كل عام وانتم بخير وعيد سعيد عليكم يارب
وينعاد عليكم بالف خير
رمضان خلص بسرعه والعيد كمان اخر يوم النهارده
افتكرنا اننا خلصنا من المسلسلات اللي قلبت رمضان
انما فوجئت انهم ابتدوا يعيدوها تاني وفي كل القنوات
بقت مطارده للمشاهدين وحرق دم ورفع ضغط
وده نتيجه مشاهدتنا للاسفاف وسماعنا الفاظ خادشه للحياء
وبيقال انها دراما واقعيه ومناقشه لقضايا المجتمع
ابتداء بقمصان النوم المثيره ومرورا بالشتائم بالاب والام
والخيانه الزوجية والدعارة وتعدد الازواج وليس الزوجات
فهناك فرق بينهم
وكمان بيعرفونا او بالاحري بيعرفوا الشباب والمراهقين وكمان الاطفال
الاثر النفسي بعد تناول الخمور والمخدرات
بعباره بقت حاليا شهيره وهي
سيبني انا عامل دماغ وطاير في السما
اسفاف وسوقيه وتدني بلا حدود
بنجد الملابس والحوار والالفاظ والحركات
والمط الشديد وتكدس معظم الاحداث في آخر حلقتين من كل مسلسل
والمرآة في أغلب المسلسلات من تجمع بين الازواج وتغيرهم كل فتره
او اللاهثة وراء الثراء وتتزوج من هو في سن والدها وممكن اكبر
او الفقيره التي تتزوج سرا وتقوم بدور العشيقه في حياة زوجها
او الباحثه عن عريس
ونجدها في اكثر من مسلسل تهان وتضرب
فهل هذه هي المرآة المصريه؟
مناظر كثيره من العري والخمور بكل انواعها والشيشه والمخدرات
ورقص خليع ومناظر جنسيه تثير اشمئزاز من يراها
ولم يسلم الصعايده من هذه المسلسلات
فاتحفونا المؤلفين بمشاكل الثأر والقتل والعنف من اهالي الصعيد
اعتقد ان مؤلفي المسلسلات الصعيدية لم يقوموا بزياره الصعيد اصلا
اما اللغه السوقيه في اللغه فحدث ولا حرج
كيف نمنع الاطفال من ترديد هذه الالفاظ ؟
استفاد ماسبيرو والعاملين به بميزانية تقدر بحوالي مليار جنيه
ياريت كان استفاد بها الشعب العدمان الفلسان التعبان القرفان
البرامج الحواريه نفس الاسئله التي مللنا منها
ونفس الضيوف ونفس المذيعات والمذيعين
ولكن هذا العام كان الفرق واضح جدا وهو كثرة الفضائح
والخيانات علي لسان الضيوف الافاضل
ياسياده وزير شئون التليفزيون المصري
الملقب بوزير الاعلام السيد أنس الفقي
المواطن لما بيروح السينما بيكون علي مسئوليته الشخصيه
يعني بيلبس وينزل من بيته واخد معاه ولاده ايا كانوا اطفال او مراهقين
ويطلع الفيلم قبيح او مؤدب هو اللي راح برجليه مشكلته هو
انما التليفزيون هو اللي بيدخل بيوتنا هو الضيف
الاطفال والكبار والمراهقين كلهم بيشوفوه
لازم يكون فيه معاير لابسط قواعد الادب
بيتهيالي ياوزير شئون التليفزيون زمان كان ممنوع كل اللي بنشوفه حاليا
ليه تسمح بيها عايزين المشاهد يتعلم ايه بالظبط ؟
كفايه اللي بنسمعه في الشارع بس في الاول والاخر ده شارع
يعني ماينفعش تغير هدومك فيه
البيوت معاليك لها حرمه
ياريت تصدر قرار بوقف اعادة المسلسلات رحمه باطفالنا وشبابنا
فين الرقابه علي التليفزيون صايمه عن الشغل ؟
التليفزيون أخطر جهاز بيدخل بيوتنا
واوعي تقولنا اللي مش عاجبه يقلب المحطه
متهيالي ان رساله التلفزيون ورساله الفن هي
توعيه المجتمع بقضاياه بالادب مش بالاسفاف وخدش الحياء
وبنلاقي ان الضحايا في كل اللي بيحصل
هما المشاهدين الغلابه
السؤال هو
فين راح مفهوم العيب ؟
حقول ايه غير حسبي الله ونعمه الوكيل في التليفزيون المصري
وبرضوا اوعوا تفكروا تقلبوا الصفحه
ابقوا معي
هناك 4 تعليقات:
اولا كــــل عــام وحضرتك بخيــر وسعاده وصحه وستر واسرتك الكريمه بكل خير
ثانياا انتى ليه مستغربه من الوضع الغير مسؤل وغير السوى من منظومه علمانيه تتستر وراء عبائه الاسلام
لا يهمها قيم ولا مبادىء ولا دين
ربنا يهديهم ويهدينا لتعلم مبادىء الدين الحنيف وكيفيه التعامل مع شهر الصيام الكريم وحسبى الله ونعم الوكيل
هشام ابو عيش
ليلي هانم
مقالك النهارده جامد جدا وانا بسال معاكي زي مالقبتيه وزير شئون التليفزيون (فين راح مفهوم العيب)
الي الامام دائما
وكل الود لليلي هانم
دكتور محمد عمر
لولا الغاليه
كل سنه وانتي طيبه
فعلا المسلسلات كانت بجحه فين واقعيه الدراما اللي فلقونا بيها المسلسلات لم تخرج من الغرز وغرف النوم والاثاره الفجه حقيقي عيب علي مسئولين التليفزيون اللي سمحوا بالاسفاف ولم يراعوا قدسيه الشهر الفضيل . مقالك يالولا عجبني جدا وربنا يحميكي يابنتي وبقولك استمري .كل شيء له آخر.
كل الحب لاغلي لولا
دكتور احمد الجمال
لولولا هانم اولا كل سنه وانتي طيبه وبخير وسعاده انتي والاسره الكريمه
ثانياموضوع المسلسلات الهابطه والتي كلها اسفاف دي يا بنتي مقصوده علشان يلهوا الشعب الغلبان اللي مش لاقي ياكل والمقاهي والكفيهات تتملي من الشباب العاطل اللي علي الرصيف ويلهوا الشباب ده عن مشاكله الحقيقيه حد شاف في الدنيا186 مسلسل في شهر كريم المفروض انه كل عباده وذكر يعني استكتروا علي الناس تعبد ربنا عباده تليق به سبحانه وتعالي لمده شهر في السنه فاصروا انهم يفسدوها وبعدين بتقولي ماينفعش يقولك حولي المحطه طيب حتي لو حولتي المحطه هتلاقي برضه نفس الاسفاف والعري والخلاعه فهوه محاصر الشعب من كل النواحي وبعين زي انتي ما قلتي مفيش غير حسبي الله ونعم الوكيل هيه اللي هتحل المشكله دي لانه القائمين علي هذا ناس مرتاحه يعني تفتكري وزير الاعلام يعني والعصابه اللي حواليع عندهم مشاكل في شئ دي ناس فاضيه وقاعده تخطط هنبوظ ايه بكره مش هنصلح ايه بكره واخيرا ااقول نفس قولتك حسبي الله ونعم الوكيل زيزو فيرست
إرسال تعليق