زيارة لاستديوهات يونيفرسال بهوليود

أعزائي

بما ان اوباما زار القاهره يوم الخميس قلت انتوا كمان تقوموا بزياره استديوهات يونيفرسال

بمدينه هوليود عاصمه السينما

تقع الاستديوهات علي بعد 9 اميال شمال وسط مدينه لوس انجلوس

بدات مرحله الاستوديوهات في هوليودعام 1920

ومع مرور الوقت ضاقت المواقع فانتقلوا الي موقع جانبي يسمي

وادي سان فرناندو

يوجد به كثير من المواقع والقاعات الواسعه المخصصه للاستوديو والاعمال السينمائيه

ممكن توصلوا هناك بواسطه المترو لو كنتوا في لوس انجلوس

محطه Universal City

ودي بتقع علي خط المترو الاحمر Rid Line

وتقع قريب منها منطقه للباصات Shutle

وهي مخصصه للباصات المجانيه بتروح البوابه كل ربع ساعه

الاستديوهات علي مساحة كبيرة من الارض

تدخل البوابه بعد ماتشتري تذكرة الدخول وبتشمل جولتك ليوم واحد

وتقدر تقضي طول النهار في الاستديوهات

بس الاول لازم تطلع علي الخريطه ودي بيكون فيها مواعيد العروض واماكنها

بعد ماتدخل من البوابه حتلاقي حديقه كبيره بتتقسم لقسمين

الاول بدون رسوم وده بيشمل المحلات والمطاعم وسينما كبيره

بها 24 صاله عرض تابعه للاستوديوهات

والقسم التاني مدينه ملاهي

في القسم الاول بتشوف شارع عريض مملوء بالباعه والناس والعاب التسليه

وتقدر تشتري منه جميع انواع السوفنير لاهلك واصحابك

تقدر تحضر تصوير لقطات من الافلام في اي بلاتوه من البلاتوهات اللي بيتم فيها التصوير

وتقدر تشوف لقطات بتعتمد علي الرشاقه ولقطات في الهواء الطلق ولقطات استعمال السلاح

وممكن تشوف جزء من عمليات المكياج الخاص بالحوادث والعمليات

يعني مكياج العاهات

بتشوف في الحديقه دينصورات جميع الاحجام وشلالات ميه

وممكن وانت ماشي تلاقي عربيه سقطت جنبك

واهم واحد ممكن تقابله المارد العملاق اللي بيتجول في مرافق الاستديوهات بحريه

واجمل حاجه ممكن تشوفها ممشي الرد كاربت والبوابه الخلفيه اللي بيفتحوها

في حفلات البريمير وافتتاح الافلام الجديده وقت وصول النجوم

تشوفها علي الطبيعه مش علي شاشات الفضائيات

وممكن تاخد الباص لو تعبت وتعمل جوله في الاستديوهات

تشوف المطر الصناعي ممكن قريه جالها فيضان

مكان تصوير الفك المفترس . جسر متحرك

بتلاقي وانت في جولتك ناس لابسين دراكولا بيهاجموك وانت ماشي

يعني نوع من انواع المرح بس بيخض

قبل ماتدخل صاله العرض بيكون فيه استضافه للجمهور في قاعة استقبال كبيره

كلها شاشات وبيتم توزيع نظارات D3

القاعه مرتبه جدا والكراسي الموجوده متحركه والفيلم اللي بتشوفه

بيكون رباعي الابعاد يعني قريب منك وممكن تحس بحاجات بتتحرك تحت الكرسي

او ميه بتدلق عليك

وممكن بعد ماتخلص عرض تروح عرض تاني

كل يوم في نجم وانت وحظك اذا كان مشهور او صاعد

بتلتقي به في قاعه من القاعات بيوجه للموجودين كلمه ترحيب

والموجودين يوجهوا له الاسئله وهو يجاوب

وممكن لو حبيت تتصور معاه

الزياره حقيقي كلها بتكون انبهار

بيني وبينكم شعرت بالاحباط بين الفن عندنا وعندهم

اخر حاجه لمحبي افلام الرعب

استديوهات يونيفرسال بتنتج اكتر من 15 فيلم في 2009 كلهم رعب

وكفايه كده واشوفكم علي خير

واوعوا تغيروا الصفحه

ابقوا معي

مولد سيدي اوباما

أعزائي

خلاص انفض المولد ورجع كل شيء لاصله

الزحمه والخنقه والمرور البشع والاهمال

يعني زي مابيقولوا رجعت ريما لعادتها القديمة

بس بعد ما اتعطلت امتحانات الجامعة والمدارس

واتصرف علي الزياره الميمونه 50 مليون جنيه من دم الشعب الغلبان

عمنا اوباما جه ومعاه 3000 جندي من قوات المارينز لحمايته

ده نعتبره عدم ثقه في حمايه البوليس المصري له

استقبل في قصر القبه بالخياله

واستقبله الرئيس مبارك وكانت جلسه المباحثات مدتها 45 دقيقه

من 9.45 دقيقه الي 10.30 دقيقه

خطابه كان سلس وناعم ووقفت عند حاجات كتير منها

انه بيرفض اي صور مسيئه للاسلام

في امريكا 7 مليون مسلم امريكي

مسجد في كل ولايه .. وامريكا بها 1200 مسجد

حق المرأة والفتاة في ارتداء الحجاب

الاسلام جزء من امريكا

واجبه حمايه الشعب الامريكي

لا يريد الابقاء علي قواته في افغانستان

استشهاده بآيات من القرآن الكريم

منع التعذيب واغلاق جونتنامو بعد 3 سنوات

هو يعني مش قادر يقفلها قبل المده دي ؟

الوضع الفلسطيني لا يحتمل

دوله يعيش فيها الفلسطينين والاسرائيلين في أمن وسلام

يدعوا الفلسطينيين بالتخلي عن العنف

لان العنف طريق مسدود

ويتوجب علي حماس وضع حد للعنف

وقال ان امريكا لا تقبل شرعيه المستوطنات الاسرائيليه

امريكا تحترم حق الجميع حتي لو كنا نختلف معهم

الاديان عليها ان تقربنا

اما عن حقوق المرأة

قال انه لا يريد ان تحرم المحجبه من المساوه مع غير المحجبه

البنات يساهمون مثل الابناء

يعني علي رأي سعاد حسني

البنت زي الولد ماهيش كمالة عدد

في الاحتمال والجلد

سيوسع الشراكة مع البلاد الاسلاميه

في كل دين عقيدة واحده وهي

عامل الاخرين كما تحب ان يعاملوك

الاسلام هو الذي طور علم الجبر والبوصلة وغيرها من العلوم

الايمان بالاخرين هو الذي اتي بي الي هنا

اهم ما لفت نظري او بالاحري ماكنت اتوقع سماعه

العلاقه بين امريكا واسرائيل وثيقه وغير قابله للكسر

وفي بدايه خطابه قال انه سعيد لوجوده في مصر

بلد الازهر وفي جامعة القاهرة مصدر العلم للعالم من سنين

مش عارفه اذا كان كلام للاستهلاك المحلي او هو فعلا حقيقي

علي اي حال الايام ستثبت نيه امريكا المتمثله في اوباما

علي هامش الزيارة

------

300 مراسل اجنبي

سال اي لون بيفضلوه المصريين لارتداءالكرافته

قيل له اللون الازرق لون النيل

النيل في اسوان مش في القاهره طبعا

صحب معه في السياره في طريقه لقصر القبه المصور الخاص به

سيارته انتاج شركه جنرال موتورز

التي اعلنت افلاسها من يومين

لم تاتي معه ميشال زوجته لامتحانات البنات

ياحرام شقيانه معاهم في المزاكره ربنا ينجحهم

مع ولعها بالاثار الفرعونيه

كان لقائه مع الرئيس مبارك لقاء وديا

لم يخلو من انبهارة بشخصيه مبارك

كان في استقباله بجامعه القاهرة شيخ الازهر

محمد سيد طنطاوي

وكان من الحاضرين لخطبه اوباما

الزعيم عادل امام .. رانيا علواني السباحه المصريه المحجبه

اساتذه جامعه .. دكاتره.. دارسين بالازهر الشريف

من الهند وباكستان

ودارسات مغتربات من الجاليات الموجدوه بالقاهرة

من اندونيسيا ودول شرق اسيا

الانبا شنودة .. ايمن نور

المعارضه ... الاحزاب السياسيه

وزراء حالين وسابقين

محللين سياسيين عرب واجانب

جمال مبارك وكان يجلس بالصف الثاني

مفيد فوزي ونخبه من الاعلام المصري

اطراف الصفوف والممرات كانت مؤمنه

ارتدت هيلاري ايشارب في مسجد السلطان حسن

وكانت حافيه زي اوباما

كانت في استقبالهم ومرافقتهم في زياره جامع السلطان حسن

ايمان عبدالفتاح المصريه الاب والامريكيه الام

والتي تحمل جنسيه امريكيه وتعمل مع الخواجه زاهي حواس

وهي حاصله علي ماجستير في الاثار وتتقن اللكنه الامريكيه

كان اوباما منبهر بالمكان لدرجه ملفته

وسال عن تاريخ المبني وعن القبله ايوان والشريط الكتابي وكان بالخط الكوفي

وشاهد ايضا القبه الضريحيه وهناك شاهد نوع أخر من الخط العربي

ووقف بانبهار امام باب نحاس محشو بالذهب والفضه

اما في الاهرام فكان منطلق وعلي حريته

ودخل الهرم من فتحه المأمون

وشاهد عرض للصوت والضوء

والتقطت له الصور الكثيره بجوار مراكب الشمش ومع ابو الهول

وكذلك مع زاهي حواس

وانتهت الزياره في حوالي السادسه مساء بتوقيت القاهره

اي انه قضي بالقاهره 9 ساعات

الاراء الامريكيه تتارجح بين مؤيد ومعارض للزياره والخطاب

وبعضهم كان يفضل ان يلقي خطابه في تركيا او اندونيسيا

وبعضهم يسال لماذا لم يلقي خطابه في السعوديه

لكن اهم مافي الزياره هي تعريف العالم كله بالاثار المصريه

دعايه مجانيه لجميع شركات السياحه بمصر

اخيرا لا نستطيع الا ان ننتظر ما سيتم بعد هذه الزياره

اهي زياره والسلام

ام انها ستغير في مجريات الامور

وعلي رأي المثل المصري

الميه تكذب الغطاس

واوعوا اوعوا تغيروا الصفحه ابقوا معي

رجعت في كلامي كالعادة

أعزائي

والله ياجماعة الوزير الفنان حيرنا معاه في تصريحاته

ادلي بتصريح اكد فيه استعداده بحرق جميع الكتب المكتوبه

باللغه العبريه الموجوده في المكتبات المصريه

يمكن مش بيعرف عبري ومضايق من كده

وكان قد وصف الثقافة الاسرائيلية بانها لا انسانية

وعنصرية ومنتقدا اختراق اليهود لوسائل الاعلام العالمية

وفي العام الماضي 2008 اتهم مركز سيمون فيزنتال

الوزير الفنان بانه وجه قبل سنوات دعوة شخصية الي

روجيه جارودي الذي انكر المحرقة

وكان قد اكد الوزير لوكاله فرانس برس انه لا يمانع

قيام المايسترو الاسرائيلي دانيال بارنبويم في 16 من ابريل الماضي

بقيادة فرقة اوركسترا القاهرة السيمفوني

بمناسبة الاحتفال بالعيد الخمسين للاوركسترا

كما اكد بصفته وزير الثقافة المصري انه يشارك المثقفين المصريين والعرب

في ان التطبيع مع اسرائيل لابد ان يكون له توقيته

اما في جريدة لوموند الفرنسيه فقدم اسفه لتصريحاته السابقة

وقال انه رجل سلام والسلام يعني التفهم والاحترام وبهذه القيم

يعتذر عما بدر منه في مايو 2008لدعوته الي احراق الكتب العبريه

وقال ايضا انها ( زلة لسان )

وقال ايضا ان تصريحاته السابقه لاتتطابق

مع الثوابت التي يؤمن بها

بجد احترنا معاه يهاجم الحجاب ويعتذر

يدلي بتصريح بان اللوحات المسروقه من متحف محمد علي الكبير ليس لها قيمه

وبعد ان يتم العثور عليها يدلي ببيان يقول فيه

ان اللوحات سيتم تشوينها في المخازن لحمايتها لانها ذو قيمه اثريه كبيره

احترنا ياوزير تتكلم وترجع في كلامك

يبقي الاسلم انك ماتتكلمش

وممكن تعمل ضجه اعلاميه ماحصلتش بتقديم استقالتك من الوزاره

وبكده حتكون اول وزير يستقيل في حياته من غير تغير للحكومه

عارف بتفكرني بالمسرحيه اللي بتقول

افتح الشباك والا اسده

الواضح انه يريد منصب مدير عام اليونسكوباي شكل

وحاليا مهم رضا اسرائيل واللوبي اليهودي عنه

والاهم ان ينال اصواتا انتخابيه في معركه ترشيحه لليونسكو

والجدير بالذكر ان مجلس الثقافة الالماني

والمجلس المركزي لليهود في المانيا

قد حذرا من انتخابه

اوعوا تغيروا الصفحه

وحنشوف حنفتح الشباك والا حنسده

ابقوا معي

رثاء لم اكن اتوقعه

أعزائي

الظاهر ان الشهر ده شهر الآحزان

وبنعي في المدونه اشخاص عزاز عليه

توفي يوم الجمعه في المانيا رجل الاعمال محمد نصير

وشيعت جنازته صباح اليوم الاثنين

من مواليد القاهره عام 1937

درس بمدرسه النقراشي الثانويه النموذجية عام 1954

التحق بهندسه القاهرة قسم الاتصالات وتخرج منها عام 1960

التحق بعد تخرجه بشركه IBM

ثم التحق في مركز الاهرام للمحاسبات اماك

رأس مجلس اداره مجموعة شركات الكان

ويمتد نشاطها في البناء والتشيد والغزل والاتصالات

والشركة العالمية للسيارات وكيلة شركتي

كياموتورز الكوريه ورينو الفرنسيه

ويرأس جمعية رجال الاعمال المصرية البريطانية

باع حصته في أدارة فودافون منذ حوالي عامين

الي فودافون العالمية

كان متزوج من المرحومه شيرين البغدادي

ابنه السيد عبداللطيف البغدادي

وهو والد لخالد رجل الاعمال

والمهندسة عاليه التي تعمل في مجال الديكور

حضر جنازته اليوم جمال وعلاء مبارك

الوزير صفوت الشريف وكمال الجنزوري

ودكتور احمد درويش وزير التنميه الاداريه

ورجال الاعمال نجيب ساويرس

خالد الميقاتي رئيس جمعية شباب الخريجين

حسين صبور رئيس جمعيه رجال الاعمال المصريين

ونجله احمد حسين صبور

وكذلك من رجال البنوك

اسماعيل حسن محافظ البنك المركزي السابق

ومحمد أوزالب نائب رئيس بنك مصر

وعلي شاكر رئيس بنك التنميه والائتمان الزراعي

خاض المرحوم نصير قبيل مرضه معركة واسعه مع جهات

حكوميه واهليه مصريه وهيئات دوليه وذلك بسبب مشروعه

كان ينوي اقامه مركزا ماليا وتجاريا عالميا

وذلك تحت سفح هضبة المقطم

ولازال المشروع مثار خلاف كبير مع منظمة اليونسكو

والمجلس الاعلي للاثار وذلك لاقامته امام القلعة

مما سيتسبب في سد الرؤية عن القلعة

ولكنه اوضح ان الابراج لن تغطي القلعة علي الاطلاق

وان اعلي مكان في المشروع أقل طولا بكثير من سور القلعة

وبرج القلعة هو مشروع أقامة ابراج سكنية في منتصف

المسافة فيما بين اهم قلعتين في مصر

الاولي اسفل قلعة محمد علي باشا والمنشأة علي قمة جبل المقطم

والثانية في مواجهة قلعة الجبل والتي اتم انشائها

السلطان الناصر صلاح الدين يوسف الايوبي

بين عامي 1176 و 1201

وكان الراحل ليست له علاقة بالسياسة بالرغم من عضويتة بالحزب الوطني

كما عرض عليه منذ 11 عاما ان يكون وزيرا للتجارة

ولكنه فضل ان يكون بعيدا مع استمرار علاقته الجيده بالجميع

رحم الله محمد نصير واسكنه فسيح جناته

والبقاء لله وحده

رساله مفتوحه

أي كلمة عزاء او رثاء مش حتفيد في شيء

لان المصيبه كبيره

هايدي قلبي معاكي وبجد حزينه جدا زي كل اللي بيعرفوكي شخصيا

او اللي بيعرفوكي بحكم انك زوجه ابن الريس

اللي ممكن يخفف عنك المعاناه حاليا هو انك تساعدي

علي قد ماتقدري الاطفال المرضي

في مستشفي سرطان الاطفال او مستشفي ابو الريش للاطفال

وممكن كمان في معهد ناصر

ساعدي وامسحي دمعه من علي خد طفل مريض

وارسمي بدالها بسمه حتقدري ياهايدي

وساعتها حتحسي انك شاركتي في شفاء طفل مريض

علاء . كلنا متعاطفين معاك

بس انت حاليا عليك حمل كبير فوق حمل الحزن علي محمد

لازم تاخد بالك من هايدي لانها محتجالك اكتر من الاول

وكمان عمر محتاجلك انت وهايدي اكتر من الاول

ولازم تخرجوه من الحزن ومفيش حد حيقدر علي كده الا انتوا الاتنين

كلمه اخيره محمد كان بيحب المولتو ممكن ياعلاء تبقي توزعه

علي الاطفال الغلابه الموجودين في الملاجي دي اكيد حاجه حتسعده

ولله ما أعطي ولله ما أخذ

اوبامافي عاصمه الازهر الشريف

أعزائي

وحشتوني بقالي مده مشغوله عنكم

عارفين طبعا ان ماليش في السياسه فاللي حكتبه مش مدرج تحت بند سياسه

ممكن تعتبروه تساؤلات

في يونيه المقبل سيلقي اوباما خطابه بالقاهره

فهل كان هذا الاختيار لان القاهرة عاصمه الازهر الشريف

ام للاعتدال والوسطيه في الاسلام

وتاثير مصر في العالم العربي والاسلامي

ام لانها النافذة التي تدير الحوار بين المسلمين

فهل يكون هذا الخطاب لاستعادة العلاقات الامريكيه المصرية

وهل ينجح الخطاب في حل مشكلة العلاقه الامريكيه الاسلاميه

والي متي ستظل امريكا تدعم اسرائيل في احتلالها للاراضي الفلسطينيه

كلنا امل في ان يكون هذا الخطاب بمثابة شهاده من اوباما لتواصل

العالم الاسلامي والعالم الغربي والتعمق في معرفة العالم الاسلامي

واعادة صياغه هذه العلاقه للوصول الي مسار جديد

فلا احد يمكن ان يغفل عن الدور الثقافي والحضاري الذي تتمتع به مصر

وهل اختياره القاهرة لالقاء خطابه دليلا علي مالها من ثقل ونفوذ اقليمي في الشرق الاوسط

بعد اسابيع قليله ستضح الصوره امامنا

وان غدا لناظره قريب

اوعوا تغيروا الصفحه

أوجاع مصرية

أعزائي

المصريين شعب بيتحمل ويقاسي وفي نفس الوقت دمه خفيف

بيضحك علي حاله قبل ماحد يضحك عليه

تخيلوا الصوره الاولي كل ده وقال ايه

التليفون شغاااااااااااااااااال

والصوره التانيه تشجيع لسياحه الاقاليم وبالاحري الصعيد

السياحه الصعيديه

والله الناس تعبانه فعلا ده حتي يوم اجازه عيد العمال لغوها

لان اول مايو طلع يوم جمعه

وبكده لازم نجازي العاملين بالدوله ونمنع عنهم الاجازه

الناس تعبانه وبيشكوا من حاجات كتير

مش عارفين حياخده العلاوه الدوريه والا لا

واذا اخدوها حتبقي كام 10% والا اكتر والا اقل

وفي حاله انهم حياخدوا علاوه الاسعار حتزيد كام % قبل مايصرفوها

والمعاشات ياتري حيتسوا بالموظفين والا تاميناتهم الدوله خدتها وبتديهم الفتات

وياريت معاشاتهم بتكفيهم او بتكفي تمن الادويه

اللي بياخدوها لكبر السن والمرض

او بيساعدوا اولادهم لان طبيعي مرتباتهم مش بتكفيهم

وياتري انفلونزا الخنازير حيقدروا يسيطروا عليها والا حتحصد الالاف

وارتفاع ثمن الحديد والاسمنت حيعمل ايه في اسعار المباني اكتر من كده

والاطباء اللي درسوا وتعبوا وفي الاخر لقوا حالهم

بيقبضوا في اخر الشهر مرتب مش بيكفيهم لتدني اجورهم

والكهرباء اللي غليت وانضاف عليه كمان رسم نظافه

يعني باللغه العاميه اجره ( زبال )

وطبعا لا في زبال ولا اي حد بيسال والزباله في الشوارع

بل في احسن الشوارع بيحطوها في صناديق القمامه

اللي مش مكفيه وتلاقي القطط منتشرين حواليها

والظاهره الجديده هروب الازواج

لانهم مش قادرين يصرفوا علي زوجاتهم واولادهم

والمناهج الدراسيه الصعبه اللي بتخلي الطفل في تانيه ابتدائي

يدرس مناهج تانيه اعدادي

والدروس الخصوصيه وموسم الامتحانات

والمراجعات النهائيه مع المدرسين اللي بتقضي علي اولياء الامور

ووزير الماليه ربنا يعمر بيته ويخليه رفض تعين

1200 طبيب بيطري .. طيب مين بقي حيتصدي لانفلونزا الطيور

وانفلونزا الخنازير واللي جاي انفلونزا الحصان وانفلونزا القطط

والبقيه تاتي او البقيه في حياتنا

اخر حاجه بقي تصورا ان في قريه في محافظه الشرقيه

تبعد عن الزقازيق حوالي 4 كيلو

اسمها قريه الخصر

مافيهاش صرف صحي ومافيش فيها لا وحده صحيه

ولا مستشفي يعني لو حد احتاج يتنقل المستشفي بيشلوه لغايه الزقازيق

ويا وصل ويا مالحقش يوصل حسب حالته

والاخر برضه بنقول عمار يامصر

حاجه توجع القلب

نهايته

واوعوا تغيروا الصفحه

دخول الحجاب البيت الابيض

أعزائي

داليا مجاهدالمولودة بحي السيدة زينب بالقاهرة

قضت به خمس اعوام وهاجرت مع والديها الي امريكا منذ مايقرب من 30 عاما

وتاتي في زيارات متقطعة صيفيه لزياره جدتها بحي السيدة زينب

والدها الباحث السيد مجاهد باحث الهندسه في جامعه ويسكونسن

حتي اصبح استاذ العلوم الهندسيه ومدير مركز ماديسون الاسلامي

متزوجه من مصري يعمل طبيبا بشريا ومقيم بامريكا

وهي ام لطارق وجبريل

ضمها الرئيس بارك اوباما الي مجلسه الاستشاري الخاص بالاديان

والمكون من 25 طائفه وشخصيات علمانية

ومهمتها هي اطلاع الرئيس اوباما عن كيفيه تفكير المسلمين

وماذا يريدون من امريكا

وتعد داليا المسلمة المصريه الاصل الامريكيه الجنسيه

اول محجبه تشغل منصبا من هذا النوع

وهي المسلمه الوحيده في المجلس الاستشاري

و حاليا تراس مركز غالوب للدراسات الاسلاميه

الذي يعد الابحاث والاحصائيات المتعلقة بالمسلمين

والشركات التي تعتمد علي الاديان والجوار

وتظهر دراسات داليا في صحف بارزة

كما انها درست ادارة الاعمال والهندسه الكيميائيه

وشاركت في تاليف كتاب ( من يتحدث باسم الاسلام )

مع ( جون أيسبوزيتو ) استاذ العلوم السياسية الامريكيه

والذي ينتقد كثيرا لمدافعته عن الآسلام

وقد نشرا الاثنان مقالا للرأي الشهر الحالي في صحيفه تايمز

حول الجهل الامريكي بالاسلام والعالم الاسلامي

ندعو جميعا لداليا بالتوفيق في مهمتها

وابقوا معي

الاحتفال بعيد شموش

أعزائي

نحتفل غدا بعيد شم النسيم

وهو عيد فرعوني تم نقله من بنو اسرائيل الي الاقباط

وصار بعد ذلك عيدا شعبيا يحتفل به المسلمين والمسيحيين

شم النسيم في الخامس والعشرين من شهر برمهات وكان اسمه قديما

( عيد شموش )

اي بعث الحياة وحرف بعد ذلك الي شم واضيفت كلمه النسيم

احتفل الفراعنه بذلك العيد رسميا عام 2700 قبل الميلاد

في اؤاخر الاسرة الفرعونية الثالثه

نسبه الي نسمة الربيع التي تعلن وصوله

يخرج المحتفلون الي الحدائق والمتنزهات ليستقبلوا الشمس عند شروقها

ولهذا اليوم اطعمته التقليديه منها البيض الملون





بدا ظهوره كاحد الشعائر المقدسة

اما فكرة نقشه وتلوينه فقد كان الفراعنه ينقشون

الدعوات والامنيات ويجمعونه ويعلقونه في اشجار الحدائق

حتي تتلقي بركات نور الاله عند شروقه

اما تلوينه فقد بدا في فلسطين الاقباط صبغوا البيض

باللون الاحمرليذكرهم بالام المسيح عليه السلام

****

الفسيخ او السمك المملح
---




من الاطعمه التقليدية في شم النسيم وكانت بدايته في الاسرة الفرعونيه الخامسة

فقد كانوا يجيدون حفظ الاسماك وتجفيفها وتمليحها وصناعه الفسيخ والملوحة

****

البصل
--





ظهر ضمن اطعمه شم النسيم في اواسط الاسره الفرعونية السادسة

وكانوا يضعونه تحت وسادة الاطفال وتنشيقهم لعصيره

اعتقادا منهم انه يشفي الامراض

وتعليق حزم البصل علي ابواب المساكن والغرف واكل البصل الاخضر

وواصل مكانه علي مائدة شم النسيم

****
الخس
--


من النباتات التي تعلن عن حلول الربيع

وعرف ابتدا من الاسرة الفرعونية الرابعة

وكان من النباتات المقدسة الخاصة بالمعبود

(من ) اله التناسل

وكان من ضمن سلال القرابين التي يقدمونها لالهتهم

****

الحمص الاخضر ( الملانه )
---



اطلقوا عليه اسم ( حوربيك )

اي راس الصقر

كانوا يعتبرون نضج الثمرة اعلانا عن ميلاد الربيع

وكانت الفتايات يصنعن عقود واساور من حبات الملاونه

ويزينون به نوافذ المنازل

****
الترمس
--

حاليا اصبح الترمس والحلبه من الاكلات المفضله

او المسليه في شم النسيم

****
الليمون
--

واخيرا لا تنسوا فوائد الليمون

وكل عام وانتيم جميعا سالمين

وشم نسيم سعيدا ويارب تقضوا وقت ممتع

واوعوا لما ترجعوا تغيروا الصفحه

تحياتي

افتتاح اكبر متحف مفتوح بالقاهرة

أعزائي

تم افتتاح اكبر متحف مفتوح في شارع المعز لدين الله الفاطمي

الكائن بحي الازهر والذي يمتد من باب الفتوح مرورا بمنطقه النحاسين

ثم خان الخليلي منطقه الصاغه ويقطعه شارع جوهر القائد

( الموسكي )

ثم يقطعه شارع الآزهر مرورا بمنطقه الغوريه والفحامين

ثم ذقاق المدق والسكرية لينتهي عند باب زويلة

سكانه حوالي 100 الف ولكونه مزارا سياحيا

وأثريا وسوق تجاري يتردد عليه الالاف يوميا

الشارع يحمل في ابنيته وجدرانه أثار اسلاميه منها

الاسوار والبوابات وجامع الحاكم بأمرالله

من العصر الفاطمي

ومدرسة صالح نجم الدين من العصر الايوبي

ومجموعه السلطان محمد بن قلاوون

من العصر المملوكي

ومسجد السلطان برقوق من العصر الشركسي

أسبلة خسرو باشا وعبدالرحمن كتخدا

من العصر العثماني

جامع سليمان أغا السلحدار وسبيل محمد علي بالنحاسين

من عصر محمد علي

الشارع يضم أجمل كوكبه من الآثار الاسلاميه بالعالم

والتي تتنوع بادق الزخارف

المرحله الاولي من اعمال الترميم كانت لسبيل محمد علي

في شارع المعز لدين الله الفاطمي تضمنت الاثاث

وحقن حوائط السبيل الحجريه بالجير

وازلة طبقات البياض الغير أثري

كما تم ترميم 34 أثرا تطل علي جانبي الشارع

بامتداد 1200 متر وذلك من بوابة الفتوح حتي باب زويله

وكذلك 67 أثرا نادرا تحيط بالشارع

تنظم الحكومه المصرية في نهايه العام الحالي حفلا بمناسبه

انتهاء المشروع الذي رصد له 35 مليون جنيه

وذلك ضمن المشروع الكبير لتطوير القاهرة التاريخية والثقافية

وقد افتتح وزير الثقافه مع الادباء والفنانين المرحله الاولي

كلمه للوزير الفنان

ياريت نهتم بالشارع علي اعتبار انه متحف مفتوح

ومايشملوش الدكتور زاهي حواس بعطفه وكرمه والمره دي يقفل الشارع

زي ماقفل متحف محمد علي الكبيربشبرا الخيمه

وانهي بقول الشاعر سيد حجاب

هنا القاهره الزاهره العاطره الشاعره

النيره الخيره الطاهره

هنا القاهرة الساخره القادره الصابره المنذره

الثائره الظافره

صدي الهمس في الزحمة والشوشره

أسي الوحدة في اللمه والنتوره

واوعوا تغيروا الصفحه

حاجه ببلاش كده

أعزائي

دي صور موبيلات للفرجه فقط

اوعوا حد يشاور عقله ويتهور ويشتري

****

ده بقي أغلي موبايل

Gold fish

**

الماس 120 قيراط بسيطه

تمنه كلام فارغ مليون دولار بس

يابلاش

كوبرا

Cobre

***

صنعه مصصم المجوهرات الفرنسي باتشيورن

الماسه واحده .. والماسه بيضاء مستديرة

وعينان من الزمرد و439 حجر روبي

علي فكره احجار الروبي جميله جدا

تمنه 310 الف دولا

ولسه ولسه

Virtue diamond
****

بلاتنيوم والماس

ده ارخص كتير

88 الف دولار

موتورلا

Motorola special edition

*****

مرصع ب 1200 الماسه

ولوحه ارقام ذهب 18 قيراط

ده سعره بسيط

51800 دولار

السماعه لها سعر لوحدها دي بقي برخص التراب

46669 دولار طبعا

السماعه تقريبا تمنها 263 الف جنيه

يعني اكتر من ربع مليون

الله يسهل عليهم

من تصميم الاسترالي بيتر اليسون

ربنا يخليه ويحفظه ويبعد عنه مصلحه الضلرائب

قولوا انشالله

نوكيا الذهبي

Gold edition nokia8800

******

ذهب خالص 24 قيراط

ده بقي ارخص

2700 دولار

ممكن نشتريه نفرح بيه الاطفال

كده افتكر اتحرق دمكم زي ما اتحرق دمي

هو مش كل الموبيلات بتطلب وبتتكلم

وبنبعت عليها sms

والا دي معالجه ضد الصدمات ومش بتخرب

ومش بتتاثر بالانفجارات ولا الزلال ولا حتي البراكين

وبتتكلم وبتقول ماما وبابا وبتدلع صاحبها

وبتصرف راتب شهري

نفسي بصراحه قبل ما اموت اشوف واحد ماسك موبايل بمليون دولار

ربنا يديم علينا نعمه الستر

وابقوا معي

اليوم العالمي لمرضي الاوتيزم

أعزائي

اليوم هو اليوم العالمي لمرضي التوحد او الاوتيزم

المرض ده انتشر بصوره كبيره بين الاطفال حاليا

معني الاوتيزم

----

هي حاله من الانطواء بتؤدي الي اضطرابات في حياة الطفل

العائليه والاجتماعيه والدراسيه

لانهم يصابون بعدم القدرة علي التاقلم مع الاخرين وعدم التواصل الاجتماعي

مع عدم تكوين صداقات مع الاخرين

وعدم المشاركه في اي تفاعل مع المجتمع

غالبا ماتبدا الاعراض في عمر 18 شهرا ومنهم او بالاحري اكثرهم

ترافقه الاعراض طوال حياته . مع بعض التحسن

اعراضه

---

عدم القدرة علي تبادل الاراء والافكار عن طريق الكلام او الكتابه او الاشارات

مصاب الاوتيزم لا ينظر الي الاخرين عينا بعين ولا وجها لوجه

عدم تكوين علاقات اجتماعيه او صداقات ولا يعبر عن عواطفه

يبدي ردود افعال شديده عند سماعه صوت الراديو او التليفزيون اذا كان عاليا

يلعب بمفرده باي شيء وبشكل متكرر وبلا ملل

كما انه يعيد الاسئله الموجهه اليه بنفس السؤال ونفس التون في الصوت

يضحك ويبكي بلا سبب

علاقته بالاشياء اقوي من علاقته بالافراد

يهتم مثلا بقطعه من عربيه اطفال مكسوره

او بيد عروسه مكسوره

ويحب الاشياء الدوارة

مع اهتمامه بالاجزاء وليس بالكل

ومنهم يكون سلوكه عدواني تجاه الاخرين

او يكون ذات نشاط زائد

ومن احب الحركات لدي مرضي الاوتيزم

رفع يديه لاعلي بين فتره واخري بلا سبب

مع ارتخاء اليد لتصبح مثل العلم

لا يهتم بالخطر

ومنهم من تكون لغته جيده لكن غير طبيعيه ورسميه

---

التشخيص المبكر مهم جدا لان هناك اطفال

يستفيدون من العلاج المنشط للدماغ اذا كانت الحاله تعاني من

وهن ذهني وزيادة في النشاط الحركي

ويحتاج العلاج الي علاج تعليمي ونفسي وتربوي وسلوكي

لتنميه القابليات الاجتماعيه

اسباب المرض

---

يقال انها لارتفاع الرصاص في الدم Lead

وان به جزء وراثي

وكذلك مضاعفات الولادة

والتعرض لبعض المواد الكيميائيه والالتهابات

مثل اصابه الام بالحصبه الالمانيه او الاختلال الجيني

وايضا نتيجه لاضطرابات في وظائف المخ

المسئوله عن التعامل والتواصل الاجتماعي

كيفيه المعامله

---

يجب معاملته معامله خاصة لعدم استجابته لطرق التربيه

المتعارف عليها

يحتاج الي نوع خاص من التعامل السايكولوجي لتهذيب سلوكه

الحنان من الام واحتضانه اطول فتره ممكنه وملامسه جلد الام لجلده

الممنوعات

---

كل المواد المصنعه من الشيكولاته والعصائر المحفوظة

والسكر الابيض

منتجات الالبان مثل الزبد والجبن ماعدا لبن الجمل

لانها تفاقم في الاعراض

الاطفال الذين يعانون من الاوتيزم تقوم اجسامهم بتكسير بروتين اللبن

المعروف باسم الكازيين الي ببتيدات تؤثر علي المخ

بنفس تاثير عقاقير الهلوسه علي المخ

وكذلك القمح والشوفان والشعير

وينصح الاطباء باعطاء مصابي الاوتيزم

عين الجمل .. الرويال جيلي .. الجينسنج

التمر ... العسل

المصابون بالاوتيزم يكون معدل الذكاء لديهم اكثر من الطبيعي

وكثير منهم يتفوقون في مادة الرياضيات وكذلك الكمبيوتر

الاحصائيه تقول انها حاله من كل 10 الاف حاله

وينصح الاطباء بالحاقهم بالمدارس العادية مع الاصحاء

ليكتسبوا مهارات اكثر في التعامل

وقد تم في مصر ادراج 30 طفلا من مرضي الاوتيزم بمراحل التعليم المختلفة

موضوع صعب انا عارفه اللي بيسمع عنه او بيقراه بيزعل

طيب اللي اولادهم كده يعملوا ايه

ربنا معاهم ويقويهم ويشفي اولادهم

ويحفظ اولادكم جميعا

اوعوا تغيروا الصفحه

ابقوا معي