من المعز لدين الله الفاطمي للمفتش كرومبو

أعزائي

احنا حاليا في العد التنازلي لقدوم شهر رمضان

كل عام وانتم جميعا سالمين

وينعاد عليكم بخير وبركه وصحه وسعادة

رمضان كريم

مع قدوم رمضان اول شيء ممكن نفكر فيه هو فانوس رمضان

الكبار قبل الاطفال

تعالوا نشوف ايه أصل فانوس رمضان

معني كلمه فانوس

----

يقول ا لفيروز أبادي في كتابه القاموس المحيط

كلمه فانوس تعني نمام

واطلق عليه هذا المعني لان حامله يظهر في وسط الظلام

فكرته بدأت في صدر الاسلام وكان الهدف منه الاضاءة ليلا

للذهاب الي المساجد وزيارة الآهل والاصدقاء

ولكن فكره فانوس رمضان بدات عمليا

في 15 من شهر رمضان عام 258 هجريا

وقد وافق هذا التاريخ دخول الخليفه المعز لدين الله الفاطمي

لمصر فخرج اهلها لاستقباله بالمشاعل والفوانيس

وكان لجمال المنظر في تلك الليلة ان اصبحت من العادات في تراثنا الاسلامي

وتحول الفانوس من الآضاءة الاصلية الي وظيفة ترفيهيه

في عهد الدولة الفاطمية

وكان يصنع قديما من الالمنيوم والنحاس المزخرف بالزجاج الملون

وبه فتحه خاصة لوضع الشمعة

وكانت فوانيس الميسوريين لها شكل وزخارف خاصة

اما الفقراء فكانت لهم ابداعتهم المتواضعة

وللفوانيس قديما اسماء أطلقها العرب منها

أبو لموز ..أبو حشوة .. أبو للجم

الصاروخ .. أبو شرف .. الدبابة

شقة البطيخ .. الترام .. المسدس

علامة النصر .. وغيرهم

وكان يطلق علي أكبرهم ( ابوولاد )

وهو عبارة عن فانوس كبير الحجم معلق به اربع فوانيس في جوانبه الاربعة

وتنتشر ورش صناعة الفانوس القديم في منطقة

بركة الفيل بالسيدة زينب وباب الشعرية

وحاليا في جميع محافظات الجمهورية

وقد عشق الاطفال فانوس رمضان

حتي تحول من الفانوس ابو شمعة للفانوس الصيني

الذي نجح في ازاحة الفانوس المصري عن عرشه

وقد استعملوا له اشكال من عالم والت ديزني

لابهار الاطفال لحبهم في هذه الشخصيات

اما فانوس المفتش كرومبو فهو المكتسح هذا العام

وذلك لحب الاطفال والكبار ايضا في شخصيته

وقد جاء باشكال متعددة

منها وهو واقف وبيده عدسته الشهيرة

ويتدلي منه فانوسان صغيران

واخر جالس علي كرسي هزار يقرا مذكراته

والثالث يركب دراجه بخارية

والرابع بجواره مصباح علاء الدين

وخامس يركب التوك توك

وجميعهم يغنون اغاني رمضان عند الضغط عليهم

ومنهم من يرقص مع الغناء .

وقد تراوحت اسعارة بين 35 جنيها الي 95 جنيها

حسب المقاس واذا كانت نوعيته بلاستيكيه

او يرتدي ملابس مصنوعه من القماش

لاضفاء المصداقيه للاطفال

وده بقي حنعتبره التحول الطبيعي للحاجه الساقعه

زي الاعلان ماقال

لا بديل عندي للفانوس ابو شمعه فهو الاجمل دائما

ومش حقول زي ماكتير بيقولواالله يرحم الفانوس ابو شمعه

لانه موجود وسيظل دائما موجود

كل عام وانتم سالمين ورمضان كريم

بس اوعوا اوعوا المفتش كرومبو يخليكم تقلبوا الصفحه

ابقوا معي

وبشتاقلك

أعزائي

القصيده التانيه للشاعر محمود صابر الخطيب

بيكون ويانا تقريبا يوميا في الروم علي البالتوك

انشاءالله حتعجبكم

تعالوا نقرها سوا

----
وبشتاقلك ..
ولما الشوق يعاندنى
اعافرفيه واندهلك
ويرجعلى صدى صوتى
بنفس اللحن يندهلك
انا فى البعد يا غاليه
بكل الحب مشتاقلك
وبشتاقلك
...
كلامك لسه رنّاته
في ليل البعد تطربنى
وتاخد روحى من روحى
وعن احزانى تبعدنى
ولما ارجع لجواباتك
عشان م اعد فى حروفك
الاقيكى على بابى واتسامرمع طيفك
وارجع تانى بالذكرى .. ليوم ما كنتى بتجينى
ببسمه حب ما تخلص .. يداعبها الهوا تنعس
واشوف الشوق على جبينك
دانا فى البعد ياغاليه

بكل الحب مشتاقلك
وبشتاقلك
...
قريب جدا ح اكون جنبك
واحط ايديّا فى ايديكى
وتاخدينى .. تضمّينى .. بفستانك تلفينى
واشوف الفرحه فى عنيكى
اشاورلك تطاوعينى .. تغطّينى .. تدفينى
مع قلبك تخلينى .. اعيش العمر اغنيكى
دانا فى البعد يا غاليه
بكل الحب مشتقلك
وبشتاقلك

اوعوا تفكروا تقلبوا الصفحه

ابقوا معي

حب الاطفال

أعزائي

بما اننا اتكلمنا عن الحب علي التربيت

يبقي نشوف حب الاطفال شكله ايه

وقولولي رأيكم ايه في الحب العيالي

مرات بيفضل الحب موجود من الطفوله للكبر

ومرات برضه بيكلل بالزواج

الله علي الحب . جميل صح الكلام

اسيبكم مع الصور

ياتري مخبي ايه ورا ضهره

وردة الحب الصافي

ممكن تكون أخويه ههههههه



عايز اشرحلك اللي في قلبي


تعالي شوفي بابي ومامي
لا تعال انت مع بابي ومامي اطلبني من اهلي





بحبك وبموت فيك

دي عشان ماتنسنيش

شوف الدنيا حلوه ازاي واحنا مع بعض

الورد الاصفر ده معناه ياحياتي اني بغير عليكي

دي بقي عشان الكبار يفرحوا بيها

اوعوا تفكروا لحظه انكم تقلبوا الصفحه

ابقوا معي

الحب علي التربيت

أعزائي

طبعا بتسالوا ايه هو التربيت ؟

التربيت معناه النت ده في البيت عندنا

يعني لما اكون قاعده فاتحه النت وحد يسال عليه

الاجابه بتكون اني قاعده علي التربيت

النهارده حبيت اكتب لكم علي الحب عن طريق التربيت

دايما لما كنا بنحتار في الروم في البالتوك نتكلم في ايه؟

كان الرايق زميلنا يقول تعالوا نتكلم علي الحب في التربيت

انا مش مؤمنه خالص ان ممكن يكون في حب علي التربيت

لان الحب له مقومات لازم تتوفرله

ودي حتقروها في اخر المقال

بصوا انا بشبه الحب ده بايه من وجهه نظري المتواضعه

اننا لما بنقرا قصه لاي كاتب معروف او مبتدا

بنعيش مع الاحداث بنتخيل الابطال اشكلهم واجسامهم وطريقه لبسهم

وحركاتهم وممكن نستنبط رد فعلهم ده حسب اللي بنقراه طبعا

تعالوا بقي نشوف نفس القصه بس لما تتحول لفيلم او مسلسل او حتي مسرحيه

ساعتها بتكون هنا الطامه الكبري ليه ؟

القصه هي هي مع تغير بسيط يناسب العمل الفني

يعني الاحداث كلها معروفه والبدايه والنهايه برضه معروفين لكن

الاشخاص اللي هما بالطبع حيكونوا الممثلين دول بقي مش عارفينهم

احنا عشنا مع ناس من صنع خيالنا ولما بقوا حقيقه قدمنا

لقينا انهم اغراب .. لا لا دول ناس تانيه

عقلنا رفضهم لاننا تخيلناهم غير الحقيقه اللي قدمنا

حسينا اننا ضايعين وان القصه كانت اجمل من المسرحيه او المسلسل او الفيلم

وندمنا علي اننا اتفرجنا عليها

ده بقي الحب علي التربيت

لما اتنين بيحبوا بعض وكل مقومات الحب صوت وصوره

لما بيتقبلوا بيحسوا انهم اغراب يعني كل اللي كان بينهم ده كان وهم وسراب

ساعتها كل واحد فيهم بيفكر الف مره يكمل مع التاني او ينسحب

ممكن اي طرف فيهم يصدم من تصرفات التاني

يعني ممكن حد يكون له حركه معينه وهو بيتكلم

زي مثلا يغمز بعينه او يحرك ايديه او يهز رجله او يهرش في راسه

وده اسمه

Body Language

او لغه الجسد

دي طبعا مش متوفره علي التربيت حتي في وجود الكام

وبعدين نسينا اهم شيء وهو الحضور وده برضه مش متوفر الا في الحقيقه

يعني لما بنحب احنا بنكتشف عيوب وحسنات اللي بنحبه

وبنرضي بيه وبنتقبلها او زي مابيقوا بيكون شاروه وحده علي بعضها

حتي لو مش بيعجبنا فيه حاجه بنقبلها وبنتاقلم عليها

لاننا بنحبه وبيكون الحب ابتدا بدايه صح

الاتنين شافوا بعض وعرفوا بعض وكل واحد فيهم اكتشف التاني

وحبه ورضي بيه

ياريت اعرف رأيكم في الحب عن طريق النت

واوعوا اوعوا تفكروا تقلبوا الصفحه

ابقوا معي

نظرة أحلي بنت

أعزائي

وحشتوني بجد .. انا بتاخر عليكم لان ظروفي صعبه اليومين دول

انما انشاءالله ححاول اكتب زي الاول

دي قصيده للشاعر محمود صابر الخطيب

كان الرئيس السادات رحمه الله عليه

منحه شهادة تقدير لجهوده في الادب

وهو اختص مدونتي باكثر من قصيده

وانشاءالله حنزلهم علي فترات

انا بشكره جدا علي الثقه الغاليه

القصيده اسمها احلي بنت

ياريت اكون وفقت في اختيار الصوره لاحلي بنت

معرفش ليه .. انا لما شوفتك ابتسمت
ووقفت بعد الابتسامه .. ساعه صمت
وقعدت بعد الصمت يوم .. من غير ما قومت
وفضلت بعد اليوم يومين .. سهران ما نومت
انا اللي عمري ما اترجعت..
قدام عيونك .. اتهزمت
…
حطيت قراري ... فوق مداري واتعدلت
بصيت في وش مريتي تاني .. كتير ودورت
لقيت في شعري شعره بيضه .. اضطربت
اتاري هم العمر خدني.. خلاص كبرت
انا اللي عمري ما اترجعت ..
قدام عيونك .. اتهزمت
…
لفت في راسي , وف حواسي , فكره من ايام ماكنت
اكتب لدي .. واوعد في دي ..
واقول لدي .. احلى ما قولت .
قفلت باب الفكره جامد .. وانتبهت
هوه انا باقي ف حياتي م السنين .. اكتر ما عشت
انا اللي عمري ما اترجعت ..
هزمتني نظره احلى بنت

اوعوا تقلبوا الصفحه

ابقوا معي

فارس المباديء جورج جالاوي

أعزائي

في ناس كتير لما بنسمع عنهم او بنعرفهم بيتركوا علامه فينا

زي النائب البريطاني جورج جالاوي

المولود في عام 1954 لاسرة ايرلنديه كاثوليكيه متدينه

وبيعتبروه في انجلترا من افضل الخطباء في تاريخ السياسه البريطانيه المعاصرة

بقيادته انطلقت قافله شريان الحياة من امريكا الي مصر

في الرابع من يوليو الحالي وهو يوم عيد الاستقلال الامريكي

وهي ثاني قافله يقودها جالاوي الاولي انطلقت من بريطانيا

ستقوم القافله بتوصيل التجهيزات الطبيه من امريكا

والتي طلبت منها وستقوم بعدها بشراء 100 شاحنه وتقودها الي غزه

بكل مافيها وهي اهداء لحكومه فلسطين

كما سيتم ايضا اهداء شخصي عباره عن 3 شاحنات

ومبلغ 25 الف جنيه استرليني لرئيس الوزراء اسماعيل هنيه

كما تضم قافله جالاوي سينتيا ماكيني والعديد من الفلسطينيين والعرب

واكثر من 200 شخص من جميع الولايات الامريكية

بالتعاون مع ( رون جوفيك ) الناشط الامريكي

الذي قاد القافله الاولي لكسر حصار غزه

كما اعلن جالاوي عن هبه بقيمة مليوني جنيه استرليني

حوالي 2.2 مليون يورو

من جمعية خيرية مقرها بريطانيا لبناء مدارس في قطاع غزه

وقد اكد جالاوي ان هذا المال لحكومه فلسطين

وقال ايضا

نحن نعترض ونعارض هذا الحصار ونكسره

فعلا اخلاق ومباديء فارس

قل ان نجده في هذا الزمان

اوعوا تقلبوا الصفحة

ابقوا معي

تري ما سيكون دفاع وزير الثقافه ووزير الاعلام عن هذه المهازل

دكتور علاء الاسواني
الكاتب البير قصيري

صنع الله ابراهيم

-----

أعزائي

ححكيلكم حكايه مهرجان تولوز

بس ياريت اعرف و جهات نظركم ياتري حتساندوا الوزير الفنان؟

ووزير الاعلام انس الفقي ؟

والا حتساندوا مصر؟

اوليفيه دارفور روائي فرنسي

اراد تنظيم مهرجان ادبي في مدينه تولوز بفرنسا

المدينه معروفه بحاجتين

الاولي صناعه الطائرات

والثانيه حب اهلها للادب والثقافة ومملوءة بالمكتبات

هذا المهرجان تتم فيه قراءات طويله للاعمال الادبية بواسطه الممثلين

ويتم ذلك بحضور المؤلفين ويلتقوا بعد القراءة بالجمهور

ويسمي المهرجان مارثون الكلمات

وقد قرر المهرجان ان تكون ضيفة الشرف لهذا العام هي مصر

وكان عنوان المهرجان هو

الادب المصري في القاهرة والاسكندرية

وقد دعت ادارة المهرجان مجموعه من الادباء والفنانين المصريين

دعت الكتاب الاتيين

صنع الله ابراهيم .. ابراهيم عبد المجيد .. نبيل ناعوم

جمال الغيطاني وقد اعتذر لظروف خاصة

دكتور علاء الاسواني .. المخرجه اسماء البكري

وكذلك الفنان عمر الشريف الذي آجل كل ارتباطاته لحضور المهرجان

كرم المهرجان نجيب محفوظ والبير قصيري ويوسف شاهين

كما اعاد تقديم الكتاب المعاصرين للجمهور الفرنسي مثل

جمال الغيطاني وعلاء الاسواني وابراهيم عبد المجيد وصنع الله ابراهيم

وبالاضافة الي انشطة المهرجان التقليدية وهي اللقاءات الحواريه

مع الكتاب وحفلات التوقيع قدم 200 قراءة مطولة تصل الي 40 دقيقة

للنص الادبي في كل احياء مدينه تولوز ويجسدها بالصوت والنغم مؤدون يطلق عليهم

قاريء عمومي

وهذا العام قام النجم عمر الشريف بقراءة مقاطع من

اولاد حارتنا لمحفوظ نوبل

وقراءة لقصص مختارة لعلاء الاسواني

من مجموعه ( نيران صديقة )

التي تمت ترجمتها في اوائل هذا العام تحت عنوان

( لوددت أن أكون مصريآ )

وقد رفض عمر الشريف الملقب في فرنسا بدكتور زيفاجو

ان يتقاضي اجر من ادارة المهرجان

اما علاء الاسواني وهو ايضا يتمتع بشعبيه كبيره في فرنسا

فيلقبونه بصاحب عمارة يعقوبيان

وقد تنافست مكتبات تولوز في تقديم السباق حيث نظمت 6 مكتبات برنامج

( تقرا لكم القاهرة والاسكندرية )

وهو قراءات لمحفوظ والغيطاني والفرنسي المصري المولد

روبير سوليه ... وصنع الله ابراهيم .. وجان ايف امبرير

الكاتب في علم المصريات

وابراهيم عبد المجيد الذي قرأ له 40 دقيقة من

( لا أحد ينام في الآسكندرية )

الروايه دي جميله جدا ياريت تقروها حتعجبكم

وعتبات البهجه المترجمة للفرنسية

كما تم لقاء الادب بالموسيقي من خلال امسيه باسم

جميلات الليل

وكانت تكريما لكوكب الشرق ام كلثوم

والفرنسيه المولودة بشبرا في مصر داليدا

المهم في الموضوع ده كله واللي عايزاكم تكتبوا رأيكم فيه هو

ادارة المهرجان دعت الوزير الفنان السيد فاروق حسني

وذلك لكونه وزير الثقافة المصري وضيفه الشرف في المهرجان هي مصر

ولكنه لم يلبي الدعوه

وكانت قد وجهت له الدعوة من قبل المديرة التنفيذيه للمهرجان

وهي المصريه الاسكندرانيه داليا حسن

وقد اكدت انها وجهت اليه الدعوة بالفعل

وان السفارة المصريه في باريس قد تسلمتها

وقد اتصلت بداليا حسن مسئولة من السفارة المصرية في باريس

وطلبت منها الغاء الدعوة الموجهه الي الكاتب صنع الله ابراهيم

والا فان الوزير الفنان لن يحضر المهرجان

وقد علق مدير المهرجان بانهم في فرنسا بلد الحريات

لا يمكن ان يخضعوا لرقابه فاروق حسني او غيره

واصروا علي دعوة صنع الله ابراهيم

وفي نفس الوقت كان الوزير الفنان يقيم معرض في باريس تحت عنوان

تاريخ مصر واليونسكو

بدعم من وزارة التعليم العالي مع وزارة الثقافة

ماينفعش يقول ان الدعوه ماوصلتش

لان وجوده بباريس علي فرض ان السفاره لم ترسل له الدعوة سهوا

فوجوده بباريس يعني علم السفاره المصرية بوجوده

وبالتالي بالدعوه للمهرجان

تصرف غريب ولكني لا استبعد اي شيء ياتي من قبل الوزير الفنان

واكيد اكيد حيبقي يقدم اعتذار كالعادة

اما الاغرب فهو موقف قناة النيل

اتصلت داليا حسن بقناة النيل فاعلن المسئولون موافقتهم علي تغطيه المهرجان

بشرط دعوة 5 من العاملين بالقناة بالاضافة الي مدير القناة

ولكنها اخبرتهم بعدم امكانيه دعوه هذا الحشد ولكنهم لم يوافقوا

السؤال اين الوزير انس الفقي من كل هذا؟

اليس هو وزير الاعلام المصري ؟

يا دكتور نظيف ياريت تنضف الوزاره

من الوزراء الكسلانين واللي مش بيهتموا الا بالمناصب زي اليونسكو

ومش عارفين اللي جاي ايه

وبلاش الكل يتعامل علي انها عزبه ملك له

او مال سايب مالوش صاحب

المصريين ذنبهم ايه انهم مايتبعوش حدث بالقوه دي

والاقوي ان مصر كانت ضيفه الشرف

شتان بين موقف الفنان عمر الشريف

وبين الوزير الفنان ومسئولي قناة النيل

ولك الله يامصر

ياريت تكتبوا وتقولوا رأيكم في المهازل اللي بتحصل

اوعوا تقلبوا الصفحة

ابقوا معي

تآيد حكم الاعدام

أعزائي

اليوم صباحا كانت الجلسه رقم 27 لمحاكمه هشام طلعت مصطفي ومحسن السكري

وكان الحكم بادانتهم وصدر باجماع الاراء

وفقا لاحكام القانون التي وضعها المشرع

الاعدام شنقا علي كلا من رجل الاعمال هشام طلعت مصطفي

والظابط السابق محسن السكري

السجن المشدد لمده 10 سنوات لمحسن السكري لحيازته سلاح بدون ترخيص

مصادرة المليون دولار المظبوطه والسلاح المستخدم في الجريمه

الزام هشام ومحسن بمصاريف القضيه

من حوالي الساعه الثالثه صباحا والتواجد الامني حول المحكمه

25 سيارة امن مركزي

8 سيارات مصفحة

3 سيارات تابعه لمرفق الكهرباء

4 سيارات مطافي

1000 جندي

بخلاف الامناء والظباط من رتبه الملازم لرتبه اللواء

وكان موجود فعلا بينهم اللواء اسماعيل الشاعر

مساعد اول الوزير ومدير أمن القاهره

وكان يشرف بنفسه

ويساعده ايضا اللواء فاروق لاشين مدير الاداره العامه لمباحث القاهرة

داخل المحكمه كثافه امنيه شديده

وكذلك امام المنصة

وقد قاموا بتفتيش الاعلاميين والصحفيين

بواسطة 4 بوابات الكترونيه

5 اجهزه للكشف عن المفرقعات

بالاضافة الي الكلاب المدربه

وقد قام بالتغطيه الاعلاميه125 اعلامي

اكبر تغطيه اعلاميه في تاريخ مصر

وصل المستشار محمدي قنصوه المحكمه داخل سيارة نجده

تحاط بها سيارتان بوكس تابعه لمديريه امن القاهرة

وعدد من موتسيكلات الحراسة

سحر طلعت مصطفي شقيقه هشام والتي لم تتغيب عن اي جلسه

حضرت الي المحكمه تستقل سيارة سوداء ماركه هامر

وقد انهارت تماما بعد سماعها الحكم

واعتدي احد البودي جارد التابع لها علي الصحفيين اثناء تقدمهم للحديث معها

حضر من اسره هشام شقيقته سحر وابنه وعمه ومدير شركات طلعت مصطفي

غادر هشام القفص لمده 10 دقائق وبعد عودته حضر

فريد الديب محاميه وتحدث معه بهمس مده 10 دقائق

بعد الحكم صرخت سيده بهستيريا بانه حكم ظالم

وانه لا يستحق هذا الحكم

السيده تدعي مني ومن الاسكندريه وكان هشام يساعدها هي واسرتها

وقالت ان الحزب الوطني اراد ابعاده لقوته فلفق له هذه التهمه

وقد قام الامن بابعادها عن المحكمه

هشام كان يرتدي بنطلون وقميص ابيض وحذاء وحزام بني

وكان شديد التوتر وطوال تواجده كان يهوي باوراق كانت معه

اما محسن السكري فكان متوتر ولكنه كان يحاول اخفاء توتره

وكان يقراء في المصحف الذي معه ويستند علي الحائط

في حاله قبول المحكمه الطعن وتحويل القضيه الي دائرة اخري

ستقوم بالتحقيق مره ثانيه

وممكن النقض يؤيد الحكم ومافيش دايره جديده ولا جلسات

ملف القضيه بالكامل كان عند المفتي

وتم نقله امس الي المحكمه

تعليق منير السكري والد محسن

الحكم ظالم وستعلن براءة ابني في النقض لوجود خلل في الاجراءات

كمال يونس محامي سوزان تميم

لم يتوقع الحكم لظروف هشام كونه من رجال الاعمال وكان عضو بمجلس الشوري

وعدم مساوته بمحسن السكري

اما الاستاذه رضا غنيم محاميه عادل معتوق زوج سوزان تميم

قالت ان الحكم عادل ولديها مستندات ومنها وثيقه زواج عادل من سوزان

اللافت للنظر اليوم هو حضور 23 طالب امريكي يدرسون القانون بفرنسا

حضروا بصحبه دكتوره تدرس لهم القانون

اما سبب الحضور فهو ان اصحاب السلطة والنفوذ والمال لا يدانون ولا يصدر حكم باعدامهم

بعد الحكم قام الحرس باخلاء القاعه تماما

وما الحكم الا لله

واوعوا تقلبوا الصفحه

ابقوا معي

ارقص ياحضري

أعزائي

النهارده كان الفوز الثاني لمنتخب مصر

فقد تغلب المنتخب المصري علي المنتخب الايطالي

في كأس القارات بملعب ( ايليس بارك ) بجنوب افريقيا

بهدف مقابل لاشيء

احرز الهدف لاعب الاسماعيلي محمد حمص لاعب خط الوسط

في الدقيقه الاربعين من الشوط الاول اي قبل نهايته بخمس دقائق

احرز الهدف بعد ركله ركنيه لابو تريكه

سددها حمص براسه علي يمين الحارس الايطالي بوفون

تبادل الفريقان السيطره في الشوطين

لخوف مارشيلو ليبي مدرب ايطاليا

دفع بلوكاتوني وريكاردو ومونتوليفو ليذداد الضغط علي منتخب مصر

لعب الحضري اليوم اجمل مبارياته فقد كان فعلا نجم المباراة

تصده لكره من فينشنزوياكوينتا مهاجم ايطاليا من داخل منطقه الجزاء

ولكرات هجوميه اخري

وبهذا الفوز احتل المنتخب المصري المركز الثالث في المجموعه الثانيه

برصيد 3 نقاط بالتساوي مع المنتخب الايطالي

الف مبروك لمصر وللمنتخب المصري

وللمعلم الكبير حسن شحاته

وتهنئه خاصه لاهل الاسماعليه

ويارب يديم الفوز ونفوز يوم الاحد علي امريكا

واوعوا اوعوا تقلبوا الصفحة

شغل المعلم حسن شحاته

أعزائي

كلنا كنا مترقبين ماتش المنتخب مع البرازيل

وكتير مننا واكيد انا وحده منهم ان لم اكن اولهم

ماكانش عندي اي امل في احراز ولا جون واحد

انما برضه الامل حلو والثقه في الفراعنه احلي

ابتدا الماتش بخوف المنتخب وزاد الخوف بعد تسديد كاكا الجون الاول

في شبكه الحضري اللي ساعتها عرف انه مش حيطلع فوق الشبكه ويقول ارقص ياحضري

بس كاكا كان ذكي استغل دربكه المنتخب وخصوصا وائل جمعه وهاني سعيد

وبعدها ابتدا المنتخب يفوق شوي

وخصوصا بعد جون ذيدان الاول اللي كان بمساعده ابو تريكه

مررها عرضيه علي راس ذيدان واكيد ذيدان كان عايز يفرح خطيبته مي عزالدين فسجل هدف التعادل

بركاتك يامي

اما الشوط التاني افتكروا اخيرا انهم ابطال افريقيا

وكمان حسن شحاته بدل احمد حسن بعيد عبد الملك

كان تغير ملائم لظروف الماتش

اما دونجا مدرب البرازيل اكيد حس بخطر المنتخب وغير هو كمان

روبينو وايلانو بالاكسندر وباتووراميريس

اهداف المباره

سجل البرازيل 4 اهداف

كاكا هدفين في الدقيقه 6 والدقيقه 90

ولويس فابيانو في الدقيقه 12

وخوان في الدقيقه 37

اما اهداف المنتخب فكانت

لذيدان هدفين في الدقيقه 9 والدقيقه 56

ومحمد شوقي في الدقيقه 6

اما دينمو الماتش فكان ابو تريكه بلا منازع

تحيه وشكر لكابتن حسن شحاته

وابقوا معي واوعوا تغيروا الصفحه

زيارة لاستديوهات يونيفرسال بهوليود

أعزائي

بما ان اوباما زار القاهره يوم الخميس قلت انتوا كمان تقوموا بزياره استديوهات يونيفرسال

بمدينه هوليود عاصمه السينما

تقع الاستديوهات علي بعد 9 اميال شمال وسط مدينه لوس انجلوس

بدات مرحله الاستوديوهات في هوليودعام 1920

ومع مرور الوقت ضاقت المواقع فانتقلوا الي موقع جانبي يسمي

وادي سان فرناندو

يوجد به كثير من المواقع والقاعات الواسعه المخصصه للاستوديو والاعمال السينمائيه

ممكن توصلوا هناك بواسطه المترو لو كنتوا في لوس انجلوس

محطه Universal City

ودي بتقع علي خط المترو الاحمر Rid Line

وتقع قريب منها منطقه للباصات Shutle

وهي مخصصه للباصات المجانيه بتروح البوابه كل ربع ساعه

الاستديوهات علي مساحة كبيرة من الارض

تدخل البوابه بعد ماتشتري تذكرة الدخول وبتشمل جولتك ليوم واحد

وتقدر تقضي طول النهار في الاستديوهات

بس الاول لازم تطلع علي الخريطه ودي بيكون فيها مواعيد العروض واماكنها

بعد ماتدخل من البوابه حتلاقي حديقه كبيره بتتقسم لقسمين

الاول بدون رسوم وده بيشمل المحلات والمطاعم وسينما كبيره

بها 24 صاله عرض تابعه للاستوديوهات

والقسم التاني مدينه ملاهي

في القسم الاول بتشوف شارع عريض مملوء بالباعه والناس والعاب التسليه

وتقدر تشتري منه جميع انواع السوفنير لاهلك واصحابك

تقدر تحضر تصوير لقطات من الافلام في اي بلاتوه من البلاتوهات اللي بيتم فيها التصوير

وتقدر تشوف لقطات بتعتمد علي الرشاقه ولقطات في الهواء الطلق ولقطات استعمال السلاح

وممكن تشوف جزء من عمليات المكياج الخاص بالحوادث والعمليات

يعني مكياج العاهات

بتشوف في الحديقه دينصورات جميع الاحجام وشلالات ميه

وممكن وانت ماشي تلاقي عربيه سقطت جنبك

واهم واحد ممكن تقابله المارد العملاق اللي بيتجول في مرافق الاستديوهات بحريه

واجمل حاجه ممكن تشوفها ممشي الرد كاربت والبوابه الخلفيه اللي بيفتحوها

في حفلات البريمير وافتتاح الافلام الجديده وقت وصول النجوم

تشوفها علي الطبيعه مش علي شاشات الفضائيات

وممكن تاخد الباص لو تعبت وتعمل جوله في الاستديوهات

تشوف المطر الصناعي ممكن قريه جالها فيضان

مكان تصوير الفك المفترس . جسر متحرك

بتلاقي وانت في جولتك ناس لابسين دراكولا بيهاجموك وانت ماشي

يعني نوع من انواع المرح بس بيخض

قبل ماتدخل صاله العرض بيكون فيه استضافه للجمهور في قاعة استقبال كبيره

كلها شاشات وبيتم توزيع نظارات D3

القاعه مرتبه جدا والكراسي الموجوده متحركه والفيلم اللي بتشوفه

بيكون رباعي الابعاد يعني قريب منك وممكن تحس بحاجات بتتحرك تحت الكرسي

او ميه بتدلق عليك

وممكن بعد ماتخلص عرض تروح عرض تاني

كل يوم في نجم وانت وحظك اذا كان مشهور او صاعد

بتلتقي به في قاعه من القاعات بيوجه للموجودين كلمه ترحيب

والموجودين يوجهوا له الاسئله وهو يجاوب

وممكن لو حبيت تتصور معاه

الزياره حقيقي كلها بتكون انبهار

بيني وبينكم شعرت بالاحباط بين الفن عندنا وعندهم

اخر حاجه لمحبي افلام الرعب

استديوهات يونيفرسال بتنتج اكتر من 15 فيلم في 2009 كلهم رعب

وكفايه كده واشوفكم علي خير

واوعوا تغيروا الصفحه

ابقوا معي

مولد سيدي اوباما

أعزائي

خلاص انفض المولد ورجع كل شيء لاصله

الزحمه والخنقه والمرور البشع والاهمال

يعني زي مابيقولوا رجعت ريما لعادتها القديمة

بس بعد ما اتعطلت امتحانات الجامعة والمدارس

واتصرف علي الزياره الميمونه 50 مليون جنيه من دم الشعب الغلبان

عمنا اوباما جه ومعاه 3000 جندي من قوات المارينز لحمايته

ده نعتبره عدم ثقه في حمايه البوليس المصري له

استقبل في قصر القبه بالخياله

واستقبله الرئيس مبارك وكانت جلسه المباحثات مدتها 45 دقيقه

من 9.45 دقيقه الي 10.30 دقيقه

خطابه كان سلس وناعم ووقفت عند حاجات كتير منها

انه بيرفض اي صور مسيئه للاسلام

في امريكا 7 مليون مسلم امريكي

مسجد في كل ولايه .. وامريكا بها 1200 مسجد

حق المرأة والفتاة في ارتداء الحجاب

الاسلام جزء من امريكا

واجبه حمايه الشعب الامريكي

لا يريد الابقاء علي قواته في افغانستان

استشهاده بآيات من القرآن الكريم

منع التعذيب واغلاق جونتنامو بعد 3 سنوات

هو يعني مش قادر يقفلها قبل المده دي ؟

الوضع الفلسطيني لا يحتمل

دوله يعيش فيها الفلسطينين والاسرائيلين في أمن وسلام

يدعوا الفلسطينيين بالتخلي عن العنف

لان العنف طريق مسدود

ويتوجب علي حماس وضع حد للعنف

وقال ان امريكا لا تقبل شرعيه المستوطنات الاسرائيليه

امريكا تحترم حق الجميع حتي لو كنا نختلف معهم

الاديان عليها ان تقربنا

اما عن حقوق المرأة

قال انه لا يريد ان تحرم المحجبه من المساوه مع غير المحجبه

البنات يساهمون مثل الابناء

يعني علي رأي سعاد حسني

البنت زي الولد ماهيش كمالة عدد

في الاحتمال والجلد

سيوسع الشراكة مع البلاد الاسلاميه

في كل دين عقيدة واحده وهي

عامل الاخرين كما تحب ان يعاملوك

الاسلام هو الذي طور علم الجبر والبوصلة وغيرها من العلوم

الايمان بالاخرين هو الذي اتي بي الي هنا

اهم ما لفت نظري او بالاحري ماكنت اتوقع سماعه

العلاقه بين امريكا واسرائيل وثيقه وغير قابله للكسر

وفي بدايه خطابه قال انه سعيد لوجوده في مصر

بلد الازهر وفي جامعة القاهرة مصدر العلم للعالم من سنين

مش عارفه اذا كان كلام للاستهلاك المحلي او هو فعلا حقيقي

علي اي حال الايام ستثبت نيه امريكا المتمثله في اوباما

علي هامش الزيارة

------

300 مراسل اجنبي

سال اي لون بيفضلوه المصريين لارتداءالكرافته

قيل له اللون الازرق لون النيل

النيل في اسوان مش في القاهره طبعا

صحب معه في السياره في طريقه لقصر القبه المصور الخاص به

سيارته انتاج شركه جنرال موتورز

التي اعلنت افلاسها من يومين

لم تاتي معه ميشال زوجته لامتحانات البنات

ياحرام شقيانه معاهم في المزاكره ربنا ينجحهم

مع ولعها بالاثار الفرعونيه

كان لقائه مع الرئيس مبارك لقاء وديا

لم يخلو من انبهارة بشخصيه مبارك

كان في استقباله بجامعه القاهرة شيخ الازهر

محمد سيد طنطاوي

وكان من الحاضرين لخطبه اوباما

الزعيم عادل امام .. رانيا علواني السباحه المصريه المحجبه

اساتذه جامعه .. دكاتره.. دارسين بالازهر الشريف

من الهند وباكستان

ودارسات مغتربات من الجاليات الموجدوه بالقاهرة

من اندونيسيا ودول شرق اسيا

الانبا شنودة .. ايمن نور

المعارضه ... الاحزاب السياسيه

وزراء حالين وسابقين

محللين سياسيين عرب واجانب

جمال مبارك وكان يجلس بالصف الثاني

مفيد فوزي ونخبه من الاعلام المصري

اطراف الصفوف والممرات كانت مؤمنه

ارتدت هيلاري ايشارب في مسجد السلطان حسن

وكانت حافيه زي اوباما

كانت في استقبالهم ومرافقتهم في زياره جامع السلطان حسن

ايمان عبدالفتاح المصريه الاب والامريكيه الام

والتي تحمل جنسيه امريكيه وتعمل مع الخواجه زاهي حواس

وهي حاصله علي ماجستير في الاثار وتتقن اللكنه الامريكيه

كان اوباما منبهر بالمكان لدرجه ملفته

وسال عن تاريخ المبني وعن القبله ايوان والشريط الكتابي وكان بالخط الكوفي

وشاهد ايضا القبه الضريحيه وهناك شاهد نوع أخر من الخط العربي

ووقف بانبهار امام باب نحاس محشو بالذهب والفضه

اما في الاهرام فكان منطلق وعلي حريته

ودخل الهرم من فتحه المأمون

وشاهد عرض للصوت والضوء

والتقطت له الصور الكثيره بجوار مراكب الشمش ومع ابو الهول

وكذلك مع زاهي حواس

وانتهت الزياره في حوالي السادسه مساء بتوقيت القاهره

اي انه قضي بالقاهره 9 ساعات

الاراء الامريكيه تتارجح بين مؤيد ومعارض للزياره والخطاب

وبعضهم كان يفضل ان يلقي خطابه في تركيا او اندونيسيا

وبعضهم يسال لماذا لم يلقي خطابه في السعوديه

لكن اهم مافي الزياره هي تعريف العالم كله بالاثار المصريه

دعايه مجانيه لجميع شركات السياحه بمصر

اخيرا لا نستطيع الا ان ننتظر ما سيتم بعد هذه الزياره

اهي زياره والسلام

ام انها ستغير في مجريات الامور

وعلي رأي المثل المصري

الميه تكذب الغطاس

واوعوا اوعوا تغيروا الصفحه ابقوا معي