29‏/11‏/2008

السياسة و شعبان عبدالرحيم

أعزائي
شعبان عبدالرحيم عمل اغنيه جديده
( شعبولا )
بيغني سياسه
علي فكره لو سمعتوا اغانيه ومافكرتوش انكم تضحكوا عليه
حتعرفوا انه بيقول كلام سياسي بس بطريقته تعالوا
شوفوا اخر حاجه قالها بعد فوز اوباما
-----
يا سكة الندامة يا دنية الوحوش
اياك باراك اوباما مايكنش زى بوش
****
بوش يخرب بيته باعنا وضيعنا سنين
واوباما الناس فاكريين حايكون صلاح الدين
****
ماهو بوش ابن المجنونة شعللها فى كل مكان
افغان وعراق وغزة واخرها سورية كمان
****
هيعمل ايه ابوما فى مصايب بوش وابوه
بلاش من بدرى نحلم ما يكنش الحلم كابوس
****
خلينا زى ما احنا ما الهم اخدنا عليه
راح بوش وجا اوباما ايه يعنى هيحصل ايه
****
لسة فلسطين محتلة والحرب فى العراق
والناس عايشة فى مزلة وعداء بيجيب عداء
****
مهما هايعمل اوباما ويلف شمال ويمين
لا هايرجع الحريرى ولا حتى الشيخ ياسين
****
سلامتك الف سلامة يا عم عربى عليك
قاعد مستنى اوباما علشان ياخد بايديك
****
ولا بوش ولا اى اوباما تانى هايفكر فيك
يا عربى مافيش غير ايدك هى اللى راح تحميك
وايييييييييييييييييييييييييييييييييييييييييييييييي ييييييييييييييييييييييييييييييه
بس خلاص
انا شايفه ان كلامه معقول جدا
ولخص حال العرب في الاغنيه
بجد والله عنده حق وخصوصا بعد اختيار اوبوما لرامبو
ياريت عم شعبولا المره الجايه يعملنا اغنيه عن رامبو

واييييييييييييييييييييييييييي يييييييييييييييييييييييه


27‏/11‏/2008

فضل صيام الايام العشر من ذي الحجه الفجر وليال عشر


أعزائي
غدا او بعد غد علي الاكثر يبدا شهر ذي الحجه
كل عام وانتم جميعا سالمين
شهر ذي الحجه من اجمل شهور السنه
صيام الايام العشر الاولي منه سنه وليس واجبا
فيها أجر وثواب
وخصوصا يوم عرفه
في الحديث الشريف
صيامه يكفر السنه الماضيه والسنه الاتيه (رواه مسلم )
يوم عرفه من افضل ايام العام
تجاب فيه الدعوات .. وتقال العثرات
ويباهي الله فيه ملائكته باهل عرفات
وهو يوم عظم الله آجره
ورفع علي الايام قدره
وهو يوم اكمال الدين ( اتمام النعمه )
يوم مغفره الذنوب والعتق من النار
في صحيح البخاري
عن النبي عليه الصلاه والسلام
ما من ايام العمل الصالح فيها احب الي الله من هذه الايام العشر
قالوا يارسول الله ولا الجهاد في سبيل الله
قال صلي الله عليه وسلم
ولا الجهاد في سبيل الله الا رجل خرج بنفسه وماله
فلم يرجع من ذلك شيء
أخرجه الترمزي
يقال في ايام العشر بكل يوم الف يوم
ويوم عرفه عشره الاف
لا تنسوا صيام العشر الاوائل من ذي الحجه
فهي ايام مجاب الدعاء فيها بأذن الله
ثلاث لا يرد دعوتهم
أمام عادل
الصائم أذا افطر
دعوه المظلوم فليس بينها وبين الله حجاب
عن ابي عباس عن النبي صلي الله عليه وسلم
اليوم الاول
---
غفر الله لادم عليه السلام
من صامه غفر الله ذنبه
اليوم الثاني
---
استجاب الله لدعاء يونس عليه السلام
فاخرجه من بطن الحوت
من صامه كمن عبدالله سنه
اليوم الثالث
---
استجاب الله لدعاء زكريا عليه السلام
من صامه استجاب الله له الدعاء
اليوم الرابع
---
ولد فيه عيسي عليه السلام
من صامه منع عنه الفقر وكان مع الصفوه
من البرره يوم القيامه
اليوم الخامس
---
ولد فيه موسي عليه السلام
من صامه بريء من النفاق وعذاب القبر
اليوم السادس
---
فتح الله لنبيه الخير
من صامه ينظر الله له بالرحمه فلا يعذب
اليوم السابع
---
يغلق فيه ابواب جهنم ولا تفتح حتي تمضي الايام العشر
من صامه اغلق الله عنه ثلاثين بابا من العسر
وفتح له ثلاثين بابا من اليسر
اليوم الثامن
---
يوم الترويه
من صامه يعطي من الاجر مالا يعلمه الا الله
اليوم التاسع
---
يوم عرفه من صامه كان كفاره السنه
وهو اليوم الذي نزلت فيه الايه
بسم الله الرحمن الرحيم
اليوم أكملت لكم دينكم وأتممت عليكم نعمتي ورضيت لكم الاسلام دينا
صدق الله العظيم
لايفوتكم اجر الصيام
وكل عام وانتم سالمين
وبرضه اوعوا تغيروا المحطه ابقوامعي


26‏/11‏/2008

الهلال والصليب

أعزائي
مش عارفه ابتدي كلامي واقولكم
السلام عليكم ورحمه الله وبركاته
ودي تحيه الاسلام
والا اقول
سلام ونعمه
ودي تحيه المسيحيين
بس اكيد ان الاتنين بيدعوا للسلام
مش عارفه جري ايه بقينا نقول ده مسيحي وده مسلم
مصر ماكانتش زمان كده . طيب ايه اللي حصل ؟
ايه الجديد ؟
انا بجد حزينه فين راحت الوحده الوطنيه
اتربينا علي ان الدين لله والوطن للجميع
كنا مسلمين ومسيحيين بندرس مع بعض
وبرضه بنشتغل مع بعض
مين المسيحيين دول زمايلنا وجيرانا واساتذتنا
ومنهم الدكاتره اللي بيعالجونا
ايه الجديد اللي بيحصل؟ ليه الفتنه؟ احنا ناقصين
المسلم بيدخل الكنيسه لما بيحضر فرح او لا قدرالله عزا لاي جار او صاحب
وبالتالي المسيحي بيدخل عمر مكرم او اي دار مناسبات ملحقه بالجامع
لنفس الغرض .
المسيحيين بيشاركونا اعيادنا واحنا كمان بنشاركهم اعيادهم
وبنحب بعض وبنخاف علي بعض
في حرب اكتوبر وقف محمد وجورج بيرفعوا علم مصر
والناحيه التانيه كان ميخائيل ومحمود بيامنوهم
كلهم مصرين مافكروش ده مسلم والا مسيحي
ماري زميلتي في الشغل بتصوم في رمضان يوم لما بتجي تفطر معانا
ورفيق زميل اخويا وصديق عمره برضه بيعمل نفس الشيء
مثال صغير عايزه اقوله
لو حصل حادثه في الطريق لمسلم ونقلوه المستشفي
واحتاج نقل دم والفصيله كانت نادره بيدورا عليها ومش موجوده
واحد مسيحي موجود في المستشفي قال انه نفس الفصيله
وانه موافق يتبرع بدمه للمسلم
ساعتها حيقولوا لا ده مسيحي .اكيدالمسلم حياخد دم المسيحي
ودم المسيحي انقذ حياه المسلم
وبقوا اخوات في الدم
ماعنديش تعليق تاني
غير اني اقول يارب اصلح حالنا جميعا

23‏/11‏/2008

الحب الحقيقي









أعزائي
الصور مش محتاجه لتعليق
يارب يديم علينا جميعا نعمه الحب





18‏/11‏/2008

افتتاح مهرجان القاهره السينمائي




بدات في السابعه مساء فاعليات مهرجان القاهره السينمائي في دورته رقم 32
افتتحه وزير الثقافه فاروق حسني
ورئيس المهرجان دكتور عزت ابو عوف
والنجم العالمي المصري عمر الشريف
اهديت الدوره رقم 32 لروح المخرج يوسف شاهين
حضر المهرجان كوكبه من النجوم الاجانب والمصريين
منهم النجمه الامريكيه سوزان ساراندون الحاصله علي الاوسكار
وسفيره النوايا الحسنه لمنظمه اليونيسيف
وحصلت علي 37 جائزه
والنجم الامريكي كيرت راسل رشح لجاتزتي ( ايمي ) و (الجولدن جلوب )
النجمه جولدي هون وهي ممثله ومخرجه ومنتجه تقدروا تقولوا انها زي الشامبو
( 3x1)وحائزه علي جائزه الاوسكار
والنجمه بريسيلا بريسلي وهي ارمله ملك الروك الفيس بريسلي
وتقوم حاليا بتحضير فيلم عن زوجها الراحل
جوليا ادرموند التي بدات في مسارح لندن ثم اتجهت الي هوليوود
اختيرت ضمن 50 شخصيه في العالم لاهتمامها بحقوق الانسان
وفازت بجائزه النقاد في لندن عن الايمان وحب الخير
النجمه الامريكيه اليشيا سيلفرستون
ونجوم الشباب او الموضه الجديدده ابطال المسلسل التركي
المدبلج نور
وهم التركي كيفتش تاتليتوغ اسم مكعبل خالص ماكنتش عارفه اكتبه
الملقب بمهند في المسلسل
والتركيه سونفول اودين الملقبه بنور في المسلسل الصغير جدا
250 حلقه بس واعلنلكم جهلي اني ماشفتش منه غير 5 دقايق في الحلقه المتين وحاجه
الظاهر ده مسلسل للناس الفاضيه
كرم المهرجان النجوم الاجانب ومعهم المصريين ايضا
مهندس الديكور نهاد بهجت
ومدير التصوير المبدع دائما طارق التلمساني
والنجمه المتالقه بوسي
وكان نور الشريف يتابعها بنظراته
والنجم محمود ياسين الذي اهده التكريم لزوجته شهيره
وكانت فرحت رانيا واضحه جدا
والنجمه القديره سميره احمد والتي اهدت التكريم لجيل الشباب
تالق علي المسرح النجم الوسيم جدا جدا مصطفي فهمي
ويسرا الشقيه دوما
وكذلك خالد ابو النجا والمذيع اسامه منير واخيرا اللي ماعجبنيش خالص
علي غير عادته هو النجم محمود قابيل
الوزير كان فرحان جدا ومش عارف يعمل ايه
وكان بيتمشه علي خشبه المسرح وبيصقف زي الاطفال
جميع النجوم الاجانب حيوا الجمهور باللغه العربيه
شكرا.. مساء الخير .. مساء الفل
ماننساش دينمو الحفل سهير عبدالقادر نائب رئيس المهرجان
وفاروق عبدالسلام امين عام المهرجان
اسبانيا هي ضيف شرف المهرجان ولاول مره سيشاهد الجمهور المصري السينما الاسبانيه
الحفله في مجملها كانت لطيفه وخفيفه ورتمها سريع
ودي كانت وقائع حفله الافتتاح
واوعوا تغيروا المحطه ابقوا معي



15‏/11‏/2008

سوزان تميم راكبه الحمار يووووووووووه اسفه الحصان


أعزائي
النهارده كانت الجلسه التانيه لمحاكمه هشام طلعت مصطفي ومحسن السكري
بدات الجلسه تحت أجراءات امنيه مشدده
امن فوق اسطح العمارات القريبه من المحكمه كردون امني حول المحكمه وداخلها
وفي كل طرقات المحكمه . تفتيش للجميع بلا اي استثناءات
خط سير خاص بالمتهمين من اول وصولهم الي قاعه السادات
اشرف علي الاجراءات بنفسه والله بنفسه
اللواء اسماعيل الشاعر مدير امن القاهره
ونائبه اللواء عبدالجواد احمد
وطاقم كبير معه والكل متواجد من قبل بدء الجلسه او بمعني اصح من الخامسه صباحا لنهايه الجلسه
وترحيل هشام علي سجن المزرعه ومحسن علي سجن طره
بدات الجلسه بفض الاحراز ونصوص المكالمات
ومنها مكالمه يطلب فيها من محسن السكري ونصها
لو فيه التزام محدد بالوقت ينفذوا العمليه واحسن حل رميها من الشباك زي اشرف مروان
هل علي الطرف الاخر هشام او غيره ؟
الحقيبه الجلديه التي تم العثور عليها بمسكن محسن السكري رقم 528 بالشيخ زايد
وبها 2 مليون و 540 الف دولار امريكي وقد تم العثور عليها داخل فرن البوتاجاز
جهاز لاب توب وطبنجه غير مرخصه وخزنه بست طلقات وطلقتين فارغتين
وخزنه فارغه وعدد 23 طلقه سليمه
وايصال ايداع 30 الف دولار في البنك
وتذاكر طيران للبرازيل
هذه الاشياء تم ظبتها في شاليه محسن بسقاره كانتري كلوب
شهود الاثبات
عددهم 13 لم يشهد منهم الا واحد اليوم
1 - مقدم شرطه سعد محمد باداره الانتربول الذي القي القبض علي محسن
وقام بتفتيش مسكنه بمدينه زايد
2_ لواء احمد سالم وكيل الاداره العامه للمباحث الجنائيه
3 _ دكتور هبه محمد العراقي مدير اداره المعامل المركزيه للطب الشرعي
والتي اخذت عينه دم محسن وطابقتها بعينه الدم علي ملابسه
التي عثر عليها في مكان الجريمه
4_ مقدم مهندس ايمن محمود شوكت باداره المساعدات الفنيه بوزاره الداخليه
والذي فحص 3 موبيلات خاصه بمحسن
5_ محاسب احمد ماجد ابراهيم مراجع حسابات بمجموعه طلعت مصطفي
6_المحاسب احمد محمود خلف بالمجموعه
7_ المحاسب هاني احمد سليمان مدير اداره البنوك بالمجموعه ايضا
8_ احمد عبد البصير موظف استقبال بسقاره كانتري كلوب
9_ بيومي محمود سيكيورتي بسقاره كانتري كلوب
10_ ايمن نبيه مدير عام الرقابه والاشراف علي البنوك بالبنك المركزي المصري
11_لواء شرطه احمد شوقي مدير اداره العمليات بالادله الجنائيه
12_ ملازم اول كريم سيد عبدالرحمن بالادله الجنائيه
مطلوب استدعاء اشرف السكري شقيق محسن لاستجوابه
لانه غسل ملابس محسن ولم حاجته وطمس الحقيقه
ثلاث اعلامات شرعيه قدمت
اهل سوزان بتثبت ان الورثه الشرعيين هم الاب والام والاخ
والثاني من رياض العزاوي
اما الثالث فمن عادل معتوق
ناجي شوقي محامي عادل معتوق قال انه الزوج الوحيد لسوزان
وان اي عقد بزواجها من اي شخص اخر باطل قانونا لعدم وجود مايثب طلاقها منه
الكل عايز حته من التورته واهبش واجري
تم سماع شهاده مقدم شرطه سعد محمد بالانتربول
وصور للمحكمه كيفيه القبض علي محسن من خلال الاسئله والاجوبه
حاله هشام عاديه ولو ان موظفيه يقولون بان حالته المعنويه سيئه
يرتدي تريننج سوت ابيض ماركه لاكوست وشميز لبني فاتح
لزوم الشياكه مش عارفه والا كان بردان
المفاجاه هي المحامي سمير الششتاوي الحاضر في الجلسه السابقه عن عبدالستار تميم
حضر اليوم عن هشام طلعت مصطفي بعد ان اعلن انه اقتنع ببراءته بعد الجلسه الاولي
تفتكروا اقتنع بكام مليون دولار
طاقم الدفاع عن هشام يشككون في الاجراءات والتحقيقات ويقولون انه تم تغير قميص محسن في دبي
ويطالبون ايضا بسماع شهاده جيران سوزان في الطابق 22 بمسكنها بدبي
طاقم دفاع هشام يبحث عن ثغرات للبراءه
وتاجلت القضيه لغدا لسماع باقي شهود الاثبات
وعاد هشام الي سجن المزرعه ومحسن الي سجن طره
مايدور في اروقه المحكمه
-----------
ال تميم يتابعون القضيه من بيروت
عدم السماح لعبد الستار تميم بدخول مصر
ويرفض الظهور في اي وسيله للاعلام مكتوبه او مرئيه
صرح بانه لم يوكل المحامي سمير الششتاوي
طيب اذا كان ده حقيقي حضر الجلسه الاولي بصفته ايه ؟
ويحضر عنه 4 محامين اثنين مصريين واثنين لبنانيين
التسجيلات ممكن تتاخد قرينه
اذا كانت ممكن تتاخد يبقي برضه ممكن ماتتاخدش
شرطه دبي تعلن ظهور 5 بصمات جديده ثلاثه لابن خالتها
والرابعه لشخص يعمل معه اما الخامسه لخادمه بلغاريه
مشادات كثيره بين المحامين
واحد نفسه يشتهر الف كتاب بيشيد بهشام طلعت مصطفي
وكذلك مشادات بين المواطنين والعاملين بمجموعه طلعت مصطفي
العاملون بالمجموعه يؤكدون برائته و بقدرته علي الصمود وخروجه ورد اعتباره
وقال واحد منهم ان في عقود بين شركتنا وهي اكبر شركه للاستثمار العقاري بمصر
ووزاره الاسكان وسلمنا فعلا 30 الف وحده سكنيه
ويؤكد موظفي المجموعه انها قضيه ملفقه للنيل من هشام والمجموعه بعد استلامهم لارض مدينتي
المحامين يطالبون بالتاجيل
الشكل العام يوحي بانها ستتاجل عده مرات
ممكن تتاجل لاخر العام القضائي
علامات استفهام كثيره
وياعالم حيحصل اليه
ابقوا معنا واوعوا تغيروا المحطه


13‏/11‏/2008

رامبو وطفل امريكا المدلل

اختار الرئيس اوباما المرشح الديمقراطي رامبو اومن يدعي
رام اسرائيل ايمانويل 48 سنه النائب عن ولايه الينوي
ورامبو ينحدر من ام امريكيه وأب اسرائيلي يحمل الجنسيه الاسرائيليه وكان ينتمي الي مجموعه ( ايستيل )
السريه اليهوديه المتشدده
هاجر مع اسرته في الستينات الي امريكا واقام في شيكاغوعام 1991
وفي حرب الخليج تطوع رامبو اليهودي الديانه لاحدي القواعد العسكريه الاسرائيليه
وعند عودته انضم لحمله بيل كلينتون الانتخابيه
هل اختيار اوباما لرامبو ما الا رساله الي الشرق الاوسط تعلنهم بان سياسه امريكا لن تتغير
رامبو هو حارس البوابه للبيت الابيض
فكل مايدخل للرئيس ويخرج من عنده يمر عليه ويوافق عليه او يمنع دخوله
رامبو اول من سيري اوباما في الصباح وأخر من سيراه في المساء
وله القرار الاخير من بين كل موظفي البيت الابيض
ومن المؤكد سيكون له تاثيرحتمي علي اوباما
ومن المؤكد ايضا ان امريكا ستتغير من الداخل فاوباما ينوي انعاشها اقتصاديا
وينهي الازمه الماليه ويرفع مستوي الطبقات المنحدره
ويجب الا ننسي انه امل السود والملونين للوصول الي المراكز المهمه والقياديه
اما بالنسبه للخارج فنجد اكثر من علامه استفهام
اما عن ميشيل اوبوما فقد ادلت بحديث الي مجله
(GLAMOUR)
العام الماضي 2007 مدحت في زوجها وبشخصيته الجميله وخلقه الرفيع المستوي
وكان وقتها مرشح لمنصب الرئيس
وكعادتهاكما يقول المقربين منها خانها تعبيرها واضافت لمزاياه وابداعاته
انه دائم الشخير اثناء نومه
ورائحه انفاسه تكون كريهه في الصباح
هذا هو انفلات لسان سيده البيت الابيض
وهذا مايشوه صوره زوجها امام العالم
وهو الابن المدلل لامريكا
علامات استفهام كثيره وبمرور الوقت بامكاننا ان نري الي اين تسير الامور
فابقوا معنا واوعوا تغيروا المحطه


10‏/11‏/2008

دعوه من الاصدقاء


أعزائي
سمعت كلام اصحابي الامريكان وعزموني علي مباراه مصارعه حره
بصراحه ندمت جدا اني وافقت بس يمكن عشان انا مش بحب الصراعات
ماعجبنيش اللي بيحصل قدامي مع انهم اكدولي انه سيناريو
حقيقي هما بيضربوا بعض بس معروف مين اللي حيكسب ومين اللي حيخسر
المصارعه رياضه مشهوره في امريكا
عرفت انها كان معترف بيها قديما لان كان لها قوانين تحكمها

اما الان فهى لعبت مراهنات وفلوس وشهرة واعلانات

لان بها كل ادوات العنف والشراسه
نصفها بيكون لزوم الشو والتسليه والتمثيل
والنص بيكون حقيقي ضرب يعني وكسر وحاجات من دي
بس في الاخر الغالب والمغلوب بيكسبوا
المكان مليان جدا وقال ايه عشان يكرموني قعدوني في الصف الاول
طول العرض كنت عصبيه جدا بصرخ وبقولهم حيموتوا بعض وهما يضحكوا عليه
وكمان بقولهم حرام حيكسر رجله عشان يثبته برضه يضحكوا عليه
و في مصارعين اول دخولهم للمكان بيكون مع موسيقي صاخبه جدا
وكمان معاهم بنات بيقولوا انهم وكلاء اعمالهم
والنبي اعمال ايه اللي الواحد ينضرب لغايه ما يتكسر ويتكوم وياخد بعدها فلوس
وبيطلعوا لابسين حاجات غريبه جدا
عرفت ان زمان كانت بتبقي بين اتنين
انما حاليا ممكن تكون بين فريقين كل فريق مكون من اتنين او تلاته يعني
المجموع بيكون اربعه او سته بيتصارعوا قال ايه عشان يفوزوا بالحزام
عرفت برضه ان لهم اسعار بتترواح بين 850,000 $ - 1,700,000$
يعني ينضربوا ويضربوا وياخدوا فلوس
فعلا رزق الهبل علي المجانين
اللي انا كنت فعلا واحده منهم
في كمان مصارعه اقزام
ههههههههه اه والله وشفتها وكانت كوميديه جدا
والاغرب ان في مصارعه للجنس الناعم
لالالا ده في عرف مين ناعم
اما اتنين ستات يطلعوا يقطعوا في بعض ولا اجدع ستيتين بيتخانقوا مع بعض في المدبح
زي مابنشوف في الافلام
الصوره لمصارع قالولي انه مشهور جدا اسمه جيمي سنوكا
الحمدلله اني بشجع كره القدم ارحم كتير من المصارعه
طبعا شكرت اصحابي اللي كانوا بيضحكوا عليه طول الوقت
وكانوا طول المباراه بيتفرجوا علي تعبيراتي وانا بتفرج
اشوفكم اخر الاسبوع علي خير
يارب يديم الود بينا

6‏/11‏/2008

تنويه عن مدونه تيوليب ( تبعي برضه )

أعزائي
اصحابي عارفين ان كان عندي مدونه تانيه علي مكتوب
اسمها زهره البنفسج برضه
دخلت من حوالي اسبوعين اكتب فيها لقيتها موجوده
بس مالقتش فيها ولا تدوينه بعتلهم وماحدش رد عليه
ولا قالي ايه السبب
وبم اني عنيده جدا لان دي طبيعه مواليد برج الجدي
عملت وحده تانيه بس الاسم مش زهره البنفسج
اسمها تيوليب
ياريت تزورني هناك ولو كل سنه مره علي رأي فيروز
اللنك هو http://tulipe.ektob.com/
الرحلات الموجوده كانت علي المدونه القديمه
وبأذن الله حتشوفوا حاجات حلوه فيها قريب جدا
ويارب يديم الود بينا

5‏/11‏/2008

حلم تحقق بالاصرار




أعزائي
امس كان يوم صعب جدا مش بس علي امريكا لكن علي العالم كله
وكان عندنا برضه في البيت يوم صعب لاننا كنا فاتحين اكتر من tvعلي
اكتر من قناه فضائيه وده غير الهوت لاين مع امريكا
بصراحه فرحنا كلنا لااوباما
تعالوا الاول نتعرف عليه وبعدها نتكلم شوي
باراك حسين اوباما .. مولود في 4 أغسطس 1961 في هونولولو .... من أب كيني وأم من ولايه كنساس
التحق بجامعه كاليفورنيا قبل انتقاله لجامعه كولومبيا في نيويورك وتخرج عام 1983 وحصل علي بكالوريوس في العلوم السياسيه
والعلاقات الدوليه .. بالاضافه لكونه كاتبا ومحللا ماليا لمؤسسة ( بزنس انترناشيونال كيروبرشن )
كما درس الحقوق بجامعه
هارفارد وتخرج عام 1991..... والتقا أوباما بميشيل روبنسون في قصة حب اكتملت بالزواج عام 1992
أوباما النائب الآصغر سنا في مجلس الشيوخ
وكذلك الابرز لمواقفه المعارضة لحرب الخليج
أوباما السيناتور الديمقراطي من ولايه الينوي
امس كان حدث في تاريخ امريكا
لوصول رئيس افروامريكي للرئاسه
والرئيس رقم 44 لامريكا
شعار اوباما كان
CHANGE
WE NEED
الانتخابات كانت تسير علي قدم وساق
تجاوزت الاصوات 270 صوتا ووصلت الي 324 صوتا
%96 من السود انتخبوا اوباما وده طبيعي
%60 من البيض ده اللي مش طبيعي بالنسبه لللامريكان
%60 من الشباب دي اللي فعلا نقول عليها سبق انتخابي
في ناس كتير صوتوا في الانتخابات للمره الاولي في حياتهم
ودي كانت نتيجه الحمله الانتخابيه الناجحه حتي ماسبوش رسائل الموبايل الا وبعتوا للشباب يشجعوهم علي التصويت
الاهم من الوصول للهدف هو الاستمراريه هو عنيد بس عارف عايز ايه
تعب حقيقي وعمل مجهود لكن في النهايه وصل لهدفه
حلم مارتن لوثر كينج
I HAVE A DREAM
( لدي حلم )
ولكن اغتيل ولكن حلمه بقي ليحققه اوباما
سينتقل اوباما وعائلته الي البيت الابيض في 20 من يناير 2009
بدايه صعبه تركه محمله بمشاكل كثيره
هل سينهي حرب العراق وافغانستان والمشكله الفلسطينيه
مع العلم بانه سيتعامل مع وضع عراقي شائك
هل سيفي بوعده بسحب القوات الامريكيه من العراق
من المرجح انه سيفي لان عدم موافقته علي حرب العراق كانت من ضمن اسباب نجاحه
السؤال المطروح حاليا هو ؟
هل السياسه الجديده سترجح كفه العرب .او بمعني اخر ستكون في صالح العرب ؟
ام ترجح الكفه الاسرائليه ؟
هذا ماسنراه ونتعرف علي رؤيه اوباما لقضايا المنطقه
في بدايه العام الجديد حين انتقاله للبيت الابيض
براك باللغه السواحليه تعني مبارك
نشكر الله انه مبارك
ومش صاحب بالين كذاب والحدق يفهم
واكيد حيكون للحديث بقيه
ويارب يديم الود بينا

3‏/11‏/2008

تعدد الزوجات


أعزائي
في استبيان عملته في اوائل الصيف عن تعدد الزوجات
وكنت نشرته في مدونتي اللي بقدره قادر مالقتهاش
والله عن جد ما لقتها وبدخل بلاقي مكتوبلي ان مافيش ولا تدوينه
بس برضه مش بيأس عملت وحده غيرها
المهم ده استبيان شوفوا وياريت اعرف رايكم
بالمناسبه الصوره دي بتوضح ان في قلوب بتساع من المحبين كتير
او يعني زي مابيقولوا وسعه زي رحمه ربنا
تعالوا نشوف الاستبيان
أضع اليوم الإستبيان أمامكم بلا إضافات ولا اي تغير في كلمه او حرف . ولم انسى رأي الأرامل والمطلقات .
السؤالين هما
1 - هل تقبلي ان يتزوج زوجك من زوجه ثانيه ؟
2 - الشرع حلل له 4 زوجات هل تخالفي الشرع ؟
في حالة الاجابة علي السؤال الاول بنعم فلا اقوم بطرح السؤال الثاني
========================================
جوليا : 21 سنه متزوجه من سنتين ولها ابن سنه وشهرين . طالبه جامعيه
-
طبعا لا............ يموت أهون مايتجوز عليه .
-
هو احنا ماشين علي الشرع في كل حاجه ؟ ماجاتش علي دي .
----------
باكينام : متزوجه من 8 سنوات ولها ابنه 6 سنوات .ومقيمه بنيويورك
- لا ما اقدرش .... يتجوز عليه ؟
الشرع حلل بس مش كل حاجه ممكن المرأة تستحملها وانا مش حستحمل .
---------
ساره : 28 سنه متزوجه من مسلم من 9 سنوات ولديها طفلين وتقيم في فلوريدا
-
لا ما اقدرش اشوفه مع وحده غيري .
-
انا اقتنعت بالاسلام واسلمت بس انا مأقدرش حد يشاركني فيه .
---------
وصال : 42 سنه لبنانيه متزوجه من 15 سنه ولها 3 ابناء ومقيمه بالقاهرة .
-
لا حبيبتي ما بستحمل ضره بموت .
-
ما بستحمل يكون الي ضره ، الشرع علي راسي بس ما بستحمل .
---------
فريده كويتيه 34 سنه زوجه من 14 سنه ولها 4 اولاد
-
مايخالف هو متجوز وهاده حجه تبوني ارفض واخالف شرع الله .
---------
نرمين مصريه تقيم في الامارات 34 سنه متزوجه من 14 سنه ولها 3 ابناء .
-
ضحكت ضحكه عاليه وقالت ... مش مدياله الفرصه ولا الوقت انه يتجوز عليه
بس لو عايز ياخد ولاده معاه .
-
شرع ربنا ما اختلفناش بس لو حصل يبقي اكيد في عيب في علاقتنا ويمكن المسئوليه الاكبر عليه انا
وبعدين التعدد مش علي الفاضي والمليان ده له ضوابط والا يمكن انا متجوزه الحاج متولي سعيد .
---------
بثينه 43 سنه (شغاله) مقيمه بالقاهره متزوجه من 23 سنه لها ابن وابنه .
يا ستي ماهو متجوز عليه وماله ده حتي انا وضرتي بنساعد بعض بس برضه بغير عليه منها ومش حقدر اعمل حاجه .
---------
ورده . 31 سنه فلبينيه مسلمه مقيمه في دبي مربيه اطفال لها ابن ومتزوجه من 12 سنه
-
لا ماما مايصير يتجوز انا جاعد هون بشتغل وهو جاعد مع الابن وما يقدر يتجوز واحد غيري
انا بعرف القرأن وبصلي بس الشرع ما بعرفه .
---------
علا 42 سنه امريكيه مصريه منقبه زوجه من 14 سنه ولها بنتان ومقيمه بنيويورك .
-
انا لو قصرت يبقي لازم يتجوز عليه ولو انه شيء صعب .
-
شرع ربنا .. مين انا عشان اقول لا ؟.
---------
زوجه حارس البيت صعيديه من دشنا 38 سنه مش فاكره اتجوزت امتي بس كان في العيد الصغيرعندها 5 اولاد .
-
يتجوز ازاي وانا حصرف علي العيال منين دول كلهم في المدارس ،واذا اتجوز ، حسيبله العيال ومصر كلها وارجع بلدنا .
-
ياست هو الشرع حيصرف علي العيال لما وحده تانيه تاخده وتبعده وتجيبله عيال .
هو يعني ايه الشرع بيقول كده انا مش بفهم انا مش متعلمه زيكم .
---------
الخضريه اللي في السوق
فكيهه. بتقول 30 سنه وماجاوبتش علي اي حاجه الا :-
ايوه وماله ياست هانم ماهي برضه لما بتعب بتنزل عالفرشه بدالي تبيع . والدنيا كلها شقي ولازم نتحمل بعض .
---------
كريستين 35 سنه متزوجه من مسلم وعايشه في لوس انجلوس .لها بنتان
لا ما اقبلش .
معليش انا مش بفهم في الشرع لاني مش مسلمه بس اولادي مسلمين زي ابوهم .
انا حبيته واتجوزته وهو مسلم وانا مسيحيه يبقي ازاي يتجوز عليه وانا بحبه
----------
-
سهام 48 سنه متزوجه من 30 سنه ولها 3 ابناء .
-
حصل وكان عرفي وسابها وكل شويه وحده جديده .
-
اعمل ايه هو بيتحجج بالشرع وانا راضيه وبقول ضل راجل .
---------
اما راي الارامل فكان
--------
زوزو مصممه ازياء . لا ماكنتش اقبل بصي اصل دي صعبه عليه لاني وقفت جنبه كتير
وعملتله حاجات كتير شقيت وتعبت وربيت وكبرت وده صعب علي كرامتي .
--------
نجلاء مقيمه بين القاهره ونيويورك ودبي
لا طبعا لو فيه عيب معليش يدور علي الشرع
انا ست بيت وموظفه وبساعده في كل حاجه خاصه بالاولاد
ومافياش عيب يخليه يدور علي وحده بحجه الشرع
---------
( غ ) رفضت زكر اسمها .
ياريته كان عاش واتجوز عليه 3 مش وحده .
---------
(ج) رفضت زكر الاسم .
تقيم بين القاهره وملبورن باستراليا
-
لا طبعا وماكانش ممكن يبص لغيري اصلي كنت كذا ست في بعض .
-
الشرع علي عيني وراسي بس انا بني ادمه ما اقدرش احس ان جوزي نايم في حضن وحده تانيه .
---------
اما رأي المطلقات :- فكان
------
ريم مديره في احدي الشركات 43 سنه .
لا ماكنتش اقبل . وده كان سبب طلاقي عرفت انه ناوي يتجوز قلبتها علي دماغه واطلقنا .
-
معليش الشرع لما بيوصل لبيوتنا في حاجه زي كده احنا بنهرب منه .
---------
سماح مضيفه 33 سنه
لا طبعا ازاي اوافق . انتوا كل حاجه تقولوا الشرع
انتي بزمتك ماشيه علي الشرع في كل حاجه ؟ . طيب لو انتي مكاني حتوافقي .؟
---------
امينه معيده في الجامعه 29 سنه .
-
لا طبعا انا مش عايزه لا نص ولا ربع ولا تمن راجل انا عايزه راجل كامل ليه لوحدي
زي ما انا كامله ليه لوحده .
-
بلاش تتمسحوا بالشرع بطلوا شعارات .
**********************************************************
كفايه كده عندي امثله كتير
بس ماينفعش تتنشر .
تارجحت الأ قوال بين رافضه ومؤيده
أو مغلوب علي أمرها .
ماعنديش تعليق
تحياتي لكم جميعاوإلى لقاء في موضوع آخر
ويارب يدوم الود بينا .
------
المدونه الجديده اذا حبتوا تشوفوها