أعزائي
رمضاااان كريم
ينعاد عليكم بالخير
ده فانوس رمضان الاصلي ابو شمعه مش الصيني
تقبل الله منا ومنكم صيامنا وقيامنا
وجعلنا واياكم من عتقاء الشهر الفضيل
---
قريبتي اللي مش يتبطل كلام عن مصر
اللي سمنها اللهو الخفي
من يومين فجأتني بسؤال ماكنش يخطر علي بالي !!!
السؤال هو
ياتري ياليلي لو بقيتي رئيس الجمهوريه حتعملي ايه ؟
السؤال صعب وعايز تفكير قلتلها حرد عليكي بمقال
قالتلي لا ده حيبقي الرد عليه في اكتر من مقال
حفكر معاكم بصوت عالي
----
اولا وبدون تفكير لازم اشوف حلول لكل اللي بيحصل
واول شيء اشوف حل في الاخوان
يعني اخلص مصر منهم
مش حموتهم طبعا بس حدور علي حل معاهم
ايه هو ؟
ده السؤال اللي تعبت في التفكير فيه
---
لازم اغير علم مصر وبفكر ارجع العلم القديم
شايفه انه انسب علم لمصر
كفانا سواد اللون الاخضر حتي بيريح العينين والاعصاب
---
الزراعه
طبعا ححل مشكله اثيوبيا ومنع بناء السد
الاراضي الصحراويه لازم تتخضر والشباب مافيش احسن منه لتخضرها
ممكن نرجع قانون فدادين خمسه خمس فدادين
بس حيكونوا فدادين صحراويه يتملكها الشباب
ويزرعوا ويحصدوا ويكفوا احتياجيتنا في الاول
بعدها يجي دور التصدير
---
الصناعه
حفتح المصانع اللي اتقفلت
حشجع اصحاب المصانع ممكن الدوله تساعدهم بشرط
تشغيل الشباب ,, ومش معني كده اننا حنستغني عن الكبار اصحاب الخبره
الخبره مطلوبه مع حماس الشباب
بشرط ان العماله تكون للمصريين
يعني نمشي بمبدا سياسه التوطين
---
الاقتصاد
ده بقي المشكله الكبيره
بس ممكن باراء الخبراء الاقتصاديين حنلاقي حل
ساعتها ممكن نشوف الصين واليابان عملوا ايه ونتعلم منهم
---
السياحه
بجد حاجه توجع القلب لما تبقي البلد اللي فيها تلت اثار العالم
بتعاني من السياحه
حد بذمتكم شاف حتي اعلان سياحي واحد يوحد ربنا
يفتح النفس في الخارج
ده في ناس لغايه دلوقتي واحنا في القرن ال21
فاكرين اننا لسه بنركب الجمل وفي قمه التخلف
ليه مانعملش البورصه المصريه للسياحه
زي بورصه برلين
ويجوافيها اهل السياحه واصحاب الفنادق من كل مكان في العالم
يعرضوا اللي جايبنهولنا واحنا نعرض احسن ماعندنا
ايه حيكون احسن من تلت اثار العالم
ده كمان حيدخل لمصر دخل مش وحش
بس بشرط التنظيم مش اي حاجه اقلب واجري
او بالاحري اعمل اي كلام واهبش اللي فيه النصيب
وابوك عند اخوك
نهتم بالاثاراللي ماحدش بيعبرها
احنا عندنا مرشدين ممتازين الحمدلله
بس الترجمان اللي بيبهلوا السياح بتوع
( جيفت بكشيش ياخواجه )
دول لازم يكون في وقفه معاهم
كتير جدا منهم فاهمين ليه مانساعدهمش ونديهم دورات ونعلمهم اكتر
اغلبهم مش بيعرفوا لا يقروا ولا يكتبوا حافظين اللي بيقولوه
ماشي الحال نحفظهم بس بطريقه كويسه
ويبطلوا يركبوا السايح الجمل ب5 دولار
ولما يخلص المده وعايز ينزل من الجمل
يشترطوا عليه ان النزول ب20 دولار
سرقه علني هما السياح بيعانوا شويه منهم
الامارات عمرها اقل من 40 سنه وحاليا
خامس دوله في العالم سياحيا
---
العشوئيات
مش حقول نقضي عليها انما في الاول لازم نحسنها
يعني ندخلهم الصرف الصحي والميه
ورجال الاعمال اللي بيحبوا يسعدوا اهلا بيهم
سواء عشان يعملوا عمل خير
او يتقال عنهم انهم شاركوا في عمل خير
لزوم الفشخره يعني !! المهم يساعدوا وخلاص
وبشويش بشويش حنلاقي العشوئيات بقت احسن من دلوقتي
---
الضرايب
ماينفعش الضرايب العشوائيه
وكمان لازم مأمور الضرايب يراعي ربنا
مايساعدش المتهرب عشان بيطلعلوا منه كام الف
وكمان مكاتب المحاسبين والمراجعين يراعوا ضمايرهم
ويقدموا ميزنيات حقيقيه مش مضروبه
طبعا في كتير من مأموري الضرائب عندهم ضمير
وكمان اللي بيدفعوا الضرايب لازم يكون عندهم ضمير
مش يكونوا بيكسب بالملايين ويدفعوا كام الف وعليكم السلام
---
حعمل قانون جديد
عدم اعطاء الجنسيه المصريه لكل من هب ودب
يعني وحياه النبي لما وحده مصريه تتجوز واحد مش مصري
عارفه ان ولادها حيتبعوا جنسيه ابوهم
ليه بقي تطلب لهم الجنسيه المصريه
اللي عايزه ولادها يكون جنسيتهم مصريه تتجوز مصري
وحطالب بسحب الجنسيه من ملايين الل متجنسين بيها
اشكال حماس والمناظر المهببه اللي اخدوا الجنسيه بدون وجه حق
كمان حنحط قيود علي فيزات الدخول لمصر
زي مابيطلع عين أم اللي خلفونا في اي سفاره اجنبيه
يبقي المعامله بالمثل
لينا الحق نمنح ونمنع
---
التاكسيات
نعمل شركه تابعه للدوله لكل تاكسيات الجمهوريه
يتوحد العداد يعني مش كل واحد يزوده بمعرفته عند
كهربائي السيارت
يبقي في متابعه مستمره
حتي ساعتها مش حيبقي في مشاكل بين الراكب وسواق التاكسي
لو في مشكله في شركه تابعلها التاكسي والسواق تحل المشكله
التوك توك يبقي موجود بس برخصه مش عشوائي
حتي نعرف لو لا قدر الله حصل مصيبه نجيب السواق
---
المروووووور
المشكله الاساسيه
لازم نظبط المرور اول حاجه بلاش نتلكك علي المخالفات
يعني بلاش نخالف كده وكده عشان ناخد المعلوم
ونسيب المزز يخالفوا زي ماهما عايزين
لان لو في قانون رادع كان المرور اتظبط
والمسئوليه كمان علي اللي بيسوقوا
لما بيطلعوا يسوقوا في مكان غير مصر
بيكونوا ملتزمين وخايفين وبيطبقوا القانون بحذافيره
انما في بلادهم انسي ان في قانون
علي فكره انا وحده من الناس دول يعني بخالف ما انا عارفه ان اخرها
20 جنيه للامين وامشي
وهو بيضربلي اعظم سلام صعيدي شحط محط من فوق لتحت
تعالوا بقي للعساكر الغلابه اللي واقفين في الاشارات
واللي اغلبهم ياولاداه مايعرفش الالف من كوز الدره
طيب ازاي حياخدوا نمره المخالف
دول مجندين الاقاليم
ويا حفيظ علي لبسهم المهلهل
لازم يلبسوا احسن من كده دول عنوان مرور مصر
وكمان تلاقيه غلبان وواقف حيموت من التعب
عطشان وجعان وقرفان وزهقان
ولو حد اتعدي عليه مش معاه ولا حتي عصايه يدافع بيها عن نفسه
---
الشرطه
عايزه تظبيط جامد
ادخل اي قسم شرطه تعمل محضر يالهوي
تفضل تتنقل من امين لامين واولويه المحاضر
للمعارف و المحاسيب
تلاقي الظابط عنده خدمه ليليه بيسموها
( مرور سياسي )
نايم في بيته وراكن البوكس في اي شارع جانبي
وسايب القوه اللي هما العساكر يولعوا ماهو البيه نايم
ومعاه الجهاز لاي طاريء ساعتها بسلامته يقوم من النوم وينزل
كمان لازم يكون في تناسق في شكلهم
مرات تلاقي ظابط مرور كرشه قدامه متر
منظره بشع ده لو احتاج يطارد حد حيعمل ايه
ده ياحرااام بيمشي بالعافيه حيجري ازاي ؟
والا حيقول الحق حرامي امسك حرامي وهو واقف مكانه
كان في وزير داخليه من احسن وزرائها
اسمه احمد رشدي
سمعت انه كان بينزل ينظم المرور بنفسه
ويلف علي الاقسام والمديريات
وعشان كده طلعوه بدري بدري
التجمع الخامس مش بلاقي فيه ولا اي كمين ولا عسكري واحد يوحد ربنا
هو التجمع ده تابع لجمهوريه كامبوديا ؟
---
البنوك
ده بقي الامن فيها قصه تانيه
يعني العسكري اللي واقف قدام البنك من غير سلاح
ب20 جنيه تعرف منه كل اللي انت عايزه
ممكن يقولك امتي البنك المركزي بيبعت العربيه المصفحه
اللي فيها الفلوس للبنك
وكام واحد بيكون راكب فيها
ولو عايز تعمل مصيبه قدام البنك مع العربيه دي
ب500 جنيه يبعلك البنك ويجري وممكن يقول انه راح الحمام
----
البلديه
اللي اسمها المحليات
لما يطلع في دماغها او بالاحري لما تبقي عايزه تشتغل
وده كل حين ومين تلاقيها نزلت تشيل التعديات
بس حتشيل ايه والا ايه
بتشيلها كام عربيه بيسترزق منها الغلابه
طيب مانعمل حاجه احسن
كل محل ممكن ياجر مكان صغير قدامه عشان زباين المحل
في الامارات وتحديدا في الشارقه
محل لارين في شارع جمال عبدالناصر
مأجر من البلديه مكان قدامه بيدفع فيه
اكتر من 100 الف درهم في السنه
عشان الزبون يقف فيه
ولو وقف اي حد غير زباينه المرور بيحصل منه غرامه فوريه
قيمتها كااااام 1000 درهم
ليه مانعملش كده بدل الصف التاني والتالت
وبرضه حيكون دخل كويس
ونعمل سوق للي بيتعدوا علي الرصيف مكان صغير بايجار معقول
يكون في مكان قريب مش نحدفهم في اماكن بعيده
ساعتها نبقي ماعملناش حاجه
لا حيشوفوا زباين ولا حد حيشوفهم
---
التامين الصحي
ده بقي فيه امتهان لكرامه المواطن
بس الغلابه يعملوا ايه
مضطرين يقعدوا بالساعات وده يزوع فيهم والتاني يتأمر عليهم
كل ده عشان شريطين ضغط وممكن مسكن او كام حقنه انسولين
---
المعاشات
دي مشكله المشاكل
الموظف قعد طول عمره يدفع التامينات والاخر ياخد 80% من راتبه كمعاش
والورثه ياخدوا من 75 ل80 % من المعاش اللي كان بياخده
يعني الدخل بينزل
والاسعار بترتفع
مش حاطين في اعتبارهم ان اللي بيطلع معاش له مصاريف
دواء حتي لو في تامين صحي لانهم مش بيصرفوا كل الادويه
بحد اقصي 3 ادويه
كل دواء شريطين يعني 20 قرص
اللي بياخد قرص في اليوم مش بيكفيه
طيب ازي الحال لو بياخد مرتين او تلاته في اليوم
العيد جه مش له احفاد عايز يديهم عيديه
راح يزور حد من اولاده مش حياخدله كيس جوافه مثلا
عايز يشتري لبس عايز يجامل قريب او جار
ولو ورثه وفي اولاد بيتعلموا دي لوحدها كارثه
انا لو حصل وبقيت رئيس جمهوريه اول حاجه حعملها
حثبت الاسعار وارفع المعاشات 100%
والغي السوق السوده مش في العمله بس
في كل حاجه ممكن يكون فيها سوق سوده
كل اللي كتبت عنه عايز اعاده هيكله
ولسه في حاجات تانيه حكتب عنها بس كفايه كده النهارده
حسيت انكم ملتوا مني ومن كلامي
تفتكروا اللي عايزاه ده كتير
سامعه اللي بيقول انها عايزه تعيش في المدينه الفاضله
وليه مصر ماتبقاش هي المدينه الفاضله
اللي ربنا سبحانه وتعالي قال عليها في القرأن الكريم
ادخلوها امنيين
نفسي اصلح كل اللي كتبت عنه
وللحديث بقيه
واوعوا اوعوا تقلبوا الصفحه
ابقوا معي
