16‏/2‏/2015

تحليل

أعزائي 
بقالي مده طويله مش بكتب هنا مكتفيه بالكتابه علي الفيس بووك 
انما المقال ده لازم يكتب هنا 
كلنا تابعنا الاحداث اللي فاتت 
اللي داعش عملتها 
خطف وقتل الظابط المصري ايمن الشرقاوي



وبعده حرق الطيار الاردني معاذ الكساسبه 

-----
 واخيرا خطفوا 21 مصري مسيحي من ليبيا 
وقاموا امس بدبحهم بطريقه اكتر من وحشيه 
وكلنا او معظمنا شافوا الفيديو اللي صورته داعش 
منتهي القسوه والافترا 
بعد ما شفت الفيديو وسماعي لكلمه الحاج ابو مصطفي سالت ؟؟
يعني ايه بيحتفظ بحق الرد؟
وكان حق الرد  هو !!!!
الضربه الجويه علي معاقل  تنظيم داعش  بليبيا 
فعلا ضربه معلم طار فيها من 40 ل 50 داعشي 
وبعدها راح قدم التعزيه في الكتدرائيه المرقسيه بالعباسيه 
ده بقي بلغه اهل الصعيد يتقبلوا العزا بعد ماياخدوا بالتار 
زي ماقلت ضربه معلم 
دي رساله ان مصر قويه  ومش سهله  



+++++
تعالوا بقي نحلل اللي شفناه في الفيديو الاخير 


الفيديو اللي شفناه وتم تداوله علي شبكات التواصل  تم تصويره علي مراحل 
لو بصينا حنلاقي اللوجو هو لوجو قناه الجزيره
 بس كاتبين الحياه 
-----
اجسامهم مش اجسام عرب  
دي اجسام  ( فرق البلاك وتر )
اللي دخلوا العراق 
-----
المتحدث هو الوحيد اللي مبين عنيه  لانهم مش ملونين 
انما الباقي مش مبينين عنيهم  لان احتمال تكون عنيهم ملونه 
وده بيكون نادر بالنسبه للعرب 
-----
الخنجر اللي في الصوره  اسمه  ( الخنجر الكولومبي )
امريكي الصنع  وممنوع تصديره لعدم الكشف عن نوع السبيكه 
وبيقال انه اشرس خنجر في العالم 
-----
نرجع تاني للمتحدث نلاقيه لابس ساعه رولكس 
كمان لابسها في الشمال وده عكس تعاليم داعش 
لازم في اليمين لعدم التشيهه بالكفار 
-----
وبرضه ماسك الحنجر بايده الشمال وده كمان عكس تعاليم داعش 
والاهم ان الداعشي لازم يكون زاهد
 يعني مابيلبسش رولكس
-----
في بدايه كلامه قال 
الصلاه والسلام علي من بعث بالسيف رحمه للعالمين 
انما هي 
الصلاه والسلام علي من بعث بالحق رحمه للعالمين 
-----
الترجمه علي اعلي مستوي وكمان النطق للمتحدث الانجليزيه 
-----
لبس الاعدام الاورنج ده لبس جوانتانامو 
-----
لون بدله المتحدث هو هو لون  البدله العسكريه الامريكيه 
----- 
تصوير القتله  جاي من زاويه من تحت  عشان يوحي للمتفرج بالضخامه والعظمة 
-----
الاخراج  بارع بجد  وده نلاحظه في المسافات بين الضحايا متساويه
-----
 لما هما قتلوهم علي الرمل 
 يبقي الرمل هو اللي شرب دمهم  مش الدم اللي شفناه في البحر 
اكيد حطوا لون في الميه قبل ما يصوره 
عشان يوحولنا انه دمهم  وده يزيد من رعبنا منهم 
-----
الضحايا مستسلمين  زي ماشفنا وده ياكد انهم  تم تعذبهم وتروعهم 
 وحرموهم من النوم لفترات طويله  
وده بيكون تاثيره اكتر من تاثير المخدرات 
-----
الملاحظه الاخيره بس بجد ماتضحكوش 
ان المتحدث عامل حواجبه 
وده عكس الحديث عن 
النامصه والمتنمصه 
مع الاعتبار انه راجل 
-----
الله يقدس ارواح الضحايا 
ويصبر اهلهم ويربط علي قلوبهم 
----- 


واسلمي يامصر
-----
واقول تاني 
اوعوا تفلبوا الصفحه ابقوا معي ..






28‏/4‏/2014

نقطه ومن اول السطر

آعزائي




مش حقولكم زي كل مره مش حتاخر عليكم 
لاني بتاخر 
الحاله بقت صعبه والظروف مش بتساعدنا
وكمان مش عارفه في ايه بقالي 3 ايام المدونه مابتفتحش
وازاي فتحتها ربنا العالم 
بجد والله مش عارفه ازاي ؟ 
--
ماعلينا تعالوا نحكي لان الحكي وياكم وحشني
 اكيد لازم نتكلم علي الترشيحات لرئاسه الجمهوريه 
سمعنا  ان زيد وعبيد ونطاط الحيط 
حيترشحوا للرئاسه والاخر صفصفت علي اتنين 
عمكم الحاج السيسي بعد ما خلع بدله الجيش 
وعمكم  الحاج حمدين 
قبل ما نتكلم انا بحترم وجهه نظر كل الناس 
ومافيش داعي اصحابي وقرائي اللي حيختاروا اي واحد 
من المرشحين يزعل مني او ياخد مني موقف 
ونرجع نقول الاختلاف في الرأي لا يفسد للود قضيه 
تعالوا بقي نتكلم من غير حساسيه ولا زعل 
---
المشير عبدالفتاح السيسي خلع البدله العسكريه واترشح 
بس ده مش حينسينا ان خلفيته عسكريه 
اتربي وعاش في حضن الجيش 
مش بقصد انه عيب بس بوضح حقيقه 
لغايه دلوقتي مافيش برنامج نزله 
بس نقدر نستنتج من كلامه البرنامج بتاعه 
قال ايه ؟
اوعوا تفتكروا ان في حد يقدر يحل المشاكل في مصر 
مهما كان اللي حتختاروه 
الموضوع حيتحل بينا كلنا 
معني كده انه مش بيدي وعود 
وانتوا بقي حلوا براحتكم 
حتي لو لبستوا في الحيط ماليش دعوه 
---
تعالوا بقي  للحاج حمدين 
صرح وقال حسب ماقريت  والله اعلم قال والا لا ؟
حيسمح بمظاهرات الاخوان ورفع شعار رابعه 
طيب الكلام ده موجهه لمين؟
الشعب اغلبه عارف انهم حينتخبوه  
طيب بيقول كده لمين او عايز يعرف مين ؟
طبيعي الكلام موجهه لامريكا عشان تدعمه وتقعده علي الكرسي 
 كمان قال حيدي فدان و10 الاف جنيه لكل شاب وفلاح 
عمار يامصر 
افلح ان صدق 
---

ده الطفل مازن اللي علي اليمين لابس احمر 
عنده 12 سنه في سنه 6 ابتدائي 
اتقبض عليه في مظاهره قدام جامع الحصري 6 اكتوبر
بيقال انهم عذبوه لغايه ما مات 
طيب بالذمه ده طفل حتي لو اهله اخوان ممكن يعمل ايه ؟
لقي مظاهره اكيد طفل هاص معاهم  زي كل الاطفال 
لما قبضوا عليه مارعوش انه طفل  ؟
كانوا جابوا ابوه وخدوا عليه تعهد انه مايطلعش في مظاهرات 
بس حبس وتعذيب ده بصراحه اوفر
ادعوله بالرحمه 
وربنا يصبر اهله 
---
بصوا كده الصوره دي 



دي جنازه لظابط شرطه من اللي بنشوفها يوميا 
ومرات بتكون مرتين في اليوم 
الاهل بدل مايزفوا ولادهم يوم فرحهم 
بيزفوهم للقبر 
سؤال بقي للسيد اللواء كبير الداخليه 
هو مش بيحس باحساس الاهالي 
ولا بيتاثر بالشباب اللي بيموت من الشرطه 
طيب حس بالامهات او بالزوجه اللي بقت ارمله في عز شبابها 
او ارئف بطفل ابوه مات غدر
كل اللي بيحصل معاليك ومدير الامن بتمشوا في الجنازه العسكريه 
وتروحواعلي بيوتكم في وسط اولادكم واهاليكم 
وتنسوا خالص انكم كنتوا في جنازه واحد مات غدر وهو بيشتغل 
اقصي ما بيتعمل ايه ؟
معاش شهيد  
الفلوس معاليك مش كل حاجه 
فين حنان الاب وحضنه وتوجيهه لاولاده 
فين الزوج اللي يعطف 
فين الابن اللي امه وابوه محتاجين بره بيهم 
ايوه مافيش احن عليهم من ربنا بس الرحمه حلوه
مش قادره استوعب سكوتك  للحاله السيئه اللي وصلنا ليها 
ياتري حتفضل ساكت كتير ؟
الي متي ؟
---
سؤال محيرني جدابقالي اسبوع 
وكل ما اسال حد مايعرفش يجاوب 
سالت ناس فاهمه وسالت ناس فهمها علي قدها 
وسالت ناس مش فاهمه السما من العمي 
مافيش اجابه  بس يتقالي ايوه عندك حق 
او والله ماعارف 
السؤال هو ؟؟؟؟
بيحاكموا الحاج ابو شيماء علي هروبه من السجن 
طيب هو لما اترشح للرئاسه ماكانوش عارفين انه هرب من وادي النطرون 
والا اذ فجأتن صحيوامن الغفوه 
حازم ابو اسماعيل لما اترشح  ما اتقبلش عشان والدته جنسيتها امريكيه 
وسرعه سرعه  اتعقدت المحكمه وحكمت وبقي في الباي باي 
 ومعروف اني لا بطيق الاخوان 
ولا انتخبت الحاج ابو شيماء ولا عصرت اللمون 
بس كلمه حق بقولها 
---
صديقي من زمان علي البالتوك والفيس بؤ
مصطفي البيلي  لقيته كاتب كلام عجبني 
قلت تشاركوني 
مذكرات المشير عبدالغني الجمسي 
وزير الحربيه السابق 
ورئيس اركان القوات المسلحه 
بيقول 
الرجل العسكري لا يصلح للعمل السياسي قط 
سبب هزيمتنا في 67 هو اشتغال وانشغال 
رجال الجيش بالالاعيب في ميدان السياسه 
فلم يجدوا مايقدمونه في ميدان المعركه 
كلام جميل ومش محتاج تعليق 
---
  الحاج السيسي طلب من العاملين في الخارج مرتب شهر 
لدعم الاقتصاد المصري 
ده بقي علي اعتبار انهم اتبطروا وسابوا الشغل في مصر
وفضلوا يروحوا يبتدوا حياتهم في الغربه ويتبهدلوا ويسيبوااهاليهم 
وكمان اصلهم بيغرفوا هناك وياخدوا 
واحد حيقول ماهي مصر علمتهم 
حرد اقوله روح شوف كام خريج واقف علي ناصيه مش بيشتغل 
وكام خريج قاعد علي قهوه عشان مش لاقي شغل
التعليم حق مش منحه ,, ماينفعش نعايرهم عشان اتعلموا 
انا مش رافضه مبدا المساعده 
انما كان ممكن الطلب يكون زي كده مثلا 
انا بناشد اولادنا واخوتنا العاملين في الخارج 
اللي عنده فائض ممكن يبعته عشان نحسن اقتصاد مصر 
تعرفوا ساعتها الكل حيبعت وبنفس راضيه ومسامحه 
انا قلت لازم الحاج السيسي حد يكتبله كفايه ارتجال 
---
ببشركم ان كل حاجه حتغلي 
الكهرباء حتزيد الضعف 
غاز المنازل 3 اضعاف 
دعم انبوبه البوتاجاز اتشال 
وخدوا ده كمان 


وعماااااار يا محروسه 
كفايه كده اقولكم اقعدوا بالعافيه 
واوعوا اوعوا تقلبوا الصفحه 
ابقوا معي 






31‏/3‏/2014

السكوت لا يعني الرضا

أعزائي 
ياتري اخبارتكم  ايه  ؟
يارب تكونوا كلكم بخير 
الاحداث بقت سريعه ومتلاحقه  
تعالوا الاول نحكي عن حاجه من كام يوم فكرت فيها 
الا وهي ؟
عنوان المقال  السكوت لا يعني الرضا
 زمان كنت اسمع لما البنوته يجيلها عريس  ويسالوها !!! ها ايه رأيك ؟
تسكت  وسكوتها ده بياخدوه علي انه موافقه 
وكانوا دايما !!   وليه دايما ماهو لغايه دلوقتي بيقولوا 
السكوت علامه الرضا 
انا بقي بقول لا  ممكن السكوت يكون علامه القهر 
لما البنت تكبر في السن  ويجيلها عريس ومايعجبهاش 
ويسالوها ايه رأيك تسكت  ما هي مجبوره 
شايفه انه ممكن يكون اخر أمل او أخر قطر وخلاص حيمشي 
ويسيب المحطه ومافيش اي قطر ممكن يجي تاني 
فتسكت مغلوب علي امرها 
ولو برضه البنوته صغيره وبنحب واد طالب سقيط 
ماشي تاته تاته في التعليم
وممكن بيضحك عليها ومش حتقدر تقول لاهلها انها بتحب
وغارقه لشوشتها في حب واد صايع 
ساعتها بتسكت  مقهوره
انا شخصيا بقيت حاليا اتبع حاجه جديده وهي!!!
لما القي حاجه مش عجباني بكبر واصهين واسكت 
ده مش معناها اني راضيه علي اللي بيتقال او اللي بيحصل 
انما  حاله من اللامبالاه
السكوت مرات كتير بيريح 
يبقي  في الحاله دي 
السكوت لا يعني الرضا 
---
نرجع للسياسه يالله بينا 
ايدكم معايا  عشان نطلع من السكوت للكلام 
--

يوم الثلاثاء اللي فات اعلن السيسي تريشحه لرئاسه الجمهوريه 
انا بحترم رأي الشعب  لان له شعبيه كبيره 
انما بطلب من الشعب يبطل يطبل ويزمر 
بلاش نصنع الفرعون الاله  اللي المصريين بيجيدوا صنعه 
زي ماعصروا الليمون وقالوا بلاها فلول خلينا آخوان 
وهللوا وطبلوا وزمروا وبعد سنه  قلبوا الصفحه 
او بالاحري قطعوا الكشكول 
وطلعوا فيه القطط الفاطسه زي ماطلعوا في مبارك اسوا مافيه 
ليه نحب بالزياده ومره وحده نكره بالزياده 
بيفكروني بالظبط زي ايام الجاهليه لما كانوا بيعملوا تمثال من العجوه 
ويعبدوه ولما يجوعوا ومايلاقوش اكل ياكلوه 
بجد والله احنا شعب غريب الاطوار 
----
ده اللي كتبته علي الفيس بوك 
---

ياجماعه الفيس بؤ
انا بناشد الجميع يعني السيساويه والاخوان والسلفيين واللي مالهمش لا في التور ولا في الطحين
خلاص بقي ماينفعش انكم تنزلوا بوسترات عن الحاج ابو شيماء ولا علي بابا حسني ولا حتي للسيسي
ياريت تركزوا في شغلكم وكفايه علينا اكتر من 3 سنين راحوا من عمرنا وعمر مصر ,,, استقيموا يرحمكم الله .
---
بنزول السيسي حلقه سباق الرئاسه بعتقد انه قضي علي اي فرصه 
لاي حد وده نظرا لشعبيته الجارفه  
وعشان كده بقترح ان الانتخابات تتلغي  وفلوسها تروح في حاجه تفيد البلد 
وبلاها حمله عارفين نتيجتها 
وممكن البرنامج الانتخابي للسيسي ينزل في كتيب صغير 
ويتباع في المكتبات والعيال اللي بيقفوا في الشارع اللي كانوا بيبيعوا بطاقه السيسي 
هما يقدروا يبيعوه ممكن يكون تمنه 3جنيه !!! 
جنيه للواد البياع 
وال2 جنيه  يتلموا 
وبرضه يتعمل بيهم حاجه تفيد البلد 
---
اللواء احمد وصفي  قائد الجيش التاني الميداني 
كان له انترفيو مع عمرواديب 
في برنامج القاهره اليوم  قال فيه 
لو السيسي بقي رئيس يبقي ده انقلاب  !!!!!
طيب ياتري ايه رأي معاليه بعد الترشيح للرئاسه ؟
---
بالمناسبه كيلو الليمون النهارده ب12 جنيه 
مش بقصد اني بدعو الشعب لعصر الليمون 
انما ياتري ياعم الحاج عبده السيسي لما تركب الحكم 
سعر الليمون حيفضل زي ماهو والا يغلي والا يرخص 
الايام بيننا 
---
ده كمان نزلته علي الفيس بؤ
---

واحنا بنسمع خطاب السيسي أكبر طفل عندنا في البيت أقل من 7 سنين، قال يبقي راجل كويس لو طلع مرسي من السجن وسابه يسافر بره البلد،سبحان الله حتي اﻻطفال ليهم رأي في السياسه، وعجبي. .


البوست ده تحيه لابننا اللي بقي له رأي في السياسه
---

الصوره دي اهداء مني للربعاويه والسيساويه 
وبسالهم هي الهوجه اللي كانت في ميدان التحرير واستمرت 18 يوم 
مش برضه اسمها ثوره ؟
انا مقتنعه تماما ان الاتنين اللي في الصوره دي 
مسئولين قدام ربنا عن دم المصريين اللي سال 
---


واشوفكم يارب في وطن حر يساع الكل 
---
واوعوا اوعوا تقلبوا الصفحه 
ابقوا معي  
---





14‏/3‏/2014

مقتطفات من الفيس بوك

اعزائي 
بجد والله بعتذر لطول غيابي عنكم 
وبقولكم 

وحشتوني جدا  بس المشكله ان الاحداث بقت سريعه 
وانا يوميا علي الفيس بؤ 
زي ما بسميه , وانا نشطه جدا هناك 
يمكن عشان مش محتاج لمقال كبير 
يعني كلها حاجات صغيره 
بقترح عليكم اني انقلكم اللي بكتبه علي الفيس بوك 
ويستاهل اني انشره هنا 
ها خلاص اتفقنا 
ماشي الكلام 
---
سمعت ان حمدين عايز يعمل مناظره مع السيسي
لو الكلام ده حقيقي انا مش بنصح السيسي انه يعمل مناظره مع حمدين 
لان حمدين بيعرف يتكلم اما السيسي مش بيعرف وده واضح 
لان كل كلامه للشعب ارتجال 
كنا بنضحك علي الحاج ابو شيماء 
ماعلينا 
وبفكركم بالمناظره اللي كانت بين ابو الفتوح وعمرو موسي 
بعدها اغلب اللي كان حينتخب ابو الفتوح رجع في كلامه 
انما عمرو موسي كان معروف انه مش حينجح
في النهايه الاتنين لم ينح احد 
وياريت السيسي يستعين بحد كويس يكتبله حطبه وتكون قصيره وموجزه
لاننا بقينا نمل وماعندناش مراره للكلام الكتير ..

---
بجد مش بحب شهر مارس
فيه عيدميلاد امي الله يرحمها !!!
وكمان عيد الام اللي بيوجع قلب كل اللي مالوش آم
اللهم ارحم امي وامهات المسلمين جميعا ..
---
النهارده سمعت برنامج في اذاعه ( نغم اف ام )وانا راجعه البيت .
البرنامج بيسال المستمعين سؤال وهما يردوا اما بمسدج او بمكالمه تليفونيه .
السؤال كان خاص للرجاله !!!
لو اللي حتتجوزها طلبت منك ان العصمه تبقي في ايدها تعمل ايه ؟
ياريت اعرف رأيكم في الموضوع ده ايه .
انا شخصيا ما ارضاش اتجوز واحد يرضي ان العصمه تبقي في ايدي .
هو انا حتجوز قفص جوافه والا كيس برتقان .
ده لو العصمه في ايدينا ماكانش بقي في مصر ولا وحده متجوزه ..
 ---



طنط كوزه لاموزه اللي دايما بتاكل استكوزا !!
طبعا عارفنها موزه قطر !!!!!
قال ايه الست ياولداه نفسها ومني عنها تيجي مصر حاسه بالحنين ليها 
 ياحرام الدمعه فرت من عيني ,حتي بتشحتف اهه طبعا حاسين بيه .
الدكتور سعد الدين ابراهيم قال انها بتنتظر الدعوه الرسميه .
هي رجعت في كلامها والا ايه جايه تعتذر والا ياتري في ايه جديد ؟
يمكن جايه تاخد السفير في ايدها ونرجع ؟
علي اي حال بعتقد ان لا رئيس الجمهوريه المؤقت ولا المشير السيسي 
ولا حتي رئيس الوزاره ممكن يوجه دعوه لوحده اتأمرت علي مصر .
حتي لو هي مزه طحن مش موزه ..
--- 
الجيل ده مش مكتوبله علام 
---
 النهارده الصبح نزلت من البيت كنت ركنه العربيه قدام البيت اللي جنب بيتنا
 دايما قبل ما اركب أبرم حوالين العربيه اشوف ممكن يكون كاوتش مريح 
 تفتكروا لقيت ايه؟ 
مالقتش فرده الكاوتش ورا يمين، والله زي مابقولكم كده ،،،،
مع اعتبار اني ساكنة قريبه جدا من ميدان
 وكمان تحت البيت محﻻت شغاله 24 ساعه 
 ماهو لو في دوريات شرطه كانوا الحراميه خافوا يتمسكوا 
شفته اﻻمن واﻻمان اللي بنتمتع بيه في المحروسة 
وعمار يا آم الدنيا ..
---
اعتقد كفايه كده 
مش حتاخر عليكم تاني 
بس اوعوا اوعوا تقلبوا الصفحه 
ابقوا معي 

19‏/12‏/2013

شخبيط ولخبيط

أعزائي 
معليش بقي كان في مشكله وماكنتش عارفه ادخل المدونه 
والجهود الذاتيه ماجابتش اي نتيجه 
الا لما استعنت بصديقي العزيز احمد حافظ حل المشكله مشكور 
وانا بدين له بدخولي المدونه مره تانيه 
بعد مايأست  من الدخول 
بجد كتر خيره 
---
  

 كل عام وانتم جميعا بالف خير  لقدوم العام الجديد 
يارب سنه جديده علينا سعيده 
نخلص فيها من الاعتصامات والمظاهرات وكل الهم اللي مش جايب  تمنه 
----
في اصدقاء كتير زعلانين مني عشان بقول لو الفريق السيسي 
اترشح للرئاسه مش حنتخبه 
انا ماعنديش اي اعتراض علي السيسي كاشخص 
انما اعتراضي عليه انه في مكانه افضل 
راجل وزير دفاع  عارف شغله كويس  وكمان شغلته مش اي حد  ممكن ينجح فيها 
ده بيراس جيش مصر اللي بيحمي ارضها 
وبيحمي الشعب لو لا قدر الله حد فكر انه يحاربنا 
وبرضه نفسي قبل ما اموت اشوف رئيس مدني 
لا عسكري ولا اخواني
بعتقد ان اللي حيترشح للرئاسه حيفكر الف مره 
وده لاحتمال ان السيسي يترشح لان ساعتها  فرصته للنجاح  حتبقي معدومه 
ولو ان اي رئيس حيحكمنا مش حيعجب الكل 
لان في ناس مننا حيطالبوه بحاجات كتير 
 سقف المطالب ارتفع عند كل الشعب المصري 
والجديد ان جمال مبارك اخد براءه النهارده في قضيه ارض الطيارين 
ومافيش عليه احكام فاذا اخد افراج وده غالبا حيكون 
ساعتها مافيش مايمنع من انه يترشح لرئاسه الجمهوريه 
النهارده كانوا بيهتفوله في المحكمه بعد اعلان براءته وبيقولوا 
ياجمال يا ابن مبارك الرياسه في انتظارك 
والايام الجايه حتجيبلنا اخبار جديده 
وفي الاول والاخر الصندوق هو اللي حيبقاله الرأي النهائي 
بس يارب يمررها علي خير 
---
الحكومه الرشيده بقياده جدو البلاوي 
من اول السنه الجديده قررت ان يكون الحد الادني للمعاش 1200جنيه 
والحد الادني لموظفين الحكومه هو 1500 جنيه 
ماتفرحوش  !!!!! قولتولي ليه 
سؤال بسيط جدا 
المواد التموينيه واللحوم والاسماك والالبان والاجبان 
والخضروات والفاكهه 
حترتفع حتبقي بكام؟
من دلوقتي قبل ما يصرفوا ولا يقبضوا كل حاجه غليت
الحياه في مصر بقت غاليه 
والكل بيعاني فقير  ومتوسط وغني 
انا بقترح تثبيت الاسعار وبلاها زياده 
---
الست آم شيماء حرم الرئيس المخلوع 
ادلت بحوار لوكاله الاناضول وقالت فيه 
ان عندها كل اسرار البيت الابيض لانها صديقه لهيلاري كلينتون 
من ايام ماكانت عايشه في امريكا وولادها بيتعلموا هناك 
عقبال كل الحبايب لما ولادهم يتعلموا في امريكا شيكا بيكا  
وقالت ان الصداقه اتوطدت بعد ما ابو شيماء ركب  كرسي الحكم 
وفي حاله ترشيح مسز كلينتون للرئاسه الاخوان حيسندوها 
زي ماساندوا اوباما في الدورتين 
وناشدت كل زوجات الاخوان الموجودين حاليا في السجون 
انهم يصبروا ولو حصل ان ازوجاهم ماتوا 
هما حيجوزوهم بعد شهور العده 
يالله عالبركه 
زغرتي معايا يا انشرررررراح


وكمان كانت بتناشد بنات جامعه الازهر والاخوات انهم يستمروا 
في الاعتصامات والتخريبات 
ونعمه النصايح 
------
الجو السنه دي بارد جدا 
لا احنا مش متعودين علي كده
 ولا بيوتنا مبنيه علي اساس ان في برد ممكن يجي 
يعني لا الحوائط فيها عازل برد ولا حتي حر 
هي مبنيه بقدره ربنا 
الجمعه اللي فاتت صحينا بعد ليله بارده جدا
 علي التلج مغطي اجزاء كتير من مصر
والنشره الجويه ماقالتش ان في برد جاي بالشكل ده 
بس هي نوهت ان يوم الاربع اللي هو امبارح جايه عاصفه ثلجيه من روسيا 
قلت لاهلي واصحابي وكمان كتبت علي الفيس بوك ده
---
مش قلتلكم انها ( الفشره الجويه )
النهاره الاربع لافي مطر ولا سيول ولا تلج
ولا موجه جايه من روسيا
ولا اي حاجه غريبه في اليوم كله
طول عمر الارصاد الجويه بتفشر
عشان تبقوا تصدقوها
---

الصوره دي والله في مصر 
في التجمد الخامس 
قصدي التجمع الخامس 
---
انا كمان كتبت ده وياريت قرائي الله عايشين في امريكا يفتونا بالصح
---
سؤال ملح 
امريكا كل سنه بتعمل مسابقه ملكه جمال المغتربات وماحدش بيسمع عنها حاجه لانه حدث مش مهم بالنسبه للمصريين !!!!
السنه دي ليه كل الضجه علي ملكه جمال المغتربين ؟
واللي لفت انتباهي ان برنامج العاشره مساء عامل انترفيو معاها هي ومامتها
والبرنامج مستضفها عشان يلمعها مش اكتر ,, ووائل الابراشي لطيف جدا معاها
علي فكره هي وصلت من يومين مصر وهي حفيده المؤلف المبدع طاهر ابو فاشا
سؤال
مش حقول ازاي هي بتمثل مصر وخدمت في الجيش الامريكي مده 4 سنين
ومش حقول لو حصل حاجه بينا وبين امريكا حتقف مع مين ضد مين
انما حقول ازاي تمثل مصر وهي اصلا مش بتتكلم عربي
انا بصراحه شايفه ان في حاجه غلط في الموضوع كله او بالاحري شامه ريحه مؤامره

وكله حيبان في وقته .وعمار يا امريكا يابلاد الفبريكه 
---


هي دي
---


ولحد كده وخلص الماتش خلص ازاي انا ما اعرفش 
والسنه كمان خلصت وان شاءالله اشوفكم السنه الجايه 

واوعوا اوعوا تقلبوا الصفحه 
ابقوا معي 


4‏/11‏/2013

صندوق الدنيا

أعزائي
فاكرين صندوق الدنيا بتاع زمان  او سمعتوا عنه
انا ماشفتوش بس بسمع عنه
مثر حاليا بقت زي صندوق الدنيا
بقت بلد الغرايب والعجايب


هو ده صندوق الدنيا
حد يصدق اننا في ظرف 25 شهر حاكمنه رئيسين
النهارده كانت محاكمه مرسي او زس مادايما بقول
الحاج ابو شيماء
تحت حراسه مشدده اعتقد انها  اكتر من حراسه محاكمه مبارك
20 الف ظابط ومجند
ابرار جوي
جميع اسطح المنازل القريبه من اكاديميه الشرطه مؤمنه
200سياره اسعاف لنامين المحاكمه
غطاء جوي من مروحيات الاباتشي
تكثيف امني علي اول الطريق الدائري المتجه للاكاديميه
كان دخول المحامين والصحافيين حاملي التصاريح
كالعاده من البوابه رقم 8
متاريس كثيره لا يسمح بتخطيها الا لحاملي التصاريح
لان من باب الدخول لمدرج المحاكمه مسافه كبيره
تفتيش علي البوابات
لا يسمح للسيارات بالدخول الا بعض السيارات الحامله لتصاريح
اوراق القضيه 20 الف ورقه
وصل الحاج ابو شيماء بطائره هيلكوبتر
وبعد ذلك ميكروباص لباب الجلسه
وكان وصوله الساعه السابعه و40 دقيقه
وكان يرتدي بدله كحلي
وكذلك وصل المتهمين في نفس الوقت تقريبا
الموجودين منهم هم
البلتاجي - العريان - اسعد شيحه -جمال صابر
ايمن عبدالرؤف -جمال حمزه
اما باقي المتهمين الهاربين هم
عبدالحكيم اسماعيل -هاني توفيق -وجدي غنيم
عبدالرحمن عز -جمال صابر-احمدعبدالعاطي
رضا الصاوي -لملوم جمعه
المستشار  احمد صبري يوسف بذل جهد كبير
ولكن اضطر ان يرفعها مرتين للهتافات
لحظه دخول الحاج ابو شيماء القفص صفق له المتهمين
وكان هتافهم
يسقط يسقط حكم العسكر
مصر دوله مش معسكر
المستشار احمد صبري سال مرسي هل يقبل العوا مدافع عنه
ولكن مرسي كل اللي قاله  للقاضي
انت باطل وانا رئيسك
وردد 4 مرات
انا الرئيس الشرعي للبلاد
مشاده بين الصحفيين ودفاع المتهمين
دفاع المتهمين  قال مرسي رئيسي
الصجفيين رفعوا صووره الحسيني ابو ضيف
مهزله حقيقيه في القاغه اليوم
سال القاضي مرسي اذا يريد هو الدفاع عن نفسه وكرر السؤال 3 مرات
لكن كان رد مرسي انه الرئيس الشرعي للبلاد
مرسي رفض لبس الترسننج الابيض
اما العريان والبلتاجي  واسعد شيحه
اعطوا ظهورهم لرئيس المحكمه رافعين اشاره رابعه
ومرسي طوال الجلسه رايح جاي في القفص
طلب الدفاع تاجيل الجلسه
فتم تاجيلها ل8 يناير
بجد كانت جلسه غريبه
وللحديث بقيه في 8 يناير
----
نتكلم شوي علي حاجات تانيه !!!!
اسره مرسي ماحضرتش الجلسه لانها مش معترفه بمحاكمته
---
ابن مرسي حاول يسافر امبارح الصبح علي ماليزيا واتمنع
بالليل حاول تاني  وبرضه اتمنع
 بقي معقول والده حيتحاكم بعد ساعات وهو يسافر؟
عرفت النهارده سبب سفره وهو ايه !!
اقولكم  لا اتحايلوا عليه
كمان  اتحايلوا
بس بس خلاص حقول
الاخوان رافعين قضيه في المحكمه الدوليه
وهو مسافر يحضر اول جلسه في ماليزيا
بس خلاص الخبر خلص
--
سمعت برضه ان المحاكمه اتنقلت اكاديميه الشرطه ليه
انتوا عارفين اننا شعب يموت ويفتي في اللي يعرفه واللي مايعرفوش
ناس قالت عشان تامين الاكاديميه اسهل من معهد امناء الشرطه
وناس قالت عشان طره منطقه فيها حركه بيوت وناس
وفي ناس قالوا ان الشرطه لقت 3 مناصات لصواريخ القسام في المعادي
ولو كنت عايزه اعرف حاجات تانيه كان سهل مش بقول اننا نحب نفتي
---
مش قلتلكم ان مصر بقت زي صندوق الدنيا
يالله بقي كفايه كده اقعدوا بالعافيه
واوعوا اوعوا تقلبوا الصفحه
ابقوا معي

18‏/10‏/2013

الفرق بين المصيبه والقضاءوالقدر

أعزائي 
كل عام وانتم جميعا بخير 
وان شاءالله العام الجاي تكونوا علي عرفات 
واللي حج السنه دي نقوله حج مبرور وذنب مغفور 
وحمدالله علي سلامتك  ياحاج بس ياريت ماتكونش نسيت تجيبلنا
السجاده والسبحه والبخور 
والا حتعيش في الطناش !!!!! لا واضح طناش 
---
طبعا عايزين تعرفوا الفرق بين المصيبه والقضاء والقدر 
القضاء والقدر لما تنزل علينا حاجه لا كانت علي البال ولا الخاطر 
زي مثلا والفريق القومي بتاعنا بيلعب يحصل زلزال  مايعرفش يلعب ويتغلب 
او السيول تفضل طول المباره تنزل بلا انقطاع 
ساعتها مايعرفش الفريق المصري يلعب
لانه مش متعود علي اللعب في السيول  وبرضه يتغلب 
ده بقي اسمه قضاء وقدر 
انما المصيبه انه يسافر بالمدربين وادارين الفريق 
والدكاتره المسئولين عن صحه اللاعبين النبي حارسهم وصاينهم
وكمان الحبايب والمقاطيع  وعلي رأسهم
الست آم ترتر وساحبه وراها انشراح 
ومصر تصرف الشيء الفلاني واحنا محتاجين كل قرش 
واخره المتمه نتغلب 1/6
طيب انتوا مش مستعدين بلاها حرقه دم 
خليكم محترمين  وماتبهدلوش اسم مصر 
من اول الماتش كان باين مستوي فريقنا فضيحه 
ماهو طول ما بندخل السياسه في كل حاجه 
حتي الكوره دخلوا فيها السياسه 
ابوتريكه الاخواني نسي انه بيلعب في الفريق القومي 
افتكر بس انه لازم يهين مصرمافرقش بين السلطه والوطن 
نسي انه مصري اكل وشرب ولف ودار وصاع واشتهر وبقي بني ادم  
بفضلها وتحت سماها


دي الصوره اللي شفناها علي شاشه التليفزيون 
شعار رابعه في مدرجات غانا 
الاخوان اللي سافروا يحضروا الماتش كانوا بيشجعوا غانا 
وكانوا قاعدين في مدرجات غانا 
كل اللي حقوله حسبي الله ونعمه الوكيل في كل من يضر مصر
--- 
ده اللي نزلته علي الفيس بوك بعد الماتش وحرقه الدم
===

اليوم كان ماشي زي الفل من اوله !!!! كنا منتظرين ماتش مصر وغانا وكلنا امل وتفائل فوجئنا باللي قلب دماغنا ورفعلنا الضغط  قال ايه اللي بيعلق علي الماتش كان بيشكر في شريف اكرامي وبيقول هو اللي حامي العرين اي عرين يقصد نفسي اعرف هو عمل ايه الا انه جون مصفه يخرب بيت كده نتغلب 1/6 , والا الاهبل اللي دخل الجون فينا !!!! وياريت الجون اللي جبناه كان بمجهودنا ده كان من ضربه جزاء ياحوستي يا امه يامرارررر طافح
والا اللي مربي دقنه المدعو ابو تريكه وهايم في الخيال هو كان نازل يبوظ الماتش والا ايه الحدوته بالظبط مالعبش بمليم ليه مارحش قعد في صفوف المتفرجين اكرمله ,, بينتقم من السيسي في مصر وقال وحياه رابعه واعتصامها لا ابوظ الماتش واخلي رقبتك يا مصر قد السمسمه . السؤال بقي اللي محيرني الا وهو ؟؟؟؟؟ لما هما مش مستعدين او مستغنيين ليه راحوا وكلفوا مصر الشيء الفلاني ؟ والا رايحين يلعبوا لصالح غانا ؟..


--- 
الشيء الغريب التاني اللي سمعنه عنه وقريناه 
في السويس  حي فيصل في مسجد حمزه بن عبدالمطلب 
كان فيه صلاتين للعيد 
ايوه صلاتين 
الاخوان صلوا فيه ثبتوا  ميكروفانتهم  وواحد منهم خطب خطبه العيد 
لانهم مش معترفين بخطيب متعين من الاوقاف 
بقي في صلاتين وخطبتين  وخطيبين ومجموعتين من المصلين  
طبعا لا حد فيهم سمع ولا حد فيهم فهم 
المسجد مش عاجبهم الخطيب اللي فيه 
يروحوا بالف سلامه يصلوا في مكان تاني 
انما يفسدوا صلاه ويعلنوا موقف سياسي 
كتير قلنا ان المساجد مش منابر سياسه 
المساجد للصلاه وعباده ربنا 
---
الحجاج اتفاجئوا  في مني بحاج من استراليا مصري الاصل 
بيخطب خطبه سياسيه بيهاجم الحكومه المصريه وبيسب فيها 
وبيطالب بعوده مرسي
الشرطه السعوديه نهرته ومنعته لان الحج ومنطقه المشاعر المقدسه 
مش حتتحول لمنبر سياسي
وجنسيته الاستراليه مش حتمنع السلطات السعوديه من مسائلته 
شوفوا الصوره دي 
وشوفوا تعليق مدمن  ده تعليقاته كلها غريبه زيه 
ماهو مدمن ممكن يقول ايه غير هلوسه 

بما  انه ماقدرش ياخد صوره شعار رابعه هو اتصرف 
ياسلام  ماهي الحاجه آم الاختراع 
---
ياعيني عليكي يامصر حتلاقيها منين والا منين 
بقول كفايه نكد النهارده ماهو انتوا دايما موجوع قلبكم معايا 
واوعوا اوعوا تقلبوا الصفحه 
ابقوا معي

27‏/9‏/2013

زمن الفاصوليا

أعزائي
 وحشتوني وحشتوني وحشتوني 
دي اغنيه قديمه لورده الجزائريه 
العنوان اللي كاتباه ده حقيقه في مصر 
لاننا بقينا في زمن الفاصوليا فعلا
مرات لما نحب نسب حد نقول شوفوا ابن الفاصوليا عمل ايه 
او مثلا عملتها يا ابن الفاصوليا 
وفي قول آخر ده ابن فاصوليا 


اصل عقبال املتكم جميعا كيلو الفاصوليا بقي  ب 13 جنيه 
والشعب المصري اغلبه مالوش حديث غير الفاصوليا
لانه عاشق للفاصوليا 


اما الفاصوليا البيضه ماتختلفش عن الخضرا كتير 
نص كيلو الفاصوليا البيضه ب10 جنيه 
بس ممكن يكفي عيله كبيره وده نظرا لاننا بننقعها فبتنفش
الحكومه الرشيده بتاعتنا بقياده جدوالببلاوي
ماهو ربنا دايما رازقنا بحكومه مسنين 
صرفت لموظفين الحكومه وقطاع الاعمال وبالمره المعاشات 
 علاوة غلاء معيشه  كبيره خالص حوش حوش 
5% ياااه كبيره فعلا 
طيب تعالوا نحسبها وحده وحده 
 الموظف اللي راتبه 2000 جنيه لا قلت 200 ولا 300
العلاوه 100 جنيه 
حيجيب كيلو فاصوليا ب13 جنيه
نص كيلو لحمه ب45 جنيه 
اذا حياكلها بالرز  او بالعيش  
وكمان في سمن او زيت  وطماطم او صلصه 
واذا نفسه هفته علي طبق سلطه  يبقي كل عام وانتم بخير 
طارت العلاوه في طبخه الفاصوليا 
علي فكره حقولكم حاجه بسيطه خالص كيلو التوم  المصري 
بقي ب20 جنيه التوم الصيني الشبكه ب10 جنيه 
مش حقولكم علي الاسعار المولعه  بلاش اخض اللي عايشين بره 
وناوين ينزلوا مصر في اجازه الكريسماس
جدو الببلاوي مش عارف  يسعر الخضار والفاكهه 
انا بقول يثبتوا الاسعار وبلاها العلاوه العره اللي بيدوها للموظفين 
واسمهم  بيدوا غلاء معيشه 
طيب ده حال اللي بياخد الفين طيب اللي مش بيتحصل حتي علي ربعهم 
يموت والا يولع في حاله ؟
بنسمع بقالنا اسبوعين ان في تسعيره 
فعلا في بس مين اللي ماشي عليها
يعني النهارده في التسعيره كيلو الملوخيه من جنيه لجنيه ونص 
انما بتتباع فعلا من 5 ل 5.5 جنيه 
ههههههه اصل البياعين بيخافوا من الحكومه  
والله بقي هم يبكي وهم يضحك 
-----
دي الحكومه الرشيده بقياده جدو الببلاوي
لا عارفه تحور ولا تدور 
السيد وزير التموين دكتور محمد ابوشادي 
كان وائل الابراشي مستضيفه في التوك توك
يووووه بقصد في التوك شو 
كان الحديث علي بطاقات التموين 
قال ايه ياحضرات    
اللهم ما اجعله خير  قال ممكن المواطن يصرف الحصه التموينيه من السوبر ماركت 
ويروح ولا اجدعها عميل ويتامر ويتشمر  بالبطاقه الزكيه  حيصرفوهاله 
الكلام ده بنسمعه بقالنا 3 سنين  بس طالما بيقولوه بالليل 
بيكون زي حدوته قبل النوم اللي الطفل بينام في نصها
او  زي الكلام المدهون بزبده بيطلع عليه النهار يسيح  
بيقول ان اللي ليه 6 كيلو رز  ممكن ياخدها من السوبر ماركت بس 
ياخدها 3 كيلو بجوده اعلي  وده بقي ينطبق علي كل المواد التموينيه 
سلامات ياجوده كله واحد بس الفرق التغليف 
ماهي الحكومه بتستحمرنا  
وهما ال6 كيلو بيكفوا  عشان ال3 حيكفوا 
والا هي سرقه علني وعليكم السلام
قعدت قدام التي في 3 ساعات بحاول اتصل بالبرنامج 
عشان اسال الوزير سؤال بس  الخط كان مشغول 
سؤالي كان بسيط جدا الا وهو ؟
العرسان الجداد اللي طلعوا من بطاقات العيله راحوا
 يعملوا بطاقات ليهم  بعد ما ياخدوا الاستمارات 
وياولداه يفضلوا رايحين جايين  سنه يسالوا عن البطاقه التموينيه الخاصه بيهم 
كل مره يتقال لهم بعد شهر او شهرين وفي الاخر يقوللهم 
انتوا ماتستحقوش بطاقه تموينيه 

السبب ان دخل الزوج 1000 جنيه 
قال يعني ال1000 جنيه بقت مرتب محترم 
انا مش حقول بس ياحوستي حقول كمان
ويادوستي وياخرابي وفوقيهم ليله فحلقي

مش اللي عنده مليون بيتقال عليه مليونير 
اللي عنده 1000 لازم يتقال عليه 
الفونير 
بجد بجد حكومه خنيقه  هي في وادي والشعب المطحون في وادي
 انا بقول لو كانت الحكومه هي حكومه  


السيد المحترم ناجي عطا الله يمكن كانت عملت حاجه 
او حست بمعاناه الشعب  اللي بيفتروا عليه ويقرصوا عليه
ناقص يقولولنا اربطوا الحزام وشدوه علي اخرجه 
لغايه ماتموتوا وتريحونا منكم 
ماهو شعارهم اياكش الشعب يولع
-----
كل عام وانتم بخير وينعاد عليكم 
قربنا علي عيد الاضحي المبارك 
بفكركم بصيام ال9 ايام الاولي من شهر ذي الحجه 
غره ذي الحجه حتوافق يوم الاحد 6 اكتوبر 
ان كان لينا عمر وكنا من اهل الدنيا 
كل عام وانتم جميعا بخير مره تانيه لان يوم الاحد 6 اكتوبر 
عبور الجيش المصري خط بارليف
بقياده المايسترو رجل الحرب والسلام
الرئيس انور السادات 
وكفايه عليكم كده النهارده وجعتوا قلبي 
واوعوا اوعوا تقلبوا الصفحه 
ابقوا معي