أعزائي
اولا احب اشكر كل اللي بيدخل المدونه عندي ويقرا ولو حرف من كتاباتي
واللي برضه بيتفضل ويكتب تعليق
عمي جحا المصري المصري ربنا يديله الصحه ويمتعنا بكتاباته
حكيم عقول اللي دايما بيصححلي اخطائي النحويه
هشام اللي تعليقاته دايما زي مابنقول في الجون
الاستاذه الفاضله يسرا بشكر حضرتك
المدون الاستاذ ابراهيم خليل وياريت يبعتلي اللنك لاني مش عارفه ادخل اشوف كتاباته
قارئي مستر جمالي من استراليا اللي لما بتاخر بيقلق ويسال عليه بالتليفون
الحقيقه مش عايزه انسي حد وكل واحد يعتبر ان الشكر ده خاص بيه هو
لاني بصراحه بكتب بفضل تشجيعكم
نبتدي المقال يا الله بينا
---
اسم المقال ده كان تعليق للفنان توفيق الدقن رحمه الله عليه
في فيلم من افلام زمان اعتقد اسمه بحبك ياحسن
بنشوفه كتير في التليفزيون
ولقيت انه انسب عنوان للمقال
---
مجلس الوزراء ارسل لجميع الوزارات خطابا سريا
بمنع كبار العاملين ورؤساء الهيئات بكل وزارة من الادلاء بتصريحات صحفية
الا بعد الحصول علي آذن رسمي من وزيره
وطبعا الوزير بياخد الآذن من رئيس الوزارة
هذه التعليمات هي نسخة طبق الاصل
من تعليمات احمد نظيف في 7 اكتوب2009
شرف قال بلاها اصدار تعليمات جديده
وماشي علي المثل القديم اللي بيقول
من فات قديمه تاه
---
رفعت حكومه شرف الضرائب علي السجاير بنسبه
10% لتصل الي 50%
وقالوا ان الزيادة حتحقق 2.1مليار جنيه
وفي نفس الوقت مارفعوش اسعار بنزين 95 اوكتين
ولا رسوم ترخيص السيارات
1600 سي سي فأكثر
والقرار ده اذا اتخذ فعلا ممكن يحقق مليار جنيه
من جيوب الصفوة
كمان جمدوا العمل بقانون الضريبه العقارية
يعني ملاك القصور والفيلات في الساحل الشمالي وشرم الشيخ والغردقه والسخنه
مش حيدفعوا حاجه
يعني شرف وسمير رضوان خليفه عبدالقووووي
مش حيغرموا الصفوةحاجه كله بعيد عن جيوبهم
بس لازم وحتما ولابد الحكومه تحط ايدها في جيب الفقراء ومحدودي الدخل
ياعيني عليهم ياحكومه الناس دول ممكن يشتروا سجاير فرت
ومش بتجوا الا علي الغلابه منكم لله
---
ارفع راسك فوق انت مصري
ياعصام مرحب بيك التحرير بيناديك
ياتري شرف لسه فاكرابناء الثوره
وهتافاتهم لما شالوك علي الاعناق واستبشروا خير
وفين العدالة الاجتماعيه اللي كانت شعارك ايام الميدان
علي فكره اللي شالوك علي اكتافهم من الميدان لرئاسه الوزراء
ممكن يشيلوك برضه بس لمكان تاني اريحلك من السفر عمال علي بطال
وبرضه ياآه ياآه
---
خبر غريب قريته وهو رفض المجلس العسكري استقاله دكتور يحيي الجمل
وده كان بعد قبول شرف الاستقاله
واتصل طنطاوي بالجمل مؤكدا رفض الاستقالة
والجمل ماصدق وسحبها
وقال ان شرف قبلها بسبب الضغوط اللي مارسها عليه
وشرف في تصريح له ماهو كثير الكلام
قال ان مسالة تغير رئيس الوزراء والوزراء شيء وارد
قرون الاستشعار عندي اشتغلت و بتقولي ان الكلام ده موجه للجمل
ياريتهم قبلوا الاستقاله وبالمره استقاله الوزاره كلها وريحونا
---
عدد المصريين اللي تم تقديمهم للنيابات والمحاكم العسكريه
حوالي 8000 شخص
يعني بواقع 2000 شخص شهريا
حكم العسكر حنقول ايه
----
يوم 27 يناير 2011 يعني بعد الثوره بيومين
اختفي 3 من ضباط الشرطة من مدينة العريش
وكان مقر عملهم قسم شرطة المنصورة
شريف المعداوي 27 سنه
محمد الجوهري 25 سنه
حمد حسين 25 سنه
كانوا يستقلون سياره بيجو 504 خضراء اللون برقم 166
ووجدت محترقة
النداء الاخير لوزير داخليتنا اللواء منصور العيسوي
هل تتابع علي الفيس بوك مثلنا طالما انك مش بتتابع من الوزارة مكان عملك الحالي
والسؤال لمعاليك هي العريش والمنصورة مش في مصر
او بالاحري مش تابعين لمعاليك يمكن تابعين لكمبوديا
ياراجل عيب كده اتحرك
ياتري وصلتك الرساله
حوووووووول
---
عندي كلام كتير جدا بس حريحكم يومين تلاته واكمل
معليش لازم اخد دواء الضغط
---
بس برضوا اوعوا اوعوا تقلبوا الصفحة
ابقواااااا معي
هناك 8 تعليقات:
-المجلس الأعلى للقوات المسلحة يدس أنفه فى كل قرارات رئيس الوزراء رغم انه ظل واقف انتباه 30 سنه امام مبارك الحقير!!
- لست متعاطف مع ظباط الشرطة المختفيين بل واتمنى ان تختفى طلتهم البهية من كل شوارع مصر ونستبدلهم بطلبة جامعيين من كليات الحقوق ... مش مممكن ابدا نعتمد على ناس هربوا مثل النساء أثناء الثورة و تركونا نواجه البلطجيه والمسجلين اللى اطلقهوم من السجون.
اعتذر على كلمة وردت فى تعليقى (هربوا مثل النساء)
الكلمة خرجت عفوياً انا اسف لأنى اعتبرها نظرة دونيه او نبرة ذكورية بحتة..لكن اعمل ايه اصل انا بقالى كم يوم مركز مه الحوينى وحسان اعذرونى وتقبلى اعتذراى استاذة ليلى.
لولا الغاليه
العنوان جميل والمقال اجمل مافيش فايده فيكي لولا اني عارف رأيك في ترشيح المرأة لرئاسه الجمهوريه كنت حقولك رشحني نفسك . يالولا دي وزاره انتقاليه مش بايدها اي حاجه الحكم زي ماقلتي للعسكر . ربنا يفوت الايام الجايه علي خير . مقالك كالعاده ثوري قلتي ان عندك كلام كتير عايزين نقرا اكتر . كل الحب للولا الغاليه
دكتور احمد الجمال
العزيزة ليلى أكيد حضرتك فاهمة إن الحاكم في مصر الآن مش شرف أو حكومته الحاكم هو المجلس السمكري اللي عمل لنفسه خط أحمر يعني مبارك جديد بيحكم مصر ، والسؤال نادى الشعب بإسقاط النظام فهل سقط النظام ، أم سادت الفوضى ؟؟لم يسقط النظام بعد ، مازالت المحليات كما هي ،والسفراء اللي سهلوا تهريب أموال البهوات كما هم ، وطنطاوي وعصابته كماهم ، إذن بقي النظام ، فقط واحد محل واحد داخل نفس النظام
تحياتي ليلى وبالمناسبة قبل ما أمشي هاتي حباية ضغط من المستورد اللي عندك
ههههههههههههه
حكيم عقول
يلي هانم
قريت مقالتك اللي فاتتني وطبعا زي ما اتعودنا منك اداء الحكومه مش عاجبنا زيك بالظبط وكمان حكم العسكر بنرفضهوعايزين محاكمه علانيه لرموز النظام اما دكتور الجمل بالظبط زي ماوضفتيه في مقالك منتظرين الكلام الكتير اللي قولتلنا .
كل الود لليلي هانم
دكتور محمد عمر
أحلى من الشرف مافيش مقال رائع يالينا..وشرف فعلا طلع كلامه عن العدالة الاجتماعية كلام ابن عم حديث وكلام فى الهوا وسى شرف لما الغلابة شالوه على إكتافهم فى الميدان قال فى نفسه دول رجالة عترة وشيلاين هموم وحمالين آسية وهم دول اللى لما نحب نشيل حد هم وغم هتلاقيهم برضه شيالين أم الاغنياء أوعى تقرب ليهم دول عمرهم ماشالوا حاجة..وحيث إن الغلابة شيالين هموم طيب نشيليهم كمان ونغلى عليهم حاجاتهم وسى شرف يظهر والله أعلم شعاره إنه أسهل من القرف مافيش.وشكرا ياسى شرف على القرف...تحياتى يالينا وتعبنا والله ياختى تعبنا
لولا
المجلس العسكري هو مبارك وحكومه شرف زي حكومه شفيق زي حكومه نظيف لازم كل رؤس النظام تتغير . مقال حريء كما عودتينا
تسلميلنا يالولا .
دكتور محمود الزهار
إرسال تعليق