه نفس الاسئله التي مللنا منها

ونفس الضيوف ونفس المذيعات والمذيعين

ولكن هذا العام كان الفرق واضح جدا وهو كثرة الفضائح

والخيانات علي لسان الضيوف الافاضل

ياسياده وزير شئون التليفزيون المصري

الملقب بوزير الاعلام السيد أنس الفقي

المواطن لما بيروح السينما بيكون علي مسئوليته الشخصيه

يعني بيلبس وينزل من بيته واخد معاه ولاده ايا كانوا اطفال او مراهقين

ويطلع الفيلم قبيح او مؤدب هو اللي راح برجليه مشكلته هو

انما التليفزيون هو اللي بيدخل بيوتنا هو الضيف

الاطفال والكبار والمراهقين كلهم بيشوفوه

لازم يكون فيه معاير لابسط قواعد الادب

بيتهيالي ياوزير شئون التليفزيون زمان كان ممنوع كل اللي بنشوفه حاليا

ليه تسمح بيها عايزين المشاهد يتعلم ايه بالظبط ؟

كفايه اللي بنسمعه في الشارع بس في الاول والاخر ده شارع

يعني ماينفعش تغير هدومك فيه

البيوت معاليك لها حرمه

ياريت تصدر قرار بوقف اعادة المسلسلات رحمه باطفالنا وشبابنا

فين الرقابه علي التليفزيون صايمه عن الشغل ؟

التليفزيون أخطر جهاز بيدخل بيوتنا

واوعي تقولنا اللي مش عاجبه يقلب المحطه

متهيالي ان رساله التلفزيون ورساله الفن هي

توعيه المجتمع بقضاياه بالادب مش بالاسفاف وخدش الحياء

وبنلاقي ان الضحايا في كل اللي بيحصل

هما المشاهدين الغلابه

السؤال هو

فين راح مفهوم العيب ؟

حقول ايه غير حسبي الله ونعمه الوكيل في التليفزيون المصري

وبرضوا اوعوا تفكروا تقلبوا الصفحه

ابقوا معي

فضائيات ومسلسلات

أعزائي

فاضل لرمضان اسبوع وبعده العيد

كل عام وانتم جميعا بالف خير

وتقبل الله صيامكم وقيامكم وجعلنا واياكم من عتقاء الشهر الكريم

رمضان هو الشهر الوحيد في السنه اللي بيمر علينا بسرعه

يعني اول ما يمر الاسبوع الاول بنلاقي رمضان ابتدا يجري

وعلي رأي اهل الشام لما بيقسموا الشهر علي 3 وبيقولوا

عشره مرءوعشره حلق وعشره خرق

العشره المرء هما اول عشره ايام بالشهر بيمروا بسرعه

اما العشره الحلق دول اللي بيتعمل فيهم كعك العيد

والعشره الخرق اللي بنشتري فيهم لبس العيد

يارب ينعاد عليكم وانتم في خير وسعاده

اول سنه بيسمح وقتي اني اتفرج علي التليفزيون

واتابع المسلسلات لان ظروفي دايما ماكانتش بتسمحلي باني اتابع التليفزيون في رمضان

انما السنه دي تابعت شوي

انا مش ناقضه ولا حاجه انا بتكلم بعين المشاهد اللي بيتفرج وبس

وكمان سالت اهلي واصحابي وزميلي عن رأيهم

التليفزيون المصري والفضائيات نزلوا 89 مسلسل مش معقول حد تابع كل ده

تعالوا احكيلكم علي اللي شفتهم

المسلسل الاول هو بالشمع الاحمر

المسلسل بطوله يسرا الجديد في المسلسل ان تاليفه تم بورشه عمل

مكونه من ثلاث مؤلفات هم مريم نعوم - نادين شمس -ونجلاء الحديني

واخراج سمير سيف

المسلسل اطاره اجتماعي حول ظاهرة العنف الاسري

وما حدث من تغيرات في الاخلاقيات وقضايا مهمه

هو بيفرجنا عن عالم الطب الشرعي اللي ماحدش ابدا اتعرضله

وبصراحه عجبني جدا يمكن لان عمري مافكرت اقرا او اعرف حاجه عن الطب الشرعي

زي كتير منكم مافكروش فيه

ده مسلسل الجماعه اللي تناول تفاصيل تاريخ جماعه الاخوان المسلمين

دفع التليفزيون المصري 24 مليون جنيه نظير عرض المسلسل

واقام سيف الاسلام حسن البنا نجل مؤسس جماعه الاخوان

دعوة قضائية علي المؤلف والمنتج لان عائلة حسن البنا وحدها اللي ليها الحق في الانتاج

نقدر نقول اللي مايعرفش حاجه عنهم ممكن يشوف المسلسل

نجي بقي للحاجه زهرةوازوجها الخمسه

هو قصه امرأةفقيرة انتقلت من حياه الفقر الي السعادة

بزواجها من ثري وطلبها الطلاق منه لدخوله السجن

وتوالت زيجاتهاحتي اصبحت علي ذمه خمس رجال

واصبحت من اقوي سيدات الاعمال في السوق بعد ان كانت ممرضه

مسلسل هايف جدا وتافه جدا

وعند بدء عرض المسلسل تقدمت نقابه الممرضين في مصر

برفع دعوة قضائيه علي المسلسل للتعرض للممرضات

بانهم يسرقن الادويه من المستشفيات

ويتزوجون الاثرياء المترددين علي المستشفيات

اما مسلسل الكبير قوي بطوله احمد مكي

عامل فيه دورين دور عمده والتاني اخوه بس امريكاني

حاجه كده تفرح العيال بس الغريبه ان الكبار مهتمين بيه جدا وبيتفرجوا عليه

----
طبعا من احسن الممثلات هي يسرا تخلت عن الملابس الشيك والميك اب وتسريحات الشعر

ومثلت بس بصدق . كل اللي مثلوا معاها كانوا علي نفس المستوي من التمثيل

ماعدا محمد امام ابن عادل امام ده النسخه المقلده من عادل امام

يعني مش بيمثل لا بيقلد والده في كل حركه ولفته

وكمان احمد السعدني في مسلسل زهرة بيقلد والده صلاح السعدني

حتي في كلام بيردده صلاح السعدني زي ست الكل وروح قلبي

متهيالي ان برضه التوريث اتنقل للتمثيل

اما النجم اللي له ماضي مشرف وله مسلسلات تليفزيونيه

زي حياه الشيخ الشعرواي هو النجم حسن يوسف

بسال ليه يرضي بعمل زي ده مش حيضيف لرصيده الفني

بالعكس ده حينقصه انه يطلع واحد من ازواج زهره

طوني خليفه

---

اما قناه القاهرة والناس دي حكايه لوحدها هي قناة للفضائح والاباحيه

وبتقدم ثلاث برامج للفضائح ولا تخرج عن ثلاثه اشياء

الدين .الجنس.السياسه

القناه بتوصف حالها بانها اجرأ قناه فضائيه رمضانيه

قناه بتشتغل 33 يوم رمضان والعيد

وتقفل 11 شهر الا 3 ايام

العام الماضي غضب الجمهور من محتوي البرامج

بالذات من برنامج لماذا اللي بيقدمه طوني خليفه

السنه دي استنسخوه بثلاث برامج هم

بلسان معاضيك

بدون رقابه

مع نضال

برنامج بلسان معارضيك من تقديم طوني خليفه

كل اسئلته عن الحياة الشخصيه ببجاحه

اسئله مستفذه ليس بها ادني احترام لا للمشاهدين ولا للضيف

في حلقه الفنانه المحترمه فعلا والله محترمه نيللي كريم

ردت علي اسئلته السخيفه بانها نادمه علي الظهور معه في البرنامج

بيضغط علي الضيف وبيوجه اسئله تمس جوانب شخصيه من حياته

وطبعا بيستغل ان الضيف حصل علي مقابل مادي

يعني المال مقابل الفضائح

--

وفاء الكيلاني

---

البرناج التاني هو بدون رقابه

بتقدمه حسب ماالقناه بتصفها

الجميله الجريئه وفاء الكيلاني

تسال ضيوفها عن اسئله تتعلق بالخيانه الزوجيه والاديان

والعلاقات بين المشاهير واشعال نيران الخلافات بين المتخاصمين

بعض الضيوف اظهر اعتراضه

زي ماقالت فيفي عبده

( انتي نشفتي ريقي باكتر من الميت الف جنيه )

وطبعا ده كان اجر فيفي عن الحلقه

يبقي ميزانيه البرنامج قد ايه ؟

والاعلانات بتجيب قد ايه ؟

---

نضال الاحمدية

---

البرنامج الثالت هو مع نضال

الملقبه باجرأ صحفية في الوطن العربي

برنامج عن نبش الاسرارالشخصيه

وفي حلقه من حلقات البرنامج وكانت مع رولا سعد

ماتسالوش مين رولا لاني مش بعرفها

فهمت بس انها مغنيه

في الحلقه دي بالذات هاجمت نضال هيفاء وهبي

بمساعده ضيفتهاووجهت انتقادات حاده لهيفاء

ولم تفرق بين خلافاتها الشخصيه وعملها كاعلاميه

وهو عمل يتطلب الحياديه

وفي اخر الحوار قالت غني يارولا خلي الناس تعرف ان عندك صوت

الناس فاكرينك زي هيفاء ماعندك صوت

----

نشره اخبار الفراخ اللي بتقدمها نفس القناه

بتتضمن افيهات مبتذله تخدش الحياء العام

---

برنامج بحث ميداني زي العسل لنفس القناه بيورينا ان المواطن المصري

عبيط وابله سال مذيع البرنامج في حلقه منه واحد ماشي في الشارع وقاله

تفتكر عشان الهرم مايتعرضش للاتربه نغطيه بالمشمع والا بالزجاج

وحلقه تانيه كان السؤال ايه رايك لو نصمم الموبايل بقرص دائري

وسؤال تاني مستفذ جدا

عشان زحمه المرور نلغي باصات المدارس تفتكر التلامذة يروحوا احسن ماشين

والا باسكوتر والا باتيناج

واخرها زي الكاميرا الخفيه يسال نذيع

----

اعلان يسرا الجديد معاها محمد منير . احمد عز. عزت ابو عوف. هند صبري . دنيا سمير غانم

اتصالات كلفته 35 مليون بس يابلاش

---

سؤالي زي كل مره

كيف وافق انس الفقي وزير شئون التليفزيون الشهير بوزير الاعلام

علي هذه البرامج التي تسيء الي سمعه مصر

وتدمر العادات والتقاليد المصريه ؟

فهل فضائيات رمضان تجاره؟

كفايه عليكم وعليه كده

واوعوا تقلبوا الصفحه

ابقوا معي

فاصل ونواصل

و ادي كركر

----

أعزائي

حقولكم تاني كل عام وانتم بالف خير ورمضان كريم

وزيرالنوبه الشهير بوزير الاسكان

يقوم بزيارات متعدده وشبه دوريه ( لوادي كركر )

المشروع بدا في مارس الماضي وسينتهي مع نهايه هذا العام

والمشروع مكون من 8 قري لتوطين 14 الف نوبي

في 2000 بيت نوبي بنظام القباب الشهير

ومركز للخدمات وسوق بكل قريه علي مساحه 460 فدان

بتكلفه للمرحله الاولي 600 مليون جنيه

والموقع اختاره اهل النوبه علي بعد 800 متر من طريق اسوان ابو سمبل

3.5 كيلو من بحيرة ناصر لقربها من مصادر الكهرباء وخزان اسوان

كل ده جميل وشيء رائع وبنشكر الوزير المغربي ووزاره الاسكان

لكن وآه من لكن

اللي حيسكنوا مش لازم يشتغلوا والا هو سكن وخلاص

لازم يكون في مصادر عمل في النوبه يبقي لازم يستصلحوا الارض

وممكن الاهالي تاخدها باسعار رمزيه مش حقول بالمجان

ولازم يمدوا شبكات المواصلات والاتصالات

الحكومه نجحت في البناء طيب فين الاستقرار لاهل النوبه

عايزه اقول يوجدوا لهم فرص عمل بس منين اذا الحكومه مش عارفه تعمل اي حاجه في ازمه البطاله

يبقي منين حتوجد لهم فرص عمل عشان بس نبقي عارفين كويس ان مافيش تخطيط

يعني لما الحكومه تقول نبي يبقي نبني تقول نهد يالله نهد

ماهي دي باقي منظومه الفساد

والنبي ياعم الحاج خلي الحكومه الرشيده بقياده النظيف تشوف حل

بلاش تبنوا ويبقي البنا علي الفاضي

تفتكروا الحكومه حتعمل حاجه والا ولا حياة لمن تنادي

----

بشري لابناء الصعيد العاملين بالخليج وليبيا

افتتح مطار سوهاج الدولي

وسيتم نقلهم منه واليه

وكمان تم تطوير مطاري الاقصر واسوان

الف مبروووووووووك

----

يقال ان نادي الزمالك اجبر جدو علي للتوقيع علي بياض

زي ماقال هو شخصيا

يعني ناقصين كمان ازمات الكوره

متعب بعد احترافه في اوربا رجع تاني بمشكلات مع النادي البلجيكي

وكماااان شيكابالا طالبه نادي (اندرلخت البلجيكي )

بتفعيل تعاقده

امتي وازاي وفين وليه وقع ماحدش عارف

نرجع لجدو ونقول هو مش وقع بارادته

وزي مابيقولوا القانون لا يحمي المغفلين

والا هما ياحراااام شربوه حاجه اصفره وخلوه يوقع

ومتعب بعد مارفض كل عروض النادي الاهلي وفضل السفر

كان بيتمني الاحتراف لاوربا بس ياخساره طلعت اوت

رجع وقاعد معانا يتفرج مش مشارك

اما المدعو شيكابالا ده مشكلاته كتير

كل موسم له مشكله شكل تاني تغير يعني بيسلينا

وقع بدون علم نادي الزمالك بالرغم من انه متعاقد معاهم

اصل الموضه السنه دي

جدو ومتعب وشيكابالا

----

ظاهرة ارتفاع الاسعار نتجت عنها وقفه احتجاجيه

من رموز التيارات السياسيه

وحملوا الاطباق والحلل للتعبير عن غضبهم

اين مجلس الشعب من كل اللي بيحصل

راح فين سيد قراره

الظاهر صايمين وعشان كده لا بيسمعوا ولا بيشوفوا

ويمكن مش بيتكلموا

كان الله في عونهم مشغولين في الفرجه علي المسلسلات

----

هدد عمال كتان طنطا بالانتحار الجماعي تحت عجلات القطار

ياحكومه انتي فين ؟

والا حتخلي المهندس علاء فهمي وزير

(س.ح.م) سافر حتموت محروق

الشهير بوزير المواصلات يجامل الست عيشه

وزيره المعاش المبكر الشهيره بوزيره القوي العاطله يوووه العامله

ويلغي رحلات القطارات

----

الدكتور صفوت النحاس رئيس الجهاز المركزي للتنظيم والادارة

في حواره مع الاهرام المسائي اعلن الاتي

80 الف بلاغ قضايا فساد

20الف بلاغ مخالفات اداريه

40 الف بلاغ امور بسيطه لها جوانب اخري

20 الف قضيه فساد

الارقام دي سنويا

لو قسمناهم علي السنه حتكون النتيجه قضيتين كل ساعه

ههههههه ده حتي المضاد الحيوي بناخده كل 6 او 8 ساعات

وعجبي

----

مارثون المسلسلات والفوازير ابتدا مع بدايه الشهر الكريم

نفسي اعرف ايه علاقه رمضان بالانتاج الفني والدرامي ؟

89 مسلسل علي مدار اليوم في جميع القنوات الارضيه والفضائيه

مين يلحق يتابع علي اعتبار ان المتابع لا حينام ولا حيشتغل ولا حياكل ولا حيصلي

ويمكن كمان مش حيصوم حيشوف 24 مسلسل

بواقع ساعه لكل مسلسل مع حشكيشه

الحشكيش دي الاعلانات

اللي بتخليك لا تعرف تتابع ولا تركز

ليه مافيش تنسيق يعني طول السنه يكون في مسلسلات جديده

شهر رمضان ياعم انس الفقي الشهير بوزير التليفزيون

شهر روحاني ويستحق مننا كل الاحترام

واوعوا تقلبوا الصفحه

ابقوا معي

من كل بستان زلطه

أعزائي

كل عام وانتم جميعا بالف خير

رمضان علي الابواب

قال النبي صلي الله عليه وسلم

كل عمل ابن آدم يضاعف الحسنه بعشر امثالها الي سبعمائة ضعف

قال الله تعالي

الا الصيام فأنه لي وانا أجزي به

يدع شهوته وطعامه من أجلي

للصائم فرحتان فرحه عند فطره وفرحه عند لقاء ربه

ولخلوف فم الصائم اطيب عندالله من ريح المسك

متفق عليه

ربنا يقبل صيامنا جميعا .
-------

الريس بتاعنا عل طول خارج القاهرة مقره المفضل شرم الشيخ

كل المقابلات والاجتماعات والمناسبات بقت في شرم

يمكن لان القاهره بقت زحمه والا عشان احنا موجودين فيها

طيب ليه مش بيسافر افريقيا يشوف مشكله مياه النيل

يزور فيها دول المنبع السبع اللي مش فاكرهم هما

اثيوبيا -الكونغو - تنزانيا -روندا - بورندي - اوغندا -وكينيا

يعني يزورهم ويحسسهم باننا عيله وحده وفي بينا روابط مشتركه

قبل ما بعض دول المنبع يقيموا مشروعات مائيه منفرده

ونرجع نلطم ونحلي ميه البحر المتوسط بالطاقه الشمسيه

حتي تبقي نوع من انواع الدعايه لانتخابات 2011

وبلاها سفريه باريس مره او روما

والنبي ياعم الحاج تطمن الشعب علي ان الميه مش حتغلي

-------

قانون المناقصات بينص علي ضرورة مشاركه اكبر عدد ممكن من الشركات في المناقصات المختلفة

وده لتحقيق مصلحة الجهه الطارحه للمزاد

واقر القانون علي اعطاء كراسات الشروط للشركات الصغيرة مجانا

طبعا مش بيحصل وبيكون سعر كراسة الشروط غاليه وكمان الشروط بتكون صعبه

يعني كراسات المناقصات في القطاع الطبي بتكون 40 الف جنيه

والتامين الابتدائي بيتجاوز 2 مليون ونص

وصلاحيه خطاب الضمان 4 شهور علي الاقل

وده بيحمل الشركات مصاريف بنك مضاعفة

والفتره الزمنيه بين الاعلان عن المناقصه وجلسه فتح المظاريف اسبوع او 10 ايام بالكتير

ودي طبعا فتره صغيرة مش بتكفي الشركات معرفه تفاصيل المناقصه

اما كراسات بعض المناقصات المطروحه من مستشفيات جامعه عين شمس

في الشهرين الماضيين التامين الابتدائي تدرج بين 15 الف جنيه و2 مليون ونص

وده اكيد منع الشركات الصغيرة من المشاركة

وفي شرط تاني عجيب

الشرط كان علي جهاز طبي بأن يكون قد مضي علي استعمال الجهاز

في مصر اكتر من 10 سنين علي الاقل

وده جهاز قديم متخزن عند شركه معروفه

وممكن يكون انتاجه توقف وفي المقابل فيه جهاز افضل منه

واحدث وارخص

ومولد ياوكالة الصحه ومدد ياجبلي

-------

في مدينه نصر العقار رقم 29 بعمارات الشروق

خلف النادي الاهلي

ساكن الدور الارضي انشاء شقه كامله ملحقه بشقته علي الرصيف

وده من سبتمبر 2008

فين المحليات مش شايفه ولا عارفه بقالها سنتين

والا شايفه وعامله حالها مغمضه عنيها

مافيش ولا مهندس مر في الشارع ولا التفتوا لاي شكوي من باقي السكان

اللي الضرر لحقهم

والا المهندس اللي بيعدي بيكون مغمض عنيه من الشمس

يعرفوا بس يتشطروا علي اي بياع غلبان واقف في الشارع

وحجتهم اشغال طريق طيب اللي بني شقه فوق الرصيف ده

اسمه اشتغال بالهبل

-------

هجوم علي دكتور علي الدين هلال لانه قال في حديث له

ان الحديث عن ضرورة تحديد الحزب الوطني مرشحه للرئاسه

قله ادب

لان الرئيس مبارك اطال الله في عمره ومتعه بالصحه مازال يحكمنا

هو المصريين امتي اختروا رئيسهم بدا من محمد نجيب وعبدالناصر والسادات واخيرا مبارك

مين اللي اخترهم

والا احنا حنصدق الاغنيه ونغني ونقول

اخترناك اخترناك

-------

قال ايه النحل حينقرض لان الخبراء لحظوا تناقص انتاج العسل من عام 2008

لان مليارات من النحل في امريكا وكندا ماتت وبدرجه اقل في اوربا

لاحظ الخبراء مرض جهاز الرادار الطبيعي داخل النحل

الجهاز ده بيرشده للخليه اللي بيفرز فيها العسل

ولو فشلت بتنهار وتموت وبعدها بتنهار الخلية

والسبب مضحك او انا ضحكت لما قريت السبب

وهو الاشعاعات الصادرة من الموبيلات

اللي ضحكني ان صحتنا مش مهمه يعني اشعاعات الموبايل لو موتتنا

ماحدش حيهتم بينا الخبراء حيقولوا في ستين داهيه

انما النحل باشا بعد الشر عليه

-------

بقول كفايه عليكم كده خليكم تصوموا وانتوا مرتاحين كفايه ارتفاع الاسعار في كل حاجه قبل رمضان

رمضان كريم

بس برضه اوعوا اوعوا تقلبوا الصفحه

ابقوااااااااا معي

قطار الاسعار من غير فرامل

أعزائي

اسمحولي اني اغني مع حكيم اغنيته المشهورة

بس حغير فيها شوي واقول

ناااااار نااااار نااااار الاسعار مولعة نار

كارثه العلاوة السنويه اللي بينتج عنها ارتفاع الاسعار بجنون

وبشكل فجائي وعشوائي

والفقراء حيعملوا ايه في الارتفاع البشع بدأ من تذكرة الاتوبيس

اللي قفزت من خمسين قرش لجنيه

الدجاج الكيلو 19 جنيه

السمك البلطي 14 جنيه

اللحم البتلو 47 جنيه في الاماكن الشعبيه

اما في الاماكن الراقيه فوصل سعرة ل 90 جنيه

اللحوم الاثيوبيه 32 جنيه للكيلو

الاستراليه 35 جنيه للكيلو

البرازيليه 25 جنيه للكيلو

وطبق الكشري 5 جنيه

اما لو طبق فويل ده بيتراوح بين 6 و8 جنيه

وساندوتش الفول او الطعميه 2.5 جنيه

اما الكباب فوصل ل100 جنيه الكيلو

الفرخه المشويه 30 جنيه

الزبده الصفراء كانت من شهر ب24 جنيه للكيلو

اليوم اصبح السعر 40 جنيه للكيلو

الارز تبع التموين 4 جنيه

خارج التموين 5.5 جنيه

السكر 5 جنيه

الخوخ 10 جنيه

اما الخوخ العريشي 12 جنيه

الكريز 18 جنيه

البطيخ 2 جنيه للكيلو

البرقوق 20 جنيه

المشمش 17 جنيه

العنب 7جنيه

الكنتالوب 4 جنيه

التفاح المصري 8 جنيه

حزمه النعناع جنيه ونص

الليمون 7 جنيه

الباميه10 جنيه

البطاطس 4 جنيه

الملوخيه 4جنيه

البدنجان 3 جنيه

الطماطم 3 جنيه

الخيار 4 جنيه

اي حزمه جرجير- بقدونس- شبت- كزبره خضرا ب 50 قرش

تعالوا بقي يامدخنين شوفوا اسعار السجائر

الكليوباترا الورقيه اللي الغلابه بيدخنوها

من 275 قرش ل400 قرش

والكرتون من 300 قرش ل 450 قرش

والسجائر الاجنبيه الفاخرة

من 8.5 ل 10 جنيه

والانواع العاديه الاجنبيه بتتراوح بين 650 قرش ل 700 قرش

حتي اسعار الكتب لم تسلم من الارتفاع بحجه ارتفاع اسعار الورق

الاسعار دي بخلاف الزياده في سعر الشاي والبن والنسكافيه والالبان ومنتجاتها

والغاز والكهرباء والميه وانتظروا قريبا

حتفرض تسعيره علي الهوا اللي ربنا خلقه لينا بعد ما لوثوه

ومن ضمن زياده الاسعار السباك والميكانيكي والمكوجي

لانهم فئه من فئات الشعب والغلاء علينا وعليهم

وبديهي يرفعوا اسعارهم

شوفوا بقي

مصر بتبيع الغاز لاسبانيا باقل من 5 دولار

وترجع اسبانيا تبيعه لليابان ب 29 دولار

وبتبيعه لاسرائيل ب 1.5 دولار والسعر ده اقل من سعر التكلفه

اللي هو 2.6 دولار

ماشاءالله بتساعدهم طب ماتساعدنا احنا

بس ازاي احنا مالهمش مصالح معانا انما التانين ليهم مصالح معاهم

الله يرحمك ياطلعت حرب ياخبير الاقتصاد

تعال شوف مصر بقي حالها ازاي

وانا بلف و اسال عن الاسعار استوقفني تعليق لراجل كبير غلبان قال

لو ماكانتش عالم جعانه طول عمرها مكنتش عملت كده

ربنا يتقبل دعاء الشعب المصري المطحون

ويبقي احسن شعب في الكون

الغلاء طااااااااااال الجميع

وبرضوا بقولكم اوعوا تفكروا تقلبوا الصفحه

ابقوا معي

وكالة الصحه

أعزائي
بجد كل يوم بيمر بنشوف العجب مع حكومتنا الرشيدة

وآخر حاجه فكروا فيها عشان يعكننوا علي المرضي من الشعب الغلبان

ويطمنوهم ان العلاج علي نفقة الدوله بقي له ضوابط جديده

قال يعني الغلابه واللي مالهمش ضهر كانوا بيتعالجوا علي نفقه الدولة

نرجع شوي نشوف كان ايه وبقي ايه نظام العلاج علي نفقة الدولة

اصدره الرئيس الراحل انور السادات عام 1975 لعلاج المواطن بالداخل والخارج

وبيكون علي نفقة الجهه او المؤسسة التابع لها المريض

ومهمة وزارة الصحه تنظيمه واللي وضع الضوابط كان الدكتور فؤاد محي الدين وكان ايامها وزير الصحه

عام 1987 قرر الدكتور عاطف صدقي رئيس مجلس الوزراء حين ذاك

والقرار بيقول تفويض وزير الصحه في اصدار القرارات فيما عدا حالات محددة

ودي من اختصاص رئيس مجلس الوزراء ودون الرجوع او الالتزام بالضوابط

وظل العلاج علي نفقة الدولة محدودا حتي عام 1996توسع فيه الدكتور اسماعيل سلام

وكان ايامها 95 مليون جنيه ذاد الي 695 مليون جنيه عام 2002ولم يتم تغطية الفرق

وظهر الوسيط اللي هو نواب البرلمان فتقلصت المخصصات الي 300 مليون جنيه للعلاج المجاني

يتم تقسيمها علي 500 مستشفي بواقع 160 الف جنيه شهريا

وبعدها اصبح 50% من القرارات بيصل لايدي الوسطاء

وال 50% الباقيه للمواطنين

وكان المسيطرون يتجاوز عددهم مئات الافراد يحصلون علي نصف القرارات بتكلفة 3.8 مليار جنيه

( احصائية 2009 )

ولما تولي الوزارة الوزير الهمام دكتور حاتم الجبلي عام 2006

كانت اولوياته تطوير الخدمة العلاجية بالريف وتحديث المستشفيات

واصدر قرارات اداريه تحولت الي قرار وزاري ملزم لكل الجهات

تعطي الاولوية

للعلاج علي نفقة الدولة لخمسه امراض

الكلي - القلب - فيرس سي - السرطان والعلاج الدوائي

الذي يستحوذ علي 50% من حجم الانفاق

والامراض المرتبطة بالطواريء

اللي هي المسامير - الحوادث -الانفصال الشبكي- نزيف المخ

وزراعة النخاع

ومنعوا التعاقد مع اي مستشفي استثماري

حكوميا كان او قطاع خاص

الا في حالات الغسيل الكلوي

المستحقات لم يتم اسقاطها لانها مستلزمات طبيه وادوية

ومستحقات اطباء

المديونيه 2.2 مليار جنيه

اما الانفاق السنوي وصل الي 3.8 مليار جنيه

الدوله بتخصص مليار جنيه وبتدفع 400 مليون سداد المديونية

بس المضحك هنا ان 400 مليون بيوجهوهم للانفاق

مش عارفه انفاق ايه ؟

وبتظل المديونيه كما هي

لكن عبدالقووووووووي والوزير الهمام حبوا يعكننوا اكتر علي الشعب ازاي ؟

فرض ضريبه علي الاسمنت اعتبارا من اول يوليه 2010 يعني بعد كام يوم

قدرها 10%وده حيحقق دخل اضافي مليار جنيه وبكده حسب كلامهم حيوفروا

2.5 مليون جنيه للانفاق علي العلاج علي نفقة الدولة

وكمان رسوم علي المحمول

وبيقولوا انهم وضعوا برنامج للانفاق خلال المامين القادمين لا يتجاوز 1.5 مليار جنيه

ويتمكنوا من سداد 2 مليار من المديونيه

وبعد عامين اذا كان للشعب عمر حيتوسعوا في خدمات العلاج علي نفقه الدولة

اما علاج المسئولين القرار بيصدره رئيس مجلس الوزراء

وفق السلطة التقديريه او بالاحري حسب مزاج معاليه

ويمكنه اصدار القرار بدون تقارير طبية

الوزير الهمام وضع نظام اداري عقيم

بيفقد اي قرار علاج فاعليته عند التنفيذ

زي فوت علينا بكره وبكره مش بيجي

والمريض يموت علي نفقه اهله

عقدوا اجتماع للجنه الصحه لمناقشه الموضوع

الوزير الهمام لم يحضر واعلن

انه وفر مليار جنيه من العلاج علي نفقة الدوله

قال يعني عمل معجزه وهو مش عارف ان التوفير كان علي حساب المرضي

اللي بيموتوا يوميا منتظرين امل العلاج علي نفقه الدوله

معالي رئيس الوزراء بيساند الوزير الهمام وقال

ان الضوابط التي تم وضعها للمجالس الطبية المتخصصه

تهدف الي الشفافيه وبتحقق العداله في عملية اصدار القرارات

وسيعرض النظام الجديد علي مجلس الشعب ليتاكد النواب

ان هناك رقابه كاملة من وزارة الصحه علي النظام

شفافيه طيب سلامات ياشفافيه

واعلن الوزير الهمام لا تراجع عن الضوابط والقواعد

ولا رجعه الي النظام القديم وعدم التستر علي الفساد أيا كان مصدرة

والنبي تصقيفه اومال وتشجيعه اومال

اقولك هنا تعاللي الللي ياحبيبي تعاللي

يجي بقي يشوف ده فساد والا دي وكاله من غير بواب

القرار رقم 166 لسنه 2006 بسفر السيده مني محمد حمدي العيوطي

حرم سيادته الي الولايات المتحدة للعلاج بمركز ( سلون كيترنج ) بنيويورك

لاجراء جراحه لمدة شهر بمرافق بنفقات علاج قدرها 30 الف دولار

وتخصم من العلاج المدرج للمواطنين

والقرار رقم 198 لسنه 2006 بزيادة نفقات العلاج بمبلغ

50 الف دولار اضافي لاستكمال العلاج وتخصم من الاعتماد المدرج للمواطنين

والقرار رقم 927 لسنه 2006 باستكمال العلاج بنفقات قدرها

10 الاف دولار

والقرار رقم 1982 لسنه 2007 بموافقه رئيس الوزراء علي العلاج بنفس المركز

لمدة ثلاث اشهر بمرافق بمبلغ قدرة 70 الف دولار

واستكمال القرار 2228 لسنه 2007 بالموافقه علي العلاج بنفس المركز

لمدة شهرين بمرافق ونفقات علاج قدرها 50 الف دولار

القرار رقم 506 لسنه 2008 بالموافقه علي زيادة النفقات 42 الف دولار

والقرار رقم 2099 لسنه 2009 استكمال العلاج 10 الاف دولار

وكلها بتخصم من اعتماد علاج المواطنين

وده بخلاف المرافق وتذاكر السفر في الدرجه الاولي وبدل السفر المقرر

للسادة الوزراء لكل ليله تقضي خارج المستشفي

بالاضافه لرسوم التحويل لها وللمرافق

النهايه ان المجموع 2 مليون جنيه بخلاف تذاكر السفر ومصاريف الاقامة

وكل القرارات لمركز واحد دون غيره

يمكن المدام بتحب نيويورك

وصرح انه مش خجلان من علاج زوجته علي نفقة الدولة لان هذا حق لكل مسئول

عن اصدار قرارات تنفيذيه

تؤثر علي مصالح المواطنين

هي فين اصلا مصالح المواطنين

ومين اللي بيتعالج علي نفقه الدوله الا الوزراء امثال عبدالقوي والشاذلي

وعائلتهم والمحاسيب والصفوة

وقلبي حقيقي وجعني

وده كله غير انه نجح في ضعف الخدمات الطبيه وصرف 160 مليون جنيه

مكافات علي حساب الخدمات اللي بتقدمها 500 مستشفي في 215 مدينه تعالج بطريقه القوافل الطبيه

ومن عائد تمن الدواء والمعامل وصيانه المستشفيات كانت مكافات الاطباء

وباستمرار بيصرح بضعف التمريض والاطباء الغير مدربين

وعدم صلاحيه العيادات بالمستشفيات

لكن يقف تعظيم سلام لما الحديث يكون عن مسنتشفي دار الفؤاد

لانه مشارك فيها وبيدمر كل من يقترب من البزنس الخاص بدار الفؤاد

كده كفايه لان لو عملت تست للسكر حلاقيه عالي جدا عندي بعد كل القرارات دي

ولو احتجت اتعالج علي نفقه الدوله حموت علي نفقه اهلي

ويابخت من كان النقيب خاله

بزمتكم مش ليه حق اقول وكاله الصحه

وللحديث بقيه في فساد جديد

بس اوعوا اوعوا تقلبوا الصفحه

ابقوا معي

ارقام حكوميه

أعزائي

انا عارفه اني بقيت اتاخر عليكم كتير

بس الحقيقه الظروف والاكتئاب من الحاله اللي مصر وصلتلها

نفسي اكتب عن حاجه الحكومه عملتها كويسه

يمكن يجي اليوم اللي اكتبلكم عن اخبار مفرحه

مش بيقولوا ان طول اليال يبلغ الامل

بقالي فتره بقرا في

كتيب اصدره الجهاز المركزي للتعبئه والاحضاء

اصدر في مارس 2010

اسمه مصر في ارقام

تعالو نتمشي بين صفحاته

كل المصريين مدمين فول مش عشان بيشبع لكن عشان كان

وكان فعل ماضي حنسيبه في حاله

الفول هو بديل البروتين الحيواني

الاكتفاء الذاتي في 2006/2007

51.6%

2007/2008

انحدر الي 28.8%

وكان اجمالي محصول 2009

16 الف طن واستوردنا 110 الف طن

من استراليا - الصين - فرنسا - وانجلترا

بخلاف بعد المسافة ومصروفات الشحن والعمولات والرشاوي وارباح المستوردين

---

اما المصدر التاني للبروتين النباتي اللي هو العدس

اللي بيستخدم بكثره في الكليات العسكريه ومعظم الشعب والسجون

الاكتفاء الذاتي عام 2005 / 2006

2.4%وانحدر في عام 2007/2008 الي 1.8%

والباقي استيراد من كندا - سوريا -وتركيا

---

هللوا وطبلوا وقالوا ان الذرة الشاميه هي المنقذ من ازمه استيراد القمح

نسبه الاكتفاء الذاتي 2005/2006

60.8%

2007/2008 انحدرت عادي طبعا الي

59%وكذلك ينخفض الاستثمار الزراعي خاص وعام ب نسبه 2.7%

وطبعا الاستيراد الباقي وكمان تم خصخصة استيراد القمح

واستوردولنا قمح فاسد

اللي بيدخلوه تحت عبارة

الشحنة صالحة للاستهلاك الادمي

ولازم نعرف ان في فرق بين الجمله دي والنص القانوني اللي بيقول

مطابقة للمواصفات

العباره الاولي بتعني ان نسبة الحشائش والديدان والسوس

ممكن توصل لغايه 60%او حتي 70%

بس هما مطمنين ان المصريين معدتهم بتهضم الزلط

لغايه مايلاقوا طريقه تموتنا

ومش بنموت قاعدين علي قلب الحكومه

لا موتنا بانفلونزا الطيور ولا انفلونزا الخنازير ولا بيحوق فينا حاجه

---

انتاج القمح المصري 138.50% عام 2006

123.6% عام 2007

---

البطالة للمتعطلين 257% عام 2008

12% من اجمالي قوة العمل

مليون و187 الف متعطلين حاصلين علي شهادات فوق المتوسطه

681.000 متعطل من الحاصل علي شهادات جامعية وفوق الجامعية

---

شقق الاسكان 60 متر فاقل 3383 شقه

القصور والفيلات والاسكان الفاخر 3762

بتكلفة 469.070.000

ده حوالي نصف مليار عام 2008/2009

معليش جالي كرشه نفس من المبلغ

---

منحوا المصريين دعما بلغ 15 مليار

بس مش اي مصري يروح ياخد اللي عايزه

ابن البطه البيضه بس انما ابن البطه السوده يبعد احسن

لانه بيدخل من باب الصدقه الجاريه لانهم مش بيستردوه

29 مليار دولار 2007/2008

25مليار دولار 2008/2009

ونصفه صادرات بتروليه

---

20 مليون قضيه بالمحاكم اقدمها من 38 عام

29% بطاله لان القادرين علي العمل 5 مليون

الانتحار 3000 سنويا

حوادث الطرق 6 الاف قتيل 23 الف مصاب

28% طلاق منهم 20% في سنه اولي جواز

7 مليون عانس 4 مليون منهم فوق 35 سنه

4 مليون مهاجر منهم 820 الف كفاءات

2500 تخصصات شديدة الاهميه

6 مليون طلب هجرة

26% الاميه

نصف مليون عمالة اطفال

100 الف طفل شوارع حسب تقرير الامم المتحدة

45% موظف حكومي تحت خط الفقر ويؤخذ منه ضرائب

6 جنيه دخل الموظف يوميا

6 مليار دولار سنويا مخدرات

2.3 مليار جنيه خسائر شركات القطن

8 مليار جنيه خسائر شركات الغزل والنسيج

12 مليار جنيه عجز في سكك حديد مصر

شعارها (س ح م )

معناها سافر حتموت محروق

10 مليار قطاع الاذاعة والتليفزيون

----

السرطان تضاعف 8 مرات بيعد اعلي نسبه في العالم

الذبحه الصدرية 20%

البلهارسيا 7 مليون

ده عشان مش بندي ضهرنا للترعه فالبلهارسيا في جسمنا بترعي

10% من عدد السكان

التهاب كبدي وبائي 13 مليون

اكتئاب 20 مليون

وبعد ماتقروا مقالي اكيد حيزيد الاكتئاب

امراض نفسيه اخري 6 مليون

اما الانفاق الحكومي فده اوعوا يغمن عليكم

10 دولار للفرد سنويا

---

614 مليار ديون

35% من الشعب تحت خط الفقر اقل من دولار يوميا

300 مليار دولار ديون مهربه

الدولار كان بيساوي 85 قرش عام 1981

الدولار بقي يساوي 5.65 جنيه النهارده

صافي الدين العام المحلي

537.559 مليار عام 2008

ارتفع الي 639.953 مليار عام 2009

بزياده 18%

الدين الخارجي 31.5 مليار دولار

مصروفات وخدمه الدين العام الخارجي

3.5 مليار دولار

نصيبكم يامصريين من الدين كل واحد عليه 418 دولار

في ارقام جبتها من مؤسسة الاهرام مش كلها من الجهاز المركزي

انا في حاله اكتئاب شديده من اللي بشوفه وبسمعه

بس اوعوا تقلبوا الصفحة

ابقوا معي