رسالة الي عائلتي

أعزائي

وحشتوني وبتاخر عليكم وكل مره اقول اني مش حتاخر بس بتاخر 

ياريت تعزروني 

حاله البلد مش مستقرةوخصوصا الوزارات اللي بتجي كل 3 دقايق 

وتمشي يادوب الوزير يحلف اليمين  وبعدها يتزحلق ويمشي

قريبتي اللي فضلت يكون اسمها اللهو الخفي في مقالاتي 

حاليا كل كلامنا يوميا منصب علي مصر 

ما اخبيش عليكم هي قلقانه جدا وقلقها زياده لانها عايشه خارج الجمهوريه 

وبتسمع علي حاله عدم الاستقرار والانفلات الامني وده بيخليها مش مستقره 

وهي خايفه جدا علي مصر ماهي في الاول والاخربلدها اللي اتربت واتعلمت فيه 

قالتلي  تفتكري لو محمد الله يرحمه ابن علاء مبارك بعت جواب لاهله  ممكن يقولهم ايه ؟

طبعا مش حخبي عليكم  انا شبطت واتعلقت بالفكرة 

وكنت عايزه اكتب عنهم بس مش لاقيه مدخل مناسب 

والحمدلله هي اديتني اول الخيط  

الاستاذ هشام من قرائي الافاضل قالي باين انكم عاملين تشكيل انتي وقريبتك 

وانا برضه ابتديت اقتنع بكلامه

تعالوا نشوف ممكن يقولهم ايه ؟

انا محمد علاء مبارك ببعت لعائله مبارك اللي هي عائله بابا وعائله راسخ 

باعتبارها عائلة ماما 

لازم تعرفوا ان انا في دار الحق وكلكم في دار الباطل 

جدو حسني 

انا زعلان منك لانك قهرت الشعب المصري اللي احنا منه 

وعاملتهم بقسوة وسرقتهم وقمعتهم لمده 30 سنه ولما قامت الثوره فضلت قاعد 

مش عايز تسيبهم يشوفوا رئيس يتقي الله فيهم 

كان لازم تتقي الله في الشعب الغلبان اللي بمعاونه اللي كانوا حواليك سرقتهم وساعدتهم علي سرقته

لازم ترجع الفلوس اللي اخدتها لانها مش من حقك 

ليه قفلت ملف العباره السلام  هان عليك كل اللي ماتوا فيها

ليه داريت علي الفساد  وانت عارف ومتاكد انهم لفقوا ورق عشان تاخد تصريح 

بالابحار وانت عارف مين شريك ممدوح اسماعيل  في العبارات اللي  بتموت الشعب 

املاكك ياجدو كتير كنت منتظر تصرفها امتي وانت وصلت للسن ده حتعيش كام سنه 

يعني زي مابيقولوا رجل بره ورجل جوه . او في قائمه الانتظار اللي مع عزرائيل 

الارصده اللي في بنوك سويسرا وبريطانيا  والعقارات اللي في الولايات المتحدة ومصر 

والارباح اللي بتاخدها من صفقات الاستثمار بالملايين 

والشركات الكبري بتقدم 50% من ارباحها لاحد من افراد عائلتك سنويا 

نسيت انك اخدت صفقات سلاح وصفقات عقاريه ب15 مليار دولار 

والمبني الاداري الضخم في ميونيخ  15 دور وفيه مكاتب لكبري الشركات والبنوك 

المبني بيدخلك ملايين اليورهات . وحاجات كتير غير كده 

انا مبسوط ان ربنا تاب عليه من آكل الحرام وخدني عنده 

جدتي سوزان

  صاحبة المليارات في بنوك امريكا وعقارات في فرانكفورت 

ومدريد  وباريس ولندن ودبي 

دخلتي  نادي الميلياردرات سنه 2000

واستوليتي علي ارصدة مكتبه الاسكندريه وحطتيهم في حسابك 

فاكره السفيرة  نهاد زكري كانت مديره مكتبك وعينتيها سفيرة في سويسرا ليه ؟؟

لانها هي اللي بتدير ثروة عائله مبارك في المانيا 

كنتي بتبعتي طيارة الرئاسة كل اسبوع لباريس عشان تجيبلنا الاكل 

والشرب والحلويات والشيكولاته  والميه المعدنيه 

حتي كانت اداره مطار اورلي في باريس  مخصصه مكان محدد للطيارة 

كنتي بتبعتيها عشان تجيب لوازم  قصر العروبه وشرم الشيخ وبرج العرب 

وبتقولي انك بتعملي خير فين الخير ده ؟ده ظلم بصراحه انا مكسوف منكم 

بابا علاء 

عملت مؤسسه محمد علاء مبارك للخير بفلوس حرام 

تعملي صدقه جاريه من الحرام 

عندك طيارتين  ويخت ملكي باكثر من 60 مليون يورو

وكمان 8 مليار دولار واملاك في شارع روديودراف بلوس انجلوس ومنهاتن بامريكا 

فاكر السيسي اللي كنت بلعب بيه انا وعمر اخويا 

بتسفرله طيارة خاصة لباريس عشان تجيبله علف اورجينك علي حساب الدوله 

السيسي يابابا تاكله اعشاب آمنه  سليمه طازجه 

والشعب بيشرب من المجاري ومنهم بياكلوا من الزبالة

والشعب بياكل حاجات كتير مسرطنه 

ماما هايدي 

فاكره اكبر قصرين في مارينا  اللي اخدتيهم  وبعتيهم  واتحرروا في الدفاتر الرسمية 

انهم ارض فضاء . هو حضرتك كنتي محتاجهم  وغير كده عندكم كتير .

جدو مجدي  

حضرتك مش امين زيهم  اخدت 2200 فدان في افضل اماكن بالشيخ زايد 

ب30 جنيه للمتر ودفعت مقدم بسيط  والباقي علي اقساط  

وياعالم دفعتها والا قلت حين ميسرة 

ونفس الشيء علي مشروع نيو جيزه ارض منتجع بيفرلي هيلز 

اخيرا وصلت لعمي 

عمو جمال 

17 مليار دولار وحساب سري في بنك ubs وicm

وفندق غزالةبشرم الشيخ 

مؤسسة بريستول اند وست للعقارات  البريطانية 

ومؤسسة فاينتشال داتا سيرفس  بتدير صناديق الاستثمار المشترك 

فاكر ياعمو لما سفرت الفرسه بتاعتك لدبي 

عشان تتعشر من خيول الشيخ محمد ابن راشد 

ساعتها خصصت طياره خاصه نقلتها  وسافر معاها  رئيس هيئة الخدمات البيطريه 

ونائبه علي حساب الدوله ماهو مولد وصاحبه غايب 

ورجعت بالسلامه وهي مهجنه بافضل الجنات الوراثية من الخيول العربيه الاصليه 

وزعلتوا عليه ده ربنا رحمني منكم 

كان لازم تتعظوا انما مافيش فايده الحرام عمي عنيكم 

بصراحه مكسوف اني منكم 

وبقول ان شباب التحرير كان عنده حق لما كان بيهتف ويقول 

انتوا بتاكلوا حمام وفراخ واحنا الفول دوخنا وداخ 

وسوزي بتلبس احدث موضه واحنا ياعيني التسعه في اوضه 

اكيد ربنا حيوريكم ايام سوده لون عملكم 

الامضاء محمد

اخيرا قرائي الاعزاء 

اوعوا تقلبوا الصفحه 

ابقوا معي

وقفه للتأمل مع اللهو الخفي

أعزائي

البدايه بصوره علم مصر القديم اللي كان لونه اخضر وابيض بس

اللي كان بلون الخضره والصفاء

الف مبروك علينا جميعا الثورة والحريه

جت بعد طول انتظار

الحمدلله علي كل شيء

بقالي مده مش بكتب لاني بتامل اللي بيحصل حوليه

متلخبطه من الفرحه  مش مستقره قلقانه عايزه الجاي يكون احسن من اللي فات

كل المتناقضات موجوده عندي

اللي خلاني اكتب النهارده تليفون جاني من احدي قريباتي

المقربات جداجدا ليه ومش عايشه في مصر

طرحت عليه اسئله وانا كمان طرحت عليها اسئله

بعض اسئله لقينا لها اجابات والبعض الآخر لم نجد

اقترحت عليه اني اعرضها عليكم في مقال

قلتلها احط اسمك معايا بما انك شاركتيني الافكار والاسئله

قالتي ممكن تكتبي اني

اللهو الخفي

حنقف وقفه تأمل ونشوف ايه اللي عايزينه من رئيس الجمهوريه الجديد

بس الاول نقول لعم الحاج مبارك اننا قسمنا رياسته علي تلاته كل 10 سنين كان بشكل مختلف

اول 10 سنين في حكمه كان كويس الشعب ماشافش منه حاجه وحشه

حتي كان لسه بيفصل بدله عند ترزي في المحله الكبري

ال10 سنين التانين بقي مش قد كده يعني ابتدا يتعوج

تعالوا للباقي او بالاحري ال10 سنين الاخيره

كان لعنه ربنا ابتلانا  بيها  هو وعائلته اللئيمه

تفتكروا مين اللي خلاه كده هو والا الشعب ؟

بقصد الشعب اللي حوليه يعني بطانته ماهو برضه بطانطه من الشعب المصري

مش من شعب كمبوديا

يعني الرئيس الجديد حيبقي زي عم الحاج يعني بدايه طيبه وحسنه

ونهايه مايعلم بيها الا ربنا ؟

وده برضه بفضل الحشكيش اللي بتكون حوالين الرؤساء

ولو بقي زي عم الحاج امتي حيبقي كده بعد كام سنه من حكمه ؟

حيحط قوانين للاقارب والمعارف والبطانه والمحاسيب والا حيمشوا علي قوانين الشعب؟

وياعالم الدستور اللي بيفصلوه حاليا حيمشي عليه والا حيغير فيه حسب مزاجه ؟

الرئيس الجديد لازم يخاف ربنا في نفسه واولاده وشعبه

ويعرف انه حيقف قدام ربنا يوم القيامه وحيتحاسب

علي كل مسيحي ومسلم جاع في عهده او اتظلم

عايزين رئيس يقدر العلم والعلماء

ويحاسب اللي بيسرقوا شعبه ويعرف ان الشعب كله امانه في عنقه

مايكونش 70 سنه ومافوقها

السن له حكم والبني ادام لما بيكبر بيضعف

يعني عم الحاج مبارك اللي فوق 80 سنه بيفهم في الفيس بوك ؟

حفكركم بخالد ابن الوليد لما ابنه ضرب ولد صاحبه

ابو الولد اشتكي لخالد كان رده انهم بيلعبوا مع بعض

ولما ابو الولد اشتكي لسيدنا عمر ابن الخطاب رضي الله عنه وارضاه

فما كان من عمر الا انه عزل خالد ابن الوليد

ياالله  هل ممكن نلاقي الاخلاق دي  في رئيسنا القادم ؟

الاحزاب لازم الكبار منهم يسلموا الرايه للاصغر

لازم يكون في تداول سلطه

الكبار بنحترمهم وبنقدرهم وفوق راسنا

بس الزمن بيتغيرومتطلبات الشباب بتتغير

لازم الشباب يشارك واحنا شفنا الشباب عملوا ايه

الدستور اللي بيتفصل  حيكون في ماده لمحاسبه رئيس الجمهوريه والبطانه اللي حواليه ؟

حيسالوا عن الذمة الماليه ؟

و زي ماكلنا عارفين في قضاه ووكلاء نيابه فاسدين زيهم زي كل مهنه

حيتحاسبوا والا هما فوق القانون ؟

علي سبيل المثال القضاه بعضهم مش كلهم اللي شاركوا في مهزله الانتخابات الاخيره

حيتواجدوا في الانتخابات القادمة ؟

الرئيس الجديد حيراسنا كام مده برضه 30 سنه ؟

سؤال مهم جدا وهو

ماهي التغيرات اللي حنحس بيها بعد ثوره25 يناير غير الحرية والديمقراطيه و15% الزياده؟

الحكومه حتقدر تأكل الغلابه لحمه كل 15 يوم ؟

اقسام الشرطه اللي حاليا بيعاملوا المواطنين باحترام وممكن يعظموا للشعب

بعد ماتهدا حاله البلد وتستقر حيرجعوا يضربونا بالجزم زي الاول ؟

ازاي حيحلوا مشاكل العشوئيات والميه والمجاري ؟

والا ده كلام كلام علي رأي الصبوحه

مش عايزين شعارات زي ثورة 52

ثورة الشباب مختلفه مافيش فيها جدال

الاحزاب اللي بيساندوا حاليا ثورة الشباب بعد نجاحها

كانوا فين ايام ماكان منهم اعضاء في مجلسي الشعب والشوري

فين الاصلاحات اللي حاولوا يعملوها  طبعا مافيش لانهم كانوا مستفدين من الوضع القائم

وكلامهم حاليا ماهو الا تصفيه حسابات مع النظام القديم ؟

والقضاه حيبتوا في قضايا الشعب سريعا والا بسرعه النملة وتتاجل  القضايا لسنوات وسنوات

تماشيا مع المثل اللي عارفينه كلنا وهو

في التاني السلامه ؟

ياتري الدرج المفتوح الموجود في المصالح الحكوميه حيتقفل ؟

والا لسه الفرده موجوده التي تتمثل في

الشاي  والقهوة والنسكافيه او حلي بق العيال لما تروح ؟

كناس الشارع حيكنس بذمه ويشوف شغله والا حيقف في الشارع

ويقول للرايح واللي جاي الجمله الشهيرة

كل سنه وانت طيب  لو في عيد اوما فيش عيد

يعني من الاخر واقف يشحت

ياتري ممكن نلاقي رئيس يمنع كل التجاوزات دي

ادعوا معايا وقولوا يارب نلاقيه

واوعوا اوعوا تقلبوا الصفحه

ابقوا معي



أسلمي يامصر

أعزائي

كنا نسينا اننا مصريين انما الشباب بين 18 و35 نفضواعنا تراب 30 سنه متراكم

وثاروا لانهم لم يروا ان غدا افضل من اليوم لانهم بلا آمل

تظاهروا بلا اجندة ولا خلف حزب من احزاب المعارضة

وكانت وسيلتهم هي الفيس بوك والموبيلات

مصر بها اكثرمن 65 الف موبايل

منهم اكثر من 12 الف بلاك بيري

(اللي بيتمتع بعدم القدره علي مراقبته )

وكان الرد عليهم هو قطع كل الاتصالات الانترنيت والموبيلات

وبقينا زي الجزر المعزولة

مصر ايام 1981 غير مصر 2011 تغيرت التركيبة

تغيرت مطالب الشعب

ورئيس الحكومه التنفيذيه اللي هو رئيس الوازرة

وحتي الوزراء لم يعدوا صالحين . انتهت صلاحيتهم

وجاء الرئيس باول بيان له بحل الحكومه الحاليه واسنادها

الي الفريق احمد شفيق

وجاءنا البيان التالي  وهو تعين السيد عمر سليمان

نائب لرئيس الجمهوريه

وتشكلت الوزارة الجديدة وكانت حسب ماقال انها ليست من رجال الاعمال

بل من ذوي الخبرات  او بمعني اخر من كبار السن

الذين تعدوا سن المعاش لاننا نجد ان متوسط سن الوزراء

المعيين في وزارة الفريق احمد شفيق هو65عاما

متي سنري وزير30 او 40 عاما؟

ولكن الشعب لم يهدا ولم يرضي وظلت المظاهرات كماهي

مع تحدي المتظاهرين لحظر التجوال

الشعب يضغط والريس صامد

ولكن لم يدم هذا الصمود فكان الظهور الثالث للرئيس مبارك

واعلن  وقال سنحاسب المسئولين عن الفساد

واعلن عدم نيته في الترشيح في انتخابات الرئاسة القادمه

وانه سيكمل المدة الباقيه وبعدها يترك الحكم

وتغير المواد 76و77 من الدستور لتتيح لمن يريد الترشيح في الانتخابات الرئاسية القادمه

وكرر دعوته للاحزاب السياسيه للحوارالسياسي

ولم يهدا ليس كل الشعب بل جزء منه

واستمرت المظاهرات تدعوه للرحيل

فلنهدا قليلا  لالتقاط الانفاس

ونري ماذا ستفعل الحكومه الجديدة والمده الباقيه ليست بكثيره

فمن انتظر 30 عاما لا يضيره الانتظار 6 شهور

مع العلم ان تغير المواد 76 و 77 من الدستور ستعرض اولا علي مجلس الشعب

ويوافق ثم تعرض علي الشعب للاستفتاء الشعبي

وهذه علي ما اعتقد ستاخذ وقتا مدته شهرين او اكثر

وقبل اجتماع المجلس لتغير المواد  يجب البت من القضاء علي هذه الطعون

اهيب بالشباب الواقف بميدان التحرير  ان يهدا وينتظر ويري

ماذا ستفعل الحكومه

واذا لم يعجبه فميدان التحرير موجود مش حيشيلوه

يعودوا للتظاهر السلمي والصمود وكلنا عرفنا الطريقه

يجب ان تنتقل السلطه في امان وسلام

تحية تقدير واعجاب  للشباب علي صمودهم واصرارهم

وتحيه لعم الحاج علي شجاعته واعلانه عن عدم ترشيحه في الانتخابات القادمه

ويريد ان يختم حياته في سلام

تحيه تقدير واجلال لصاحب اول طلعه جويه

والان جاء دور السين وعليكم الجيم

1- من كان وراء فتح السجون وخروج وليس هروب المساجدين ؟

2- من اصدر الاوامر بترك الضباط اقسام الشرطه للامناء والمساعدين

 الساعه الخامسه يوم الجمعه28 يناير؟

3- من المسئول عن استعمال غازات مسيله للدموع منتهيه الصلاحية منذ عام 2003؟

4- من كان وراء حريق اقسام الشرطة والمحاكم وسرقه ونهب المنشأت العامة والخاصة ؟

5- اين كانت الاحزاب السياسيه  واين دورها قبل انتفاضة الشباب ؟

6- الان يدعون لتكوين مجلس الحكماء فاين كانوا الداعين قبل 25 يناير ؟

7- لماذا طالت هذه المره اقامه البرادعي و اري انها اقامه طويله عن اقاماته السابقه؟

هل يريد ان يركب الموجه ؟

8- زويل سياتي لينضم لمجلس الحكماء فاين كان قبل انتفاضه الشباب في 25 يناير ؟

ماذاااااا يريد ؟

ارجو منكم قرائي الاعزاء التفكير في الاجابات .

وصفحة التعليقات تستوعب اجاباتكم جميعا

واسلمي في كل حين

واوعوا اوعوا تقلبوا الصفحة

ابقوا معي



صحي الخلق وهز الكون مصر بلدنا مش حتهون

أعزائي

شيئ مذهل حقيقيي حصل او بالاحري اللي بيحصل

مصر كلها بجميع محافظاتها في ثوره

حاولت انشرلكم صور كتير بس النت مش مساعدني

بطيئ زياده وده لدخول اعداد كتير  للمدونات والفيس بوك والمواقع المختلفه

حكتبلكم عن مواقع المظاهرات والهتافات اللي الشارع المصري بيرددها

ولما تتضح لنا الصوره اكتر حكتب باستفاضه

الاماكن اللي حدثت فيها المظاهرات هي

القاهرة

دوران شبرا - دوران المطرية - وسط القاهرة

ميدان التحرير . ميدان سفنكس . الكورنيش . الدقي

والنهارده في مدينه نصر امام الجامعه العماليه اول شارع عباس العقاد

-----

الجيزة

شارع جامعة الدول العربية .امبابه . جامعه القاهرة

----

اسكندرية

منطقة القائد ابراهيم

----

الاسماعيلية

شارع التلاتين .شارع السكة الحديد . بجوار الحمزاوي

----

الغربية

طنطا : امام مبني المحافظة بشارع البحر

المحلة : ميدان البندر . ميدان الشون الشعبية .والجمهورية

----

كفر الشيخ

بلطيم . ميدان بورسعيد

----

قنا

ميدان البنزايون

----

متظاهروا المطرية يوجهون استغاثات لكافة الهيئات الحقوقية

ينادون نحن نتعرض لمجازر فعلية من الامن 

بور سعيد حصار 150 ناشط داخل مبني الحزب الوطني واطلاق الكلاب البوليسيه عليهم

اسكندرية . محظه الرمل  المتظاهرون يشتبكون مع الامن والامن يسحل المتظاهرات

المحلة . المتظاهرون يتعدون 20 الف ويكسرون الطوق الامني حولهم

وكل تجهيزات الامن تنسحب الي الشوارع الجانبية

والمتظاهرون يسيطرون علي شارع البحر .

 اما الهتافات فكانت كالاتي

حد ادني للاجور قبل ما الشعب يثور

--

ثورة ثورة يامصريين علي حزب المجرمين

--

الثورة جايه جايه بالعدالة والحرية

--

الاصلاح بقي شيء مطلوب قبل الشعب ماياكل طوب

--

الطلاب ويا العمال ضد الفقر والاحتلال

--

ثورة مصر جايه جايه بالعدالة والحرية

--

خالد سعيد مات مقتول ومبارك هو المسئول

--

حكم 30 سنه في هذا العصر هو اهانه لشعب مصر

--

واحد اتنين الشعب راح فين

--

ارفع صوتك زي الناس احنا كرهنا الظلم خلاص

--

صحي الخلق وهز الكون مصر بلدنا مش حتهون

--

يااهلينا يا اهلينا ضموا علينا صموا علينا

--

ثورة ثورة حتي النصر ثورة في كل شوارع مصر

--

بطل تمشي جنب الحيط اصل سكاتك مش حيفيد

--

يا ابو دبوره ونسر وكاب احنا اخواتك مش ارهاب

--

كلها هتافات من قلوب المصريين

برغم ضرب المتظاهرين فهم مصرين علي موقفهم

ندعوا جميعا لهم بالتوفيق

مش حقولكم اوعوا تقلبوا الصفحه

لاني متاكده انكم حتبقوا معي

وللحديث بقيه



مجزرة الاسماعلية

أعزائي

بعد ايام تاتي زكري مجزرة الاسماعليه يوم الجمعة 25 يناير عام 1952

ممكن كتير مننا بيعرفوا ان يوم 25 يناير عيد الشرطه انما ليه بيحتفلوا باليوم ده مش عارفين

تعالوا نحكي ونعرف

نرجع للتاريخ لعام 1952

نشطت اعمال التخريب والانشطة الفدائية ضد المعسكرات البريطانية 

وانسحب العمال المصريين من العمل في معسكرات الانجليز

وبذلك وضعوا القوات البريطانيه في حرج

واعلنت الحكومة عن فتح المعسكرات للراغبين في ترك عملهم

والانضمام للكفاح الوطني

وتم تسجيل (91572) عاملا اسمائهم

وذلك في المدة من 16 اكتوبر 1952

حتي 30 نوفمبر 1952

حوالي شهر ونص

كما توقف المتعهدون عن توريد اللحوم والخضروات وكل مايلزم اعاشة

80 الف جندي وضابظ بريطاني

وكان رد فعل بريطانيا الاتي

استدعي ( البريجادير أكسهام ) القائد البريطانيه لمنطقة القناة

ضابط الاتصال المصري وانذره بسرعه تسليم قوات الشرطة المصرية

اسلحتها للقوات البريطانية وترك الثكنات ومحافظة الاسماعيلية

فرفض ضابط الاتصال الانذار البريطاني وابلغ بذلك

وزير الداخلية المصري فؤاد سراج الدين باشا

فرفض المثول وطلب منهم الصمود والمقاومة

فاطلق البريطانيون قنابلهم بتركيز اكثر من ساعه

ولم يكن لدي الضباط المصريين التابعين لبلوكات النظام

غير بنادقهم القديمة والعصي

( البنادق القديمه اللي بتشتغل بالمنفله )

وكانت هذه المعركة الشرارة التي غيرت مجري تاريخ مصر

دي كانت مقدمه لما اريد ان اطرحه

كثير من الشباب والاحزاب حاليا ينادي بمظاهرات يوم 25 يناير  اي بعد 4 ايام

وفاكرين انهم حيغيروا حالنا  او ممكن فاكرين اللي حصل في تونس ممكن يحصل هنا

وبيحفذوا الناس علي المظاهرات وبيطالبوهم بتخزين المواد الغذائيه

قال يعني الداخليه والحكومة مش دارين ونايمين علي ودانهم

وحيسيبوهم يغيروا حال البلد في غمضه عين

والمضحك انهم بيعلنوا انهم حيقفوا امام وزارة الداخليه يوم 25 يناير

زي بالظبط لما سواق الاتوبيس يقول محطة المطار السري

الاخوان وحزب الوفد اعلنوا عدم اشتراكهم في مظاهرة يوم الثلاثاء

وكتير من اللي بيحفذوا الشباب ويوزعوا المنشورات

مش حيشتركوا في المظاهرات ولا الوقفات

ممكن يتفرجوا علي اللي بيحصل

انا مؤمنه بان معظم النار من مستصغر الشرر

والمثال علي كده

شاوشيسكو كان بيخطب في امان الله والمؤيدين بيهللوا

واحد هتف بسقوطه الكل ايده

وهاجموا القصر وهرب هو وايلينا زوجته بالهليوكوبتر

والجيش انضم للشعب وقدروا يقبضوا عليه ويعدموه هو وايلينا

انمااللي حيحصل او بالاحري اللي عايزينه يحصل مش حينجح

لازم قبل مانعمل الشيء ندرسه ونشوف امكانيه نجاحه

مش نعمل اي حاجه

وعلي رأي جدتي لما بتقول هوجه عرابي

دي بقي حتكون هوجه 2011

حنقول ايه غير ربنا يحمي مصرنا الحبيبه

ويرفع عنا الغمة

ممكن يكون رائيي صادم لكتير منكم

ومستعده جدا لاي نقد وبرحب بيه

والاختلاف في الرأي لا يفسد للود قضية

وبقولكم اوعوا اوعوا تقلبوا الصفحه

ابقوا معي

زين الهاربين وحاكمة قرطاج

زين الهاربين والكوفيرة وزوج ابنتهم

------

أعزائي

كل عام وانتم جميعا بخير ويارب تكون سنه جديده خير علينا جميعا

الاوضاع تغيرت بسرعة وبشكل لا يمكن توقعه

من منا كان يتوقع ماحدث في تونس

وما قام به الشعب التونسي مثل يجب ان يحتذي به كل المقهورين

نبدا بسرد الاحداث ففي الايام الاخيره من ديسمبر2010

بعد ان قام  محمدبوعزيزيه أحد الشباب وهو حاصل علي شهادة علمية

ويعمل بائعا متجولابحرق نفسه احتجاجا

علي ظروفه الاجتماعية

وقد قام النقابيون بتظاهرفي العاصمة التونسية

تضامنامع شباب محافظة سيدي بوذيد جنوب شرق العاصمة

وواجهتم الشرطة بالرصاص وسقط الضحايا

وزار زين العابدين الشاب بوعزيز في المستشفي

وحذر بأن الاحتجاجات ضد البطالة غير مقبولة

وهدد مثيري الشغب بالعقاب الشديد

ثم اجري تغيرا وزاريا محدودا في وزارات الشباب والاتصال والشئون الدينية والتجارة

وبعدها اقال محافظ سيدي بوذيد

ومنذ ايام وجهه خطابا تلفزيونيا يتهم اطراف خارجية

بأثارة الشغب والاضطرابات

وذلك كاعاده جميع الحكام العرب

وامتدت المظاهرات الي الضواحي وعلي اثرها

اقيل رفيق بلحاج قاسم  وزير الداخلية

وفرض حظر التجوال من الخامسة مساء حتي السابعة صباحا

واعلن بعدها الرئيس زين العابدين في خطاب تليفزيوني بأنه لن يترشح

في انتخابات 2014كما الغي الرقابة علي الانترنيت واطلق حرية الصحافة

وكلف الحكومه بتخفيض اسعار السلع الاساسيه كالخبز والسكر والحليب

ولكني اعتقد ان كل هذا لتهدئه وتسكين الشعب التونسي

ولكن شعبه لم يصدق مزاعمة واجبره علي الخروج

او بالاحري علي الهروب والانتحار السياسي

بعد 23 عاما من الحكم والقهر بلا منازع

ولم ترغب فرنسا في استضافته وتوجه الي السعودية التي قبلت الاسضافه لمده قصيرة

وقد تسلم رئيس الوزارءفؤاد المبزع 77 عاما رئاسه البلاد

بصورة مؤقتة ويجب ان تجري الانتخابات بعد 60 يوم اعتبارا من الامس

ملاحظه صغيره اري ان معظم الحكام حاليا في سن كبيرة

واعتقد انهم سيمارسوا مهامهم الرئاسيه علي الكراسي المتحركة

ناتي الي الاهم وهو السيدة ليلي الطرابلسي زوجه الرئيس

او كما يسموها الحاكم بأمره

من مواليد 1957 والداها كانوا بائعين خضر وفاكهه

حصلت علي الشهادة الابتدائية وبعدها التحقت لتتعلم

تصفيف الشعر ( كوافيره )

وتعرفت علي رجل الاعمال خليل معاوي وتزوجته وطلقت منه بعد 3 سنوات

بعد ان تعرفت علي رجال الاعمال

وعملت بعدها في التجارة بين تونس وايطاليا

وسحب جواز سفرها وكان حين ذاك زين العابدين مديرا للامن

ساعدها علي ارجاع جواز السفر ثم تزوجها

وبعد زواجها من زين العابدين استحوذ شقيقها بلحسن الطرابلسي

علي شركه (كورتاجو اير لاينز )كما سيطر اقاربها علي اقتصاد تونس

وكانت سلطاتها تفوق سلطات رئيس الوزراء بل الرئيس نفسه

فكانت تقيل الوزراء وتعين السفراء

وشبكة اقاربها ملكت الهواتف المحمولة والتعليم الحر

وكان من اشهر معاونيها هو رجل الاعمال محمد صخر زوج ابنتها

وكان يمتلك اذاعة الزيتونة الدينية ومؤسسة دار الصباح ومصرف الزيتونة

وعضو اللجنة المركزية للتجمع الدستوري الديمقراطي الحاكم

وكانت تعده بأن يكون وريث زين العابدين .

الوراثه بقت في دم كل  الرؤساءالعرب

نامل ان تحترم الحكومة الجديدة حق الشعب في التعبير عن ارائه

وتتم الاصلاحات الاقتصادية والسياسية والاجتماعية

واجراء انتخابات حرة معبره عن ارادة الشعب .

ويارب مش بعيد علي ربنا ان كتير يعملوا زي ماتونس عملت

----

ملاحظه عننا  احنا يقال  ان الكهرباء في مصر ستصبح بكروت شحن

مثل كروت الموبايل المسدده مسبقا

الموبايل لما الكرت بيخلص بنتكلم ونقول سلفني شكرا

اكيد الكهربا لما تتقطع حنقول كهربي شكرا

والله دي حاجه تجنن

واقولكم كالعادة

اوعوا اوعوا تقلبوا الصفحة

ابقواااااا معي

حسابات ختاميه لعام 2010

أعزائي

بعد 3 ايام نستقبل العام الجديد 2011

كل عام وانتم جميعا بخير ويارب يكون عام سعيد علينا جميعا

والاهم يكون عام سعيد علي مصر

---

 قديما لم يعرفوا الا المواطنه ولم يعرفوا التعصب الديني

فكلنا مصريون والاختلاف الديني لم يكن له وجود

فالمسيحيه القبطيه هي مسيحيه مصريه بحكم الاباء القدامي للكنيسه المرقصية

بالرغم من الاضطهاد من الكنائس الاخري

وتخت ظل حكم اسلامي منذ اربعة عشر قرنا من الزمان .

---

ارتفاع مستوي معيشة المواطن حسب تاكيدالاحصائيات الحكومية

وده اللي بياكده الغلاء وارتفاع الاسعار

السكر ب7 جنيه الكيلو

---

سمك القرش في شرم الشيخ وقريبا في الغردقة

كارثه الاتوبيس السياحي في الطريق بين اسوان وابو سمبل

قضوا علي السياحه

---

الوزير الذي اكد في برنامج علي قناه فضائيه ان اسماء وعناوين

وارقام تليفونات الفقراء في درج مكتبه

الظاهر ماعرفش ياخد ارقام موبيلاتهم

يابختهم  ياتري مين فينا منهم

---

البرلمان الموازي ومجلس شوري موازي ومحليات موازيه

واكثر من 50 نقابه عماليه ومهنية و17 الف جمعية اهلية

ناقص يجيبوا شعب موزاي

---

كلام ورغي وطق حنك من الوزراء في برامج التوك شو

عن الفقراء ومحدودي الدخل

ياتري ايه موقفهم من معدومي الدخل

---

مترو الانفاق ضرب الرقم القياسي في استمرار الاعطال

هههه وقال ايه بيعملوا محطات جديده ومدوا الخطوط

مش لما تصلحوا الاعطال الاول

---

هشام طلعت مصطفي  اتبدل حكم الاعدام بحبس 15 سنه

والمؤبد للسكري

ماتستعجلوش حيخففوا الحكم وممكن عفو صحي

---

القبض علي الجاسوس المصري طارق عبد الرازق حسنين

بتهمه التخابر لصالح اسرائيل

الظباط الاسرائيلين هربوا

---

انفلونزا الطيور وبعدها انفلونزا الخنازير

دول موضه قديمه الجديده الانفلونزا المحورة

برضه مش حتحوق في الشعب المصري لانه من البيئه الصحيه اللي عايش فيها

بقي عنده مناعه طبيعيه

---

اختفاء برنامج القاهرة اليوم لعمرو اديب

بسبب ديون المحطه

هي دي الحقيقه والا لمنع شغبه لانه بيعلن دايما انه بيحب مبارك

ولكن مش عايز وصول ابنه للحكم

---

ابعاد ابراهيم عيسي عن رئاسة تحرير الدستور فهل الاقاله لانه صمم علي نشر

مقال البرادعي عن انتصار اكتوبر ؟

---

سعر الطماطم وصل ل12 جنيه

يامجنونه ياقوطه

---

الجدمعيه الوطنيه للتغير عارفين ليه اسمها كده

عشان بتغير اعضائها كتير

نيولوك  يعني

---

عمر افندي

حيبعوه لمستثمر اجنبي لا المستثمر مصري بقاله في السوق 30 سنه

والله حيرتونا  معاكم  حتبعوه لا مش حتبعوه

خلاص والنبي ابعدوه

----

واخيرا  جهاز شئون البيئة ماشاءالله عليه

استطاع الحصول علي شجرة كريسماس

صديقه للبيئه

لولولولي

---

كفايه عليكم كده  وكل عام وانتم طيبين واشوفكم السنه الجايه علي خير

بس اوعوا اوعوا تقلبوا الصفحه

ابقوا معي .

مقارنه بين الماضي والحاضر

أعزائي

كل عام وانتم جميعا بخير بمناسبه السنه الهجريه الجديده

وادعوا انها تكون سنه سعيده علي مصر وشعبها الغلبان

الصور دي صور من الزمن الجميل اللي ماعشناش فيه

وعلي رأي عبد المنعم مدبولي

زمان زمان  الكل متهني وفرحان

بس حاليا الكل مكتئب وقرفان

تعالوا نعمل مقارنه  ونتحسر اننا ماعشناش في الزمن الجميل

----

التعليم المتميز هو الفرق بين الافراد والشعوب

التعليم زمان في مصر كان قبلة لكل العرب

الجامعات والمدارس المصريه كانت منارة للمنطقه العربيه

بنشوف اجيال قبل ثوره ناصر 52 بتدخل مدارس الحكومه

اما الفشله من التلاميذ واللي مش بيحصلوا علي درجات بيدخلوا يتعلموا في المدارس الخاصة

دلوقتي ياعيني اللي يقول انه في مدرسه حكومه  يبقي مكسوف زي ماتكون سبه او عامل عمله

مدارس الحكومه خريجيها عاطلين

الدروس الخصوصيه بقت عبء علي كل عائله لها ابناء في التعليم

الدروس من الحضانه للجامعة

والشيء المؤسف ان خريجي الجامعات المصريه لا يدرجوا في خانة الكفاءات

 بل في خانه العاطلين  والجالسين في الكفيهات .

----

كان الاقتصاد في الخمسينات والستينات  يعتمد علي القطاع العام

ولذلك الحكومه زمان طردت جميع المستثمرين الاجانب من مصر

اما الحكومه النظيفة يووووه اقصد الرشيده بتفتح الابواب وبتحضن وتتحايل

وتستجدي الاجانب باقامه مشاريع وتقدم اليهم جميع المعونات الممكنه والغير ممكنه

الدين الداخلي موجود موجود ياولدي

بعد ان كان لمصر سندات وودائع في بنوك انجلترا

نتسول القمح من امريكا

بعد ان كانت مصر قديما هي سله غذاء المنطقة

الشباب العاطل في مصر يهاجر هجرة غير شرعية

ويموت في عرض البحرطالبا الرزق

قديما كان الاجانب من ايطاليا وقبرص واليونان وغيرهم

ياتون لمصر للعمل في محلات البقالةوجرسونات المطاعم والكافتيريات

زمان كان يحضر الاجانب لافتتاح بنسيونات لان مصر كانت بلدا امنه.

زي برضه ماشفنا في روايه ميرامار لمحفوظ نوبل

الست الوزيره الهمامه وزيره القوي العاطله تستجدي وتلح وتتحايل

بلاد الخليج لعمل الفتايات المصريات بوظيفه خادمات بعد ان كانت مصر تستجلب

المربيات من انجلترا وسويسرا لتربيه الابناء وتعليمهم

كما شاهدنا في مسلسل الملك فاروق

وبعد ان كانت الطبيبات والمدرسات والممرضات المصريات

يلقوا ترحيبا من بلاد الخليج للعمل معهم .

----

الرشوة والفساد وانعدام القانون

والقانون السائد حاليا هو قانون البقاء للاقوي

والفساد اصبح من اكبر المؤسسات حتي بطاقه التموين

الغير مصرح بها لمن يتقاضي 1000 جنيه شهريا

قال يعني الالف جنيه حيعملوا حاجه في الغلاء اللي شيفينه

اما في الماضي فكان يطبق سياده القانون

---

متوسط عمر من في السلطه فوق 70 عام

واعتقد انهم سيذهبون الي البرلمان والوزرات علي كراسي متحركة

وذلك لان مصر فقدت الشباب

ولذا نجد انفسنا يامصريين في قطار السبنسة

----

حتي الفن الجميل اصبح غير موجود

فنجد الاغاني الهبابيه المعروفه بالشبابيه هي السائدة

الاصوات كلها شبيه ببعضها حتي يتعذر عليك معرفه من يغني

وكذلك في اغاني كثيره يتعذر عليك ان تعرف المغني رجل او سيده

زمان كان الرقص بالنسبه للرجال عيب

حاليا عيب جدا لو الشاب مايعرفش يرقص

ويهز اجدع من احسن رقاصة

----

زمان كان فيه وسائل مواصلات كثيره ورايقه

حاليا الوسائل بقي فيها توك توك

وزمان كان الصغير بيقوم للكبير في وسائل المواصلات

حاليا الشباب يزاحم الكبار للجلوس علي مقعد خالي .

----

المره دي حبتدي بحاليا

اغلب بنات الجامعه وعموما النساء حتي الاطفال محجبات

ياريت اللي فاضي يروح  زياره وحده للجامعه ويشوف المحجبات بالبنطلونات المحزقه

والبدي اللي بيبان كل اللي تحته   ومناظر لا تليق بالحجاب

زمان ماكانش في حجاب  بس الكل كان محترم

بنشوف حفلات ام كلثوم مافيش ولا وحده محجبه بس كلهم محترمات .

----

زمان كان بيسهر يوم الخميس الشباب ومش بيتاخر عن الساعه 12

حاليا السهره تبتدي من الساعه 12 وفي كل ايام الاسبوع

واللي زاد وغطي  ان الصبايا برضه تلاقيهم في كل ايام الاسبوع

وفي وقت متاخر بصحبة الشباب او تجمع صبايا

اللي كتبته كله بعد حديث ممتع والله ممتع من رجال ونساء افاضل 

من اللي عاشوا في الزمن الجميل

بعتذرعلي طول المقال ويارب ماتكونوا ملتوا مني ومنه

طبعا المقارنه مش في صالحنا ولا صالح الزمن اللي عايشنه حاليا

وآه يازمن يازمن آه

واوعوا واوعوا تقلبوا الصفحة

ابقوا معي

توابع الانتخابات

أعزائي

خلاص الجوله الاولي في الانتخابات خلصت ويوم الاحد وعليكم خير الجوله التانيه

طبعا كلنا عارفين النتيجه من الكونترول ان الحزب الوطني حيحصد اكبر عدد من اعضاء المجلس الموقر

ولسه الجوله التانيه اكيد طلعت في الكونترول وبرضه لصالح سيد قراره

علي اي حال مبروك للحزب  وهارد لك للمرشحين اللي اتنبح صوتهم

والاخر طلعوا قعدوا علي دكه الاحتياطي لمده 5 سنين

في حاجتين عايزه اكلمكم عنهم طبعا عرفتهم قبل الانتخابات بس المقال السابق ماحبتش اكتب عنهم

لاني مش بحب يكون مقالي كبير وتملوا منه خليني خيفه عليكم

كفايه عليكم الانتخابات والحزب الوطني  كان الله في عونا جميعا

اول حاجه اني قريت ان في اربعه من ظباط الشرطه في محافظه الاسماعيليه

تم نقلهم لمده اسبوعين  لمحافظه تانيه والسبب ان في اتنين منهم والدهم مرشح فئات

والتالت  المرشح نفسه يبقي عمه اما الرابع فوالده مرشح عمال

شفتوا بقي نزاهه الانتخابات

قال يعني لما ينقلوهم يبقي مش حيكون ليهم يد في مساعدته

ولا ظبطوا كل شيء قبل يتنقلوا

طيب مش هما برضه ليهم زمايل . لما بتكون اجازه من شغلك

حتي لو حد معرفه بيجي يسال عليك علشان عايز يخلص شغله

اكيد حد من زمايلك بيساعده وبيحل محلك

شفتوا بقي الحكومه بتستعبطنا ازاي  والله اتغظت جدا لما قريت الخبر ده

تعالوا علي الخبر التاني

سمعت وشفت برنامج الطبعه الاولي للاعلامي المحبوب من كتير منكم احمد المسلماني

انا من مشاهدي البرنامج وبحترم جدا مذيع البرنامج

بس من وجه نظري هو اخطأ مش عارفه عن قصد او دون قصد وقال

وطبعا ده بيوجهه لجمهوره من خلال البرنامج

قال اللي رايح ينتخب ولقي حد اداله فلوس عشان ينتخب مرشح معين

ياخد منه الفلوس . بس وهو ورا الستاره بينتخب يراعي ضميره !

فين بقي هنا الضمير اللي بيحكي عنه

دي دعوه صريحه للشعب عشان يبقي نصاب

ازاي ياخد فلوس عشان يادي خدمه مهما كانت  وماننساش انه رضي يعملها ووعد

وبعدين نطلب منه انه يراعي ضميره

هو اصلا اذا مراعي ضميره حيروح ينتخب من غير ماياخد اجر علي صوته

وفي نفس البرنامج يناشد المواطنين ويقولهم

صوتك امانه . والنبي تجي ازاي دي

التليفزيون جهاز اعلامي خطير ولازم يتحروا الدقه في كل مايقدم

بس مين يسمع ومين يعلم الصح

نتيجه الانتخابات احبطتني

مش قلتلكم ان الاكتئاب قادم لا محالا

وبرضوا اوعوا اوعوا تقلبوا الصفحه

ابقوا معي

انتخابات مجلس الشعب 2010

أعزائي

كل خمس سنين وانتم بخير  النهارده كانت انتخابات مجلس الشعب

قلت اعمل جوله علي لجان مصرالجديده بصفتي من سكانها 

اول شيء شفته الصبح الساعه 9 ونص صباحا في التليفزيون

عمنا الحاج الكبير لما انتخب هو ومرات عمنا واولاد عمنا في لجنه

مصر الجديده الثانويه النموذجيه للبنات

ودي تعتبر اشيك وانضف لجنه في مصر كلها

اللجنه دي بالذات لما لها من اهميه تلاقوها دايما هادية

نقول الاول عن نظام الانتخابات

المرشحين 508 نصفهم عمال وفلاحين والباقي فئات

منهم 64 سيده ودي كوته المرأة

فتحت ابواب اللجان في الثامنه صباحا

واغلقت في السابعه مساء

222 لجنه انتخابية بيتبعها   144.500 لجنه علي مستوي الجمهورية

تحت اشراف 2286 قاضيا و276 الف موظف من العاملين

بالحكومة  والهيئات والمؤسسات وذلك لتولي رئاسه وعضوية اللجان

لما تدخل اللجنه تلاقي بوستربيوضح كيفيه الادلاء بصوتك

بعد ما تنتخب ستجد صندوقين الاول للمقاعد العادية اما الثاني فهو الخاص بمقاعد المرآة

لجان هاديه جدا ولجان ساخنه جدا

طبعا انا كنت حكتفي باني الف علي لجان مصر الجديده انما جاني تليفون اثناء مروري علي اللجان

قلب كل شيء  بوفاة احد اقاربي وكانت الجنازه من السيده نفسيه

طبعا وصلت قبل صلاة العصر بدقايق لقيت هدوء غريب

بعد صلاه الجنازه علي المرحوم  رحنا ندفنه في مقابر الامام الشافعي

المهم بعد كل ده رجعت اكمل المرور علي الدوائر وكان من حسن حظي اني تهت

اه والله تهت ولقيت نفسي في ازقه وحواري وزحمه رهيبه في الامام الشافعي وتحت كوبري التونسي وزينهم

والمنيل وشارع الهرم 

شفت بصراحه حاجات ماكنتش اعتقد اني ممكن اشوفها

وقابلت ناس غلابه جدا رايحين ينتخبوا  سالت ست هو حضرتك بتنتخبي ليه

قالتلي اصل اللي حنتخبه وعدني انه حيطلب انهم يزودا معاشي

ووحده تانيه سالتها ليه بتنتخبي  قالت عشان بيدوني 100 جنيه

طبعا الكارت الدوار  بقي حاجه عاديه واللي مش عارف ايه هو  حعرفه

تدخل اللجنه ومعاك بطاقه ادهولك بره هما محددين اللي حتنتخبه

بتدخل  وطبيعي انهم يدوك بطاقه عشان تعلم علي اللي انت عايز تنتخبه

بتطبقها وتشيلها وتحط اللي معاك من الاول ولما تخرج تديها للي كان ادالك البطاقه اللي علموا عليها

وتاخد المعلوم  وهو غالبا بيكون 100 جنيه

وحده ست كبيره لقيتها بتبكي سالتها مالك قالتلي اصلي حطيت الفاضيه

وضاعت عليه الفلوس

سالت واحد راجل  مسن هو حضرتك بتنتخب كل مره قالي ايوه

قلتله منتظر ايه من اللي حتنتخبه

قالي هو وعدنا انه يكون معانا ولو لينا طلبات حيحققلنا طلباتنا

لقيت ست  مسنه ومعاها ولد حوالي 10 او 11 سنه مسندها

سالتها حضرتك عندك تذكره انتخابيه قالتلي ايوه سالتها جايه تنتخبي حد تعرفيه

قالتلي ايوه انا بنتخبه كل مره

قلتلها وهو بيساعدكم قالتلي كل مره يوعدنا  طبعا مفهوم الباقي

ناس غلابه وطيبين وبيصدقوا كل حاجه

هما دول اغلب الشعب المصري

اغلب اللي راحوا الانتخابات هما المسنين والغلابه 

انما الشباب بيهتف ويرقص ويهيص

في الازقه والحواري اللي رحتها لقيت الطبل والرقص والميكرفونات

  وده مايمنعش من وجود البلطجيه  والبادي جارد للمرشحين

سالت واحد كان متطوع انه يمشي المرور عشان سياره فولكس باست سوده

كانت عايزه تركن في الزحمه .سالته بعد ماوقفني عشان يخليها تركن

قلتله مين ده اللي وقفتني عشانه قالي ده ابن الدايره

طبعا ضحكت من كلمه الدايره وسالته هما هنا في ابناء كتير للدايره

قالي ايوه طبعا  وسابني وجري عشان ابن الدايره نزل من العربيه

في دائره مدينه نصر الدعايه مكثفه امام شركات البترول

وطبعا كلها لوزير البترول سامح فهمي

كل مندوبي مرشحي الحزب الوطني هادين جدا

انما مندوبي المستقلين والاحزاب  في غايه العصبيه

الشرطه موجوده بكثرة وكمان عربيات الامن المركزي

طبعا رحت انتخب حوالي الساعه 6.10 مساء

دخلت اللجنه  الشرطه وقفتني علي الباب عشان تشوف بطاقتي الانتخابيه قلتلهم انا بنتخب بالبطاقه

قالولي طيب ادخلي بصراحه كانوا في منتهي الادب

دخلت  سالوني انتي لجنه كام قلتلهم لا مش عارفه  لاني فعلا ناسيه

قالتلي وحده ممكن تروحي الكمبيوتر تعرفي لجنه كام  سالت فين هو

شاورتلي علي ممر  دخلت لقيت ناس كتير قاعده

سالتهم فين الكمبيوتر فوجئت ان مافيش كمبيوتر 

وحده اتبرعت وخدت اسمي واتصلت بحد علي الموبايل وقالتله اسمي

اقل من دقيقتين وقالتلي لا مش موجود

قلتلها ازاي قالتلي في كتير مالقوش اسمائهم قلتلها ايه الحل قالتلي مافيش حل

قلتلها يعني اروح  وبلاش انتخب قالتلي ايوه

قلتلها لا انا حنتخب بالرقم القومي قالتلي لا مش حينفع

لقيت مافيش فايده من الصوت الواطي  وبصوت عالي سالت الموجودين

هو احنا لما بنطلع باسبور مش بيطلبوا منا الرقم القومي

ولما بنصرف شيك في البنك برضه بيطلبوا الرقم القومي

ولما بننزل في اوتيل بيطلبوا الرقم القومي

ولما يطلب مني اثبات شخصيتي بيكون برضه عن طريق الرقم القومي

وفي خانه في استماره الرقم القومي بتخيرنا ننتخب في مكان اقامتنا والا في مكان ما اتولدنا

 وده علي اعتبار ان مش كلنا مواليد القاهرة

ماحدش رد زي ما اكون بحكي مع حالي 

طلعت الموبايل وقلتلهم خلاص انا حطلب بوليس النجده يجي يعملي محضر

اثبات حاله انكم مش عايزني انتخب او بالاحري بتسلبوا مني حقي الانتخابي

لقيت الكل قام وجريوا ندهولي رئيس اللجنه

جالي وقالي ايه اللي مزعلك  قولتله مش حعيد تاني  هما حكولك

قالي خلاص هاتي الرقم القومي وراح معايا بنفسه اللجنه وانتخبت والحمدلله

ماهو انا دايما ارازيهم في الانتخابات

واقولكم اوعوا تقلبوا الصفحة

وللحديث بقيه بعد الاعاده

ابقوا معي

لعبه الكراسي الموسيقه

أعزائي

كل عام وانتم جميعا بخير بمناسبه عيد الاضحي المبارك

والسنه الجايه ان شاءالله نكون جميعا صحبه علي عرفات

بصراحه اشتقتلكم جدا وانا عارفه اني وحشه خالص خالص لاني بتأخر عليكم

بس والله الظروف والجو الغير مستقر  وحرق قش الرز كل دي عوامل مساعده

للحساسيه  الصدريه . شفاكم الله وعافاكم

طبعا مستغربين من شعار الحزب الوطني بس قلت افكركم بيه

طالما اني حكتب عن الحزب ولو اني مش عضوه فيه

ولا في اي حزب تاني الا حزب وداد قلبي

طبعا اتفاجئت زيكم من ترشيحات الحزب الوطني اللي كانت مفأجاه

وليه رشحوا اكتر من عضو في كل دايره وفي دايره منهم رشحوا  فيها

ست قدام 4 رجاله  والله دي حقيقه

طب الشرع بيقول ان الراجل له 4 ستات انما الست مالهاش الا راجل واحد

هي دي الحاجه زهرة والا ايه

معليش بقي اصل القافيه حبكت معايا

والسؤال هو حيضحوا بمين لصالح مين والتضحيه دي لزوم عيد الاضحي

يبقي لازم نضحي باكتر من مرشح لكل دايرة

عشان المرشح اللي عليه العين ومظبط اموره هو اللي حينجح في الانتخابات

اكيد النتيجه في الكونترول قالت ان كل الوزراءالحاليين نجحوا نجاح ساحق

وحينالوا شرف التواجد في المجلس الموقر او ( سيد قراره )

بس برضه في دواير مقفوله من 32 سنه زي دايرة الباجور

كانت مقفوله للمرحوم كمال الشاذلي

بس اكيد الحزب حيرشح حد تاني واعتقد ان التاني ده ممكن يكون ابنه

دي مجرد تخمينات بس الايام الجايه حتورينا الكتير

عارفين الانتخابات دي شكلها زي الكراسي الموسيقيه

بس المرشح اللي عليه العين والنيه بيفضل واقف

جنب الكرسي والباقي بيلف علي الموسيقي

واول مايشار للمرشح ان الموسيقي حتقف يقعد علي الكرسي وبكده ضمن الدايره

وباقي المرشحين في الباي باي وسعيهم مشكور

في حاجه تانيه شغلتني جدا  وفكرت فيها كتير لغايه مالقيت تفسير انا اقنعت حالي بيه

عاملين شعارين للحزب الهلال والجمل طب مين حياخد الهلال ومين حياخد الجمل ؟

الهلال اكيد اللي حينجح وحيعلا زي الهلال في السما

اما رمز الجمل ده بقي للي حيشيل الهم ويقعد يفكر ياتري ياهل تري

ناجح والا لا حنول الشرف والا لا

وفي الاخر يطلع من المولد ويقعد علي دكة الاحتياطي لمده 5 سنوات

ياعالم حيحصل فيهم ايه ؟

تفكير جاني من ايام فجأة وهو لو انا رشحت حالي حيكون ايه شعاري

هما شعارين فكرت فيهم الاول الجردل ماتضحكوش مش بقلد عادل امام  في الجردل والكنكه

بس لقيته رمز مناسب ليه  لاني مش حفهم حاجه واكيد حبقي زي الجردل ويجي اي حد يدلقني

والشعار التاني برضه مناسب جدا جدا  برضه اوعوا تضحكوا

هو شعار الحمار لاني اكيد في مساله الانتخابات حشبه الحمار في عدم الفهم

والله يسهل علي عبيده

معليش انا طالعه من دور مرض جامد وممكن يكون مقالي هلوسه برلمانيه

استحملوني زي كل مره امركم لله انا برضه اخف من الانتخابات والترشيحات

وللحديث بقيه بعد النتيجه

بس اوعوا اوعوا تفكروا تقلبوا الصفحه

ابقوا معي



لمصلحه من ؟

أعزائي

ترددت كثيرا قبل الكتابه ولكن وجدت ان قلمي لا يطاوعني علي عدم الكتابة

فالمسائل الدينيه لا يجب ان يكتب فيهاالا المؤهلين دينيا

ولكني اكتب بدافع مصريتي وحرصي الشديد علي ما تعلمناه ونحن صغار

الدين لله والوطن للجميع

فهل فعلا انتهت الازمة التي حدثت من جراء تصريحات

الانبا بيشوي

سكرتير المجمع المقدس للكنيسة المصرية ا\لارثوذكسية

عندما اعلن أن المسلمين حلوا ضيوفا علي مصر في القرن السابع الميلادي

والضيف لا يستقر وله وقت محدد فهل سيرحل من مصر 80 مليون ؟

كما قال ايضا

اذا قالولي ان المسلمين سيرعون شعبي بالكنيسة

اقتلوني او ضعوني في السجن حتي تصلوا لهذا الهدف

كذلك ابدي قلقه من النص القراني في سورة المائدة

بسم الله الرحمن الرحيم

لقد كفر الذين قالوا أن الله هو المسيح ابن مريم

صدق الله العظيم

فهل باعتذار البابا شنوده المذاع تليفزيونيا قد اغلقت الابواب التي فتحت علي مصراعيها

فهل فعلا المسلمين سعدوا بهذا الاعتذار الذي اسماه البابا شنوده

آسف علي ماقال الانبا بيشوي وليس اعتذار!

كما حاول البابا تهدئة الجو في حوارة علي القناة الاولي بالتليفزيون المصري

مع الاعلامي عبداللطيف المناوي

قائلا أن الارض ملك لله وكلنا ضيوف عليه

ولا نستطيع ان نقول ان المسلمين ضيوف الاقباط

انني مستعد ان اقول اننا نحن المسيحيين ضيوف علي

اخوتنا المسلمين فهم الآغلبية

ونجد ان هذه ليست المرة الاولي للانبا بيشوي في الخطأ

لكنه اخطاء منذ عامين في حق الانجيليين

واصبح الان له اتباع  وللاسف الشديد فاننا نجد من كان يكتب ضده بالامس

اليوم دفع آجر اعلانات تسانده

أما المؤسسة الدينيه الآسلاميه المتمثلة في الآزهر الشريف

اصدرت بيان للتركيز علي الهوية الاسلامية للمجتمع

ونجد حاليا علي صفحات الجرائد والفضائيات

ان النزاع اصبح بين الانبا بيشوي ومحمد سليم العوا

الذي تحدث باسم المسلمين

فمن اعطاة هذا الحق ؟

هل وجد أن فضيله الامام الاكبر شيخ الازهر

لا يستطيع ان يصدر بيأن متعقل ومتفتح ؟

ولماذا لم تكن مصر تعاني قديما من الطائفية

وكان الشعار السائد دوما

يحيا الهلال مع الصليب

اليوم اصبح الموقف اكثر تعقيدا

ولماذا تثار المشاكل في هذا الوقت  ؟ولمصلحت من ؟

لا اجد اجابة غير ان الانتخابات علي الابواب

والبلد ليست في حاله تسمح بكل هذا التمزق

يجب ان ننزه الدين عن هذه التفاهات

فالاسلام دين العمل

والمسيحية دين المحبة

والله علينا جميعا لو جمعنا العمل بالمحبة

ومن اجمل ما قال الانبا شنودة

الاسلام والمسيحية وجهان لعملة دينية واحده

فهل تمت فعلا المعالجة

أشك

ولا يسعنا جميعا الا ان ندعو لمصرنا  الحبيبه بالاستقرار

واوعوا اوعوا تقلبوا الصفحة

ابقوا معي