أعزائي
الاحداث متلاحقه مش بنقدر نستوعب
علي رأي الله يرحمه توفيق الدقن كله علي ودنه
بسال ليه عم الحاج ابو شيماء من اول ماركب الكرسي
وهو بيتحدي القضاء؟
قلت انك حتعيد المحاكمات حقولك ان اي حد فاهم
وانت كلك مفهوميه عارف ان المتهم مش بيتحاكم مرتين
وبرضه قرارك اللي كان حبر علي ورق
باعاده المجلس الموقر وكابرتوا ورحتوا محكمه النقض
مافيش فايده رحتوا القضاء الاداري رجعتوا تاني مافيش فايده
----
خبر نزل للشعب باقاله النائب العام
المستشارعبدالمجيد محمود
بعده خبر تاني
تعينه سفير مصر في الفاتيكان
خبر تالت
المستشار قبل المنصب
مع ان المستشار صرح وسمعتها بوداني وشفتها بعنيه
في التليفزيون
انه باقي في منصبه
وقال بالحرف
باق في مكتبي ولن اترك منصبي الا لو اغتالوني
تقطه بقي ومن اول السطر
اقاله النائب العام مش من سلطتك ياحاج عشان ده تصرف غير قانوني
ابقي غير القانون الاول وفضي الملعب والعب براحتك
غير- كسر - اضرب
يبقي ساعتها زي مابتقول
كله بالقانون
---
كان المبرر علي اقاله النائب العام هو براءه المتهمين في موقعه الجمل
بس المستشارين نسيوا يقولولك ان اللي باشر القضيه
المستشار محمود السبروت
والمضحك او بالاحري المهزله المضحكه
ان في واحد من المستشارين اتهم النائب العام بالتواطيء
في قضيه العباره
لو فكر ورجع الذاكره لورا حبتين كان حيلاقي
انها كانت علي ايام النائب العام السابق
----
بجد بقي شابوه واكبر تعظيم سلام
للمستشار عبدالمجيد محمود
ماقبلش عزومه هشام قنديل لا في بيته ولا مكتبه
ولا شرب معاه شاي بالياسمين يووووه
بقصد قهوه لخبطوني وعادل امام حيزعل مني
قال له لو عايز تعال انت بيتي اهلا وسهلا
ماخافش يكون مصيره زي مصير السنهوري
ماركعش لانه لو ركع مره حبفضل يركع علي طول
بحب اوي الثبات علي المبدا
بجد بجد وقفه احترام للنائب العام
----
نفسي عم الحاج يسال الاخوان عايزين ايه
ماهو برضه متربي في حضنهم
وله دلال عليهم
اتظاهروا داخل قاعات المحاكم
وهانوا المحكمه الدستوريه
وكل اللي بيتكلموا باسم حزب الحريه والعداله
في برامج التوك شو بيهينوا القضاء والقضاه
ماهو الحاج لما نط علي الكرسي ماكانش فرافيرو
كان بصندوق الانتخاب اللي اشرف عليه القضاء المصري
قولهم عيب كده كتير
---
نرجع تاني لعمنا الحاج خطب 3 مرات في اسبوع واحد
في استاد القاهره
وخطب في المحامين
وجماهير اسكندريه
اخطب زي ما انت عايز واذا عايز تبدل الخطوبه بجواز انت حر
بس وحياه النبي من غير ارتجال
كلامك محسوب عليك
ولازم تعرف انك مش مطرب عشان تفضل تتحرك
علي المنصه طولا وعرضا
فين المستشارين ؟
باين انهم بيشوروا عليك باللي بيعجبك
مش اللي لازم يكون
----
الجماعه الاسلاميه حتقاتل لتطبيق الشريعه
ورفضت نص الماده التانيه للدستور
وطالبت بحذفه وهددت بالنزول للميادين
ودعوة الشعب لرفض الدستور
اصل الميادين فاضيه قالوا نشغلها
لان الايد البطاله نجسه
دي كمان حتقدم ارواح اعضائها شهداء
لو الدستور خالف الشرع
ده كلام محمد صلاح عضو الهيئه الشرعيه
وبيطالب بمليونيه لحصار العلمانيين الموجودين في التاسيسيه
استنوا استنوا اللي جاي
الاستفتاء علي الدستور بصورته الحاليه
حرام شرعا وبيطالب بالجهاد
اخر حاجه خدوا عندكم
طالب الشيخ عبد الاخر حماد عضو مجلس شوري الجماعه
الاعضاء بتجيش انفسهم لمعركه تطبيق الشريعه
مش حعلق لان ضغطي عالي
ومش مستغنيه عن صحتي
----
رئيس الوزراء هشام قنديل
صرح ان رواتب الموظفين حيصرفوها قبل العيد
كتر خير الحكومه
والمعاشات ليه مش حيصرفوا ؟
تلاقيهم بيقولوا ماهما عيدوا كتير قبل كده
كفايه عليهم كده
ما فكروش ان ممكن يكون واحد عايز يدي احفاده العيديه
او وحده بتربي اطفال يتامي عايزه تشترلهم لبس علي العيد
مع ان الحكومه واخده فلوس التامينات وبتنقط اصحاب المعاشات
يعني من ماله ولا يحلاله
عمار ياعم قنديل يجعل بيت مجلس الوزراء عامر
---
حمله تطعيم الاطفال ضد الشلل متاخره
المسئول عن الاهمال اياكش يجيله شلل
---
سمعت ان في عابدين كان فيه مهرجان السيرك الدولي
هو سيرك الحكومه مش كفايه عشان يجيبولنا سيرك دولي
والله الشعب المصري ده غلبان
----
النهارده حوالي الساعه 2 الضهر كنت في الحي التامن في مدينه نصر
بالظبط في شارع ابو داود الظاهري في تقاطع شارع الطاقه
شفت منظر غريب جدا
بنات مدرسه حكوميه مروحين بعد اليوم الدراسي
تفتكروا راكبين ايه
سمعه اللي بيقول توك توك
لا راكبين نص نقل اللي بينقلوا فيه اليومين دول
الجاموس والبقر والخرفان
بمناسبه عيد الاضحي
شفتوا وسيله نقل التلامذه في القرن 21
---
الساعه 4 النهارده كان فيه قطع طريق من عربيات النقل
في ميدان سفير بمصرالجديده
قدام محطه بنزين مصر
الشارع واقف والشرطه بتحاول تمشي المرور
طبعا دخلت محطه البنزين اشوف في ايه
عبيت بنزين وماكنتش محتاجه بس عشان اعرف في ايه
حشريه انا عارفه
وسالت العامل هو في ايه قالي دول عايزين سولار
قلتله وايه المشكله
قالي المكنه بتاعه السولار بايظه وهما مش مصدقين
قلتله طيب بيني وبينك هي بايظه
قالي بيقولوا
قلتله اه زي قولوله بتاعه حليم
ضحك العامل وقالي حاجه زي كده
قلتله طيب ربنا يقوم المكنه بالسلامه وسلملي علي حليم وقولوله
----
كفايه كده لان المقال بقي مقال كابيس
واوعوا اوعوا تقلبوا الصفحه
ابقوا معي
