أعزائي
بجد والله وحشتوني جدا
مش قادره اكتب عشان البلد كل يوم بقت من سييء لاسواء
والاحباط اللي كلنا فيه
بس برضه ححاول وربنا يعينا جميعا
---
التقي دكتور قنديل رئيس الوزراء
بشباب الاعلاميين وقيادات الاذاعه والتليفزيون
بدل ما يتكلم عن الشهداء والمصابيين واوضاع البلد
اتكلم عن ان الجهل بيخلي الست ترضع عيلها
من غير ماتهتم بتنضيف صدرها
قوم ايه يجيي للعيل اسهال
والفلاحات بينزلوا الغيط بيغتصبوا
ياعم قنديل انت مصلي ماينفعش ترمي المحصانات
ده كلام يصدر من رجل عاقل ومسئول
والله لو الست آم كشري قاعده في الحاره قدمها مشنه الفجل والجرجير
وبتهش الدبان من بالمنشه
حتتكسف تقول الكلام الخايب اللي مالوش معني
انا بقول يمكن عايز يمسك وزاره الصحه كمان
يالله بالمره عشان يخربها من كل ناحيه
شوفوا بقي تعليقات الفيس بوك علي كلامه
شفتوا وصلنا لفين !!!!!!!
الشعب المصري بيداوي جراحه بالضحك
حتي لو بيضحك علي حاله
---
قنديل والمدام سافروا امس لاداء مناسك العمره
كل ميادين البلد وكل محافظاتها في مظاهرات واعتصامات
الاصابات وصلت يوم جمعه الكرامه 200 مصاب
ازاي يسيب البلد في الظروف الحرجه
ماهو ضامن الكرسي حيروح ويرجع يلاقيه
لو ماكانش ضامنه كان اخده معاه وهو مروح بيته
بعدين حد ينط ويقعد عليه
فاكره كرسي من الكراسي الموسيقيه
عجبت لك يازمن
---
مسجد حسن الشربتلي بالتجمع الخامس
هو المسجد المفضل للحاج ابوشيماء لاداء صلاة الجمعه
بيفتشوا المصلين قبل مايدخلوا يصلوا
واحد قال يوم الجمعه اللي هي اول امبارح
ده بيت الله ومفتوح للجميع
الصلاه بقي فيها اجراءات امنيه زياده عن الحد اللي شفناه مع مبارك
الصفوف اللي وراه حراسات خاصه بالزي الملكي
بيروحوا للصلاه في 3 اتوبيسات ياعيني علي كده
بالاضافه للحرس الجمهوري بالزي الرسمي
استنوا لسه
في امن مركزي وشرطه المرور
زي مايكون داخل المطار او مول او اوتيل
طبعا الصوره بتقول كل اللي حقوله واللي انتوا كمان حتقولوه
اللي بيصلي بيبص لمكان سجوده مش للي حواليه
يبقي بلاش الفيلم الهندي اللي عمله في التحرير وفتح الجاكت
لك الله يامصر
---
حماده صابر او المسحول
طبعا كلنا شفنا السحل وكل العالم شافه
حماده اخدوه مستشفي الشرطه وعالجوه
وعشان كده تاني يوم صرح وقال انه كان بيشرب ازازه بيبسي
ولقي المتظاهرين اخدوه وقلعوه هدومه وسحلوه
ولما وكيل النيابه وراه تسجيل سحل الشرطه له
بكي واعترف وقال ان الوزير جاله وباس علي راسه وعالجه
طبعا واكيد انهم وعدوه يشغلوه ويدوله سكن
عشان يرجع في اقوله
ده يورينا ان الفقر بيخلي الناس تتنازل عن حقها
وقبل ماتتنزل عن حقها بتتنازل عن مبادئها
الله يلعن الفقر والجهل المتفشي في شعبنا
---
ذادت معدلات الهجره مسلمون ومسيحيون
ياحرام اللي قدر ياخد فيزا بالشيء الفلاني ويقطع تزكره
سافر بلا هدف ولا ضمانات
السفر كان نتيجه الخوف والرعب من الاحداث
وثوره الجياع اللي جايه قريب
وكل الشعب بيعاني من المشاكل اللي بيشتغل والعاطل
كمان بقي في تميز بين الشعب المصري
التميز في الدين ده من ناحيه الاخوان والسلفيين
عايزين يفرضوا نمط جديد
شركات كتير بتصفي اشغالها والموظفين طبعا في الباي باي
مصانع بتقفل والعمال يقعدوا في الشارع مش مهم
شوفوا المحلات طول اليوم الزباين يدخلوا يتفرجوا ويخرجوا
مافيش حد بقي يشتري
حيلحقوا ازاي علي الغلا والكوا كفايه انهم بياكلوا
ويدفعوا الكهربا والميه اللي غليت
كل اللي بيشتغل سواء موظف او عامل قلقان من الوضع الحالي
ده بقي اللي زود معدلات الهجره
---
طبعا جالكم اكتئاب بس ححاول المقال الجاي يكون كوميدي
واسلمي في كل حين
وا وعوا اوعوا تقلبوا الصفحه
ابقوا معي
