أعزائي
مش فاهمه انا ليه بتاخر عليكم
انتوا في بالي بس برضه مش عارفه جرالي ايه
يمكن لان الفضائيات بقت ملحه زي مابيقولوا
في الشارده والوارده
المهم بجد بجد وحشتوني ومش حتاخر عليكم تاني
في موضوعين انا منزعجه جدا منهم
تعالوا بهدوءءءءء
علي رأي عماد اديب نناقشهم
---
ده بقي اسم النبي حارسه وصاينه
عبدالله ابن الحاج مرسي
اللي قالوا انه خطب بنت الحكومه القنديليه
بس اياك ما يرجعوش في رأيهم
زي عاده الحا ج ابو شيماء
من ساعه ما ابوه بقي ريس وهو مش عارف يعمل ايه
مشاكله كتير
اخر مشكله كانت مع الملازم احمد حمدي من قوة تامين
حي فلل الجامعه في مدينه الزقازيق
كان راكب هو وصديقه عربيه ماركه BMW
طبعا مش تابعه للرياسه
يعني مش نمر رياسه الجمهوريه
طلبوا من العسكري يشيل الصدادات
بس بطريقه بايخه
قالوله شيل الصدادات دي وعديني يالا
يالا معناها ياواد بس بلغه الميكانيكي لما بيكلم الواد بليه
طبعا العسكري الغلبان مايعرفوش وما رفعش الصدادات
قاله امشي هات الظابط اللي معاك
جه الملازم احمد حمدي وكان جديد بقاله يومين في الحراسه
وماشافش وش المحروس قبل كده ولا يعرفه
قاله بتعالي ارفع البتاعه دي
رد الظابط وقاله ليه انتم مين حضراتكم
نزل صاحب ابن الحاج ابوشيماء من العربيه
ونغز الظابط في كتفه وقاله اتكلم عدل
مش عارف بتكلم مين ؟
وعمكم عبدالله ابن فخامه الرئيس قاله
انت مش عارف انا مين ؟
حعرفك انا مين وحعرفك شغلك
هاقلعك البدله الميري وهاخليك تقعد جنب امك
الظابط كلم مدير امن الشرقيه وقاله اذا ما اعتذرش حعمل محضر
والاعتذار يبقي قدام المجندين والظباط والاهالي في نفس المكان
ومش حيقبل اعتذار في اي مكان ولا حتي مكتب مدير امن الشرقيه
اتصل اسامه اخوه الكبير بالظابط
ردالظابط كان جميل عجبني قاله
انت ماغلطش في حقي الغلطان هو اللي يعتذر
لغايه دلوقتي مافيش اخبار عن اي اعتزار
الظباط هددوا بوقفه احتجاجيه
ولسه هوس هوس لا حس ولا خبر
طيب ياعم الحاج حتعمل ايه في الحكايه السوده دي
ياتري حتخليهم يضغطوا علي الظابط لجل عيون الحيله
والا حتقنعه بالاعتذار
والا حتنقلوه في حلايب جزاء تجرئه علي السيد عبدالله حفظه الله ورعاه
وسدد خطاه وجعله زخرا للوطن
والا حتدوا الملازم احمد حمدي استماره 6 وتريحوا حالكم
بس في كلمتين واقفين في زوري لازمن حتمن اقولهم
ياعم الحاج معاليك اذا مش عارف تربي ابنك
ازاي حتعرف تحكم بلد تعدادها اكتر من 90 مليون ؟
والنبي ابقي خلي الحكومه القنديليه ترد علينا في المؤتمر الجاي
وتعرفنا ازاي حتعرف تحكمنا وتشكمنا وتطلع علي جتتنا البلاء
ويجعله عامر ياعم الحاج ابو شيماء
---
الموضوع التاني هو الظباط الملتحين
لما ربوا اللحيه وقفوهم عن العمل
قوم ايه رفعوا قضيه والحكم جه عوده للعمل
الداخليه مش عايزه ترجعهم
طيب وحده وحده نقنع بعض
لما بيدخل الطالب كليه الشرطه كل يوم الصبح بيحلقوا دقنهم
وممكن خميس وجمعه يتحبس لو ماكانش حالق كويس
يعني دخلتوا الشرطه وعارفين النظام
حتقولولي سنه عن الرسول عليه الصلاة والسلام
طيب باقي السنن بتعملوها ؟ طبعا لا
في حاجه اسمها نظام للوظائف ماشين عليه من يوم ما اتخرجتوا
ايه الجديد
كده بقي الدخليه اتاخونت
الحديث الشريف بيقول
خفوا اللحيه وقصوا الشوارب
بالنسبه للحليه قص مازاد عن القبضه
انتوا شايفين الدقون قد ايه والا انا مزوداها حبتين
في سنه عن الرسول عليه الصلاة والسلام بتبيح الكحل للرجال
روي ابن ماجه رحمه الله
عن عبدالله بن عمر رضي الله عنه
ان النبي عليه الصلاة والسلام قال
عليكم بالاثمد - فانه يجلو البصر - وينبت الشعر
وصححه الالباني في صحيح جامع
---
طيب ماهي دي سنه يالله نتكحل كلنا مافيش حد احسن من حد
وبالمره تغيروا البدل الميري بجلاليب ميري برضه
بس تكون قصيره وتحطوا اسبلايت عليه الرتب
عشان تكمل
بجد حاجه ترفع الضغط وتجيب شلل رباعي
يا اهل الشرطه راعوا ربنا فينا قبل ما تطلقوا اللحيه
بطلوا السحل والضرب والتعذيب وبعدين دورا علي السنن واعملوا بيها
الدين المعامله
طيب الجيش ماعملش كده ليه ؟
تفتكروا مافيش حد عندهم بيعرف او بيقرا او حتي بيسال
عن السنن المفروضه
ياعالم والله حتجنن من اللي بشوفه وبسمعه
كفايه عليكم كده ومش حتاخر عليكم تاني
واوعوا اوعوا تقلبوا الصفحه
ابقوا معي
هناك تعليقان (2):
انشر موقع مدونة القران الكريم
التي تقدم القران الكريم بكل سهوله ولايوجد اي استغلال فيها اكسب الاجر وانشرها
http://al-korankareem.blogspot.com/
اسخف حاجة قرأتها بالصدفة كانى بتفرج على فيلم هابط من خلال سطور لا تحوى سوى سخافات فية طرق كثيرة للنقد بس ده ممكن نسمية ردح وبلدى كمان من النوع الرخيص خصوصا لو كانت الكاتبة له بدون حياء وكرامة الاشخاص اخر حاجة ممكن تفكرى فيها . بس مش مستغربة لان امثالك كثيرون انا اعتذر لنفسى والوم الصدفة التى ادخلتنى الى مش حسميها مدونة ممكن نسميها ( بسطة سلم للردح البلدى ) عموما ان لم تستحى فافعل ما شئت
إرسال تعليق